ಬಿಗ್ ಬಾಸ್ ಮನೆಗೆ ಮೊದಲ ದಿನವೇ ಬಂದ ಹೊಸ ಸ್ಪರ್ಧಿ; ದಿನವೀಡಿ ಅಳು

‘ಬಿಗ್ ಬಾಸ್ ಕನ್ನಡ ಸೀಸನ್ 13’ ಅದ್ಧೂರಿಯಾಗಿ ಚಾಲನೆ ಪಡೆದುಕೊಂಡಿದೆ. ಮೊದಲ ದಿನ 16 ಸ್ಪರ್ಧಿಗಳು ಫ್ಲೈಟ್​​ನಲ್ಲೇ ಇದ್ದರು. ಅಲ್ಲಿಗೇ ಊಟ ಬರುತ್ತಿತ್ತು. ಈ ಬೆನ್ನಲ್ಲೇ ಸ್ಪರ್ಧಿಗಳಿಗೆ ಒಂದು ಶಾಕ್ ಉಂಟಾಗಿದೆ. ದೊಡ್ಮನೆಯಲ್ಲಿ ಮೊದಲ ದಿನವೇ ಅಚ್ಚರಿಯ ತಿರುವು ಸಿಕ್ಕಿದ್ದು, ಮನೆಯೊಳಗೆ ಎಲ್ಲ ಸ್ಪರ್ಧಿಗಳು ಕಾಲಿಟ್ಟು ಸೆಟಲ್ ಆಗುವಷ್ಟರಲ್ಲೇ ಮತ್ತೋರ್ವ ‘ವಿಶೇಷ ಸ್ಪರ್ಧಿ’ಯ ಆಗಮನವಾಗಿದೆ. ಇದು ಉಳಿದ ಸ್ಪರ್ಧಿಗಳನ್ನೆಲ್ಲ ಕಂಗಾಲುಗೊಳಿಸಿದೆ.

ಆ ವಿಶೇಷ ಸ್ಪರ್ಧಿ ಬೇರಾರೂ ಅಲ್ಲ, ಒಂದು ಪುಟ್ಟ ಮಗುವಿನ ಗೊಂಬೆ. ಎಲ್ಲರೂ ವಿಮಾನದಲ್ಲಿ ಕುಳಿತಿದ್ದರು. ಆ ಸಮಯಕ್ಕೆ ಹೊಸ ಸ್ಪರ್ಧಿಯ ಆಗಮನದ ಸೂಚನೆ ಸಿಕ್ಕಿತು. ಎಲ್ಲರೂ ಇನ್ನೂ ಯಾರೋ ಒಬ್ಬರು ಬರುತ್ತಿದ್ದಾರೆ ಎಂದು ಭಾವಿಸಿದರು. ಆದರೆ, ಅದು ಮಗುವಿನ ಗೊಂಬೆ ಆಗಿತ್ತು. ನೋಡಲು ನೈಜ ಮಗುವಿನಂತೆಯೇ ರೂಪುಗೊಂಡಿರುವ ಈ ತಂತ್ರಜ್ಞಾನ ಆಧಾರಿತ ಕೃತಕ ಗೊಂಬೆ, ಈಗ ದೊಡ್ಮನೆಯ ಸದ್ಯದ ಹೈಲೈಟ್.

ಆಟದ ನಿಯಮ ಹಾಗೂ ಸವಾಲು:

ಅತ್ತರೆ ಸುಮ್ಮನಾಗಿಸಬೇಕು: ಈ ಗೊಂಬೆ ಮಗು ಇದ್ದಕ್ಕಿದ್ದಂತೆ ಜೋರಾಗಿ ಅಳಲು ಪ್ರಾರಂಭಿಸುತ್ತದೆ. ಮಗು ಅತ್ತ ತಕ್ಷಣ ಸ್ಪರ್ಧಿಗಳು ಅದನ್ನು ಸುಮ್ಮನಾಗಿಸಬೇಕು. ಹೀಗೆ ಮಾಡಲು ಸ್ಪರ್ಧಿಗಳು ನಗಬೇಕು, ಡ್ಯಾನ್ಸ್ ಮಾಡಬೇಕು.

ಸುಮ್ಮನಾದರೆ ಮಾತ್ರ ನಗು: ಸ್ಪರ್ಧಿಗಳು ಸರಿಯಾಗಿ ಆರೈಕೆ ಮಾಡಿ ಸಮಾಧಾನಪಡಿಸಿದಾಗ ಮಾತ್ರ ಆ ಮಗು ಅಳು ನಿಲ್ಲಿಸಿ ಮುದ್ದಾಗಿ ನಗುತ್ತದೆ. ಮಗು ಅತ್ತರೆ ಏನು? ನಕ್ಕರೆ ಏನು ಎಂಬ ಬಗ್ಗೆ ಬಿಗ್ ಬಾಸ್ ಏನನ್ನೂ ಹೇಳಿಲ್ಲ.

ಇದನ್ನೂ ಓದಿ: ಬಿಗ್ ಬಾಸ್ ಆಟ ಆರಂಭ ಆಗೋದಕ್ಕೂ ಮೊದಲೇ ಶುರುವಾಯ್ತು ಜಗಳ

ಮೊದಲ ದಿನವೇ ದೊಡ್ಮನೆಗೆ ಬಂದ ಈ ಮಗು ಸ್ಪರ್ಧಿಗಳ ಜವಾಬ್ದಾರಿ ಹಾಗೂ ತಾಳ್ಮೆಗೆ ದೊಡ್ಡ ಪರೀಕ್ಷೆ ಒಡ್ಡಿದೆ. ದಿನವಿಡೀ ಮಗುವಿನ ಅಳು-ನಗುವಿನ ಸುತ್ತಲೇ ಇಡೀ ಮನೆ ಹೆಣಗಾಡುತ್ತಿದ್ದು, ಪ್ರೇಕ್ಷಕರಿಗೆ ಮೊದಲ ದಿನವೇ ಪಕ್ಕಾ ಎಂಟರ್‌ಟೇನ್‌ಮೆಂಟ್ ಸಿಕ್ಕಂತಾಗಿದೆ. ಮುಂದೆ ಯಾವ ರೀತಿಯ ಘೋಷಣೆ ಬರುತ್ತದೆ ಎಂಬ ಕುತೂಹಲ ಮೂಡಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.