‘ಸ್ಟಿಂಗ್​ ಪ್ರಕರಣದಿಂದ ಸರ್ಕಾರಕ್ಕೆ ಡ್ಯಾಮೇಜ್’: ಶೀಘ್ರವೇ ತನಿಖೆ ಪೂರ್ಣ ಎಂದ ಗೃಹ ಸಚಿವ ಪ್ರಿಯಾಂಕ್​​ ಖರ್ಗೆ

ಬೆಂಗಳೂರು, ಅಕ್ಟೋಬರ್​​ 23: ಸ್ಟಿಂಗ್​ ಆಪರೇಷನ್​ ಕೇಸ್ ವಿಚಾರವಾಗಿ ಗೃಹ ಸಚಿವ ಪ್ರಿಯಾಂಕ್​​ ಖರ್ಗೆ ಬಿಗ್​​ ಅಪ್ಟೇಟ್​ ನೀಡಿದ್ದು, ಕೆಲವು ಲೀಡ್ ಸಿಕ್ಕಿರುವ ಕಾರಣ ತನಿಖೆ ಶೀಘ್ರವೇ ಮುಗಿಯಲಿದೆ ಎಂದವರು ತಿಳಿಸಿದ್ದಾರೆ. ಸ್ಟಿಂಗ್​ ಪ್ರಕರಣದಿಂದಾಗಿ ಸರ್ಕಾರಕ್ಕೆ ಡ್ಯಾಮೇಜ್​ ಆಗಿದ್ದು, ಸಿದ್ದರಾಮಯ್ಯನವರು ನಮ್ಮ ಪಕ್ಷದ ದೊಡ್ಡ ನಾಯಕರು. ಅವರಿಗೆ ಲಕ್ಷಾಂತರ ಅಭಿಮಾನಿಗಳಿದ್ದು, ಸಿದ್ದರಾಮಯ್ಯರ ಮೇಲಿನ ಕಳಂಕ ಸರಿಸೋದು ನಮ್ಮ ಕೆಲಸವಾಗಿದೆ. ಸ್ಟಿಂಗ್ ಪ್ರಕರಣದಲ್ಲಿ ಕಾಂಗ್ರೆಸ್ ಶಾಸಕರು, ಸಂಸದರು ಇಲ್ಲ. ಯಾರೋ ಮುಖಂಡರು ಇದನ್ನು ಮಾಡಿದ್ದು, ಇನ್ನೊಂದು ವಾರದಲ್ಲಿ ಎಲ್ಲವನ್ನೂ ಪತ್ತೆ ಹಚ್ಚುತ್ತೇವೆ ಎಂದವರು ಮಾಹಿತಿ ನೀಡಿದ್ದಾರೆ.

‘ಪಾರದರ್ಶಕವಾಗಿ ಸ್ಟಿಂಗ್ ಕೇಸ್​ನ ತನಿಖೆ’

ಎಸ್​ಐಟಿ ಬೇಡ ಎಂದು ಸಿದ್ದರಾಮಯ್ಯ ಅವರೇ ಹೇಳಿದ್ದು, ಸ್ಟಿಂಗ್ ಕೇಸ್​ನ ತನಿಖೆ ಪಾರದರ್ಶಕವಾಗಿ ನಡೆಯುತ್ತಿದೆ. ಸ್ಟಿಂಗ್ ಆಪರೇಷನ್ ಮಾಡಿದ್ಯಾರು? ಯಾಕೆ ಮಾಡಿದರು? ಎಲ್ಲಿ ಮಾಡಿದರು? ಯಾರು ಪ್ರೋತ್ಸಾಹ ನೀಡಿದರು? ವಿಡಿಯೋ ಅಪ್‌ಲೋಡ್ ಮಾಡಿದ್ಯಾರು? ಎಂಬ ಎಲ್ಲಾ ಮಾಹಿತಿ ಗೊತ್ತಾಗಲಿದೆ. ಸಿದ್ದರಾಮಯ್ಯ ತನಗೆ ತನಿಖೆಯ ಜವಾಬ್ದಾರಿ ನೀಡಿದ್ದಾರೆ. ಸಿದ್ದರಾಮಯ್ಯ ಘನತೆಗಿಂತ ದೊಡ್ಡದು ಯಾವುದೂ ಇಲ್ಲ. ಮೊದಲೇ ಹೇಳಿದ್ದೆ ಇದು ಕಟ್ಟುಕಥೆ, ಫೇಕ್ ಕೇಸ್ ಎಂದು. ಈ ಹೇಳಿಕೆಗೆ ಆಧಾರವಾಗಿ ಕೆಲ ಮಾಹಿತಿ ಇದ್ದು, ಅಗತ್ಯವಿದ್ದಾಗ ಪುರಾವೆ ನೀಡುತ್ತೇನೆ ಎಂದು ಪ್ರಿಯಾಂಕ್ ತಿಳಿಸಿದ್ದಾರೆ.

ಇದನ್ನೂ ಓದಿ:  ಸ್ಟಿಂಗ್ ಆಪರೇಷನ್ ಮಾಡಿರುವುದು ಇವರೇ: ಲೇಡಿ ಸೇರಿ ಇಬ್ಬರ ಹೆಸರು ಬಹಿರಂಗಪಡಿಸಿದ ಸಿದ್ದರಾಮಯ್ಯ

‘ಸ್ಟಿಂಗ್​​​ ಪ್ರಕರಣದ ಹಿಂದೆ ರಾಜಕೀಯ ಉದ್ದೇಶ’

ಮಾಜಿ ಸಿಎಂ ಸಿದ್ದರಾಮಯ್ಯ ಬಗ್ಗೆ ನಮಗೆ ಕಾಳಜಿ ಇದೆ. ನುಡಿದಂತೆ ನಡೆದ ಸರ್ಕಾರ ಎನ್ನಲು ಸಿದ್ದರಾಮಯ್ಯ ಕಾರಣ. ಇದರಲ್ಲಿ ಆಂತರಿಕ ರಾಜಕೀಯ ಅಂತ ಏನಿಲ್ಲ. ಶಾಸಕ, ಪರಿಷತ್ ಸದಸ್ಯ ಆಗಬೇಕು ಅಂತ ಮಾಡಿದ್ದಾರೆ ಎಂದೂ ಪ್ರಿಯಾಂಕ್​​ ಹೇಳಿದ್ದಾರೆ. ಈ ಸ್ಟಿಂಗ್​​​ ಪ್ರಕರಣದ ಹಿಂದೆ ರಾಜಕೀಯ ಉದ್ದೇಶವಿದ್ದು, ಕಾಂಗ್ರೆಸ್​ಗೆ ಕೆಟ್ಟಹೆಸರು ತರಬೇಕೆಂದೇ ನಡೆಸಲಾಗಿದೆ. ಸಿದ್ದರಾಮಯ್ಯ ಮತ್ತು ಡಿಕೆಶಿ ಅವರ ಪ್ರತಿಷ್ಠೆಗೆ ಧಕ್ಕೆ ತರಲು ಯತ್ನ ನಡೆದಿದ್ದು, ವಿಡಿಯೋ ಖಾಸಗಿ ನೆಟ್‌ವರ್ಕ್ ಅಥವಾ ಮೊಬೈಲ್ ಮೂಲಕ ಎಲ್ಲಿಂದಲಾದರೂ ಅಪ್‌ಲೋಡ್ ಮಾಡಲು ಸಾಧ್ಯವಿದೆ. ರಾಜಕೀಯವಾಗಿ ಮೇಲೇರಲು, ಶಾಸಕ, ಪರಿಷತ್ ಸದಸ್ಯ, ಸಂಸದ, ನಿಗಮ ಮಂಡಳಿ ಅಧ್ಯಕ್ಷರಾಗಲು ಬಯಸುವರುಇಂತಹ ಕೃತ್ಯಗಳಲ್ಲಿ ತೊಡಗಿರಬಹುದು ಎಂದು ಗೃಹ ಸಚಿವರು ಹೇಳಿದ್ದಾರೆ.

‘ಸ್ಟಿಂಗ್​​ ಕೇಸ್​​ ಸಂಬಂಧ ಹಲವರ ವಿಚಾರಣೆ’

ಪ್ರಕರಣಕ್ಕೆ ಸಂಬಂಧಿಸಿದಂತೆ ಹಿರಿಯ ಪತ್ರಕರ್ತರು ಮತ್ತು ಕಿರಿಯ ಪತ್ರಕರ್ತರನ್ನು ವಿಚಾರಣೆಗೆ ಕರೆಯಲಾಗಿದೆ. ಅನುಮಾನವಿರುವವರು ಮತ್ತು ಸಂಬಂಧಿತ ವ್ಯಕ್ತಿಗಳನ್ನು ವಿಚಾರಣೆ ನಡೆಸಲಾಗಿದೆ. ವಿವಿಧ ವ್ಯಕ್ತಿಗಳ ಹೇಳಿಕೆಗಳನ್ನು ದಾಖಲಿಸಿಕೊಳ್ಳಲಾಗಿದ್ದು, ವಿಚಾರಣೆಯ ವಿಡಿಯೋ ರೆಕಾರ್ಡಿಂಗ್ ಮಾಡಲಾಗಿದೆ. ಪ್ರಕರಣಕ್ಕೆ ಸಂಬಂಧಿಸಿದ ಸಾಕ್ಷ್ಯಗಳನ್ನು ವಿಧಿವಿಜ್ಞಾನ ಪ್ರಯೋಗಾಲಯಕ್ಕೆ (FSL) ಕಳುಹಿಸಲಾಗಿದ್ದು, ಅಗತ್ಯ ಪ್ರಕ್ರಿಯೆಗಳಿಗೆ ಸಮಯ ಬೇಕಾಗುತ್ತದೆ ಎಂದವರು ಹೇಳಿದ್ದಾರೆ.

‘ಹೆಚ್​​ಡಿಕೆ ಆರೋಪಗಳಿಗಿಂತ ಸಾಕ್ಷ್ಯಗಳೇ ಮುಖ್ಯ’

ಸ್ಟಿಂಗ್ ಆಪರೇಷನ್ ಪ್ರಕರಣದ ಕುರಿತು ಕೇಂದ್ರ ಸಚಿವ ಹೆಚ್‌.ಡಿ.ಕುಮಾರಸ್ವಾಮಿ ಆರೋಪಗಳ ಬಗ್ಗೆಯೂ ಪ್ರತಿಕ್ರಿಯಿಸಿರುವ ಪ್ರಿಯಾಂಕ್​​, ಆರೋಪ ಮಾಡುತ್ತಿರುವವರು ತನಿಖೆಗೆ ಸಹಕರಿಸಬೇಕು. ನೋಟಿಸ್ ನೀಡಿದ ವ್ಯಕ್ತಿಗಳು ವಿಚಾರಣೆಗೆ ಹಾಜರಾಗಿಲ್ಲ. ಮರೆಮಾಚಲು ಏನೂ ಇಲ್ಲದಿದ್ದರೆ ವಿಚಾರಣೆಯಿಂದ ದೂರ ಉಳಿಯುವುದು ಏಕೆ? ಕುಮಾರಸ್ವಾಮಿ ಅವರು ಸಂಬಂಧಪಟ್ಟ ವ್ಯಕ್ತಿಗಳಿಗೆ ರಕ್ಷಣೆ ನೀಡುತ್ತಿದ್ದಾರೆಯೇ? ಎಂದು ಪ್ರಶ್ನಿಸಿದ್ದಾರೆ. ಪ್ರಕರಣದ ಕುರಿತು ಕುಮಾರಸ್ವಾಮಿ ಮಾಡುತ್ತಿರುವ ಆರೋಪಗಳಿಗಿಂತ ತನಿಖೆಯಲ್ಲಿ ಸಿಗುವ ಸಾಕ್ಷ್ಯಗಳೇ ಮುಖ್ಯ. ತನಿಖೆಯ ಸಂಪೂರ್ಣ ವಿವರಗಳು ಹೊರ ಬಂದಾಗ ಯಾರು ಸತ್ಯ ಹೇಳುತ್ತಿದ್ದಾರೆ ಎಂಬುದು ರಾಜ್ಯದ ಜನರಿಗೆ ತಿಳಿಯಲಿದೆ ಎಂದು ಗೃಹಸಚಿವರು ಹೇಳಿದ್ದಾರೆ.

ಮತ್ತಷ್ಟು ಸುದ್ದಿ ಓದಲು ಇಲ್ಲಿ ಕ್ಲಿಕ್​​ ಮಾಡಿ.

Published On - 6:19 pm, Fri, 23 October 26