ಬೆಂಗಳೂರಿನ ನೆಲಕದಿರನಹಳ್ಳಿ ಭೂಸ್ವಾಧೀನ ರದ್ದು: ಜಮೀನು ಮರಳಿಸುವಂತೆ ಸುಪ್ರೀಂಕೋರ್ಟ್ ಆದೇಶ
ಕರ್ನಾಟಕ ಗೃಹ ನಿರ್ಮಾಣ ಸಹಕಾರ ಸಂಘಕ್ಕೆ ಸುಪ್ರೀಂಕೋರ್ಟ್ ಬಿಗ್ ಶಾಕ್ ಕೊಟ್ಟಿದೆ. ಸುಮಾರು ಮೂರು ದಶಕಗಳಿಗಿಂತಲೂ ಹಳೆಯದಾದ ನೆಲಕದಿರನಹಳ್ಳಿ ಭೂಸ್ವಾಧೀನ ಪ್ರಕರಣದಲ್ಲಿ ತೀವ್ರ ವಂಚನೆ ಮತ್ತು ಕಾನೂನು ಉಲ್ಲಂಘನೆ ನಡೆದಿರುವುದನ್ನು ಸುಪ್ರೀಂ ಕೋರ್ಟ್ ಪತ್ತೆಹಚ್ಚಿ, ಜಮೀನನ್ನು ಮೂಲ ಮಾಲೀಕರಿಗೆ ಮರಳಿ ನೀಡುವಂತೆ ಮಹತ್ವದ ತೀರ್ಪು ನೀಡಿದೆ.
Updated on: Oct 26, 2026 | 9:14 PM
ಬೆಂಗಳೂರು, (ಅಕ್ಟೋಬರ್ 26): ಬೆಂಗಳೂರು ಉತ್ತರ ತಾಲೂಕಿನ ನೆಲಕದಿರನಹಳ್ಳಿ ಗ್ರಾಮದ 59 ಎಕರೆ 6 ಗುಂಟೆ ಜಮೀನಿನ ಸ್ವಾಧೀನ ಪ್ರಕ್ರಿಯೆಯನ್ನು ಸುಪ್ರೀಂ ಕೋರ್ಟ್ ರದ್ದುಗೊಳಿಸಿದೆ. ಭೂಸ್ವಾಧೀನ ಪ್ರಕ್ರಿಯೆಯಲ್ಲಿ ವಂಚನೆ, ಅಧಿಕಾರ ದುರ್ಬಳಕೆ ದೃಢಪಟ್ಟಿದ್ದರಿಂದ ಹೈಕೋರ್ಟ್ ವಿಭಾಗೀಯ ಪೀಠದ ಆದೇಶ ರದ್ದುಗೊಳಿಸಿದ ಸುಪ್ರೀಂಕೋರ್ಟ್, ಏಕಸದಸ್ಯ ಪೀಠ ನೀಡಿದ್ದ ಮೂಲ ಆದೇಶವನ್ನು ಎತ್ತಿಹಿಡಿದಿದೆ. ಮೂಲ ಭೂಮಾಲೀಕರಿಗೆ ತಕ್ಷಣವೇ ಸ್ವಾಧೀನ ಹಕ್ಕು ಹಸ್ತಾಂತರಿಸಬೇಕು. ಅರ್ಜಿ ಸಲ್ಲಿಸದ ಭೂಮಾಲೀಕರಿಗೂ ಜಮೀನು ಮರಳಿಸುವಂತೆ ಜೆ.ಬಿ.ಪಾರ್ದೀವಾಲಾ ಹಾಗೂ ಕೆ.ವಿನೋದ್ ಚಂದ್ರನ್ ಪೀಠ ಮಹತ್ವದ ತೀರ್ಪು ನೀಡಿದೆ.
ಮೂಲ ಭೂಮಾಲೀಕರಿಗೆ ತಕ್ಷಣವೇ ಜಮೀನಿನ ಸ್ವಾಧೀನ ಹಕ್ಕು ಹಸ್ತಾಂತರಿಸಲು ಸೂಚನೆ ನೀಡಿರುವ ಸುಪ್ರೀಂ, ಅರ್ಜಿ ಸಲ್ಲಿಸದ ಭೂಮಾಲೀಕರಿಗೂ ಜಮೀನು ಮರಳಿಸುವಂತೆ ಹೇಳಿದೆ. ಅಲ್ಲದೇಪರಿಹಾರ ಪಡೆದ ಭೂಮಾಲೀಕರು ಬಡ್ಡಿ ರಹಿತವಾಗಿ ಹಣ ಮರಳಿಸಲು ನಿರ್ದೇಶನ ನೀಡಿದೆ.
ಇದನ್ನೂ ಓದಿ: ‘ಬೇಡ್ತಿ–ವರದಾ ನದಿ ಜೋಡಣೆಯ ಸಂಪೂರ್ಣ ಜವಾಬ್ದಾರಿ ರಾಜ್ಯ ಸರ್ಕಾರದ್ದು’: ಕೇಂದ್ರ ಜಲಶಕ್ತಿ ಸಚಿವ ಸಿ.ಆರ್.ಪಾಟೀಲ್ ಸ್ಪಷ್ಟನೆ
ಈ ಹಿಂದೆ ಕರ್ನಾಟಕ ಹೈಕೋರ್ಟ್‌ನ ಏಕಸದಸ್ಯ ಪೀಠವು ವಂಚನೆಯನ್ನು ಗುರುತಿಸಿ ಭೂಸ್ವಾಧೀನ ರದ್ದುಪಡಿಸಿತ್ತು. ಆದರೆ ನಂತರದ ವಿಭಾಗೀಯ ಪೀಠವು, ಕಾಲಹರಣದ ಕಾರಣ ನೀಡಿ ಆ ತೀರ್ಪನ್ನು ಬದಲಾಯಿಸಿತ್ತು. ಈಗ ಸುಪ್ರೀಂ ಕೋರ್ಟ್‌ನ ನ್ಯಾಯಮೂರ್ತಿಗಳಾದ ಜೆ.ಬಿ. ಪಾರ್ದಿವಾಲಾ ಮತ್ತು ಕೆ. ವಿನೋದ್ ಚಂದ್ರನ್ ಅವರ ಪೀಠವು ವಿಭಾಗೀಯ ಪೀಠದ ಆದೇಶವನ್ನು ರದ್ದುಗೊಳಿಸಿ, ಏಕಸದಸ್ಯ ಪೀಠದ ಆದೇಶವನ್ನು ಎತ್ತಿಹಿಡಿದಿದೆ.
ಪೀಣ್ಯ ಮೂಲದ ಹೌಸ್ ಬಿಲ್ಡಿಂಗ್ ಕೋ-ಆಪರೇಟಿವ್ ಸೊಸೈಟಿಯು ಖಾಸಗಿ ಜಮೀನನ್ನು ಸ್ವಾಧೀನಪಡಿಸಿಕೊಳ್ಳಲು ‘ಮೆಸರ್ಸ್ ಭಾಗ್ಯ ಎಂಟರ್‌ಪ್ರೈಸಸ್’ ಎಂಬ ಮಧ್ಯವರ್ತಿ ಸಂಸ್ಥೆಯೊಂದಿಗೆ ಸೆಪ್ಟೆಂಬರ್ 1984 ರಲ್ಲಿ ನಿಯಮಬಾಹಿರವಾಗಿ ಒಪ್ಪಂದ ಮಾಡಿಕೊಂಡಿತ್ತು. ಈ ಒಪ್ಪಂದದ ಆಧಾರದ ಮೇಲೆ ಸರ್ಕಾರವು 1988 ಮತ್ತು 1989 ರ ಅವಧಿಯಲ್ಲಿ ನೆಲಕದಿರನಹಳ್ಳಿಯ ಒಟ್ಟು 59 ಎಕರೆ ಭೂಮಿಯನ್ನು ವಶಪಡಿಸಿಕೊಳ್ಳಲು ಪ್ರಾಥಮಿಕ ಮತ್ತು ಅಂತಿಮ ಅಧಿಸೂಚನೆಗಳನ್ನು ಹೊರಡಿಸಿತ್ತು.
ಕರ್ನಾಟಕದ ಮತ್ತಷ್ಟು ಸುದ್ದಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
