ರಾಜ್ಯಾದ್ಯಂತ ಹೈಟೆಕ್​ ಮದ್ಯ ಮಳಿಗೆ ತೆರೆಯಲು ನಿರ್ಧರಿಸಿದ ಎಂಎಸ್​ಐಎಲ್​

ಮೈಸೂರು: ಆದಾಯ ಹೆಚ್ಚಿಸಿಕೊಳ್ಳುವ ನಿಟ್ಟಿನಲ್ಲಿ ಮೈಸೂರು ಸೇಲ್ಸ್ ಇಂಟರ್ನ್ಯಾಷನಲ್ ಲಿಮಿಟೆಡ್ (MSIL) ಆಮದು ಮಾಡಿದ ಮದ್ಯವನ್ನು (Alcohol) ಮಾರಾಟ ಮಾಡಲು ರಾಜ್ಯದಾದ್ಯಂತ ಹೈಟೆಕ್ ಮಳಿಗೆಗಳನ್ನು ತೆರೆಯಲು ನಿರ್ಧರಿಸಿದೆ. ಈ ಮಳಿಗೆಗಳೊಂದಿಗೆ, ಎಂಎಸ್​ಐಎಲ್​​ಗೆ ವಾರ್ಷಿಕವಾಗಿ 200 ಕೋಟಿ ರೂಪಾಯಿಗೂ ಹೆಚ್ಚು ಆದಾಯವನ್ನು ಬರುವ ನಿರೀಕ್ಷೆ ಇದೆ. ಮೂಲಗಳ ಪ್ರಕಾರ, ಈ ಮಳಿಗೆಗಳು ಖಾಸಗಿ ಮದ್ಯದ ಶೋರೂಂಗಳಂತೆಯೇ ಇರಲಿವೆ ಎಂದು ತಿಳಿದುಬಂದಿದೆ.

ಮೊದಲ ಹಂತದಲ್ಲಿ, ಎಮ್​​ಎಸ್​​ಐಎಲ್​ ಬೆಂಗಳೂರಿನಲ್ಲಿ 10 ಮಳಿಗೆಗಳನ್ನು, ಬೆಳಗಾವಿ, ಮೈಸೂರು, ಮಂಗಳೂರು, ದಾವಣಗೆರೆ ಮತ್ತು ಇತರ ದೊಡ್ಡ ನಗರಗಳಲ್ಲಿ ಎರಡು ಮಳಿಗೆಗಳನ್ನು ಮತ್ತು ಪ್ರತಿ ಜಿಲ್ಲಾ ಕೇಂದ್ರದಲ್ಲಿ ಒಂದು ಆಧುನಿಕ ಮಳಿಗೆಗಳನ್ನು ತೆರೆಯಲು ಯೋಜಿಸಿದೆ. ಮುಂದಿನ ಹಂತದಲ್ಲಿ ಇನ್ನೂ 40 ಮಳಿಗೆಗಳನ್ನು ತೆರೆಯಲು ಅಧಿಕಾರಿಗಳು ಯೋಜಿಸಿದ್ದಾರೆ.

ಅಧಿಕಾರಿಗಳ ಪ್ರಕಾರ, ಬೆಂಗಳೂರಿನಲ್ಲಿ 1,500 ಚದರ ಅಡಿ ಪ್ರದೇಶದಲ್ಲಿ ಮತ್ತು ಇತರ ಜಿಲ್ಲಾ ಕೇಂದ್ರಗಳಲ್ಲಿ 1,000 ಚದರ ಅಡಿ ವಿಸ್ತೀರ್ಣದಲ್ಲಿ ಆಕರ್ಷಕ ಮಳಿಗೆಗಳನ್ನು ತೆರೆಯಲು ಚಿಂತಿಸಲಾಗಿದೆ. ಅಲ್ಲದೇ ಇದಕ್ಕೆ ಜಾಗವನ್ನು ಗುರುತಿಸಲಾಗುತ್ತಿದೆ. ಈ ಮಳಿಗೆಗಳು ಸ್ಕಾಚ್, ವಿಸ್ಕಿ, ವೋಡ್ಕಾ, ವೈನ್ ಮತ್ತು ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಹೆಚ್ಚಿನ ಬೇಡಿಕೆಯಿರುವ ಇತರ ಆಲ್ಕೋಹಾಲ್ ಪ್ರಭೇದಗಳನ್ನು ಮಾರಾಟ ಮಾಡುತ್ತವೆ.

ಇದನ್ನೂ ಓದಿ: Alcohol Prices: ಅಬಕಾರಿ ಸುಂಕ ಹೆಚ್ಚಳ; ಮದ್ಯದ ದರ ಪರಿಷ್ಕರಿಸಲಿವೆ ಬೆಂಗಳೂರಿನ ಪಬ್, ಬಾರ್​​ಗಳು

ದುಬಾರಿ ಮದ್ಯ ಮಾರಾಟ ಖಾಸಗಿ ಅಂಗಡಿಗಳಿಗೆ ಸೀಮಿತವಾಗಬಾರದು. ಶ್ರೀಮಂತ ಗ್ರಾಹಕರನ್ನು ಸೆಳೆಯುವ ನಿಟ್ಟಿನಲ್ಲಿ ಎಂಎಸ್‌ಐಎಲ್‌ ಕೂಡ ಕೆಲಸ ಮಾಡಬೇಕು ಎಂದು ಕೈಗಾರಿಕಾ ಸಚಿವ ಎಂ.ಬಿ.ಪಾಟೀಲ್​ ಹೇಳಿದರು.

ಎಮ್​ಎಸ್​ಐಎಲ್​​ ಈ ಹೈಟೆಕ್ ಸ್ಟೋರ್‌ಗಳಿಗೆ ವಿಶಿಷ್ಟ ಮತ್ತು ಆಕರ್ಷಕ ಹೆಸರನ್ನು ನೀಡಲು ನಿರ್ಧರಿಸಿದ್ದು, ಸಾರ್ವಜನಿಕರು ಹೆಸರನ್ನು ಸೂಚಿಸಬಹುದಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ನಾಗರಿಕರು ತಮ್ಮ ಸಲಹೆಗಳನ್ನು msil.liquor@msilonline.com ಗೆ ಸಲ್ಲಿಸಬಹುದು. 2009 ರಲ್ಲಿ MRP ಗಿಂತ ಹೆಚ್ಚಿನ ದರದಲ್ಲಿ ಮದ್ಯ ಮಾರಾಟವನ್ನು ತಡೆಯಲು ಸರ್ಕಾರವು ಎಮ್​ಎಸ್​ಐಎಲ್​​ಗೆ 463 MRP ಮಳಿಗೆಗಳನನ್ನು ತೆರೆಯಲು ಪರವಾನಿಗೆ ನೀಡಿತ್ತು. ಈ ಮಳಿಗೆಗಳ ಯಶಸ್ಸಿನ ನಂತರ ಇನ್ನೂ 900 ಮಳಿಗೆಗಳನ್ನು ಸ್ಥಾಪಿಸಲು ಅನುಮೋದನೆ ನೀಡಲಾಯಿತು. ಪ್ರಸ್ತುತ, ರಾಜ್ಯದಾದ್ಯಂತ ಸುಮಾರು 1,023 ಎಂಎಸ್‌ಐಎಲ್ ಮದ್ಯದಂಗಡಿಗಳು ಕಾರ್ಯನಿರ್ವಹಿಸುತ್ತಿವೆ.

ರಾಜ್ಯದ ಮತ್ತಷ್ಟು ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ