‘ಹೊರಡೋದಾದ್ರೆ ಹೊರಡಿ, ಡೋರ್ ಓಪನ್ ಮಾಡಿಸ್ತೀನಿ’; ಗಾನವಿಗೆ ಸುದೀಪ್ ಖಡಕ್ ಎಚ್ಚರಿಕೆ

‘ಹಳ್ಳಿ ಪವರ್’ ರಿಯಾಲಿಟಿ ಶೋನಲ್ಲಿ ರಗಡ್ ಪರ್ಫಾರ್ಮೆನ್ಸ್ ನೀಡಿ ಸದ್ದು ಮಾಡಿದ್ದ ಗಾನವಿ ಅವರಿಗೆ ‘ಬಿಗ್ ಬಾಸ್ ಕನ್ನಡ’ ವೇದಿಕೆಯಲ್ಲಿ ಕಿಚ್ಚ ಸುದೀಪ್ ಖಡಕ್ ಆಗಿಯೇ ಎಚ್ಚರಿಕೆ ನೀಡಿದ್ದಾರೆ. ಟಾಸ್ಕ್‌ನಲ್ಲಿ ತಪ್ಪು ಮಾಡಿ ಅದನ್ನು ಒಪ್ಪಿಕೊಳ್ಳದೆ ವಾದಕ್ಕಿಳಿದ ಗಾನವಿ ನಡೆಗೆ ಅಸಮಾಧಾನ ವ್ಯಕ್ತಪಡಿಸಿದ ಸುದೀಪ್, ‘ಹೊರ ಹೋಗ್ತೀರಾ ಅಂದ್ರೆ ಹೊರಡಿ, ಡೋರ್ ಓಪನ್ ಮಾಡಿಸ್ತೀನಿ’ ಎಂದು ನೇರವಾಗಿಯೇ ಸವಾಲು ಹಾಕಿದ್ದಾರೆ.

ರಗಡ್ ಆಟ ಇಲ್ಲಿ ನಡೆಯಲ್ಲ

‘ಹಳ್ಳಿ ಪವರ್’ ಶೋನಲ್ಲಿ ತಮ್ಮ ರಗಡ್ ಅವತಾರ ಹಾಗೂ ಆಟದ ವೈಖರಿಯಿಂದಲೇ ಗುರುತಿಸಿಕೊಂಡಿದ್ದ ಗಾನವಿ, ಬಿಗ್ ಬಾಸ್ ಮನೆಯಲ್ಲೂ ಅದೇ ಶೈಲಿ ಮುಂದುವರಿಸಲು ಯತ್ನಿಸಿದ್ದರು. ಆದರೆ, ಬಿಗ್ ಬಾಸ್ ಪಂಚಾಯಿತಿ ವೇದಿಕೆಯಲ್ಲಿ ನಿರೂಪಕ ಕಿಚ್ಚ ಸುದೀಪ್ ಮುಂದೆ ಅವರ ಈ ರಗಡ್ ವರ್ತನೆ ನಡೆಯಲಿಲ್ಲ.

‘ನಾನು ಏನು ನೋಡಬೇಕು ಅಂತ ನೀವು ಹೇಳಬೇಡಿ’

ವಾರಾಂತ್ಯದ ಸಂಚಿಕೆಯಲ್ಲಿ ಟಾಸ್ಕ್ ಒಂದರಲ್ಲಿ ಗಾನವಿ ಮಾಡಿದ ತಪ್ಪಿನ ವಿಡಿಯೋವನ್ನು ತೋರಿಸಲಾಗಿತ್ತು. ಆದರೆ, ಅದನ್ನು ಒಪ್ಪಿಕೊಳ್ಳಲು ತಯಾರಿಲ್ಲದ ಗಾನವಿ, ‘ನೀವೇ ಬೇಕಿದ್ರೆ ನೋಡಿ ಸರ್, ಅಲ್ಲಿ ನನ್ನ ತಪ್ಪೇ ಇಲ್ಲ’ ಎಂದು ವಾದಿಸಲು ಮುಂದಾದರು.

ಇದರಿಂದ ಆಕ್ರೋಶಗೊಂಡ ಸುದೀಪ್, ‘ನಾನು ಏನು ನೋಡಬೇಕು, ಏನು ಹೇಳಬೇಕು ಎಂಬುದನ್ನು ನೀವು ಹೇಳಬೇಕಿಲ್ಲ’ ಎಂದು ಗಾನವಿಗೆ ವೇದಿಕೆಯಲ್ಲೇ ಟಾಂಗ್ ನೀಡಿದರು.

ತಪ್ಪನ್ನು ಒಪ್ಪಿಕೊಳ್ಳದ ಧೋರಣೆಗೆ ಕಿಚ್ಚ ಗರಂ!

ಗಾನವಿ ಅವರ ವರ್ತನೆಯನ್ನು ತೀವ್ರವಾಗಿ ಖಂಡಿಸಿದ ಸುದೀಪ್, ‘ನಿಮ್ಮ ತಪ್ಪನ್ನು ನೀವು ಒಪ್ಪಿಕೊಳ್ಳುತ್ತಲೇ ಇಲ್ಲ. ನೀವು ಎಫರ್ಟ್ ಹಾಕುತ್ತಿದ್ದೀರಾ ಹೌದು, ಆದರೆ ‘ಅವರು ತಪ್ಪು ಮಾಡಿದ್ದಾರೆ, ಅದಕ್ಕೆ ನಾನು ಮಾಡ್ತೀನಿ’ ಎಂದರೆ ಅದು ತಪ್ಪಾಗುತ್ತದೆ. ಈ ರೀತಿ ಸಮಜಾಯಿಷಿ ನೀಡುವುದು ಸರಿಯಲ್ಲ’ ಎಂದು ಸ್ಪಷ್ಟ ಮಾತುಗಳಲ್ಲಿ ತಿಳಿಸಿದರು.

‘ಹೊರಡೋದಾದ್ರೆ ಹೊರಡಿ, ಡೋರ್ ಓಪನ್ ಮಾಡಿಸ್ತೀನಿ!

ಸುದೀಪ್ ಅವರ ಮಾತಿಗೂ ಸರಿಯಾಗಿ ಸ್ಪಂದಿಸದೆ ವಾದ ಮುಂದುವರಿಸಲು ಯತ್ನಿಸಿದಾಗ, ಕಿಚ್ಚ ಸುದೀಪ್ ಅವರು ಬಿಗ್ ಬಾಸ್ ಇತಿಹಾಸದಲ್ಲೇ ನೀಡುವ ಕಠಿಣ ಎಚ್ಚರಿಕೆಯನ್ನು ನೀಡಿದರು. ‘ನೀವು ಹೊರ ಹೋಗ್ತೀರಾ ಅಂದ್ರೆ ಹೊರಡಿ. ಈಗಲೇ ಡೋರ್ ಓಪನ್ ಮಾಡಿಸ್ತೀನಿ’ ಎಂದು ಖಡಕ್ ಆಗಿ ಹೇಳಿದರು.

ಇದನ್ನೂ ಓದಿ ನೀವು ಈ ಮನೆಯಲ್ಲಿ ಇರಲು ಅರ್ಹರಲ್ಲ  ಎಂದು ಲಿಖಿತ್‌ಗೆ ಬಿಗ್ ಬಾಸ್ ವೇದಿಕೆಯಲ್ಲಿ ಸುದೀಪ್ ಕ್ಲಾಸ್

ಸುದೀಪ್ ಅವರ ಈ ಕಠಿಣ ಎಚ್ಚರಿಕೆಯಿಂದ ಗಾನವಿ ಸೇರಿದಂತೆ ಮನೆಯ ಇತರ ಸ್ಪರ್ಧಿಗಳು ಕೆಲಕಾಲ ಸ್ತಬ್ಧರಾದರು. ಸಿಕ್ಕ ಅವಕಾಶವನ್ನು ಗೌರವಿಸಿ, ಆಟದ ತತ್ವಕ್ಕೆ ಬದ್ಧವಾಗಿ ಆಡಬೇಕೆ ಹೊರತು ಅನಗತ್ಯ ವಾದ-ಉಡಾಫೆ ನಡೆಯುವುದಿಲ್ಲ ಎಂಬುದನ್ನು ಸುದೀಪ್ ಮತ್ತೊಮ್ಮೆ ನಿರೂಪಿಸಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.