ಇನ್ಮುಂದೆ ಬೆಂಗಳೂರಿನಿಂದ ಮಂಗಳೂರಿಗೆ ಕೇವಲ 7 ಗಂಟೆಯಲ್ಲಿ ತಲುಪಬಹುದು: ವಿಮಾನ ಪ್ರಯಾಣಕ್ಕಿಂತ ಇದು ಲಾಭದಾಯಕವೇ?

ಬೆಂಗಳೂರು, ನ.13: ರಾಜಧಾನಿ ಬೆಂಗಳೂರು ಮತ್ತು ಕರಾವಳಿ ನಗರಿ ಮಂಗಳೂರಿನ ನಡುವಿನ ಪ್ರಯಾಣದ ಅವಧಿಯನ್ನು ಗಣನೀಯವಾಗಿ ತಗ್ಗಿಸುವ ಬೆಂಗಳೂರು-ಮಂಗಳೂರು ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲು ಪ್ರಯಾಣಿಕರಲ್ಲಿ ಭಾರಿ ನಿರೀಕ್ಷೆ ಹುಟ್ಟಿಸಿತ್ತು. ಇದೀಗ ಅದಕ್ಕೆ ಪ್ರಧಾನಿ ಮೋದಿ ಚಾಲನೆ ನೀಡಿದ್ದಾರೆ, ಅವರು ಇಂದು (ನ.13) ಬೆಂಗಳೂರು-ಮಂಗಳೂರು-ಮಡಗಾಂವ್ ವಂದೇ ಭಾರತ್​​ಗೆ ಹಸಿರು ನಿಶಾನೆ ತೋರಿಸಿದ್ದಾರೆ. ಮಂಗಳೂರು, ಉಡುಪಿ ಸೇರಿದಂತೆ ಕಾರವಾರ ಮತ್ತು ಗೋವಾ ಭಾಗದ ಕರಾವಳಿ ಪ್ರದೇಶಗಳಿಗೆ ಇದು ವಿಶ್ವದರ್ಜೆಯ ವೇಗದ ಸಂಪರ್ಕ ಕಲ್ಪಿಸಲಿದೆ ಎಂದು ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ತಿಳಿಸಿದ್ದಾರೆ. ವಂದೇ ಭಾರತ್ ರೈಲಿನ ಪ್ರಾಯೋಗಿಕ ಸಂಚಾರದ ಸಮಯವನ್ನು ಗಮನಿಸಿದರೆ, ಪ್ರಸ್ತುತ ಸಂಚರಿಸುತ್ತಿರುವ ಸಾಮಾನ್ಯ ರೈಲುಗಳಿಗೆ ಹೋಲಿಸಿದರೆ ಪ್ರಯಾಣಿಕರಿಗೆ ಬರೋಬ್ಬರಿ 2 ರಿಂದ 9 ಗಂಟೆಗಳವರೆಗೆ ಸಮಯ ಉಳಿತಾಯವಾಗಲಿದೆ.

ಪ್ರಾಯೋಗಿಕ ಸಂಚಾರದಲ್ಲೇ ದಾಖಲೆ: ಕೇವಲ 6 ಗಂಟೆ 49 ನಿಮಿಷದಲ್ಲಿ ಮಂಗಳೂರು-ಬೆಂಗಳೂರು ಪ್ರಯಾಣ

ಸೆಪ್ಟೆಂಬರ್ 5ರಂದು ನಡೆದ ಮೊದಲ ಪ್ರಾಯೋಗಿಕ ಸಂಚಾರದ ವೇಳೆ ಸಕಲೇಶಪುರ-ಸುಬ್ರಹ್ಮಣ್ಯ ರಸ್ತೆ ಘಟ್ಟ ಪ್ರದೇಶದಲ್ಲಿ ಓವರ್‌ಹೆಡ್ ತಾಂತ್ರಿಕ ಅಡಚಣೆಯಿಂದಾಗಿ ರೈಲು ಸುಮಾರು 2 ಗಂಟೆ ತಡವಾಗಿತ್ತು. ಆದರೆ, ಸೆಪ್ಟೆಂಬರ್ 10ರಂದು ನಡೆದ ಎರಡನೇ ಪ್ರಾಯೋಗಿಕ ಸಂಚಾರ ಅತ್ಯಂತ ಯಶಸ್ವಿಯಾಗಿ ಪೂರ್ಣಗೊಂಡಿದೆ. 16 ಬೋಗಿಗಳ ವಂದೇ ಭಾರತ್ ರೈಲು ಬೆಳಿಗ್ಗೆ 6:50ಕ್ಕೆ ಯಶವಂತಪುರದಿಂದ ಹೊರಟು, ನಿಗದಿತ ಸಮಯಕ್ಕಿಂತ (ಮಧ್ಯಾಹ್ನ 2:50) ಮುಂಚಿತವಾಗಿಯೇ ಅಂದರೆ ಮಧ್ಯಾಹ್ನ 1:55ಕ್ಕೆ (ಕೇವಲ 7 ಗಂಟೆ 5 ನಿಮಿಷಗಳಲ್ಲಿ) ಮಂಗಳೂರು ಜಂಕ್ಷನ್ ತಲುಪಿದೆ. ಇನ್ನು ಮರಳಿ ಮಧ್ಯಾಹ್ನ 2:25ಕ್ಕೆ ಮಂಗಳೂರಿನಿಂದ ಹೊರಟು ರಾತ್ರಿ 9:14ಕ್ಕೆ ಯಶವಂತಪುರ ತಲುಪಿದ್ದು, ಕೇವಲ 6 ಗಂಟೆ 49 ನಿಮಿಷಗಳಲ್ಲಿ ಪ್ರಯಾಣ ಪೂರ್ಣಗೊಳಿಸಿದೆ.

ಇತರ ರೈಲುಗಳಿಗೆ ಹೋಲಿಸಿದರೆ ವಂದೇ ಭಾರತ್ ಎಷ್ಟು ವೇಗ?

ಸಾಮಾನ್ಯವಾಗಿ ಬೆಂಗಳೂರು-ಮಂಗಳೂರು ನಡುವಿನ ರೈಲು ಪ್ರಯಾಣಕ್ಕೆ 9 ರಿಂದ 16 ಗಂಟೆಗಳ ಕಾಲಾವಕಾಶ ಬೇಕಾಗುತ್ತದೆ. ವಂದೇ ಭಾರತ್ ರೈಲಿನ 7 ಗಂಟೆಗಳ ಪ್ರಾಯೋಗಿಕ ಅವಧಿಗೆ ಹೋಲಿಸಿದರೆ ಉಳಿತಾಯವಾಗುವ ಸಮಯದ ವಿವರ ಇಲ್ಲಿದೆ.

(ಗಮನಿಸಿ: ಇದು ಪ್ರಾಯೋಗಿಕ ಸಂಚಾರದ ಸಮಯವನ್ನು ಆಧರಿಸಿದ ಹೋಲಿಕೆಯಾಗಿದ್ದು, ರೈಲ್ವೆ ಇಲಾಖೆ ಬಿಡುಗಡೆ ಮಾಡುವ ಅಂತಿಮ ವೇಳಾಪಟ್ಟಿಯ ಮೇಲೆ ನಿಖರ ಸಮಯ ಅವಲಂಬಿತವಾಗಿರುತ್ತದೆ).

ಬೆಂಗಳೂರು-ಮಂಗಳೂರು ವಂದೇ ಭಾರತ್ vs ವಿಮಾನ ಪ್ರಯಾಣ: ಯಾವುದು ಉತ್ತಮ?

ಬೆಂಗಳೂರು ಮತ್ತು ಮಂಗಳೂರು ನಡುವಿನ ನೇರ ವಿಮಾನ ಪ್ರಯಾಣಕ್ಕೆ ಕೇವಲ 1 ಗಂಟೆ 5 ನಿಮಿಷ ಸಾಕಾಗುತ್ತದೆ. ಅಂದರೆ ವಂದೇ ಭಾರತ್ ರೈಲಿಗಿಂತ ಸುಮಾರು 6 ಗಂಟೆ ಮುಂಚಿತವಾಗಿ ವಿಮಾನ ತಲುಪುತ್ತದೆ. ಆದರೆ, ವಿಮಾನ ನಿಲ್ದಾಣಕ್ಕೆ ತೆರಳುವ ಪ್ರಯಾಣದ ಅವಧಿ, ಚೆಕ್-ಇನ್ ಮತ್ತು ಭದ್ರತಾ ತಪಾಸಣೆಯ ಸಮಯವನ್ನು ಲೆಕ್ಕ ಹಾಕಿದರೆ ನಗರದ ಮಧ್ಯಭಾಗದಿಂದಲೇ ಹೊರಡುವ ರೈಲು ಪ್ರಯಾಣ ಹೆಚ್ಚು ಆರಾಮದಾಯಕವಾಗಿರುತ್ತದೆ. ವಿಮಾನ ಟಿಕೆಟ್ ದರಗಳು ಸಾಮಾನ್ಯವಾಗಿ ಏಕಮುಖ ಪ್ರಯಾಣಕ್ಕೆ ₹4,530 ರಿಂದ ₹4,679 ರಷ್ಟಿದ್ದು, ಕೆಲವೊಮ್ಮೆ ಕನಿಷ್ಠ 3,033 ರೂ. ರಿಂದ ಆರಂಭವಾಗುತ್ತವೆ (ರಿಟರ್ನ್ ಟಿಕೆಟ್ 5,119 ರಿಂದ ಆರಂಭ).

ವೇಳಾಪಟ್ಟಿ ಮತ್ತು ಸಂಚಾರದ ದಿನಗಳು (ವಾರದಲ್ಲಿ 6 ದಿನ ಸೇವೆ):

ಈ ನೂತನ ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲು ವಾರದಲ್ಲಿ ಆರು ದಿನಗಳ ಕಾಲ ಎರಡೂ ದಿಕ್ಕುಗಳಲ್ಲಿ ಸಂಚರಿಸಲಿದೆ. ಯಶವಂತಪುರ-ಮಂಗಳೂರು-ಮಡಗಾಂವ್ ವಂದೇ ಭಾರತ್ ಎಕ್ಸ್‌ಪ್ರೆಸ್ (ರೈಲು ಸಂಖ್ಯೆ: 26655 / 26656) ರೈಲಿನ ನಿಯಮಿತ ವಾಣಿಜ್ಯ ಸಂಚಾರವು ನವೆಂಬರ್ 15, 2026ರಿಂದ ಅಧಿಕೃತವಾಗಿ ಆರಂಭವಾಗಲಿದೆ.

ಮಾರ್ಗ ಮತ್ತು 12 ನಿಲುಗಡೆ ನಿಲ್ದಾಣಗಳು:

ಪಶ್ಚಿಮ ಘಟ್ಟದ ರಮಣೀಯ ಪ್ರಕೃತಿ ಮತ್ತು ಕರಾವಳಿ ಕರ್ನಾಟಕದ ತೀರ ಪ್ರದೇಶದ ಮೂಲಕ ಸಾಗುವ ಈ ರೈಲಿಗೆ ಯಶವಂತಪುರ ಮತ್ತು ಮಡಗಾಂವ್ ನಡುವೆ ಒಟ್ಟು 12 ನಿಲ್ದಾಣಗಳಲ್ಲಿ ವಾಣಿಜ್ಯ ನಿಲುಗಡೆ ನೀಡಲಾಗಿದೆ. ಶ್ರವಣಬೆಳಗೊಳ, ಹಾಸನ, ಸಕಲೇಶಪುರ, ಸುಬ್ರಹ್ಮಣ್ಯ ರೋಡ್ ಮತ್ತು ಕಬಕ ಪುತ್ತೂರು. ಮಂಗಳೂರು ಜಂಕ್ಷನ್, ಉಡುಪಿ, ಕುಂದಾಪುರ, ಬೈಂದೂರು (ಮೂಕಾಂಬಿಕಾ ರೋಡ್), ಮುರುಡೇಶ್ವರ, ಗೋಕರ್ಣ ರೋಡ್ ಮತ್ತು ಕಾರವಾರ.

ಇದನ್ನೂ ಓದಿ: ಬೆಂಗಳೂರು-ಮಡಗಾಂವ್ ವಂದೇ ಭಾರತ್​​ಗೆ ಚಾಲನೆ​​ ಸೇರಿ ವಿವಿಧ ರೈಲ್ವೇ ಕಾಮಗಾರಿಗಳ ಲೋಕಾರ್ಪಣೆಗೊಳಿಸಿದ ಪ್ರಧಾನಿ ಮೋದಿ

ಟಿಕೆಟ್ ದರ ಮತ್ತು ಪ್ರಮುಖ ಬದಲಾವಣೆಗಳು:

ಬೆಂಗಳೂರು – ಮಂಗಳೂರು ಟಿಕೆಟ್ ದರ: ವರದಿಗಳ ಪ್ರಕಾರ, ಬೆಂಗಳೂರಿನಿಂದ ಮಂಗಳೂರಿಗೆ AC ಚೇರ್ ಕಾರ್ (CC) ಟಿಕೆಟ್ ದರ ಸುಮಾರು ₹809 ಹಾಗೂ ಎಕ್ಸಿಕ್ಯೂಟಿವ್ ಚೇರ್ ಕಾರ್ (EC) ದರ ಸುಮಾರು ₹1,561 ಇರಲಿದೆ.

ಬೆಂಗಳೂರು – ಮಡಗಾಂವ್ (ಗೋವಾ) ಟಿಕೆಟ್ ದರ: ಯಶವಂತಪುರದಿಂದ ಮಡಗಾಂವ್‌ಗೆ ತಾತ್ಕಾಲಿಕವಾಗಿ AC ಚೇರ್ ಕಾರ್ ₹1,369 ಮತ್ತು ಎಕ್ಸಿಕ್ಯೂಟಿವ್ ಚೇರ್ ಕಾರ್ ₹2,795 ನಿಗದಿಯಾಗಿದೆ (ಗಮನಿಸಿ: ಐಆರ್‌ಸಿಟಿಸಿ ಅಧಿಕೃತ ಪೋರ್ಟಲ್‌ನಲ್ಲಿ ಅಂತಿಮ ದರ ಮತ್ತು ಕೇಟರಿಂಗ್ ಶುಲ್ಕದೊಂದಿಗೆ ₹2,200 ರಿಂದ ₹3,865 ರವರೆಗೂ ವ್ಯತ್ಯಾಸವಿರಬಹುದು).

ಹಳೆಯ ರೈಲು ಸೇವೆ ಸ್ಥಗಿತ: ಬೆಂಗಳೂರು-ಮಡಗಾಂವ್ ವಿಸ್ತರಿತ ಮಾರ್ಗದ ಈ ಹೊಸ ರೈಲು ಆರಂಭವಾಗುತ್ತಿರುವ ಹಿನ್ನೆಲೆಯಲ್ಲಿ, ಈ ಹಿಂದೆ ಸಂಚರಿಸುತ್ತಿದ್ದ ಮಂಗಳೂರು ಸೆಂಟ್ರಲ್ – ಮಡಗಾಂವ್ ವಂದೇ ಭಾರತ್ ಎಕ್ಸ್‌ಪ್ರೆಸ್ (20645/20646) ಸೇವೆಯನ್ನು ಸ್ಥಗಿತಗೊಳಿಸಲಾಗಿದೆ.

ಟಿಕೆಟ್ ಬುಕಿಂಗ್: ಪ್ರಯಾಣಿಕರು ಐಆರ್‌ಸಿಟಿಸಿ (IRCTC) ವೆಬ್‌ಸೈಟ್ ಅಥವಾ ಮೊಬೈಲ್ ಆ್ಯಪ್ ಮೂಲಕ ನೇರವಾಗಿ ಟಿಕೆಟ್ ಕಾಯ್ದಿರಿಸಬಹುದು ಹಾಗೂ ಸೀಟುಗಳ ಲಭ್ಯತೆಯನ್ನು ಪರಿಶೀಲಿಸಬಹುದು.

ರಾಜ್ಯದ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ