ರಾಮನಗರ: 100 ನೇ ವರ್ಷದ ಹುಟ್ಟುಹಬ್ಬ ಆಚರಿಸಿಕೊಂಡ ಅಜ್ಜಿ

ರಾಮನಗರ: ಜಿಲ್ಲೆಯ ಚನ್ನಪಟ್ಟಣ ತಾಲೂಕಿನ ವಂದರಗುಪ್ಪೆಯಲ್ಲಿ ನಿಂಗಮ್ಮ ಎನ್ನುವವರು 100 ವರ್ಷ ಪೂರೈಸಿ ಹುಟ್ಟು ಹಬ್ಬವನ್ನ ಇಂದು(ಜ.9) ಮಕ್ಕಳು, ಮೊಮ್ಮಕ್ಕಳು, ಮರಿಮಕ್ಕಳು ಸೇರಿ ಸಂಭ್ರಮದಿಂದ ಆಚರಣೆ ಮಾಡಿದ್ದಾರೆ. ಅಂದಹಾಗೆ ನಿಂಗಮ್ಮನಿಗೆ ಏಳು ಜನ ಮಕ್ಕಳಿದ್ದು, ಅದರಲ್ಲಿ ಐದು ಹೆಣ್ಣು, ಇಬ್ಬರು ಗಂಡು ಮಕ್ಕಳು. ಇನ್ನು ಮೊಮ್ಮಕ್ಕಳು, ಮರಿಮಕ್ಕಳು ಸೇರಿ 80 ಜನ ಇದ್ದಾರೆ. ಎಲ್ಲರೂ ಒಳ್ಳೆಯ ಕೆಲಸಗಳಲ್ಲಿಯೇ ಇದ್ದಾರೆ. ಕೆಲವರು ರಾಮನಗರದಲ್ಲಿ ಇದ್ದರೇ, ಇನ್ನು ಕೆಲವರು ಬೆಂಗಳೂರು ಸೇರಿ ಹಲವು ಕಡೆಗಳಲ್ಲಿ ಇದ್ದಾರೆ. ಒಟ್ಟಿಗೆ ಸೇರುವುದೇ ಅಪರೂಪವಾಗಿದ್ದು ಇವತ್ತು ಎಲ್ಲರೂ ಸೇರಿ ನಿಂಗಮ್ಮ ಅವರ ನೂರು ವರ್ಷ ಪೂರೈಸಿರುವ ಹಿನ್ನೆಲೆ ಅಜ್ಜಿಯ ಕೈಯಲ್ಲಿ ಕೇಕ್ ಕಟ್ ಮಾಡಿಸುವ ಮೂಲಕ ಸಂಭ್ರಮದಿಂದ ಹುಟ್ಟುಹಬ್ಬ ಆಚರಣೆ ಮಾಡಿದ್ದಾರೆ.

ನಿಂಗಮ್ಮ ಅವರು 1923ರಲ್ಲಿ ರಾಮನಗರ ಜಿಲ್ಲೆಯ ಚನ್ನಪಟ್ಟಣ ತಾಲೂಕಿನ ದೇವರಹೊಸಳ್ಳಿ ಗ್ರಾಮದಲ್ಲಿ ಜನಸಿದರು. ಇದೀಗ ತನ್ನ ಎರಡನೇ ಮಗಳ ಮನೆಯಲ್ಲಿ ಆಶ್ರಯ ಪಡೆದಿದ್ದಾರೆ. ಇನ್ನು ಅಜ್ಜಿಗೆ ನೂರು ವರ್ಷ ಆದರೂ ಇದುವರೆಗೂ ಯಾವುದೇ ಅನಾರೋಗ್ಯದ ಸಮಸ್ಯೆ ಕಾಡಿಲ್ಲ. ಈಗಲೂ ಸಹ ಕಣ್ಣುಗಳು ಚೆನ್ನಾಗಿ ಕಾಣಿಸುತ್ತವೆ ಕೆಲವನ್ನ ಓದುತ್ತಾರೆ. ಅಷ್ಟೇ ಅಲ್ಲದೆ ಮಕ್ಕಳು, ಮೊಮ್ಮಕ್ಕಳನ್ನ ಗುರುತಿಸುತ್ತಾರೆ. ನೂರು ವರ್ಷಗಳ ಕಾಲ ಬದುಕುವುದು ಎಂದರೇ ಸಾಮಾನ್ಯವಲ್ಲ. ಹೀಗಾಗಿ ಅಜ್ಜಿಗೆ ಎಲ್ಲರೂ ಸೇರಿ ಏನಾದರೂ ಮಾಡಬೇಕು ಎಂದು ನೂರನೇ ವರ್ಷದ ಹುಟ್ಟುಹಬ್ಬವನ್ನ ಆಚರಣೆ ಮಾಡಿದ್ದಾರೆ.

ಇದನ್ನೂ ಓದಿ:Prashanth Neel: ಉರ್ದು ಭಾಷೆಯಲ್ಲಿ ಯಶ್​ ಹುಟ್ಟುಹಬ್ಬಕ್ಕೆ ವಿಶ್​ ಮಾಡಿದ ಪ್ರಶಾಂತ್​ ನೀಲ್​; ಕನ್ನಡಿಗರು ಗರಂ

ಒಟ್ಟಾರೆ ವಯಸ್ಸಾಗಿದೆ ಎಂದು ಮೂಗು ಮುರಿಯುವವರೇ ಎಷ್ಟು ಜನ ಇರುವಾಗ ಈ ಕುಟುಂಬ ನೂರು ವರ್ಷ ಪೂರೈಸಿರುವ ನಿಂಗಮ್ಮ ಅವರ ಹುಟ್ಟುಹಬ್ಬ ಸಂಭ್ರಮದಿಂದ ಆಚರಿಸಿ ಇತರರಿಗೂ ಮಾದರಿಯಾಗಿದ್ದಾರೆ.

ವರದಿ: ಪ್ರಶಾಂತ್ ಹುಲಿಕೆರೆ ಟಿವಿ9 ರಾಮನಗರ

ಇನ್ನಷ್ಟು ರಾಜ್ಯಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ