‘ನಾಯಕ ಆಗೋ ಜಾಗದಲ್ಲಿ ಜೋಕರ್​ ಆಗಬೇಡಿ’; ಅರುಣ್ ಸಾಗರ್​ಗೆ ಸುದೀಪ್ ಎಚ್ಚರಿಕೆ

‘ಬಿಗ್ ಬಾಸ್ ಕನ್ನಡ ಸೀಸನ್ 9’ರಲ್ಲಿ 18 ಸ್ಪರ್ಧಿಗಳು ಒಂದು ವಾರ ಪೂರ್ಣಗೊಳಿಸಿದ್ದಾರೆ. ಈ ವಾರ ಒಂದಷ್ಟು ಫನ್ ಇತ್ತು, ಕಿತ್ತಾಟ ಇತ್ತು. ವೀಕೆಂಡ್​ನಲ್ಲಿ ಸುದೀಪ್ ಅವರು ಬಂದು ಎಲ್ಲ ಸ್ಪರ್ಧಿಗಳ ಜತೆ ಮಾತುಕತೆ ನಡೆಸಿದ್ದಾರೆ. ಅಷ್ಟೇ ಅಲ್ಲ ಒಂದಷ್ಟು ಜನರಿಗೆ ಸಖತ್ ಕ್ಲಾಸ್ ತೆಗೆದುಕೊಂಡಿದ್ದಾರೆ. ಆ ಪೈಕಿ ಅರುಣ್ ಸಾಗರ್​ಗೆ ಸುದೀಪ್ ಖಡಕ್ ಎಚ್ಚರಿಕೆ ನೀಡಿದ್ದಾರೆ. ಇದಕ್ಕೆ ಅರುಣ್ ಸಾಗರ್ ನಡೆದುಕೊಂಡ ರೀತಿಯೇ ಕಾರಣ. ಇದಕ್ಕೆ ಸುದೀಪ್ (Sudeep) ಅವರು ಖಡಕ್ ಎಚ್ಚರಿಕೆ ನೀಡಿದ್ದಾರೆ. ಇದರಿಂದ ಅರುಣ್ ಸಾಗರ್ (Arun Sagar) ಕ್ಷಮೆ ಕೇಳಿದ್ದಾರೆ.

ಬಿಗ್ ಬಾಸ್ ಮನೆಯಲ್ಲಿ ಈ ವಾರ ಟಾಸ್ಕ್​ ಒಂದನ್ನು ನೀಡಲಾಗಿತ್ತು. ತ್ರಿಕೋನಾಕಾರದ ಬಾಕ್ಸ್​ನಲ್ಲಿ ಬಾಲ್​ಗಳನ್ನು ಜೋಡಿಸಿ ಪಿರಾಮಿಡ್ ಆಕಾರ ಮಾಡಬೇಕು.ಅರುಣ್ ಸಾಗರ್-ನವಾಜ್ ಹಾಗೂ ಆರ್ಯವರ್ಧನ್ ಗುರೂಜಿ-ದರ್ಶ್ ಆಟಕ್ಕೆ ಇಳಿದಿದ್ದರು. ಈ ಆಟ ಅವರಿಗೆ ಕಷ್ಟ ಎನಿಸಿತ್ತು. ಈ ವೇಳೆ ಕಾಮಿಡಿ ಮಾಡುತ್ತಾ ಸಮಯ ಕಳೆದಿದ್ದರು. ಅವರು ಜೋಕರ್​ನಂತೆ ನಡೆದುಕೊಂಡಿದ್ದರು. ಇದು ಮನೆಯವರ ಕೋಪಕ್ಕೂ ಕಾರಣವಾಗಿತ್ತು.

ಕಳಪೆ ಕೊಡುವಾಗ ಅನೇಕರು ಅರುಣ್ ಸಾಗರ್ ಬಗ್ಗೆ ಈ ವಿಚಾರದಲ್ಲಿ ಕಮೆಂಟ್ ಮಾಡಿದ್ದರು. ಸಾನ್ಯಾ, ರೂಪೇಶ್ ಶೆಟ್ಟಿ ಇದೇ ವಿಚಾರಕ್ಕೆ ಅರುಣ್ ಸಾಗರ್​ಗೆ ಕಳಪೆ ನೀಡಿದರು. ಇದಕ್ಕೆ ಅರುಣ್ ಸಾಗರ್ ಸಿಟ್ಟಾಗಿದ್ದರು. ರೂಪೇಶ್​ ವಿರುದ್ಧ ಪರೋಕ್ಷವಾಗಿ ಅರುಣ್ ಸಾಗರ್ ಸಿಡುಕಿದ್ದರು.

ಈ ಬಗ್ಗೆ ಸುದೀಪ್ ವೀಕೆಂಡ್​ನಲ್ಲಿ ಕ್ಲಾಸ್ ತೆಗೆದುಕೊಂಡಿದ್ದಾರೆ. ‘ಅರುಣ್ ಸಾಗರ್ ಅವರೇ ನೀವು ಫೆಂಟಾಸ್ಟಿಕ್ ಎಂಟರ್​ಟೇನರ್​. ಮನೆ ಒಳಗೆ ಇರುವ ಎಲ್ಲವನ್ನೂ ಸುಲಭವಾಗಿ ತೆಗೆದುಕೊಳ್ಳಬೇಡಿ. ಟಾಸ್ಕ್​ನ ಗಂಭೀರವಾಗಿ ತೆಗೆದುಕೊಳ್ಳಬೇಕಿತ್ತು. ಆದರೆ, ವಿದೂಷಕನಾದ್ರಿ. ನಾಯಕ ಆಗೋ ಜಾಗದಲ್ಲಿ ಜೋಕರ್ ಆಗಬೇಡಿ. ಜೋಕರ್ ಆಗೋ ಜಾಗದಲ್ಲಿ ನಾಯಕನಾಗಬೇಡಿ’ ಎಂದು ಸುದೀಪ್ ಎಚ್ಚರಿಕೆ ನೀಡಿದರು. ಅರುಣ್ ಸಾಗರ್ ಅವರಿಗೆ ತಪ್ಪಿನ ಅರಿವಾಗಿದೆ.