PUBGಗಾಗಿ ತಂದೆಯನ್ನೇ ಕೊಂದ; ಬೆಳಗಾವಿಯಲ್ಲಿ ಅಮಾನವೀಯ ಘಟನೆ

ಮೊಬೈಲ್​ನಲ್ಲಿ ಪಬ್​ ಜಿ ಗೇಮ್ ಆಡುತ್ತಿದ್ದ ಮಗನಿಗೆ ಬುದ್ಧಿವಾದ ಹೇಳಿದ ತಂದೆಯನ್ನೇ ಬರ್ಬರವಾಗಿ ಹತ್ಯೆ ಮಾಡಿರುವ ಹೃದಯ ವಿದ್ರಾವಕ ಘಟನೆ ಬೆಳಗಾವಿ ತಾಲೂಕಿನ ಕಾಕತಿಯಲ್ಲಿ ನಡೆದಿದೆ. ಕಾಕತಿ ಗ್ರಾಮದ ನಿವಾಸಿ ರಘುವೀರ್(21) ತನ್ನ ತಂದೆ​ ಶಂಕರಪ್ಪನನ್ನು ಭೀಕರವಾಗಿ ಕೊಲೆಗೈದಿದ್ದಾನೆ. ಪೊಲೀಸ್ ಇಲಾಖೆಯಲ್ಲಿ ಎಎಸ್ಐ ಆಗಿ ಕಾರ್ಯನಿರ್ವಹಿಸುತ್ತಿದ್ದ ಶಂಕರಪ್ಪ, 3 ತಿಂಗಳ ಹಿಂದೆ ನಿವೃತ್ತಿ ಹೊಂದಿದ್ದರು.

ಇತ್ತೀಚೆಗೆ ಆರೋಪಿ ರಘುವೀರ್ ನಿರಂತರವಾಗಿ ಮೊಬೈಲ್​ನಲ್ಲಿ ಪಬ್​ ಜಿ ಗೇಮ್ ಆಡುತ್ತಿದ್ದ. ಇಂಟರ್​ನೆಟ್​ ಮುಗಿದ ಕಾರಣ ಪಬ್​ ಜಿ ಆಡಲು ತಂದೆಯ ಬಳಿ ಹಣ ಕೇಳಿದ್ದ. ಮೊಬೈಲ್​ನಲ್ಲಿ ಹೆಚ್ಚು ಕಾಲಹರಣ ಮಾಡುತ್ತಿದ್ದ ಕಾರಣ ಪುತ್ರ ರಘುವೀರ್​ಗೆ ತಂದೆ ಶಂಕರಪ್ಪ ಬುದ್ಧಿವಾದ ಹೇಳಿದ್ದ. ಇದರಿಂದ ಕೋಪಗೊಂಡಿದ್ದ ರಘುವೀರ್, ಅಕ್ಕಪಕ್ಕದ ಮನೆಯ ಕಿಟಕಿ ಗಾಜುಗಳನ್ನು ಒಡೆದುಹಾಕಿದ್ದ. ಬಳಿಕ ಪೊಲೀಸರು ಠಾಣೆಗೆ ಕರೆದೊಯ್ದು ತಂದೆಯ ಸಮ್ಮುಖದಲ್ಲೇ ಬುದ್ಧಿವಾದ ಹೇಳಿ ಕಳುಹಿಸಿದ್ದರು.

ಇಷ್ಟಾದರು ಕಳೆದ ರಾತ್ರಿ ಮತ್ತೆ ಪಬ್​ ಜಿ ಆಡುವುದರಲ್ಲಿ ಆರೋಪಿ ನಿರತನಾಗಿದ್ದ. ಈ ವೇಳೆ ತಂದೆ ಮೊಬೈಲ್ ಕಿತ್ತುಕೊಂಡು ಬೈದಿದ್ದರು. ಇದರಿಂದ ಕುಪಿತಗೊಂಡಿದ್ದ ರಘುವೀರ್​,  ತಂದೆಯ ಕೈಕಾಲು ಹಾಗೂ ಕುತ್ತಿಗೆ ಭಾಗವನ್ನು ಕತ್ತರಿಸಿ ಭೀಕರವಾಗಿ ಹತ್ಯೆಗೈದು ಕ್ರೂರತೆ ಮೆರೆದಿದ್ದಾನೆ. ಘಟನಾ ಸ್ಥಳಕ್ಕೆ ಆಗಮಿಸಿದ ಕಾಕತಿ ಪೊಲೀಸರು ಆರೋಪಿಯನ್ನು ವಶಕ್ಕೆ ಪಡೆದು ಕೇಸ್​ ದಾಖಲಿಸಿದ್ದಾರೆ.