‘ಜೈಲರ್’ ಸಿನಿಮಾಕ್ಕೆ ಮೊದಲ ಆಯ್ಕೆ ರಜನೀಕಾಂತ್ ಅಲ್ಲ: ಮತ್ಯಾರು?

ತಮಿಳಿನ ಪ್ಯಾನ್ ಇಂಡಿಯಾ ಸಿನಿಮಾ ‘ಜೈಲರ್’ ಸೂಪರ್ ಡೂಪರ್ ಹಿಟ್ ಆಗಿದೆ. ಸೂಪರ್ ಸ್ಟಾರ್ ರಜನೀಕಾಂತ್ ಅವರ ವೃತ್ತಿ ಜೀವನದಲ್ಲಿಯೇ ಅತ್ಯಂತ ಹೆಚ್ಚು ಹಣ ಗಳಿಸಿದ ಸಿನಿಮಾ ಎಂಬ ಖ್ಯಾತಿಗೆ ಕಾರಣವಾಗಿದೆ. ಸಿನಿಮಾದ ಹಾಡುಗಳು, ಹಿನ್ನೆಲೆ ಸಂಗೀತವಂತೂ ಎಲ್ಲರ ಮೆಚ್ಚುಗೆಗೆ ಕಾರಣವಾಗಿದೆ. ರಜನೀಕಾಂತ್​ಗಾಗಿಯೇ ರಚಿಸಿ, ಸಂಗೀತ ಸಂಯೋಜಿಸಿರುವ ಟೈಗರ್ ಕಾ ಹುಕುಂ ಹಾಡಂತೂ ಸಾಮಾಜಿಕ ಜಾಲತಾಣದಲ್ಲಿ ಸಖತ್ ವೈರಲ್ ಆಗಿಬಿಟ್ಟಿದೆ. ನಿಜ ಕತೆ ಏನೆಂದರೆ ‘ಜೈಲರ್’ ಸಿನಿಮಾದ ಕತೆ ಬರೆದಿದ್ದು ಬೇರೊಬ್ಬ ನಟನಿಗಾಗಿ, ಆದರೆ ಆ ನಟ ಒಪ್ಪಲಿಲ್ಲವಾದ್ದರಿಂದ ಕತೆ ರಜನೀಕಾಂತ್ ಬಳಿ ಬಂತು.

‘ಜೈಲರ್’ ಸಿನಿಮಾನಲ್ಲಿ ರಜನೀಕಾಂತ್​ರನ್ನು ಭಿನ್ನ ರೀತಿಯಲ್ಲಿ ತೋರಿಸಲಾಗಿದೆ. ನಿವೃತ್ತ ಜೈಲರ್, ಪ್ರತಿದಿನ ಮಾರುಕಟ್ಟೆಗೆ ಹೋಗಿ ತರಕಾರಿ ತರುವವ, ಮನೆಯಲ್ಲಿ ಪತ್ನಿ, ಸೊಸೆ, ಮಗ, ಮೊಮ್ಮಗನ ಆಜ್ಞೆ ಪಾಲಿಸುವವ, ಜೋರಾಗಿ ಬರುವ ಗಾಡಿಗಳನ್ನು ನೋಡಿ ಭಯ ಪಡುವವ. ಫೈಟ್​ಗಳನ್ನು ಮಾಡದೆ, ನೂರಾರು ಗೂಂಡಾಗಳನ್ನು ಸೆದೆಬಡಿಯದೇ ಗೆಳೆಯರನ್ನು ಬಳಸಿಕೊಂಡು ಬುದ್ಧಿವಂತಿಕೆಯಿಂದ ಯುದ್ಧ ಗೆಲ್ಲುವ ಪಾತ್ರ ಅವರದ್ದು, ಅವರ ವಯಸ್ಸು ಗಮನದಲ್ಲಿಟ್ಟುಕೊಂಡು ಈ ರೀತಿಯಾಗಿ ಪಾತ್ರವನ್ನು ಡಿಸೈನ್ ಮಾಡಲಾಗಿದೆ. ಆದರೆ ಇದಕ್ಕೆ ಮೊದಲು ಸಿನಿಮಾದ ಕತೆ ಹೀಗೆ ಇರಲಿಲ್ಲ.

ಇದನ್ನೂ ಓದಿ: ರಜನೀಕಾಂತ್ ಹೊಸ ಸಿನಿಮಾದಲ್ಲಿ ಹಲವು ತಾರೆಯರು, ಈ ಬಾರಿ ಯುವಕರಿಗೆ ಮಣೆ

ಹೌದು, ‘ಜೈಲರ್’ ಸಿನಿಮಾದ ಕತೆ ಮೊದಲು ಆಫರ್ ಮಾಡಲಾಗಿದ್ದು ತೆಲುಗಿನ ಮೆಗಾಸ್ಟಾರ್ ನಟ ಚಿರಂಜೀವಿ ಅವರಿಗೆ. ಸಿನಿಮಾದಲ್ಲಿ ಹಾಡುಗಳಿಲ್ಲ, ಕಮರ್ಷಿಯಲ್ ಸಿನಿಮಾದ ಸಿದ್ಧ ಸೂತ್ರಕ್ಕೆ ಹೊಂದಿಕೆ ಆಗುವ ಕೆಲವು ಸೀನ್​ಗಳು, ಸನ್ನಿವೇಶಗಳು ಇಲ್ಲ. ಅಲ್ಲದೆ ತಾನು ವಯಸ್ಸಾದ, ನಿಶ್ಯಕ್ತನ ರೀತಿಯ ಪಾತ್ರ ಮಾಡುವುದು ಸರಿಯಲ್ಲ ಎಂಬ ಕಾರಣಕ್ಕೆ ಚಿರಂಜೀವಿ ಆ ಸಿನಿಮಾವನ್ನು ಒಪ್ಪಿಕೊಳ್ಳಲಿಲ್ಲ. ಅಲ್ಲದೆ ಅದೇ ಸಮಯದಲ್ಲಿ ಅವರು ತಮಿಳಿನ ‘ವೇದಾಲಂ’ ಸಿನಿಮಾದ ರೀಮೇಕ್ ‘ಭೋಲಾ ಶಂಕರ್’ ಒಪ್ಪಿಕೊಂಡಿದ್ದರು. ಹಾಗಾಗಿ ನೆಲ್ಸನ್, ಕತೆಯನ್ನು ರಜನೀಕಾಂತ್​ರ ಇಮೇಜು, ವಯಸ್ಸಿಗೆ ಅನುಗುಣವಾಗಿ ಬದಲಾಯಿಸಿ, ರಜನೀಕಾಂತ್​ ಅವರನ್ನು ಹಾಕಿಕೊಂಡು ಸಿನಿಮಾ ಮಾಡಿದರು. ಸಿನಿಮಾ ಸೂಪರ್-ಡೂಪರ್ ಹಿಟ್ ಆಯ್ತು.

‘ಜೈಲರ್’ ಸಿನಿಮಾವನ್ನು ನೆಲ್ಸನ್ ನಿರ್ದೇಶನ ಮಾಡಿದ್ದಾರೆ. ಸಿನಿಮಾನಲ್ಲಿ ರಜನೀಕಾಂತ್ ಜೊತೆಗೆ ಶಿವರಾಜ್ ಕುಮಾರ್, ಮಲಯಾಳಂನ ಮೋಹನ್​ಲಾಲ್, ಹಿಂದಿಯ ಜಾಕಿ ಶ್ರಾಫ್, ತೆಲುಗಿನ ಸುನಿಲ್ ಅವರುಗಳು ಅತಿಥಿ ಪಾತ್ರದಲ್ಲಿ ನಟಿಸಿದ್ದಾರೆ. ತಮನ್ನಾ ಐಟಂ ಹಾಡಿನಲ್ಲಿ ಕಾಣಿಸಿಕೊಂಡರೆ, ರಮ್ಯಾ ಕೃಷ್ಣ ರಜನೀಕಾಂತ್ ಪತ್ನಿ ಪಾತ್ರದಲ್ಲಿ ನಟಿಸಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ