Ronny Movie: ‘ಕಿರಣ್​ ರಾಜ್​ ಅವರ ಆ್ಯಕ್ಷನ್​ ಝಲಕ್​ ತೋರಿಸಲಿದೆ ರಾನಿ ಟೀಸರ್​’: ಕೌತುಕ ಮೂಡಿಸಿದ ನಿರ್ದೇಶಕ ಗುರುತೇಜ್​ ಶೆಟ್ಟಿ

ಖ್ಯಾತ ನಟ ಕಿರಣ್​ ರಾಜ್​ (Kiran Raj) ಅವರು ಕಿರುತೆರೆ ಸೀರಿಯಲ್​ಗಳ ಮೂಲಕ ಫೇಮಸ್​. ಆದರೆ ಈಗ ಅವರು ಸಂಪೂರ್ಣವಾಗಿ ಸಿನಿಮಾಗಳ ಕಡೆಗೆ ತಮ್ಮ ಗಮನ ಹರಿಸಿದ್ದಾರೆ. ಈ ಹಿಂದೆ ‘ಬಡ್ಡೀಸ್​’ ಸಿನಿಮಾದಲ್ಲಿ ನಟಿಸಿದ್ದ ಅವರು ಈಗ ಅದೇ ತಂಡದ ಜೊತೆ ಸೇರಿಕೊಂಡು ‘ರಾನಿ’ ಸಿನಿಮಾ (Ronny Movie) ಮಾಡಿದ್ದಾರೆ. ಟೈಟಲ್​ ಲಾಂಚ್​ ಮೂಲಕ ಈ ಸಿನಿಮಾ ಸಖತ್​ ಸುದ್ದಿಯಾಗಿತ್ತು. ಕಿರಣ್​ ರಾಜ್​ ಅವರ ಜನ್ಮದಿನದ ಪ್ರಯುಕ್ತ (ಜುಲೈ 5) ಟೀಸರ್​ ಬಿಡುಗಡೆ ಮಾಡಲು ಸಕಲ ಸಿದ್ಧತೆ ಮಾಡಿಕೊಳ್ಳಲಾಗಿದೆ. ಈ ಚಿತ್ರಕ್ಕೆ ಗುರುತೇಜ್​ ಶೆಟ್ಟಿ ಅವರು ನಿರ್ದೇಶನ ಮಾಡಿದ್ದಾರೆ. ‘ರಾನಿ’ ಚಿತ್ರದ ಟೀಸರ್ (Ronny Movie Teaser)​ ಹೇಗಿರಲಿದೆ ಎಂಬುದನ್ನು ಅವರು ವಿವರಿಸಿದ್ದಾರೆ. ಆ ಮೂಲಕ ಕೌತುಕ ಮೂಡಿಸಿದ್ದಾರೆ.

ಸೀರಿಯಲ್​ನಲ್ಲಿ ಲವರ್​ ಬಾಯ್​ ರೀತಿ ಕಾಣಿಸಿಕೊಂಡಿದ್ದ ಕಿರಣ್​ ರಾಜ್​ ಅವರಿಗೆ ‘ರಾನಿ’ ಸಿನಿಮಾದಲ್ಲಿ ಪಕ್ಕ ಮಾಸ್​ ಲುಕ್​ ನೀಡಲಾಗಿದೆ. ಅದರ ಹಿಂದಿನ ಕಾರಣವನ್ನು ತಿಳಿಸಿದ್ದಾರೆ ನಿರ್ದೇಶಕ ಗುರುತೇಜ್​ ಶೆಟ್ಟಿ. ‘ಈ ಹಿಂದೆ ನಾವು ಬಡ್ಡೀಸ್​ ಸಿನಿಮಾ ಮಾಡುವಾಗ ಕಿರಣ್​ ರಾಜ್​ ಅವರ ಬಗ್ಗೆ ನನಗೆ ಚೆನ್ನಾಗಿ ತಿಳಿಯಿತು. ಅವರೊಳಗೆ ಒಬ್ಬ ಮಾಸ್​ ಹೀರೋ ಇದ್ದಾನೆ ಎಂಬುದು ಅರ್ಥವಾಯಿತು. ಹಾಗಾಗಿ ರಾನಿ ಸಿನಿಮಾದಲ್ಲಿ ಅವರಿಗೆ ಮಾಸ್​ ಆದಂತಹ ಪಾತ್ರ ನೀಡಲಾಯಿತು. ಕೆಲಸದ ಬಗ್ಗೆ ಕಿರಣ್​ ರಾಜ್​ ಅವರಿಗೆ ಶ್ರದ್ಧೆ ಇದೆ. ಆ್ಯಕ್ಷನ್​ ಸನ್ನಿವೇಶಗಳನ್ನು ತುಂಬ ಬದ್ಧತೆಯಿಂದ ಮಾಡಿದ್ದಾರೆ. ಅದರ ಝಲಕ್​ ಈ ಟೀಸರ್​ನಲ್ಲಿ ಕಾಣಿಸುತ್ತದೆ’ ಎಂದು ಗುರುತೇಜ್​ ಶೆಟ್ಟಿ ಹೇಳಿದ್ದಾರೆ.

ಇದನ್ನೂ ಓದಿ: ಸರ್ಕಾರಿ ಶಾಲೆಗೆ ‘ಕನ್ನಡತಿ’ ಸೀರಿಯಲ್​ ನಟ ಕಿರಣ್​ ರಾಜ್​ ನೆರವಿನ ಹಸ್ತದಿಂದ ಬಂತು ಹೊಸ ಮೆರುಗು

‘ಟೀಸರ್​ನಲ್ಲಿ ಕಥೆಯ ಒಂದು ಸಣ್ಣ ಎಳೆ ಇರಲಿದೆ. ಸಾಹಸ ಸನ್ನಿವೇಶಗಳ ಝಲಕ್​ ಕಾಣಿಸಲಿದೆ. ಸಿನಿಮಾದ ಅದ್ದೂರಿತನ ಮತ್ತು ಗುಣಮಟ್ಟ ಯಾವ ರೀತಿ ಇದೆ ಎಂಬುದು ಕೂಡ ಇದರಲ್ಲಿ ಗೊತ್ತಾಗಲಿದೆ. ಈ ಸಿನಿಮಾದಲ್ಲಿ ಒಟ್ಟು 6 ಫೈಟಿಂಗ್​ ದೃಶ್ಯಗಳು ಇವೆ. ಯಾವುದರಲ್ಲೂ ಕಿರಣ್​ ರಾಜ್ ಅವರು ಡ್ಯೂಪ್​ ಬಳಸಿಲ್ಲ. ಸ್ವತಃ ಅವರೇ ಫೈಟ್​ ಮಾಡಿದ್ದಾರೆ. ಈ ಚಿತ್ರದ ತಯಾರಿಗಾಗಿ ಅವರು ಒಂದು ವರ್ಷ ಸಂಪೂರ್ಣ ಮೀಸಲಿಟ್ಟಿದ್ದರು. ರಾನಿ ಚಿತ್ರದಿಂದ ಕನ್ನಡ ಚಿತ್ರರಂಗದಲ್ಲಿ ಕಿರಣ್​ ರಾಜ್​ ಅವರು ಓರ್ವ ಮಾಸ್​ ಹೀರೋ ಆಗಿ ಗುರುತಿಸಿಕೊಳ್ಳುತ್ತಾರೆ’ ಎಂಬುದು ನಿರ್ದೇಶಕರ ಮಾತುಗಳು.

ಇದನ್ನೂ ಓದಿ: Kiran Raj: ‘ಕನ್ನಡತಿ’ ಸೀರಿಯಲ್​ ನಟ ಕಿರಣ್​ ರಾಜ್​ ಈಗ ‘ಶೇರ್​’; ಸೆಟ್ಟೇರಿತು ಹೊಸ ಸಿನಿಮಾ

‘ರಾನಿ’ ಚಿತ್ರಕ್ಕೆ 75 ದಿನಗಳ ಕಾಲ ಶೂಟಿಂಗ್​ ಮಾಡಲಾಗಿದೆ. ಇನ್ನು 10 ದಿನಗಳ ಚಿತ್ರೀಕರಣ ಬಾಕಿ ಇದೆ. ಪೋಸ್ಟ್​ ಪ್ರೊಡಕ್ಷನ್​ ಕೆಲಸಗಳು ಸಾಗುತ್ತಿವೆ. ಈ ವರ್ಷ ಡಿಸೆಂಬರ್​ ಅಥವಾ ಮುಂಬರುವ ಸಂಕ್ರಾಂತಿಗೆ ಸಿನಿಮಾ ಬಿಡುಗಡೆ ಮಾಡಬೇಕು ಎಂಬ ಗುರಿ ಇಟ್ಟುಕೊಂಡು ಚಿತ್ರತಂಡ ಕಾರ್ಯ ನಿರತವಾಗಿದೆ. ಪೋಸ್ಟರ್​ಗಳ ಮೂಲಕ ಈ ಸಿನಿಮಾ ಹೈಪ್​ ಹೆಚ್ಚಿಸಿದೆ. ಸಮೀಕ್ಷಾ, ಅಪೂರ್ವಾ, ರಾಧ್ಯಾ ಉಗ್ರಂ ರವಿ, ಮೈಕೋ ನಾಗರಾಜ್, ರವಿಶಂಕರ್, ಉಗ್ರಂ ಮಂಜು, ಬಿ. ಸುರೇಶ, ಮಂಡ್ಯ ರಮೇಶ್, ಸುಜಯ್ ಶಾಸ್ತ್ರಿ, ಸೂರ್ಯ ಕುಂದಾಪುರ, ಗಿರೀಶ್ ಹೆಗ್ಡೆ, ಧರ್ಮಣ್ಣ ಕಡೂರು ಮುಂತಾದವರು ‘ರಾನಿ’ ಚಿತ್ರದಲ್ಲಿ ನಟಿಸಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.