ಸರ್ಕಾರದ ಬೊಕ್ಕಸಕ್ಕೆ ಭರ್ಜರಿ ‘ಕಿಕ್’ ಕೊಟ್ಟ ಮದ್ಯಪ್ರಿಯರು: ಅಬಕಾರಿ ಇಲಾಖೆಗೆ ಭರ್ಜರಿ ಲಾಭ
ಪಂಚ ಗ್ಯಾರಂಟಿ ಯೋಜನೆಗಳಿಂದ ಡಿಕೆ ಶಿವಕುಮಾರ್ ಸರ್ಕಾರದ ಖಜಾನೆ ಖಾಲಿಯಾಗಿದೆ. ಅಭಿವೃದ್ಧಿಗೆ ಹಣವಿಲ್ಲ ಎನ್ನುವ ಆರೋಪ ಕೇಳಿಬರುತ್ತಲೇ ಇವೆ. ಅಲ್ಲದೇ ಗ್ಯಾರಂಟಿ ಯೋಜನೆ ವಿರುದ್ಧವೇ ಸರ್ಕಾರದ ಸಚಿವರೇ ಅಪಸ್ವರ ಎತ್ತಿದ್ದುಂಟು. ಅಲ್ಲದೇ ಖುದ್ದು ಹಣಕಾಸು ಇಲಾಖೆಯೂ ಸಹ ಸೂಕ್ಷ್ಮವಾಗಿ ಎಚ್ಚರಿಕೆ ನೀಡಿದೆ. ಇದರ ಮಧ್ಯೆ ಸರ್ಕಾರದ ಬೊಕ್ಕಸಕ್ಕೆ ಮದ್ಯಪ್ರಿಯರು ಭರ್ಜರಿ ಕಿಕ್ ಕೊಟ್ಟಿದ್ದಾರೆ.
Updated on: Oct 05, 2026 | 10:47 PM
ಮುಖ್ಯಾಂಶಗಳು
- ಅಬಕಾರಿ ಇಲಾಖೆಯಿಂದ ಅರ್ಧವಾರ್ಷಿಕ ಅವಧಿಯ ಮದ್ಯ ಮಾರಾಟ ವರದಿ ರಿಲೀಸ್
- 22,191.63 ಕೋಟಿ ರೂ ಅಬಕಾರಿ ರಾಜಸ್ವ ಸಂಗ್ರಹ
- ಬಿಯರ್ ಮಾರಾಟದಿಂದ 3,377.88 ಕೋಟಿ ರೂ ರಾಜಸ್ವ ಸಂಗ್ರಹ
ಬೆಂಗಳೂರು, ಅಕ್ಟೋಬರ್ 05: ರಾಜ್ಯ ಅಬಕಾರಿ ಇಲಾಖೆಯು ಪ್ರಸಕ್ತ 2026ನೇ ಸಾಲಿನ ಅರ್ಧವಾರ್ಷಿಕ ಅವಧಿಯ ಅಂದರೆ ಏಪ್ರಿಲ್ನಿಂದ ಸ್ಟೆಪ್ಟೆಂಬರ್ವರೆಗಿನ ಮದ್ಯ ಮಾರಾಟ ಹಾಗೂ ರಾಜಸ್ವ ಸಂಗ್ರಹದ ವರದಿಯನ್ನು ಬಿಡುಗಡೆ ಮಾಡಿದೆ. 2025ಕ್ಕೆ ಹೋಲಿಸಿದರೆ ಈ ಬಾರಿ ಮದ್ಯ ಮಾರಾಟ ಮತ್ತು ರಾಜಸ್ವ ಸಂಗ್ರಹದಲ್ಲಿ ಗಣನೀಯ ಏರಿಕೆ ಕಂಡಿದೆ. ಕಳೆದ ಆರು ತಿಂಗಳಲ್ಲಿ ರಾಜ್ಯದಲ್ಲಿ ಒಟ್ಟು 22,191.63 ಕೋಟಿ ರೂ ಅಬಕಾರಿ ರಾಜಸ್ವ ಸಂಗ್ರಹವಾಗಿದ್ದು, ಕಳೆದ ವರ್ಷಕ್ಕಿಂತ 2,621.40 ಕೋಟಿ ರೂ ಹೆಚ್ಚಳವಾಗಿದೆ. ಆ ಮೂಲಕ ಒಟ್ಟು ಅಬಕಾರಿ ರಾಜಸ್ವ ಸಂಗ್ರಹದಲ್ಲಿ ಶೇಕಡಾ 13.39 ರಷ್ಟು ಏರಿಕೆ ಕಂಡುಬಂದಿದೆ ಎಂದು ಅಬಕಾರಿ ಆಯುಕ್ತರು ತಿಳಿಸಿದ್ದಾರೆ.
ಬಿಯರ್ ಮಾರಾಟದಲ್ಲಿ ಶೇ. 41.32ರಷ್ಟು ಏರಿಕೆ
ಬರದ ಛಾಯೆಯ ನಡುವೆಯೂ ರಾಜ್ಯದಲ್ಲಿ ಬಿಯರ್ ಮಾರಾಟದಲ್ಲಿ ಭಾರಿ ಏರಿಕೆ ಕಂಡುಬಂದಿದೆ. ಅರ್ಧವಾರ್ಷಿಕ ಅವಧಿಯಲ್ಲಿ ಒಟ್ಟು 275.96 ಲಕ್ಷ ಪೆಟ್ಟಿಗೆ ಬಿಯರ್ ಮಾರಾಟವಾಗಿದ್ದು, ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇಕಡಾ 41.32 ರಷ್ಟು ಹೆಚ್ಚಳವಾಗಿದೆ. ಕೇವಲ ಬಿಯರ್ ಮಾರಾಟದಿಂದಲೇ ಸರ್ಕಾರಕ್ಕೆ 3,377.88 ಕೋಟಿ ರೂ ರಾಜಸ್ವ ಸಂಗ್ರಹವಾಗಿದೆ.
ಐಎಂಎಎಲ್ ಮಾರಾಟದ ಅಂಕಿ-ಅಂಶಗಳು ಹೀಗಿದೆ
ಇನ್ನು ಏಪ್ರಿಲ್ನಿಂದ ಸೆಪ್ಟೆಂಬರ್‌ವರೆಗಿನ ಅವಧಿಯಲ್ಲಿ ರಾಜ್ಯದಲ್ಲಿ ಒಟ್ಟು 346.83 ಲಕ್ಷ ಪೆಟ್ಟಿಗೆ ಐಎಂಎಎಲ್ ಮದ್ಯ ಮಾರಾಟವಾಗಿದೆ. ಮೊದಲ ತ್ರೈಮಾಸಿಕದಲ್ಲಿ 175.14 ಲಕ್ಷ ಪೆಟ್ಟಿಗೆ ಹಾಗೂ ದ್ವಿತೀಯ ತ್ರೈಮಾಸಿಕದಲ್ಲಿ 171.69 ಲಕ್ಷ ಪೆಟ್ಟಿಗೆ ಐಎಂಎಎಲ್ ಸೇಲ್ ಆಗಿದೆ.
ಇದನ್ನೂ ಓದಿ: ಪ್ರೀಮಿಯಂ ಮದ್ಯ, ಬಿಯರ್ ದರ ಇಳಿಕೆಯಾದ್ರೂ ಹಳೆ ದರದಲ್ಲೇ ಸೇಲ್: ಮದ್ಯ ಮಾರಾಟಗಾರರ ವಿರುದ್ಧ ಎಣ್ಣೆ ಪ್ರಿಯರ ಆಕ್ರೋಶ
ಕಳೆದ ವರ್ಷಕ್ಕೆ ಹೋಲಿಸಿದರೆ ಐಎಂಎಎಲ್ ಮಾರಾಟದಲ್ಲಿ ಶೇಕಡಾ 1.14 ರಷ್ಟು ಪ್ರಗತಿಯಾಗಿದ್ದು, ಐಎಂಎಎಲ್ ಒಂದರಿಂದಲೇ 17,424.57 ಕೋಟಿ ರೂ ರಾಜಸ್ವ ಅಬಕಾರಿ ಬೊಕ್ಕಸಕ್ಕೆ ಹರಿದುಬಂದಿದೆ. ಕಳೆದ ವರ್ಷಕ್ಕಿಂತ ಐಎಂಎಎಲ್ ರಾಜಸ್ವದಲ್ಲಿ 2,048.35 ಕೋಟಿ ರೂ ಹೆಚ್ಚಳವಾಗಿದೆ.
ಕರ್ನಾಟಕದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ.
