ಆಲಿವ್ ಆಯಿಲ್‌ನಲ್ಲಿ ಅಡುಗೆ ಮಾಡುತ್ತಿದ್ದೀರಾ? ಬಳಸುವ ಮೊದಲು ಈ ವಿಷಯ ತಿಳಿಯಿರಿ!

ಆರೋಗ್ಯಕರ ಆಹಾರ ಪದ್ಧತಿಯ ಬಗ್ಗೆ ಮಾತನಾಡುವಾಗ ಆಲಿವ್ ಆಯಿಲ್‌ ಹೆಸರು ಸಾಮಾನ್ಯವಾಗಿ ಕೇಳಿಬರುತ್ತದೆ. ವಿಶೇಷವಾಗಿ ಎಕ್ಸ್ಟ್ರಾ ವರ್ಜಿನ್ ಆಲಿವ್ ಎಣ್ಣೆಯನ್ನು (Extra Virgin Olive Oil) ಅನ್ನು ಅದರ ನೈಸರ್ಗಿಕ ಸಸ್ಯ ಸಂಯುಕ್ತಗಳು ಮತ್ತು ಆ್ಯಂಟಿಆಕ್ಸಿಡೆಂಟ್‌ಗಳ ಕಾರಣದಿಂದ ಆರೋಗ್ಯಕರ ಆಯ್ಕೆಯೆಂದು ಪರಿಗಣಿಸಲಾಗುತ್ತದೆ. ಆದರೆ ಆಲಿವ್ ಎಣ್ಣೆ ಎಂದರೆ ಯಾವುದೇ ರೀತಿಯಲ್ಲಿ, ಯಾವುದೇ ಪ್ರಮಾಣದಲ್ಲಿ ಬಳಸಬಹುದು ಎಂದರ್ಥವಲ್ಲ. ಎಣ್ಣೆಯ ಪ್ರಕಾರ, ಪ್ರಮಾಣ ಮತ್ತು ಅಡುಗೆ ವಿಧಾನವೂ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತವೆ.

ಆಲಿವ್ ಆಯಿಲ್‌ನಲ್ಲಿ ಏನಿದೆ?

ಆಲಿವ್ ಆಯಿಲ್‌ನಲ್ಲಿ ಮುಖ್ಯವಾಗಿ ಕೊಬ್ಬುಗಳು (Unsaturated Fats) ಇರುತ್ತವೆ. ಬೆಣ್ಣೆ, ತುಪ್ಪದಂತಹ ಸ್ಯಾಚುರೇಟೆಡ್ ಫ್ಯಾಟ್‌ ಹೆಚ್ಚಿರುವ ಕೊಬ್ಬಿನ ಮೂಲಗಳ ಬದಲಿಗೆ ಸಸ್ಯ ಮೂಲದ ಎಣ್ಣೆಗಳನ್ನು ಮಿತವಾಗಿ ಬಳಸುವುದು ಆರೋಗ್ಯಕರ ಆಹಾರ ಪದ್ಧತಿಯ ಭಾಗವಾಗಬಹುದು.

ಎಕ್ಸ್ಟ್ರಾ ವರ್ಜಿನ್ ಆಲಿವ್ ಎಣ್ಣೆ ಏಕೆ ವಿಶೇಷ?

ಎಕ್ಸ್ಟ್ರಾ ವರ್ಜಿನ್ ಆಲಿವ್ ಎಣ್ಣೆ ಕಡಿಮೆ ಸಂಸ್ಕರಿಸಲಾದ ಆಲಿವ್ ಎಣ್ಣೆಯ ಒಂದು ವಿಧ. ಇದರಲ್ಲಿ ನೈಸರ್ಗಿಕ ಸಸ್ಯ ಸಂಯುಕ್ತಗಳು ಮತ್ತು ಆ್ಯಂಟಿಆಕ್ಸಿಡೆಂಟ್‌ಗಳು ಉಳಿದಿರುವ ಸಾಧ್ಯತೆ ಹೆಚ್ಚಿರುತ್ತದೆ. ಆದ್ದರಿಂದ ಸಲಾಡ್, ಡ್ರೆಸ್ಸಿಂಗ್, ಡಿಪ್‌ ಅಥವಾ ಅಡುಗೆ ಮುಗಿದ ನಂತರ ಆಹಾರದ ಮೇಲೆ ಸ್ವಲ್ಪ ಪ್ರಮಾಣದಲ್ಲಿ ಬಳಸಬಹುದು.

ಇದನ್ನೂ ಓದಿ: ಮಖಾನಾ ಆರೋಗ್ಯಕ್ಕೆ ನಿಜಕ್ಕೂ ಸೂಪರ್‌ಫುಡ್‌ ಆಗಿ ಕೆಲಸ ಮಾಡುತ್ತಾ? ತಿನ್ನುವ ಮುನ್ನ ತಿಳಿಯಬೇಕಾದ ಸಂಗತಿಗಳು

ಬಿಸಿ ಮಾಡಿದರೆ ಆಲಿವ್ ಎಣ್ಣೆ ವಿಷವಾಗುತ್ತದೆಯೇ?

ಆಲಿವ್ ಆಯಿಲ್‌ ಅನ್ನು ಬಿಸಿ ಮಾಡಿದ ತಕ್ಷಣ ಹಾನಿಕಾರಕವಾಗುತ್ತದೆ ಎಂದು ಹೇಳುವುದಕ್ಕೆ ಸಾಧ್ಯವಿಲ್ಲ. ಆದರೆ ಹೆಚ್ಚು ಉಷ್ಣತೆ ಮತ್ತು ದೀರ್ಘಕಾಲ ಬಿಸಿಗೆ ಒಳಪಡಿಸುವುದರಿಂದ ಎಣ್ಣೆಯಲ್ಲಿರುವ ಕೆಲವು ನೈಸರ್ಗಿಕ ಸಸ್ಯ ಸಂಯುಕ್ತಗಳು ಮತ್ತು ಆ್ಯಂಟಿಆಕ್ಸಿಡೆಂಟ್‌ಗಳು ಕಡಿಮೆಯಾಗಬಹುದು. ಹೀಗಾಗಿ ಎಕ್ಸ್ಟ್ರಾ ವರ್ಜಿನ್ ಆಲಿವ್ ಎಣ್ಣೆಯ ನೈಸರ್ಗಿಕ ಗುಣಗಳನ್ನು ಹೆಚ್ಚು ಉಳಿಸಿಕೊಳ್ಳಲು ಕಡಿಮೆ ಅಥವಾ ಮಧ್ಯಮ ಉರಿಯಲ್ಲಿ ಅಡುಗೆ ಮಾಡುವುದು ಒಳ್ಳೆಯದು. ಯಾವುದೇ ಎಣ್ಣೆಯನ್ನು ಹೊಗೆ ಬರುವಷ್ಟು ಬಿಸಿ ಮಾಡಬಾರದು. ಅದನ್ನು ಆದಷ್ಟು ತಪ್ಪಿಸುವುದು ಬಹಳ ಮುಖ್ಯ.

ಬೇರೆ ಎಣ್ಣೆಗಳನ್ನು ಬಳಸಬಹುದೇ?

ಖಂಡಿತ. ಕಡಲೆಕಾಯಿ ಎಣ್ಣೆ, ಸೂರ್ಯಕಾಂತಿ ಎಣ್ಣೆ, ಸೋಯಾಬೀನ್ ಎಣ್ಣೆ ಮತ್ತು ಕ್ಯಾನೋಲಾ ಎಣ್ಣೆ ಸೇರಿದಂತೆ ಇತರ ಸಸ್ಯ ಮೂಲದ ಎಣ್ಣೆಗಳೂ ಆಹಾರದಲ್ಲಿ ಆರೋಗ್ಯಕರ ಕೊಬ್ಬುಗಳನ್ನು ಒದಗಿಸಬಹುದು. ಹೀಗಾಗಿ ಆರೋಗ್ಯಕರ ಆಹಾರ ಎಂದರೆ ಕೇವಲ ಒಂದು ನಿರ್ದಿಷ್ಟ ಎಣ್ಣೆಯನ್ನು ಆಯ್ಕೆ ಮಾಡುವುದು ಅಲ್ಲ.

ನೆನಪಿಡಿ: ಆಲಿವ್ ಆಯಿಲ್ ಆರೋಗ್ಯಕರ ಕೊಬ್ಬಿನ ಮೂಲವಾಗಿದ್ದರೂ ಅದು ಕೂಡ ಎಣ್ಣೆಯೇ ಮತ್ತು ಕ್ಯಾಲೊರಿ ಹೆಚ್ಚಿರುವ ಆಹಾರ. ಆದ್ದರಿಂದ ಪ್ರಮಾಣ ನಿಯಂತ್ರಣ ಅತ್ಯಂತ ಮುಖ್ಯ. ಒಟ್ಟಾರೆ ಆಹಾರ ಪದ್ಧತಿಯಲ್ಲಿ ತರಕಾರಿಗಳು, ಹಣ್ಣುಗಳು, ಬೇಳೆಕಾಳುಗಳು, ಧಾನ್ಯಗಳು ಮತ್ತು ಬೀಜಗಳಿಗೆ ಆದ್ಯತೆ ನೀಡುವುದರ ಜೊತೆಗೆ ಎಣ್ಣೆಯ ಪ್ರಮಾಣವನ್ನೂ ಗಮನಿಸಿ.

ಆರೋಗ್ಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ