ಅಪರೂಪದ ಶನಿವಾರದ ಎಪಿಸೋಡಿನಲ್ಲಿ ಕಿಚ್ಚನಿಂದ ಮೆಚ್ಚುಗೆ ಪಡೆದವರು ಯಾರ್ಯಾರು?

ಬಿಗ್​​ಬಾಸ್​​ನಲ್ಲಿ ವೀಕೆಂಡ್ ಬಂದರೆ ಅದರಲ್ಲೂ ವೀಕೆಂಡ್ ಎಪಿಸೋಡಿನ ಮೊದಲ ದಿನ ಅಂದರೆ ಶನಿವಾರದ ಎಪಿಸೋಡಿನಲ್ಲಿ ತಪ್ಪು ಮಾಡಿದ ಸ್ಪರ್ಧಿಗಳಿಗೆ ಕ್ಲಾಸ್ ಖಾಯಂ. ಸುದೀಪ್ ಅವರು ಸಾಮಾನ್ಯವಾಗಿ ಶನಿವಾರವನ್ನು ಟೀಕೆ, ವಿಮರ್ಶೆ, ಬುದ್ಧಿವಾದ, ಎಚ್ಚರಿಕೆಗಳಿಗೆ ಮೀಸಲಿಡುತ್ತಾರೆ. ಭಾನುವಾರದ ಎಪಿಸೋಡು ತಮಾಷೆಯಾಗಿ, ಫನ್​​ ಆಗಿ ನಡೆಸಿಕೊಡುತ್ತಾರೆ. ಈ ಸೀಸನ್ನಿಲ್ಲಂತೂ ಅದೇ ನಡೆಯುತ್ತಿತ್ತು. ಕಳೆದ ಕೆಲ ಸೀಸನ್ನುಗಳಿಂದಲೂ ಇದೇ ಪ್ಯಾಟರ್ನ್​​ನಲ್ಲಿ ಸುದೀಪ್ ವೀಕೆಂಡ್ ಎಪಿಸೋಡ್​​ಗಳನ್ನು ನಿರೂಪಣೆ ಮಾಡುತ್ತಾರೆ. ಆದರೆ ಈ ಬಾರಿಯ ಶನಿವಾರದ ಎಪಿಸೋಡ್ ಬಹಳ ಭಿನ್ನವಾಗಿತ್ತು. ಅದಕ್ಕೆ ಕಾರಣ ಸ್ಪರ್ಧಿಗಳು ಈ ವಾರ ಆಡಿದ ರೀತಿ.

ಈ ವಾರ ಕಳ್ಳರು-ಲೂಟಿಕೋರರು ಟಾಸ್ಕ್​​ ಅನ್ನು ನೀಡಲಾಗಿತ್ತು. ಟಾಸ್ಕ್​​ ಅನ್ನು ಮನೆಯ ಎಲ್ಲ ಸದಸ್ಯರು ಅದ್ಭುತವಾಗಿ ಆಡಿದರು. ಟಾಸ್ಕ್ ಬಹಳ ಯಶಸ್ವಿಯಾಗಿ ನಡೆಯಿತು. ಕೆಲವರಂತೂ ಅದ್ಭುತವಾದ ಪ್ರದರ್ಶನ ನೀಡಿದರು. ಅವರಿಗೆ ಕಿಚ್ಚ ಚಪ್ಪಾಳೆ ನೀಡಿದರು. ಈ ವಾರ ಇಬ್ಬರಿಗೆ ಕಿಚ್ಚನ ಚಪ್ಪಾಳೆಯನ್ನು ಸುದೀಪ್ ನೀಡಿದರು. ಮೊದಲು ತಾಂಡವ್ ರಾಮ್ ಅವರಿಗೆ ಹಾಗೂ ನಂತರ ತಮ್ಮ ಎನರ್ಜಿಯಿಂದ ಇಡೀ ವಾರ ಎಂಟರ್ಟೈನ್​​ ಮಾಡಿದ ಸೌಂದರ್ಯಾ ಶೆಟ್ಟಿ ಅವರಿಗೆ ಸುದೀಪ್ ಚಪ್ಪಾಳೆ ನೀಡಿದರು.

ಇದನ್ನೂ ಓದಿ:ತಾಂಡವ್​​ಗೆ ಚಪ್ಪಾಳೆ ನೀಡಿ ಮೂರು ಕಾರಣ ಕೊಟ್ಟ ಕಿಚ್ಚ ಸುದೀಪ್

ಚಪ್ಪಾಳೆ ನೀಡಿದವರನ್ನು ಮಾತ್ರವೇ ಅಲ್ಲದೆ ಇನ್ನೂ ಕೆಲವರನ್ನು ವೈಯಕ್ತಿಕವಾಗಿ ಹೆಸರಿಸಿ ಅವರ ಆಟಕ್ಕೆ ಸುದೀಪ್ ಮೆಚ್ಚುಗೆ ವ್ಯಕ್ತಪಡಿಸಿದರು. ಎದುರಾಳಿ ತಂಡದಲ್ಲಿದ್ದ ಧನುಶ್ ಅವರ ಆಟದಲ್ಲಿದ್ದ ಡೆಡಿಕೇಷನ್ ಅನ್ನು ಸುದೀಪ್ ಮೆಚ್ಚಿದರು. ಹಗಲು ರಾತ್ರಿ ಎದ್ದಿದ್ದು ಕಾವಲು ಕಾದ ರೀತಿಯನ್ನು ಸುದೀಪ್ ಕೊಂಡಾಡಿದರು. ಬಳಿಕ ಯಶಸ್ ಅವರು ತಲೆ ಉಪಯೋಗಿಸಿ ಆಡಿದ ರೀತಿಯ ಬಗ್ಗೆಯೂ ಬಹಳ ಶ್ಲಾಘಿಸಿದರು. ಯಶಸ್ ಅವರನ್ನು ‘ಶೆರ್ಲಾಕ್ ಹೋಮ್​​’ಗೆ ಹೋಲಿಸಿದ ಸುದೀಪ್, ನೀವು ಬಹಳ ಬುದ್ಧಿವಂತರು ಬಹಳ ಚೆನ್ನಾಗಿ ತಲೆ ಓಡಿಸಿ ಆಟ ಆಡಿದಿರಿ’ ಎಂದು ಹೊಗಳಿದರು.

ಅವರನ್ನು ಮಾತ್ರವೇ ಅಲ್ಲದೆ ಇನ್ನೂ ಕೆಲವರ ಆಟವನ್ನು ಕೊಂಡಾಡಿದ ಸುದೀಪ್, ಈ ವಾರ ನಿಮ್ಮಗಳಿಂದಾಗಿ ತೆರೆಯ ಹಿಂದೆ ಕೆಲಸ ಮಾಡುವ ಸಿಬ್ಬಂದಿಗೂ ನಿದ್ದೆ ಇಲ್ಲದಂತಾಯ್ತು ಎಂದರು. ಮಾತ್ರವಲ್ಲದೆ ಬಿಗ್​​ಬಾಸ್ ಕಡೆಯಿಂದ ಇಡೀ ಮನೆಗೆ ಮೆಚ್ಚುಗೆ ಪತ್ರದ ಜೊತೆಗೆ ಎಲ್ಲರಿಗೂ ಸಿಹಿ ಸಹ ನೀಡಲಾಯ್ತು.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ