ನಗರಸಭೆ ನಿರ್ಲಕ್ಷ್ಯದಿಂದ ಅನೈತಿಕ ಚಟುವಟಿಕೆಗಳ ತಾಣವಾದ ರಾಮನಗರದ ಹೃದಯಭಾಗದಲ್ಲಿನ ಮಹಾತ್ಮಗಾಂಧಿ ಪಾರ್ಕ್​​

ರಾಮನಗರ: ರೇಷ್ಮೆನಗರಿ ರಾಮನಗರದ ಹೃದಯಭಾಗದಲ್ಲಿರೋ ಏಕೈಕ ಉದ್ಯಾನವನ ಅದು. ನಗರಕ್ಕೆ ವಿವಿಧ ಕೆಲಸಗಳ ನಿಮಿತ್ತ ಬರುವ ಜನರಿಗೆ ವಿಶ್ರಾಂತಿ ತಾಣ. ಆದರೆ, ನಗರಸಭೆ ಅಧಿಕಾರಿಗಳ ನಿರ್ಲಕ್ಷ್ಯದಿಂದ ಸೂಕ್ತ ನಿರ್ವಾಹಣೆ ಇಲ್ಲದೇ ಆ ಪಾರ್ಕ್ ಅನಾಥವಾಗಿದೆ. ವಾಯುವಿಹಾರಿಗಳಿಗೆ ಅನುಕೂಲವಾಗಲಿ ಅಂತ ಲಕ್ಷಾಂತರ ರೂ ಖರ್ಚು ಮಾಡಿ ನಿರ್ಮಾಣ ಮಾಡಿರೋ ಜಿಮ್ ಯಂತ್ರಗಳು ತುಕ್ಕು ಹಿಡಿದು ಕಳಚಿ ಬಿದ್ದಿವೆ. ಮತ್ತೊಂದೆಡೆ ಪಾರ್ಕ್ ಸೋಂಬೆರಿಗಳ ಅಡ್ಡವಾಗಿದೆ. ಇಷ್ಟೆಲ್ಲ ಇದ್ದರು ಸಂಬಂಧಪಟ್ಟ ಅಧಿಕಾರಿಗಳು ಮಾತ್ರ ಕಣ್ಣು ಮುಚ್ಚಿ ಕುಳಿತಿದ್ದಾರೆ.

ರಾಮನಗರದ ಕೋರ್ಟ್ ಹಾಗೂ ತಾಲೂಕು ಕಚೇರಿ ಪಕ್ಕದಲ್ಲೇ ನಗರದ ಹೃದಯ ಭಾಗದಲ್ಲಿರುವ ಮಹಾತ್ಮಗಾಂಧಿ ಉದ್ಯಾನವನ ಸೂಕ್ತ ನಿರ್ವಹಣೆ ಇಲ್ಲದೇ ಅನಾಥವಾಗಿದೆ. ಅವ್ಯವಸ್ಥೆಗಳೇ ತುಂಬಿ ತುಳುಕುತ್ತಿರುವ ಈ ಉದ್ಯಾನವನದಲ್ಲಿ ಮಧ್ಯಾಹ್ನದ ವೇಳೆ ಕಾಲೇಜು ವಿದ್ಯಾರ್ಥಿಗಳ ಅನೈತಿಕ ತಾಣವಾದರೇ, ಸಂಜೆಯಾಗುತ್ತಿದ್ದಂತೆ ಕುಡುಕರ ಅಡ್ಡೆಯಾಗಿ ಮಾರ್ಪಟ್ಟಿದೆ. ಇದರಿಂದಾಗಿ ಕೆಲವು ವಿಶ್ರಾಂತಿ ಪಡೆಯಲು ಬರುವ ಜನರು ಮುಜುಗರ ಪಡುವಂತಾಗಿದೆ. ಇಷ್ಟೇ ಅಲ್ಲದೆ ಸಂಬಂಧಪಟ್ಟ ಅಧಿಕಾರಿಗಳು ಪಾರ್ಕ್ ನಿರ್ವಹಣೆ ಸಹ ಮಾಡಿಲ್ಲ. ಇನ್ನು ಕೆಲವೇ ದಿನಗಳ ಕೆಳಗೆ ಸ್ಥಾಪನೆ ಮಾಡಲಾದ ಗಾಂಧೀಜಿ ಪ್ರತಿಮೆ ಕೂಡ ನಾಪತ್ತೆಯಾಗಿದೆ. ಇಷ್ಟೆಲ್ಲಾದರು ಸಂಬಂಧಪಟ್ಟ ಅಧಿಕಾರಿಗಳು ಈ ಬಗ್ಗೆ ತಲೆ ಕೆಡಿಸಿಕೊಂಡಿಲ್ಲ.

ಪ್ರತಿನಿತ್ಯ ನೂರಾರು ಜನರು ನ್ಯಾಯಾಲಯ ಹಾಗೂ ತಾಲೂಕು ಕಚೇರಿಗೆ ಬರುವ ಜನರು ಹೆಚ್ಚಿರುತ್ತಾರೆ. ಕೆಲಸ ವಿಳಂಬವಾದರೆ, ವಿಶ್ರಾಂತಿ ಪಡೆಯಲು ಈ ಮಹಾತ್ಮಗಾಂಧಿ ಉದ್ಯಾನವನಕ್ಕೆ ಬಂದು ಕೂರುತ್ತಾರೆ. ಇನ್ನು ಮಳೆ ಬಂದಾಗ ಪಾರ್ಕ್ ಹಚ್ಚಹಸಿರಿನಿಂದ ಕೂಡಿರುತ್ತದೆ. ಮಳೆ ಬಾರದಿದ್ದರೇ ನೀರು ಹಾಕುವವರೇ ಇಲ್ಲದೇ ಉದ್ಯಾನವನ ಸಪ್ಪೆಯಾಗಿರುತ್ತದೆ.

ಇನ್ನು ವಾಯುವಿಹಾರಿಗಳಿಗೆ ಅನುಕೂಲವಾಗಲಿ ಎಂದು ಲಕ್ಷಾಂತರ ರೂ ಖರ್ಚು ಮಾಡಿ ಜಿಮ್ ಯಂತ್ರಗಳನ್ನ ಅಳವಡಿಸಲಾಗಿದೆ. ಆದರೆ ಇವು ಸಹ ಬಳಕೆಗೆ ಬಾರದಂತೆ ಆಗಿವೆ. ಸೈಕಲ್, ಫನ್ವಾಕರ್, ಶೋಲ್ಡರ್, ಪ್ರೆಸ್ ಸೇರಿದಂತೆ ವ್ಯಾಯಾಮ ಸಾಧನಗಳು ತುಕ್ಕು ಹಿಡಿದಿವೆ. ಕೆಲವು ಕಳಚಿ ಬಿದ್ದಿವೆ. ಹೀಗಾಗಿ ಸಂಬಂಧಪಟ್ಟ ಅಧಿಕಾರಿಗಳು ಈ ಬಗ್ಗೆ ಗಮನಹರಿಸಬೇಕೆಂದು ಸ್ಥಳೀಯರು ಆಗ್ರಹಿಸುತ್ತಿದ್ದಾರೆ.

ಒಟ್ಟಾರೆಯಾಗಿ ನಿರ್ವಹಣೆ ಇಲ್ಲದೇ ಅನಾಥವಾಗಿರುವ ಮಹಾತ್ಮಗಾಂಧಿ ಉದ್ಯಾನವನದ ನಿರ್ವಾಹಣೆ ಮಾಡಬೇಕಿದೆ. ಇನ್ನಾದರು ಸಂಬಂಧಪಟ್ಟ ನಗರಸಭೆ ಅಧಿಕಾರಿಗಳು ಈ ಬಗ್ಗೆ ಗಮನಹರಿಸಿ ಸಾರ್ವಜನಿಕರಿಗೆ ಅನುಕೂಲ ಮಾಡಿಕೊಡಬೇಕಿದೆ.

ಪ್ರಶಾಂತ್ ಹುಲಿಕೆರೆ, ಟಿವಿ9 ರಾಮನಗರ