Srinidhi Shetty Salary: ‘ಕೆಜಿಎಫ್​’ ಸುಂದರಿ ಶ್ರೀನಿಧಿ ಶೆಟ್ಟಿ ‘ಕೋಬ್ರಾ’ ಚಿತ್ರಕ್ಕೆ ಪಡೆದ ಸಂಭಾವನೆ ಎಷ್ಟು?

Srinidhi Shetty Salary | ನಟಿಯರಿಗೆ ಸಿಗುವ ಸಂಭಾವನೆ (Remuneration) ಕಡಿಮೆ ಅಂತ ಕೆಲವರು ದೂರುತ್ತಾರೆ. ಹೀರೋಗಳಿಗೆ ಹೋಲಿಸಿದರೆ ಹೀರೋಯಿನ್​ಗಳು ಅಲ್ಪ ಪ್ರಮಾಣದ ಸಂಬಳಕ್ಕೆ ಸಮಾಧಾನ ಪಟ್ಟುಕೊಳ್ಳಬೇಕಾದ ಪರಿಸ್ಥಿತಿ ಇದೆ. ಆದರೆ ಇತ್ತೀಚೆಗೆ ಕಾಲ ಬದಲಾಗುತ್ತಿದೆ. ಸಮಂತಾ ರುತ್​ ಪ್ರಭು, ರಶ್ಮಿಕಾ ಮಂದಣ್ಣ ಮುಂತಾದ ನಟಿಯರು ಬಹುಕೋಟಿ ರೂಪಾಯಿ ಸಂಭಾವನೆ ಪಡೆಯುತ್ತಾರೆ. ಅವರ ಸಾಲಿಗೆ ಶ್ರೀನಿಧಿ ಶೆಟ್ಟಿ (Srinidhi Shetty) ಕೂಡ ಸೇರ್ಪಡೆ ಆಗಿದ್ದಾರೆ. ಅವರು ಪಡೆದುಕೊಂಡ ಸಂಬಳದ ಬಗ್ಗೆ ಗುಸುಗುಸು ಕೇಳಿಬರುತ್ತಿದೆ. ಕನ್ನಡ ಮಾತ್ರವಲ್ಲದೇ ಪರಭಾಷೆಯಲ್ಲೂ ಗುರುತಿಸಿಕೊಂಡಿರುವ ಅವರಿಗೆ ‘ಕೋಬ್ರಾ’ (Cobra Movie) ಚಿತ್ರತಂಡದವರು ಕೈ ತುಂಬ ಸಂಭಾವನೆ ನೀಡಿದ್ದಾರೆ ಎಂದು ವರದಿ ಆಗಿದೆ. ಅದನ್ನು ಕೇಳಿದರೆ ಇತರೆ ನಟಿಯರು ಅಚ್ಚರಿ ಪಟ್ಟಕೊಳ್ಳುವುದು ಗ್ಯಾರಂಟಿ.

‘ಕೆಜಿಎಫ್​: ಚಾಪ್ಟರ್​ 1’ ಸಿನಿಮಾ ಬಿಡುಗಡೆ ಆದಾಗಲೇ ನಟಿ ಶ್ರೀನಿಧಿ ಶೆಟ್ಟಿ ಅವರಿಗೆ ಪ್ಯಾನ್​ ಇಂಡಿಯಾ ಮಟ್ಟದಲ್ಲಿ ಬೇಡಿಕೆ ಬಂತು. ಹತ್ತು ಹಲವು ಆಫರ್​ಗಳು ಕೂಡ ಹರಿದುಬರಲು ಆರಂಭವಾದವು. ಹಾಗಿದ್ದರೂ ಕೂಡ ಅವರು ಸಿನಿಮಾಗಳನ್ನು ಒಪ್ಪಿಕೊಳ್ಳುವಲ್ಲಿ ಅವಸರ ಮಾಡಲಿಲ್ಲ. ‘ಕೆಜಿಎಫ್​’ ನಂತರ ಅವರು ಸಹಿ ಮಾಡಿದ ಏಕೈಕ ಸಿನಿಮಾ ತಮಿಳಿನ ‘ಕೋಬ್ರಾ’. ಈ ಚಿತ್ರಕ್ಕೆ ಚಿಯಾನ್​ ವಿಕ್ರಮ್​ ಹೀರೋ.

ವಿಕ್ರಮ್​ ಅವರಿಗೆ ತಮಿಳುನಾಡಿನಲ್ಲಿ ಮಾತ್ರವಲ್ಲದೇ ದೇಶಾದ್ಯಂತ ಅಭಿಮಾನಿಗಳು ಇದ್ದಾರೆ. ಅವರು ನಟಿಸಿರುವ ‘ಕೋಬ್ರಾ’ ಸಿನಿಮಾ ಮೇಲೆ ದೊಡ್ಡ ಮಟ್ಟದ ನಿರೀಕ್ಷೆ ಇದೆ. ಈ ಚಿತ್ರದಲ್ಲಿ ಅವರಿಗೆ ಜೋಡಿಯಾಗಿ ಶ್ರೀನಿಧಿ ಶೆಟ್ಟಿ ನಟಿಸಿದ್ದಾರೆ. ‘ಕೋಬ್ರಾ’ ಸಿನಿಮಾಗೆ ಶ್ರೀನಿಧಿ ಅವರು ಬರೋಬ್ಬರಿ 6ರಿಂದ 7 ಕೋಟಿ ರೂಪಾಯಿ ಸಂಭಾವನೆ ಪಡೆದುಕೊಂಡಿದ್ದಾರೆ ಎಂಬ ಗಾಸಿಪ್​ ಹಬ್ಬಿದೆ. ಈ ಮೊತ್ತ ಕೇಳಿ ಅನೇಕರು ಹುಬ್ಬೇರಿಸಿದ್ದಾರೆ.

ಶ್ರೀನಿಧಿ ಶೆಟ್ಟಿ ಅವರಿಗೆ ತಮಿಳಿನಲ್ಲಿ ಇದು ಮೊದಲ ಪ್ರಾಜೆಕ್ಟ್​. ಆದರೆ ಅದಕ್ಕೂ ಮುನ್ನ ‘ಕೆಜಿಎಫ್​: ಚಾಪ್ಟರ್​ 1’ ಹಾಗೂ ‘ಕೆಜಿಎಫ್​: ಚಾಪ್ಟರ್​ 2’ ಸಿನಿಮಾಗಳು ತಮಿಳಿಗೂ ಡಬ್​ ಆಗಿ ತೆರೆ ಕಂಡಿದ್ದರಿಂದ ಅವರು ಕಾಲಿವುಡ್​ ಪ್ರೇಕ್ಷಕರಿಗೆ ಪರಿಚಿತರಾಗಿದ್ದಾರೆ. ಈಗ ‘ಕೋಬ್ರಾ’ ಮೂಲಕ ಮತ್ತೆ ರಂಜಿಸಲು ಸಜ್ಜಾಗಿದ್ದಾರೆ. ಹಲವು ಕಾರಣಗಳಿಂದ ಈ ಸಿನಿಮಾ ನಿರೀಕ್ಷೆ ಮೂಡಿಸಿದೆ. ಡಿಫರೆಂಟ್​ ಗೆಟಪ್​ನಲ್ಲಿ ವಿಕ್ರಮ್​ ಕಾಣಿಸಿಕೊಳ್ಳಲಿದ್ದಾರೆ. ಇತ್ತೀಚೆಗಷ್ಟೇ ಈ ಚಿತ್ರದ ಆಡಿಯೋ ರಿಲೀಸ್​ ಮಾಡಲಾಗಿದೆ. ಆಗಸ್ಟ್​ 11ರಂದು ವಿಶ್ವಾದ್ಯಂತ ‘ಕೋಬ್ರಾ’ ಬಿಡುಗಡೆ ಆಗಲಿದೆ.