ಆಟೋದಲ್ಲಿ ಹಾಸ್ಯ ನಟನ ಮೃತದೇಹ ಪತ್ತೆ! ಅನುಮಾನ ಹುಟ್ಟುಹಾಕಿದ ಸಾವು

ಕಳೆದ ವರ್ಷ ಲಾಕ್​ಡೌನ್​ನಲ್ಲಿ ಅನೇಕ ಸೆಲೆಬ್ರಿಟಿಗಳು ಅಕಾಲಿಕವಾಗಿ ಕೊನೆಯುಸಿರೆಳೆದಿದ್ದರು. 2021ನೇ ವರ್ಷದಲ್ಲಾದರೂ ಅಂಥ ಘಟನೆಗಳು ನಡೆಯದಿರಲಿ ಎಂಬುದು ಎಲ್ಲರ ಪ್ರಾರ್ಥನೆ ಆಗಿತ್ತು. ಆದರೆ ಕಾಲಿವುಡ್​ಯಿಂದ ಈಗೊಂದು ಕಹಿ ಸುದ್ದಿ ಕೇಳಿಬಂದಿದೆ. ತಮಿಳು ಚಿತ್ರರಂಗದ ಹಾಸ್ಯ ಕಲಾವಿದ ವಿ. ಬಾಬು ಅವರು ಮೃತರಾಗಿದ್ದಾರೆ. ಅವರ ಸಾವು ಅನೇಕ ಅನುಮಾನಗಳನ್ನು ಹುಟ್ಟುಹಾಕಿದೆ!

ಸೂಪರ್​ ಹಿಟ್​ ‘ಕಾದಲ್​’ ಸಿನಿಮಾದಲ್ಲಿ ವಿ. ಬಾಬು ಅವರು ಒಂದು ಚಿಕ್ಕ ಪಾತ್ರ ಮಾಡಿದ್ದರು. ಚೆನ್ನೈನಲ್ಲಿ ಅವರು ನಿಧನರಾಗಿದ್ದು, ಆಟೋರಿಕ್ಷಾದಲ್ಲಿ ಮೃತದೇಹ ಪತ್ತೆ ಆಗಿದೆ. ಮಾ.23ರ ರಾತ್ರಿಯೇ ಅವರು ಕೊನೆಯುರೆಳೆದಿದ್ದಾರೆ ಎಂದು ವರದಿ ಆಗಿದೆ. ಬಾಬು ಸಾವಿಗೆ ಕಾರಣ ಏನು ಎಂಬುದು ಇನ್ನಷ್ಟೇ ಗೊತ್ತಾಗಬೇಕಿದೆ.

ಕೆಲವು ವರ್ಷಗಳ ಹಿಂದೆ ವಿ. ಬಾಬು ತಂದೆ-ತಾಯಿ ನಿಧನರಾಗಿದ್ದರು. ಅದರಿಂದ ಅವರು ತೀವ್ರ ವಿಚಲಿತರಾಗಿದ್ದರು. ಚಿತ್ರರಂಗದಲ್ಲಿ ಸೂಕ್ತ ಅವಕಾಶಗಳು ಇರಲಿಲ್ಲ. ಸರಿಯಾದ ಕೆಲಸವೂ ಸಿಗದ ಕಾರಣ ಆಟೋರಿಕ್ಷಾಗಳಲ್ಲಿ ಮಲಗುತ್ತಿದ್ದರು. ದೇವಸ್ಥಾನಗಳಲ್ಲಿ ಕಾಣಿಸಿಕೊಳ್ಳುತ್ತಿದ್ದರು. ತಂದೆ-ತಾಯಿ ನಿಧನದ ನಂತರ ಅವರು ಮಾನಸಿಕ ಸ್ಥಿಮಿತ ಕಳೆದುಕೊಂಡಿದ್ದರು ಎಂದೆಲ್ಲ ವರದಿ ಆಗಿತ್ತು.

ಭರತ್​ ಮತ್ತು ಸಂಧ್ಯಾ ನಟಿಸಿದ್ದ 2004ರ ಸೂಪರ್​ ಹಿಟ್​ ಸಿನಿಮಾ ‘ಕಾದಲ್​’ನಲ್ಲಿ ಬಾಬು ಮಾಡಿದ ಚಿಕ್ಕ ಪಾತ್ರ ಗಮನ ಸೆಳೆದಿತ್ತು. ಸಿನಿಮಾ ಹೀರೋ ಆಗಬೇಕು ಎಂಬ ಆಸೆ ಇಟ್ಟುಕೊಂಡು ಆಡಿಷನ್​ಗೆ ಬರುವ ಯುವಕನ ಪಾತ್ರದ ಮೂಲಕ ಅವರು ಸಿಕ್ಕಾಪಟ್ಟೆ ನಗು ಉಕ್ಕಿಸಿದ್ದರು. ಆದರೆ ಈಗ ಅವರು ಅನುಮಾನಾಸ್ಪದವಾಗಿ ನಿಧನರಾಗಿರುವುದು ಇಡೀ ಚಿತ್ರರಂಗಕ್ಕೆ ಶಾಕ್​ ನೀಡಿದೆ.

ಕಾದಲ್​ ಸಿನಿಮಾ ಬಳಿಕ ಬಾಬು ಅವರಿಗೆ ಹೆಚ್ಚಿನ ಅವಕಾಶಗಳು ಸಿಗಲಿಲ್ಲ. ಅದರಿಂದ ಅವರು ಆರ್ಥಿಕವಾಗಿ ತೊಂದರೆಗೆ ಸಿಲುಕಿದರು. ಅವರು ದೇವಸ್ಥಾನದಲ್ಲಿ ಕಾಣಿಸಿಕೊಂಡ ವಿಡಿಯೋ ಕೂಡ ಈ ಹಿಂದೆ ವೈರಲ್​ ಆಗಿತ್ತು.

ಇದನ್ನೂ ಓದಿ: ಖ್ಯಾತ ನಿರ್ದೇಶಕ ಎಸ್​.ಪಿ. ಜನನಾಥನ್​ ಹೃದಯಾಘಾತದಿಂದ ನಿಧನ! ಸೆಲೆಬ್ರಿಟಿಗಳ ಸಂತಾಪ