ಬಿಗ್ ಬಾಸ್ ಕನ್ನಡ 13: ರಾಕ್ಷಸನಾಗಿ ಬಾಯಿ ಬಂದಂತೆ ಮಾತನಾಡುತ್ತಿರುವ ಮಂಜ

‘ಬಿಗ್ ಬಾಸ್ ಕನ್ನಡ ಸೀಸನ್ 13’ ರಿಯಾಲಿಟಿ ಶೋನಲ್ಲಿ ಮಾಡರ್ನ್ ಮಹಾಕವಿ ಮಂಜ ಮೊದಲಿನಿಂದಲೂ ಮಿತಿ ಇಲ್ಲದಂತೆ ಮಾತನಾಡುತ್ತಿದ್ದಾರೆ. ಅವರ ಮಾತಿಗೆ ಹಲವು ಬಾರಿ ಆಕ್ಷೇಪ ಎದುರಾಗಿದೆ. ಆದರೆ ಈಗ ಮಂಜನಿಗೆ ಮಿತಿ ಮೀರಿ ಮಾತನಾಡಲು ಪರವಾನಗಿ ಸಿಕ್ಕಂತೆ ಆಗಿದೆ! ಹೌದು, ಗಂಧರ್ವರು ಮತ್ತು ರಾಕ್ಷಸರು ಎಂಬ ಎರಡು ಗುಂಪುಗಳನ್ನು ಮಾಡಿ ಟಾಸ್ಕ್ ನೀಡಲಾಗಿದೆ. ಈ ಆಟದಲ್ಲಿ ಮಂಜ ಅವರು ರಾಕ್ಷಸರ ಟೀಮ್​ನಲ್ಲಿ ಇದ್ದಾರೆ. ಮನಸ್ಸಿಗೆ ಬಂದಂತೆ ವರ್ತಿಸಲು ರಾಕ್ಷಸರಿಗೆ ಅವಕಾಶ ಇದೆ. ಹಾಗಾಗಿ ಮಂಜ ಮಿತಿ ಮೀರಿ ನಡೆದುಕೊಳ್ಳುತ್ತಿದ್ದಾರೆ.

ಗಂಧರ್ವರ ಟೀಮ್​ನಲ್ಲಿ ಇರುವ ಕಾವ್ಯಾ ಅವರ ಕೂದಲಿಗೆ ಮಂಜ ಸ್ಪ್ರೇ ಹಾಕಿದ್ದಾರೆ. ಕೂದಲು ಹಾಳಾಗುತ್ತದೆ ಎಂದು ಕಾವ್ಯಾ ಮನವಿ ಮಾಡಿಕೊಂಡರೂ ಕೂಡ ಅವರು ನಿಲ್ಲಿಸಿಲ್ಲ. ಬಳಿಕ, ಗಂಧರ್ವರಿಗೆ ಮೆಣಸಿನಕಾಯಿ ತಿನ್ನುವಂತೆ ಒತ್ತಾಯಿಸಿದ್ದಾರೆ. ಕಾವ್ಯಾ, ಯಶಸ್ ಮುಂತಾದವರಿಗೆ ಮೆಣಸಿನಕಾಯಿ ತಿನ್ನಿಸಲಾಗಿದೆ. ಇಷ್ಟೇ ಅಲ್ಲದೇ, ಅತಿಯಾಗಿ ಮಾತನಾಡಿದ್ದಾರೆ.

ಬಿಗ್ ಬಾಸ್ ಮನೆಯಲ್ಲಿ ಕೆಲವರನ್ನು ಕಂಡರೆ ಮಂಜ ಅವರಿಗೆ ಆಗೋದಿಲ್ಲ. ಯಶಸ್, ಕಿರಣ್ ಶಾಸ್ತ್ರಿ ಬಗ್ಗೆ ಈ ಮೊದಲು ಕೂಡ ಮಂಜ ಮಿತಿ ಮೀರಿ ಮಾತನಾಡಿದ್ದರು. ಈಗ ಅವರು ಇನ್ನಷ್ಟು ನಾಲಿಗೆ ಹರಿಬಿಟ್ಟಿದ್ದಾರೆ. ರಾಕ್ಷಸನ ಪಾತ್ರ ನಿರ್ವಹಿಸುತ್ತಿದ್ದೇನೆ ಎಂಬ ಒಂದೇ ಕಾರಣವನ್ನು ಮುಂದಿಟ್ಟುಕೊಂಡು ವೈಯಕ್ತಿಕವಾಗಿ ಚಾರಿತ್ರ್ಯಹರಣ ಮಾಡುವ ರೀತಿಯಲ್ಲಿ ಮಾತನಾಡಿದ್ದಾರೆ.

ಸ್ವಿಮಿಂಗ್ ಪೂಲ್​ನಲ್ಲಿ ಯಶಸ್ ಅವರು ಇದ್ದಾಗ ಅವರನ್ನು ಮಂಜ ಕೆಣಕಿದರು. ‘ಲೇ ಮೂಲಂಗಿ.. ಸ್ತ್ರೀ ವ್ಯಾಮೋಹ ಇರುವ ಕಳ್ಳ ನಾಯಿ. ಕ್ಯಾಮರಾಗೆ ತೋರಿಸಲು ಸಾಧ್ಯವಾಗದ ಕಳ್ಳ ನನ್ನ ಮಗ ನೀನು’ ಎಂದು ಮಂಜ ಹೇಳಿದರು. ಇದರಿಂದ ಯಶಸ್ ಅವರಿಗೆ ತೀರಾ ಬೇಸರ ಆಯಿತು. ಪರ್ಸನಲ್ ಆಗಿ ಮಾತನಾಡಬೇಡಿ ಎಂದು ಅವರು ಮನವಿ ಮಾಡಿಕೊಂಡರು.

ಇದನ್ನೂ ಓದಿ: ಮಂಜು ಮಾಡಿದ ತಪ್ಪಿಗೆ ಇಡೀ ಮನೆಗೆ ಶಿಕ್ಷೆ; ನಗುತ್ತಾ ಎಲ್ಲರನ್ನೂ ಹಂಗಿಸಿದ ಮಾಡರ್ನ್ ಮಹಾಕವಿ

ಮಂಜ ಈಗ ರಾಕ್ಷಸರ ಗುಂಪಿನಲ್ಲಿ ಇರುವುದರಿಂದ ಆಟದ ನಿಯಮದ ಪ್ರಕಾರ ಗಂಧರ್ವರು ಮಂಜನ ವಿರುದ್ಧ ಹೆಚ್ಚು ಮಾತನಾಡಲು ಸಾಧ್ಯವಾಗುತ್ತಿಲ್ಲ. ಅದನ್ನೇ ಅಸ್ತ್ರವಾಗಿ ಬಳಸಿಕೊಂಡು ಮಂಜ ಈ ರೀತಿ ನಡೆದುಕೊಳ್ಳುತ್ತಿದ್ದಾರೆ. ‘ನಾಟಕದ ನನ್ ಮಗನೇ. ಥು ನಿನ್ನ ಜನ್ಮಕ್ಕೆ’ ಎಂದು ಕಿರಣ್ ಶಾಸ್ತ್ರಿಗೆ ಮಂಜ ಅವಾಜ್ ಹಾಕಿದ್ದಾರೆ. ಮುಂದಿನ ಸಂಚಿಕೆಯಲ್ಲಿ ಈ ಬಗ್ಗೆ ಖಂಡಿತಾ ಚರ್ಚೆ ಆಗಲಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.