ಅಂದು ಅಣ್ಣಾವ್ರ ಜತೆ ತೂಗುದೀಪ ಶ್ರೀನಿವಾಸ್​; ಇಂದು ಅಪ್ಪು ಜತೆ ದಿನಕರ್​ ತೂಗುದೀಪ! ಇಲ್ಲಿದೆ ಗುಡ್​ ನ್ಯೂಸ್​

ಪುನೀತ್​ ರಾಜ್​ಕುಮಾರ್​ ಅಭಿಮಾನಿಗಳು ಸಂಭ್ರಮಿಸಲು ಇಂದು ಹಲವಾರು ಕಾರಣಗಳು ಸಿಕ್ಕಿವೆ. ಅಪ್ಪು ಜನ್ಮದಿನದ ಪ್ರಯುಕ್ತ ಹಲವು ಹೊಸ ನ್ಯೂಸ್​ಗಳು ಹೊರಬಂದಿವೆ. ಅದರಲ್ಲಿ ಹೆಚ್ಚು ಎಕ್ಸೈಟಿಂಗ್​ ಆಗಿರುವುದು ನಿರ್ದೇಶಕ ದಿನಕರ್​ ತೂಗುದೀಪ ಕೊಟ್ಟಿರುವ ನ್ಯೂಸ್​. ಅಪ್ಪು ಜೊತೆ ತಾವು ಹೊಸ ಸಿನಿಮಾ ಮಾಡುವುದಾಗಿ ದಿನಕರ್​ ಘೋಷಿಸಿದ್ದಾರೆ.

‘ಚಾಲೆಂಜಿಂಗ್​ ಸ್ಟಾರ್​’ ದರ್ಶನ್​ ಸಹೋದರ ದಿನಕರ್​ ತೂಗುದೀಪ ಅವರು ಸ್ಯಾಂಡಲ್​ವುಡ್​ನಲ್ಲಿ ಯಶಸ್ವಿ ನಿರ್ದೇಶಕ ಎನಿಸಿಕೊಂಡಿದ್ದಾರೆ. ಲವ್ಲೀ ಸ್ಟಾರ್​ ಪ್ರೇಮ್​ ಮತ್ತು ರಮ್ಯಾ ಜೋಡಿಯಾಗಿ ನಟಿಸಿದ್ದ ‘ಜೊತೆ ಜೊತೆಯಲಿ’, ದರ್ಶನ್​ ನಟನೆಯ ‘ನವಗ್ರಹ’, ‘ಸಾರಥಿ’ ಮುಂತಾದ ಸಿನಿಮಾಗಳಿಗೆ ದಿನಕರ್​ ನಿರ್ದೇಶನ ಮಾಡಿ ಗೆದ್ದಿದ್ದಾರೆ. ಈಗ ಅವರ ಹೊಸ ಸಿನಿಮಾ ಬಗ್ಗೆ ನಿರೀಕ್ಷೆ ಸೃಷ್ಟಿ ಆಗಿದೆ. ಪುನೀತ್​ ಜೊತೆ ದಿನಕರ್​ ಸಿನಿಮಾ ಮಾಡುತ್ತಾರೆ ಎಂಬ ಗುಸುಗುಸು ಕಳೆದ ಹಲವು ದಿನಗಳಿಂದಲೂ ಕೇಳಿಬರುತ್ತಿತ್ತು. ಅದು ಈಗ ಅಧಿಕೃತವಾಗಿದೆ.

ತಾವು ಪುನೀತ್​ಗೆ ನಿರ್ದೇಶನ ಮಾಡುವ ಕುರಿತು ಟ್ವಿಟರ್​ ಮೂಲಕ ದಿನಕರ್​ ಮಾಹಿತಿ ಹಂಚಿಕೊಂಡಿದ್ದಾರೆ. ‘ಮೊದಲನೆಯದಾಗಿ ಪವರ್ ಸ್ಟಾರ್ ಪುನೀತ್ ರಾಜ್​ಕುಮಾರ್ ರವರಿಗೆ ಹುಟ್ಟುಹಬ್ಬದ ಹಾರ್ದಿಕ ಶುಭಾಶಯಗಳು. ಸುಮಾರು 5 ದಶಕಗಳು ನನ್ನ ತಂದೆ ತೂಗುದೀಪ ಶ್ರೀನಿವಾಸ್​ ಅವರು ಮತ್ತು ನಟಸಾರ್ವಭೌಮ ಡಾಕ್ಟರ್ ರಾಜ್​ಕುಮಾರ್ ಅಣ್ಣಾವ್ರ ಸ್ನೇಹವಿತ್ತು. ಅವರಿಬ್ಬರು ಜೊತೆಯಾಗಿ ಮಾಡಿದ ಚಿತ್ರಗಳಿಗೆ ಪ್ರೀತಿ-ಪ್ರೋತ್ಸಾಹ ನೀಡಿ ಆಶೀರ್ವದಿಸಿದ್ದೀರಿ. ಅದೇ ರೀತಿ ಈಗ ಮತ್ತೆ ನನ್ನ ಹಾಗು ಅಪ್ಪು ಸರ್ ರವರ ಕಾಂಬಿನೇಷನ್​ನಲ್ಲಿ ಬರುತ್ತಿರುವ ಚಿತ್ರಕ್ಕೂ ನಿಮ್ಮ ಪ್ರೋತ್ಸಾಹವಿರಲಿ. ಒಂದೊಳ್ಳೆಯ ಚಿತ್ರವನ್ನು ಕನ್ನಡಿಗರಿಗೆ ನೀಡುವ ಹಂಬಲದಲ್ಲಿದೆ ಚಿತ್ರತಂಡ’ ಎಂದು ದಿನಕರ್ ಟ್ವೀಟ್​ ಮಾಡಿದ್ದಾರೆ.

ಡಾ. ರಾಜ್​ಕುಮಾರ್​ ಮತ್ತು ದರ್ಶನ್​ ತಂದೆ ತೂಗುದೀಪ ಶ್ರೀನಿವಾಸ್​ ನಡುವೆ ಉತ್ತಮ ಬಾಂಧವ್ಯ ಇತ್ತು. ರಾಜ್​ಕುಮಾರ್​ ನಟನೆಯ ಹಲವಾರು ಸಿನಿಮಾಗಳಲ್ಲಿ ಶ್ರೀನಿವಾಸ್​ ಅವರು ವಿಲನ್​ ಆಗಿ ಅಭಿನಯಿಸಿದ್ದರು. ಆ ಕಾಲದಿಂದಲೂ ಈ ಎರಡು ಫ್ಯಾಮಿಲಿ ನಡುವೆ ಸ್ನೇಹಿವಿದೆ. ಈಗ ಅವರ ಮಕ್ಕಳು ಒಂದೇ ಸಿನಿಮಾಗಾಗಿ ಕೈ ಜೋಡಿಸಿರುವುದು ಅಭಿಮಾನಿಗಳಿಗೆ ಸಂತಸ ತಂದಿದೆ. ಈ ಸಿನಿಮಾದ ಶೀರ್ಷಿಕೆ ಏನು? ಪುನೀತ್​ ಗೆಟಪ್​ ಹೇಗಿರಲಿದೆ? ಅಪ್ಪುಗೆ ಜೋಡಿಯಾಗಿ ಯಾರು ನಟಿಸುತ್ತಾರೆ? ಈ ಎಲ್ಲ ಪ್ರಶ್ನೆಗಳಿಗೂ ಮುಂದಿನ ದಿನಗಳಲ್ಲಿ ಉತ್ತರ ಸಿಗಬೇಕಿದೆ.

ಇಂದು ಪುನೀತ್​ ರಾಜ್​ಕುಮಾರ್​ ಅವರ ಜನ್ಮದಿನಕ್ಕೆ ಎಲ್ಲರೂ ಶುಭಕೋರುತ್ತಿದ್ದಾರೆ. ‘ಚಾಲೆಂಜಿಂಗ್​ ಸ್ಟಾರ್​’ ದರ್ಶನ್​ ಕೂಡ ಟ್ವೀಟ್​ ಮಾಡುವ ಮೂಲಕ ಪುನೀತ್​ಗೆ ಶುಭ ಹಾರೈಸಿದ್ದಾರೆ. ‘ಹುಟ್ಟುಹಬ್ಬದ ಶುಭಾಶಯಗಳು ಪುನೀತ್​ ರಾಜ್​ಕುಮಾರ್​’ ಎಂದು ಅಭಿಮಾನಿಗಳ ಪ್ರೀತಿಯ ‘ದಾಸ’ ಟ್ವೀಟ್​ ಮಾಡಿದ್ದಾರೆ.