ಯುವ ಎರಡನೇ ಸಿನಿಮಾ ಹೆಸರಿಗೆ ಪುನೀತ್ ಸಿನಿಮಾದ ಲಿಂಕ್

ಪುನೀತ್ ರಾಜ್​ಕುಮಾರ್ ಕಾಲವಾದ ಬಳಿಕ ಯುವ ರಾಜ್​ಕುಮಾರ್ ಅವರು ಅಪ್ಪು ಸ್ಥಾನ ತುಂಬಲಿ ಎಂಬ ನಿರೀಕ್ಷೆ ಅಭಿಮಾನಿಗಳದ್ದಾಗಿತ್ತು. ನಿಜಕ್ಕೂ ಯುವ, ಅಪ್ಪು ಸ್ಥಾನ ತುಂಬಲಿದ್ದಾರೆಯೇ ಎಂಬುದನ್ನು ಕಾಳವೇ ಉತ್ತರಿಸಲಿದೆ. ಆದರೆ ಯುವ ರಾಜ್​ಕುಮಾರ್, ಆ ಪ್ರಯತ್ನವಂತೂ ಮಾಡುತ್ತಿದ್ದಾರೆ. ಆದರೆ ಅವರು ಎಷ್ಟರ ಮಟ್ಟಿಗೆ ಯಶಸ್ಸುಗಳಿಸುತ್ತಾರೆ ಎಂಬುದನ್ನು ಕಾದು ನೋಡಬೇಕಿದೆ. ಯುವ ರಾಜ್​ಕುಮಾರ್ ಮೊದಲ ಸಿನಿಮಾ ‘ಯುವ’ ಅನ್ನು ಹೊಂಬಾಳೆ ನಿರ್ಮಿಸಿದ್ದು, ಸಿನಿಮಾ ಸಾಧಾರಣ ಯಶಸ್ಸನ್ನಷ್ಟೆ ಗಳಿಸಿತು. ಇದೀಗ ಯುವ ರಾಜ್​ಕುಮಾರ್ ಎರಡನೇ ಸಿನಿಮಾ ಸೆಟ್ಟೇರಿದ್ದು, ಎರಡನೇ ಸಿನಿಮಾದ ಟೈಟಲ್ ಅನ್ನು ಸಹ ಪುನೀತ್ ರ ಸಿನಿಮಾದ ಹಾಡಿನೊಂದಿಗೆ ಎರವಲು ಪಡೆದಂತಿದೆ.

ಯುವ ರಾಜ್​ಕುಮಾರ್ ನಟನೆಯ ಎರಡನೇ ಸಿನಿಮಾದ ಹೆಸರು ‘ಎಕ್ಕ’ ಎಂದು ಇರಿಸಲಾಗಿದೆ. ಕನ್ನಡ ರಾಜ್ಯೋತ್ಸವ ಹಾಗೂ ದೀಪಾವಳಿ ಹಬ್ಬದ ಶುಭ ಸಂದರ್ಭದಲ್ಲಿ ಸಿನಿಮಾದ ಟೈಟಲ್ ಮತ್ತು ಹೊಸ ಪೋಸ್ಟರ್ ಅನ್ನು ಸಹ ಬಿಡುಗಡೆ ಮಾಡಲಾಗಿದೆ. ಪೋಸ್ಟರ್​ನಲ್ಲಿ ರಕ್ತದಲ್ಲಿ ಅದ್ದಿ ತೆಗೆದಂತಿರುವ ಯುವ ಕೈಯಲ್ಲಿ ರಕ್ತ ಮೆತ್ತಿದ ಆಯುಧವೊಂದನ್ನು ಹಿಡಿದುಕೊಂಡು, ಯಾರನ್ನೋ ಕೊಲ್ಲಲು ಮುಂದಾವರಂತೆ ನೋಡುತ್ತಿರುವ ಚಿತ್ರವಿದೆ. ಈ ರಕ್ತ-ಸಿಕ್ತ ಫೈಟ್, ಯಾವುದೋ ಮಾಂಸದ ಅಂಗಡಿಯಲ್ಲಿ ನಡೆಯುತ್ತಿದ್ದು, ಯುವ ಹಿನ್ನೆಲೆಯಲ್ಲಿ ಚರ್ಮ ಸುಲಿದ ಮಾಂಸದ ತುಂಡುಗಳು ನೇತಾಡುತ್ತಿವೆ. ಆ ಮಾಂಸವನ್ನು ನೇತು ಹಾಕಲು ಬಳಸುವ ವಸ್ತುವನ್ನೇ ಶತ್ರುಗಳನ್ನು ಕೊಲ್ಲಲು ಆಯುಧವನ್ನಾಗಿ ಹಿಡಿದಿದ್ದಾರೆ ಯುವ.

ಇದನ್ನೂ ಓದಿ:ಒಟಿಟಿಗೆ ಬಂತು ಯುವ ರಾಜ್​ಕುಮಾರ್ ನಟನೆಯ ‘ಯುವ’ ಸಿನಿಮಾ; ಆದರೆ..

ಇನ್ನೊಂದು ಪೋಸ್ಟರ್​ನಲ್ಲಿ ಯುವ ರಾಜ್​ಕುಮಾರ್ ಕೈಗೆ ಪೊಲೀಸರು ಕೋಳ ಹಾಕಿದ್ದಾರೆ. ಯುವ ರಾಜ್​ಕುಮಾರ್ ಬಟ್ಟೆಯೆಲ್ಲ ರಕ್ತಮಯವಾಗಿದೆ. ರಸ್ತೆಯ ಮೇಲೆ ಮಲಗಿರುವ ಯುವ ಕಡೆ ಪೊಲೀಸರು ಕೆಲ ಬಂದೂಕುಗಳನ್ನು ಗುರಿ ಮಾಡಿದ್ದಾರೆ. ಒಟ್ಟಿನಲ್ಲಿ ಎರಡೂ ಪೋಸ್ಟರ್​ಗಳು ಸೂಚಿಸುತ್ತಿರುವುದು ಒಂದನ್ನೇ, ಈ ಸಿನಿಮಾ ಬಲು ರಕ್ತ-ಸಿಕ್ತ ಕತೆ ಒಳಗೊಂಡಿರಲಿದೆ ಎಂಬುದನ್ನು.

ಪುನೀತ್ ರಾಜ್​ಕುಮಾರ್ ನಟನೆಯ ‘ಜಾಕಿ’ ಸಿನಿಮಾದಲ್ಲಿ ‘ಎಕ್ಕ ರಾಜ ರಾಣಿ…’ ಹಾಡು ಬಹಳ ಜನಪ್ರಿಯಗೊಂಡಿತ್ತು. ಆ ಸಿನಿಮಾದಲ್ಲಿ ಪುನೀತ್ ರಾಜ್​ಕುಮಾರ್ ಇಸ್ಪೀಟು ಆಡುವುದರಲ್ಲಿ ನಿಸ್ಸೀಮ. ಈಗ ಅದೇ ಹಾಡಿನ ‘ಎಕ್ಕ’ ಪದವನ್ನು ಯುವ ರಾಜ್​ಕುಮಾರ್ ಸಿನಿಮಾಕ್ಕೆ ಇಡಲಾಗಿದೆ. ಇಸ್ಪೀಟು ಆಟ ಪರಿಚಯ ಇರುವವರಿಗೆ ಎಕ್ಕ ಹೆಸರು ಚೆನ್ನಾಗಿ ಪರಿಚಿತವಾಗಿರುತ್ತದೆ.

ಯುವ ರಾಜ್​ಕುಮಾರ್ ನಟನೆಯ ಎರಡನೇ ಸಿನಿಮಾ ಇದಾಗಿದ್ದು, ಸಿನಿಮಾವನ್ನು ರೋಹಿತ್ ಪದಕಿ ನಿರ್ದೇಶನ ಮಾಡಿದ್ದಾರೆ. ಸಿನಿಮಾ ನಿರ್ಮಾಣ ಮಾಡುತ್ತಿರುವುದು ಪಿಆರ್​ಕೆ ಪ್ರೊಡಕ್ಷನ್ಸ್ ಮತ್ತು ಜಯಣ್ಣ ಫಿಲಮ್ಸ್. ಸಿನಿಮಾದ ಇತರೆ ಪಾತ್ರವರ್ಗ ಇನ್ನಷ್ಟೆ ಅಂತಿಮಗೊಳ್ಳಬೇಕಿದೆ. ಸಿನಿಮಾ 2025ಕ್ಕೆ ತೆರೆಗೆ ಬರಲಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ