ನಕಲಿ ಚಿನ್ನ ನೀಡಿ ಅಸಲಿ ಚಿನ್ನ ಕದ್ದು ಚಾಲಾಕಿ ಕಳ್ಳಿಯರು ಎಸ್ಕೇಪ್​!

ಹಾಸನ: ಇತ್ತೀಚೆಗೆ ನಕಲಿ ಚಿನ್ನ ನೀಡಿ ಜನರನ್ನ ವಂಚಿಸುವವರ ಹಾವಳಿ ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದೆ. ಹಾಸನ ನಗರದ ಎನ್.ಆರ್.ವೃತ್ತದಲ್ಲಿರುವ ಸುಮುಖ ಜ್ಯೂವೆಲರ್ಸ್​ನಲ್ಲಿ ನಕಲಿ‌ ಚಿನ್ನ ನೀಡಿ ಅಸಲಿ ಚಿನ್ನದ ಸರ ಲಪಟಾಯಿಸಿರುವ ಘಟನೆ ನಡೆದಿದೆ.

ಚಿನ್ನ ಖರೀದಿಸಲೆಂದು ಚಿನ್ನದ ಅಂಗಡಿಗೆ ಇಬ್ಬರು ಮಹಿಳೆಯರು ಎಂಟ್ರಿ ಕೊಟ್ಟಿದ್ದಾರೆ. ಓರ್ವ ಮಹಿಳೆ ಚಿನ್ನ ಖರೀದಿಸುತ್ತಿದ್ರೆ, ಮತ್ತೋರ್ವ ಮಹಿಳೆ ಅಂಗಡಿಯಲ್ಲೇ ಕುಳಿತು ಎಲ್ಲವನ್ನೂ ಗಮನಿಸುತ್ತಿರುತ್ತಾಳೆ. 9.50 ಗ್ರಾಂನ ಚಿನ್ನದ ಸರ ಪಡೆದು, ಚಿನ್ನ ಲೇಪಿತ ನಕಲಿ ಆಭರಣ ನೀಡಿ ಚಾಲಾಕಿ ಮಹಿಳೆಯರು ಎಸ್ಕೇಪ್ ಆಗಿದ್ದಾರೆ.

ಅಂಗಡಿ ಸಿಬ್ಬಂದಿಗೆ ನಕಲಿ ಚಿನ್ನದ ಸರ ಮತ್ತು 8 ಸಾವಿರ ಹಣ ನೀಡಿ, 43 ಸಾವಿರ ರೂಪಾಯಿ ಮೌಲ್ಯದ ಚಿನ್ನದ ಸರ ಪಡೆದು ಚಾಲಾಕಿ ಕಳ್ಳಿಯರು ಪರಾರಿಯಾಗಿದ್ದಾರೆ. ಈ ಸಂಬಂಧ ಹಾಸನ ನಗರ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಪ್ರಕರಣ ದಾಖಲಾಗಿದೆ.