ಮೊದಲ ಸ್ವದೇಶಿ ವಿಮಾನವಾಹಕ ನೌಕೆ ಐಎನ್‌ಎಸ್ ವಿಕ್ರಾಂತ್ ಹಿಂದಿದೆ ಮಕರಂದ ಹಂಪಿಕೊಳಿ ಎಂಬ ಕನ್ನಡಿಗನ ಪರಿಶ್ರಮ

ಇತ್ತೀಚೆಗಷ್ಟೇ ಸ್ವದೇಶಿ ನಿರ್ಮಿತ ಐಎನ್ಎಸ್ ವಿಕ್ರಾಂತ್(INS Vikrant) ಯುದ್ಧನೌಕೆಯನ್ನು ಪ್ರಧಾನಿ ನರೇಂದ್ರ ಮೋದಿ(Narendra Modi) ಅನಾವರಣಗೊಳಿಸಿದ್ದರು. ಸಾಕಷ್ಟು ವಿಶೇಷತೆಗಳ ಕಾರಣಕ್ಕಾಗಿ ಐಎನ್ಎಸ್ ವಿಕ್ರಾಂತ ಸುದ್ದಿಯಾಗಿದೆ. ಅಂದಿನಿಂದ ಈ ವಿಕ್ರಾಂತ ಜೊತೆಗೆ ಇದರ ರೂವಾರಿಯಾಗಿರೋ ದಕ್ಷಿಣ ನೌಕಾಪಡೆಯ ಮುಖ್ಯಸ್ಥ ವೈಸ್ ಅಡ್ಮಿರಲ್ ಎಂ. ಎ. ಮಕರಂದ(Makarand Hampiholi) ಕೂಡ ರಾಷ್ಟ್ರಮಟ್ಟದಲ್ಲಿ ಸುದ್ದಿಯಾಗುತ್ತಿದ್ದಾರೆ. ಈ ಯುದ್ಧ ನೌಕೆಯ ಸಂಪೂರ್ಣ ಉಸ್ತುವಾರಿ ವಹಿಸಿಕೊಂಡಿರೋ ಅವರು ನಮ್ಮ ಕನ್ನಡಿಗರು ಅನ್ನೋದು ಸಾಕಷ್ಟು ಜನರಿಗೆ ಗೊತ್ತಿಲ್ಲ. ಅದರಲ್ಲೂ ವಿದ್ಯಾಕಾಶಿ ಧಾರವಾಡದ ಈ ಮಕರಂದ್, ಇದೀಗ ರಾಜ್ಯವೇ ತಲೆ ಎತ್ತಿ ನಿಲ್ಲುವಂತೆ ಮಾಡಿದ್ದಾರೆ. ಇಡೀ ಜಗತ್ತಿನ ಗಮನ ಸೆಳೆದಿರೋ ಐಎನ್ಎಸ್ ವಿಕ್ರಾಂತ ನೌಕೆಯ ಹಿಂದಿನ ರೂವಾರಿ ನಮ್ಮ ವೀರ ಕನ್ನಡಿಗ ಮಕರಂದ ಅನ್ನೋದೇ ಹೆಮ್ಮೆಯ ಸಂಗತಿ.

ವೈಸ್ ಅಡ್ಮಿರಲ್ ಮಕರಂದ ಹಂಪಿಕೊಳಿ ಹೆಮ್ಮೆಯ ಕನ್ನಡಿಗ, ಧಾರವಾಡಿಗ

ಐಎನ್ಎಸ್ ವಿಕ್ರಾಂತ್ ಸ್ವದೇಶಿ ಬಲದ ಮೇಲೆಯೇ ಮೇಡ್ ಇನ್ ಇಂಡಿಯಾ ಘೋಷವಾಕ್ಯದ ಮೇಲೆಯೇ ನಿರ್ಮಾಣವಾಗಿರೋ ಬಲಿಷ್ಠ ಯುದ್ಧ ನೌಕೆ. ಕೊಚ್ಚಿಯ ದಕ್ಷಿಣ ನೌಕಾ ಪಡೆಯ ಬಂದರಿನಲ್ಲಿ ಇತ್ತೀಚೆಗಷ್ಟೇ ಪ್ರಧಾನಿ ನರೇಂದ್ರ ಮೋದಿ ಈ ನೌಕೆಯನ್ನು ಅನಾವರಣಗೊಳಿಸಿದ್ದರು. ಯುದ್ಧ ವಿಮಾನ ವಾಹನದ ಜೊತೆಗೆ ಯುದ್ಧ ನೌಕೆಯೂ ಆಗಿ ಕೆಲಸ ಮಾಡಲಿರೋ ವಿಕ್ರಾಂತ ಬಗ್ಗೆ ರಾಷ್ಟ್ರಮಟ್ಟದಲ್ಲಿ ಸುದ್ದಿಯಾದಾಗ ಇದರ ಬಗ್ಗೆ ಸಂಪೂರ್ಣ ಮಾಹಿತಿ ನೀಡಿದ್ದು ದಕ್ಷಿಣ ನೌಕಾ ಪಡೆಯ ಕಮಾಂಡಿಂಗ್ ಅಧಿಕಾರಿ, ನೌಕಾಪಡೆಯ ಪ್ಲ್ಯಾಗ್ ಚೀಫ್ ಸಹ ಆಗಿರೋ ವೈಸ್ ಅಡ್ಮಿರಲ್ ಎಂ. ಎ. ಹಂಪಿಹೊಳಿ. ಇವರು ಜಲಂತರ್ಗಾಮಿ ಯುದ್ಧಗಳಲ್ಲಿ ಸಾಕಷ್ಟು ಪರಿಣಿತಿ ಹೊಂದುವ ಜೊತೆಗೆ ತಮ್ಮ ಸೇವಾ ಅವಧಿಯಲ್ಲಿ ಅನೇಕ ಶೌರ್ಯ ಪ್ರಶಸ್ತಿಗಳಿಗೆ ಭಾಜನರಾದವರು. ಅದಕ್ಕಿಂತಲೂ ಮುಖ್ಯವಾಗಿ ಇವರು ನಮ್ಮ ಕರ್ನಾಟಕದ ಧಾರವಾಡದವರು.

ಧಾರವಾಡದ ರಾಮನಗರ ಬಡಾವಣೆಯ ಮೂಲ ನಿವಾಸಿಯಾಗಿರೋ ಇವರ ಹೆಸರು ಮಕರಂದ ಹಂಪಿಹೊಳಿ. ಇವರ ತಂದೆ ಅರವಿಂದ ಹಂಪಿಹೊಳಿ ಸಹ ಸೇನೆಯಲ್ಲಿದ್ದವರು. ತಾಯಿ ಸಂಗೀತ ಹಂಪಿಹೊಳಿ ಆಕಾಶವಾಣಿಯಲ್ಲಿ ಉದ್ಘೋಷಿಕಿಯಾಗಿದ್ದಾರೆ. ಐದನೇ ತರಗತಿಯವರೆಗೆ ಧಾರವಾಡ ಸೇಂಟ್ ಜೋಸೆಫ್ ಶಾಲೆಯಲ್ಲಿ ಶಿಕ್ಷಣ ಪಡೆದಿರೋ ಮಕರಂದ, ನಂತರ ವಿಜಯಪುರ ಸೈನಿಕ ಶಾಲೆಯಲ್ಲಿ ವ್ಯಾಸಂಗ ಮುಂದುವರೆಸಿ, ಪಿಯುಸಿ ಬಳಿಕ ಎನ್. ಡಿ. ಸೇರಿದರು. ಬಳಿಕ ನೌಕಾ ದಳಕ್ಕೆ ಸೇರಿ ಇಂದು ದೊಡ್ಡಮಟ್ಟಕ್ಕೆ ಬೆಳೆದಿದ್ದಾರೆ. ಇಂದಿಗೂ ಅವರ ಹಳೆಯ ಮನೆ ರಾಮನಗರ ಬಡಾವಣೆಯಲ್ಲಿದ್ದು, ಅದನ್ನು ತಮ್ಮ ಆಪ್ತ ಕುಮಾರ ಕಾಟೇನಹಳ್ಳಿ ಎಂಬುವವರಿಗೆ ನೋಡಿಕೊಳ್ಳಲು ನೀಡಿದ್ದಾರೆ. ಇಂದಿಗೂ ಈ ಮನೆಯಲ್ಲಿ ಅವರ ಕುಟುಂಬದ ಹಾಗೂ ತಂದೆ, ಅಜ್ಜ, ಅಜ್ಜಿಯ ಫೋಟೋಗಳಿದ್ದು, ಮಕರಂದ ಅವರು ಆಗಾಗ ಈ ಮನೆಗೆ ಭೇಟಿ ನೀಡುತ್ತಿರುತ್ತಾರೆ. ಈಗ ಅಷ್ಟು ದೊಡ್ಡ ಮಟ್ಟದಲ್ಲಿದ್ದರೂ ಯಾವತ್ತಿಗೂ ಕಾಟೇನಹಳ್ಳಿ ಕುಟುಂಬಸ್ಥರೊಂದಿಗೆ ಹಮ್ಮು ಬಿಮ್ಮು ತೋರಿಸದೇ ಸರಳವಾಗಿ ವರ್ತಿಸೋದನ್ನು ಎಲ್ಲರೂ ನೆನೆಯುತ್ತಾರೆ.

ತಂದೆ ಭಾರತೀಯ ಸೇನೆಯಲ್ಲಿ ಅಧಿಕಾರಿಯಾಗಿದ್ದರು

ಮಕರಂದ ಹಂಪಿಹೊಳಿ ಅವರ ತಂದೆ ಅರವಿಂದ ಅವರು ಸೇನೆಯಲ್ಲಿ ಅಧಿಕಾರಿಯಾಗಿ ಸೇವೆ ಸಲ್ಲಿಸಿ, ನಿವೃತ್ತರಾಗಿ ಬಂದ ಬಳಿಕ ಎರಡು ವರ್ಷಗಳ ಕಾಲ ಗರಗ್ ನ ಮಡಿವಾಳೇಶ್ವರ ಶಾಲೆಯಲ್ಲಿ ಶಿಕ್ಷಕರಾಗಿ ಸೇವೆ ಸಲ್ಲಿಸಿದರು. ಬಳಿಕ ಕಮರ್ಷಿಯಲ್ ಟ್ಯಾಕ್ಸ್ ಇಲಾಖೆಯಲ್ಲಿ ಸೇವೆ ಸಲ್ಲಿಸಿ, ನಿವೃತ್ತರಾಗಿದ್ದರು. ಇತ್ತೀಚೆಗೆ ಮಕರಂದ ಅವರ ತಂದೆ-ತಾಯಿ ಇಬ್ಬರೂ ತೀರಿಕೊಂಡರು. ಆಗಾಗ ಬಿಡುವು ಸಿಕ್ಕಾಗ ಮಕರಂದ ಅವರು, ಧಾರವಾಡಕ್ಕೆ ಬರುತ್ತಲೇ ಇರುತ್ತಾರೆ. ಇನ್ನು ವಿಜಯಪುರದ ಸೈನಿಕ ಶಾಲೆಯಲ್ಲಿನ ಶಿಕ್ಷಣದ ಬಳಿಕ ಅವರು, ಪುಣೆಯ ನ್ಯಾಷನಲ್ ಡಿಫೆನ್ಸ್ ಅಕಾಡೆಮಿಗೆ ಸೇರಿದರು. ಅಲ್ಲಿ ಕಠಿಣ ಪರೀಕ್ಷೆ ಎದುರಿಸಿ ಭಾರತೀಯ ನೌಕಾ ಪಡೆಗೆ ಅಧಿಕಾರಿಯಾಗಿ ಸೇರಿಕೊಂಡರು. 1985ರ ಜುಲೈ 1ರಲ್ಲಿ ಅವರು ಭಾರತೀಯ ನೌಕಾ ಪಡೆಗೆ ಸೇರಿಕೊಂಡಿದ್ದರು. ದಕ್ಷಿಣ ವಲಯದ ಭಾರತೀಯ ನೌಕಾ ಪಡೆಗೆ ಇದೀಗ ಅವರೇ ಮುಖ್ಯಸ್ಥರು.

ಅನೇಕ ಪದಕಗಳನ್ನು ಪಡೆದ ವೀರ ಮಕರಂದ ಅವರಿಗೆ ಭಗವದ್ಗೀತೆಯೇ ಸ್ಪೂರ್ತಿ

ಇನ್ನು ತಮ್ಮ ಸೇವಾವಧಿಯಲ್ಲಿ ವೈಸ್ ಅಡ್ಮಿರಲ್ ಮಕರಂದ ಹಂಪಿಹೊಳಿ ಅನೇಕ ಮೆಡಲ್ ಗಳನ್ನು ಪಡೆದುಕೊಂಡಿದ್ದಾರೆ. ಅದರಲ್ಲಿ ಮುಖ್ಯವಾಗಿದ್ದು ಅಂದರೆ, ಅತಿ ವಿಶಿಷ್ಟ ಸೇವಾ ಮೆಡಲ್, ನೌ ಸೇವಾ ಮೆಡಲ್, ಸಮಯ ಸೇವಾ ಮೆಡಲ್, ಅಪರೇಷನ್ ಪರಾಕ್ರಮ ಮೆಡಲ್, ಸೈನ್ಯ ಸೇವಾ ಮೆಡಲ್. ಮಕರಂದ ಅವರಿಗೆ ಭಗವದ್ಗೀತೆಯೇ ಸ್ಪೂರ್ತಿಯಂತೆ. ಅದನ್ನೇ ಮುಂದಿಟ್ಟುಕೊಂಡು, ಗೀತೆಯಲ್ಲಿನ ಕರ್ಮಣ್ಯೆ ವಾಧಿಕಾರಸ್ತೆ ಎಂಬ ಶ್ಲೋಕವನ್ನು ನಂಬಿ ಅವರು ಕೆಲಸ ಮಾಡುತ್ತಾರಂತೆ. ಇನ್ನು ಈ ಬಗ್ಗೆ ಧಾರವಾಡದ ಹಿರಿಯ ಪತ್ರಕರ್ತ ಗುರುರಾಜ ಜಮಖಂಡಿ ಟಿವಿ-9 ಡಿಜಿಟಲ್ ಜೊತೆಗೆ ಮಾತನಾಡಿ, ವೈಸ್ ಅಡ್ಮಿರಲ್ ಮಕರಂದ ಹಂಪಿಹೊಳಿ ಬಗ್ಗೆ ನಮಗೆ ಸಾಕಷ್ಟು ಹೆಮ್ಮೆ ಅನ್ನಿಸುತ್ತೆ. ಧಾರವಾಡದ ನೆಲ ಅನೇಕ ವೀರರನ್ನು ಸೇನೆಗೆ ನೀಡಿದೆ. ಅದರಲ್ಲಿ ಮಕರಂದ ಕೂಡ ಒಬ್ಬರು. ತಂದೆಯಂತೆಯೇ ದೇಶಕ್ಕಾಗಿ ಸೇವೆ ಸಲ್ಲಿಸುತ್ತಿರೋ ಮಕರಂದ ಅವರಿಗೆ ಭಗವದ್ಗೀತೆ ಅಂದರೆ ತುಂಬಾನೇ ಅಚ್ಚುಮೆಚ್ಚು. ಹೀಗಾಗಿ ಅದರಲ್ಲಿನ ಕರ್ಮಣ್ಯೇ ವಾಧಿಕಾರಸ್ತೆ ಅನ್ನೋ ಶ್ಲೋಕವನ್ನು ನೆನೆದು ಅವರು ಕೆಲಸ ಮಾಡುತ್ತಾರೆ ಅಂತಾ ಹೇಳುತ್ತಾರೆ. ಅಂಥವರಿಂದ ನಮ್ಮ ಧಾರವಾಡದ ಕಿರೀಟಕ್ಕೆ ಮತ್ತೊಂದು ಗರಿ ಸೇರಿದಂತಾಗಿದೆ ಅಂತಾ ಹೆಮ್ಮೆಪಡುತ್ತಾರೆ.

ಅಚ್ಚರಿಯಾಗುವಷ್ಟು ಸರಳತೆ

ಇನ್ನು ಮನೆಯ ಉಸ್ತುವಾರಿ ನೋಡಿಕೊಳ್ಳುತ್ತಿರೋ ಕಾಟೇನಹಳ್ಳಿ ಕುಟುಂಬದ ಸದಸ್ಯ ವಿಕಾಸ್ ಟಿವಿ-9 ಡಿಜಿಟಲ್ ಜೊತೆಗೆ ಮಾತನಾಡಿ, ಅವರು ಇಲ್ಲಿಗೆ ಬಂದಾಗ ಇಡೀ ದಿನ ಮನೆಯಲ್ಲಿಯೇ ಇರುತ್ತಾರೆ. ತಾವು ಹುಟ್ಟಿ, ಬೆಳೆದ ಮನೆಯಲ್ಲಿ ಇರೋದು ಅವರಿಗೆ ತುಂಬಾನೇ ಇಷ್ಟ. ನಮ್ಮೊಡನೆ ತೀರಾ ಸರಳವಾಗಿ ನಡೆದುಕೊಳ್ಳೋ ಅವರು ಅಷ್ಟು ಎತ್ತರದ ಹುದ್ದೆಯಲ್ಲಿ ಇದ್ದಾರೆ ಅನ್ನೋದು ಅಚ್ಚರಿ ಮೂಡಿಸುತ್ತದೆ. ಮೊನ್ನೆ ಪ್ರಧಾನಿ ಮೋದಿ ಅವರೊಂದಿಗೆ ಮಕರಂದ್ ಸರ್ ಓಡಾಡೋದು ನೋಡಿ ನಮಗಂತೂ ನಿಜಕ್ಕೂ ಅಚ್ಚರಿ ಹಾಗೂ ಹೆಮ್ಮೆ ಆಗಿತ್ತು. ಅಂಥವರ ಮನೆಯಲ್ಲಿ ನಾವು ಇದ್ದೇವೆ ಅನ್ನೋದೇ ನಮಗೆ ಹೆಮ್ಮಯ ವಿಚಾರವಾಗಿದೆ ಅನ್ನುತ್ತಾರೆ.

ವಿವಿಧ ಕ್ಷೇತ್ರಗಳ ಉನ್ನತ ಸ್ಥಾನದಲ್ಲಿ ಧಾರವಾಡವರು ಹೆಸರು ಮಾಡಿರುವಂತೆಯೇ ಈಗ ಭಾರತೀಯ ಸೇನಾ ವಲಯದಲ್ಲಿಯೂ ಧಾರವಾಡ ತನ್ನದೆ ಆದ ಛಾಪು ಮೂಡಿಸಿದೆ. ಈಗಾಗಲೇ ದೇಶದ ಮೂರನೇ ಮಹಿಳಾ ಲೆಫ್ಟಿನಂಟ್ ಜನರಲ್ ಆಗಿ ಧಾರವಾಡದ ಡಾ. ಮಾಧುರಿ ಕಾನಿಟ್ಕರ್ ಸೇವೆ ಸಲ್ಲಿಸುತ್ತಿದ್ದು, ಅದರ ಬೆನ್ನಲ್ಲಿಯೇ ಈಗ ನೌಕಾಪಡೆಯ ಉನ್ನತ ಹುದ್ದೆಯಲ್ಲಿ ಧಾರವಾಡ ಮೂಲದವರೇ ಆಗಿರೋ ಹಂಪಿಹೊಳಿಯವರು ಇರೋದು ಧಾರವಾಡಕ್ಕೆ ಹೆಮ್ಮೆಯ ಕಿರೀಟವಿಟ್ಟಂತಾಗಿದೆ.

ವರದಿ: ನರಸಿಂಹಮೂರ್ತಿ ಪ್ಯಾಟಿ, ಟಿವಿ9, ಧಾರವಾಡ