ಅಭಿಮಾನಿಯ ಕೈಚಳಕದಲಿ ಅರಳಿತು ಯಶ್ ಫ್ಯಾಮಿಲಿ ಚಿತ್ರ: ಪೆಂಟಿಂಗ್ ಕಂಡು ರಾಕಿ ಬಾಯ್ ಫಿದಾ
ಕಲಾವಿದರಾದ ಕೃಷ್ಣ ಅವರು ಯಶ್ ಅವರ ದೊಡ್ಡ ಅಭಿಮಾನಿಯಾಗಿದ್ದು, ಅವರ ಕೈಚಳಕದಲ್ಲಿ ಯಶ್ ಅವರ ಮುದ್ದಾದ ಫ್ಯಾಮಿಲಿ ಚಿತ್ರ ಅರಳಿದೆ.
ನಟ ರಾಕಿಂಗ್ ಸ್ಟಾರ್ ಯಶ್ (Yash) ಅವರ ‘ಕೆಜಿಎಫ್ 2’ ಚಿತ್ರ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಗೆಲುವು ಕಂಡಿದೆ. ಸದ್ಯ ಬೇರೆ ಬೇರೆ ರೀತಿಯ ಸ್ಕ್ರಿಪ್ಟ್ಗಳನ್ನು ಕೇಳುವುದರಲ್ಲಿ ಯಶ್ ಬ್ಯುಸಿ ಆಗಿದ್ದಾರೆ. ಜೊತೆಗೆ ತಮ್ಮ ಕುಟುಂಬದವರೊಂದಿಗೂ ಅವರು ಕಾಲ ಕಳೆಯುತ್ತಿದ್ದಾರೆ. ಆದರೆ ಸಿನಿಮಾ ವಿಚಾರವಾಗಿ ಇಲ್ಲಿಯವರೆಗೂ ಯಾವುದೇ ರೀತಿಯ ಮಾಹಿತಿ ಬಿಟ್ಟಿಕೊಟ್ಟಿಲ್ಲ ನಟ ಯಶ್. ಅವರ ಮುಂದಿನ ಚಿತ್ರ ಯಾವುದು? ಚಿತ್ರದ ನಿರ್ದೇಶಕರು ಯಾರು? ಯಾವ ರೀತಿಯ ಸ್ಕ್ರಿಪ್ಟ್ನ್ನು ಈ ಸಲ ಆಯ್ಕೆ ಮಾಡಿಕೊಳ್ಳುತ್ತಾರೆ ಹೀಗೆ ನೂರಾರು ಪ್ರಶ್ನೆಗಳು ಅವರ ಫ್ಯಾನ್ಸ್ ಕೇಳುತ್ತಿದ್ದಾರೆ. ತಮ್ಮ ನೆಚ್ಚಿನ ನಟರಿಗಾಗಿ ಏನು ಬೇಕಾದರು ಮಾಡಲು ಅಭಿಮಾನಿಗಳು ಸಿದ್ಧರಿರುತ್ತಾರೆ. ಒಂದು ಚಿತ್ರದ ಬಿಡುಗಡೆಯಿಂದ ಹಿಡಿದು ಕಟೌಟ್, ಹಾಲಿನ ಅಭಿಷೇಕ, ಊಟದ ವ್ಯವಸ್ಥೆ ಕೊನೆಗೆ ಚಿತ್ರವನ್ನು ಗೆಲ್ಲಿಸುವವರು ಅವರೇ.
‘ಕೆಜೆಎಫ್ 2’ ಚಿತ್ರ ಬಿಡುಗಡೆಯಾದಾಗ ಅಭಿಮಾನಿಗಳು ತಮ್ಮ ಪ್ರೀತಿ ಮತ್ತು ಅಭಿಮಾನವನ್ನು ತೋರಿಸಲು ಸುಮಾರು 20,700 ಪುಸ್ತಕಗಳನ್ನು ಬಳಸಿ ಯಶ್ ಅವರ ಬೃಹತ್ ಮೊಸಾಯಿಕ್ ಭಾವಚಿತ್ರ ರಚಿಸಿ ವಿಶ್ವ ದಾಖಲೆ ಬರೆದಿದ್ದರು. ಅದೇ ರೀತಿಯಾಗಿ ಇಲ್ಲೊಬ್ಬ ಅಭಿಮಾನಿ ತನ್ನ ನೆಚ್ಚಿನ ನಟ ಯಶ್ ಅವರಿಗೆ ಸಖತ್ ಗಿಫ್ಟ್ ಒಂದನ್ನು ನೀಡಿದ್ದಾರೆ. ಝಾರ್ಖಂಡ್ ಮೂಲದ ಕಲಾವಿದರಾದ ಕೃಷ್ಣ ಅವರು ಯಶ್ ಅವರ ದೊಡ್ಡ ಅಭಿಮಾನಿಯಾಗಿದ್ದು, ಅವರ ಕೈಯಿಂದ ಯಶ್ ಅವರ ಮುದ್ದಾದ ಫ್ಯಾಮಿಲಿ ಚಿತ್ರ ಅರಳಿದೆ.
ಅಭಿಮಾನಿ ಕೃಷ್ಣ ಅವರು ಯಶ್, ರಾಧಿಕಾ ಪಂಡಿತ ಮತ್ತು ಮಕ್ಕಳಾದ ಆಯ್ರಾ, ಯಥರ್ವ್ ಒಟ್ಟಿಗೆ ಒಂದೇ ಫ್ರೇಮ್ನಲ್ಲಿ ಚಿತ್ರಿಸಿದ್ದಾರೆ. ಜೊತೆಗೆ ಈ ಪೆಂಟಿಂಗ್ನ್ನು ಯಶ್ ಮತ್ತು ರಾಧಿಕಾ ದಂಪತಿ ಅವರನ್ನು ಭೇಟಿ ಮಾಡಿ ನೀಡಿದ್ದಾರೆ. ಈ ವಿಚಾರವನ್ನು ಕೃಷ್ಣ ಅವರು ತಮ್ಮ ಇನ್ಸ್ಟಾಗ್ರಾಮ್ನಲ್ಲಿ ವಿಡಿಯೋವನ್ನು ಹಂಚಿಕೊಂಡಿದ್ದಾರೆ. ಕಲಾವಿದ ಕೃಷ್ಣ ಅವರು ಯಶ್ ಅವರ ಕುಟುಂಬದ ಮುದ್ದಾದ ಪೆಂಟಿಂಗ್ನ್ನು ತುಂಬಾ ಎಂಜಾಯ್ ಮಾಡಿಕೊಂಡು ಬರೆದಿದ್ದಾರಂತೆ. ನಟ ಯಶ್ ಅವರು ಚಿತ್ರವನ್ನು ಪಡೆದುಕೊಂಡು ಕಲಾವಿದ ಕೃಷ್ಣ ಅವರನ್ನು ಮಾತನಾಡಿಸಿದ್ದು, ‘ಚಿತ್ರ ತುಂಬಾನೇ ಚೆನ್ನಾಗಿದೆ. ನನಗೆ ಇಷ್ಟವಾಯಿತು ಧನ್ಯವಾದ’ ಎಂದು ಹೇಳಿದ್ದಾರೆ. ಜೊತೆಗೆ ಕಲಾವಿದ ಕೃಷ್ಣ ಅವರ ಕಲೆಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಸದ್ಯ ಕೃಷ್ಣ ಅವರು ಬಿಡಿಸಿರುವ ಈ ಚಿತ್ರ ಎಲ್ಲೆಡೆ ವೈರಲ್ ಆಗುತ್ತಿದೆ.
ಮತ್ತಷ್ಟು ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
Published On - 8:21 pm, Sat, 26 November 22