ಅಪರೂಪದ, ಅಲ್ಪಾಯುಷಿ ಪತಂಗ ಕ್ಯಾಮರಾ ಕಣ್ಣಿಗೆ ಬಿತ್ತು!

ಉಡುಪಿ: ಜಿಲ್ಲೆಯ ಶಿರ್ವ ಸಮೀಪದ ಕಲ್ಲೊಟ್ಟಿ ಗ್ರಾಮದ ನಾಗಬನವೊಂದರಲ್ಲಿ ಒಂದು ವಿಭಿನ್ನ ಪತಂಗ ಪತ್ತೆಯಾಗಿದೆ. ಹಾವಿನ ತಲೆಯಂತೆ ಹೋಲುವ ಮತ್ತು ಪ್ರಪಂಚದಲ್ಲಿ ಅತ್ಯಂತ ಬೃಹತ್ ಗಾತ್ರದ ಪತಂಗಗಳಲ್ಲಿ ಒಂದಾದ ಇದರ ಹೆಸರು ಅಟ್ಲಾಸ್​ ಮಾತ್​.

ಕರಾವಳಿ ಜಿಲ್ಲೆಯಲ್ಲಿ ಅಪರೂಪವಾಗಿ ಕಾಣಸಿಗುವ ಈ ಪತಂಗದ ವೈಜ್ಞಾನಿಕ ಹೆಸರು ಌಟಕಸ್ ಅಟ್ಲಾಸ್. ಸುಮಾರು 24 ಸೆಂಟಿಮೀಟರ್​ ವಿಸ್ತೀರ್ಣ ಹೊಂದಿರುವ ಈ ಅಟ್ಲಾಸ್​ ಮಾತ್​ನ ತುಸು ದೂರದಿಂದ ಸೂಕ್ಷ್ಮವಾಗಿ ಗಮನಿಸಿದರೆ ಥೇಟ್​ ಹಾವಿನ ತೆಲೆಯಂತೆ ಹೋಲುತ್ತದೆ.

ಅಪರೂಪದ ಅಲ್ಪಾಯುಷಿ ಪತಂಗ ಕ್ಯಾಮರಾದಲ್ಲಿ ಸೆರೆ
 ಅತ್ಯಂತ ಕಡಿಮೆ ಜೀವಿತಾವಧಿ ಹೊಂದಿರುವ ಈ ಪತಂಗವು ಕೇವಲ ಒಂದು ಅಥವಾ ಎರಡು ವಾರಗಳ ಕಾಲ ಮಾತ್ರ ಬದುಕಿರುತ್ತದೆ. ಚಕ್ಕೆ, ಚೆರ್ರಿ, ಪೇರಳೆ, ಸಂಪಿಗೆ ಹೀಗೆ ಕೆಲವೊಂದು ಮರಗಳ ಎಲೆಗಳಲ್ಲಿ ಮಾತ್ರ ಈ ಪತಂಗ ಮೊಟ್ಟೆ ಇಡುತ್ತದೆ. ಬಳಿಕ ಮೊಟ್ಟೆಯಿಂದ ಹೊರ ಬರುವ ಹುಳ ಆ ಮರದ ಎಲೆಗಳನ್ನೇ ತಿಂದು ಕೋಶವನ್ನು ರಚಿಸುತ್ತದೆ. ಕೆಲವು ದಿನಗಳ ನಂತರ ಅದರಿಂದ ಹೊರಬರುವ ಪತಂಗವು ಮತ್ತೆ ಬೆಳೆದು, ಸಂತಾನೋತ್ಪತ್ತಿ ಕ್ರಿಯೆಯಲ್ಲಿ ತೊಡಗಿ, ಮೊಟ್ಟೆ ಇಟ್ಟು ತದ ನಂತರ ಅಸುನೀಗುತ್ತದೆ. ಹೀಗೆ ವಿಶೇಷವಾಗಿರುವ ಈ ಪತಂಗವನ್ನ ಉಡುಪಿಯ ಉರಗ ತಜ್ಞ ಗುರುರಾಜ್ ಸನಿಲ್ ತಮ್ಮ ಕ್ಯಾಮೆರಾದಲ್ಲಿ ಸೆರೆಹಿಡಿದಿದ್ದಾರೆ.

ಈ ಪತಂಗಕ್ಕೆ ಬಾಯಿ, ಜೀರ್ಣಾಂಗ ವ್ಯವಸ್ಥೆ ಎಂಬುದೇ ಇಲ್ಲ!
ಇದರ ಜೊತೆಗೆ ವಿಶೇಷವೆಂದರೆ ಈ ಪತಂಗಕ್ಕೆ ಬಾಯಿ ಹಾಗೂ ಜೀರ್ಣಾಂಗ ವ್ಯವಸ್ಥೆ ಎಂಬುದೇ ಇಲ್ಲ. ಹಾಗಾಗಿ ಕೋಶದಿಂದ ಹೊರಬಂದ ಪತಂಗ ಏನ್ನನೂ ತಿನ್ನುವುದಿಲ್ಲ. ಇದಕ್ಕೆ ಬೇಕಾದ ಎಲ್ಲಾ ಪೌಷ್ಟಿಕಾಂಶವನ್ನು ಹುಳು ಆಗಿರುವಾಗಲೇ ಎಲೆಗಳನ್ನು ತಿಂದು ಸಂಪಾದಿಸಿಕೊಳ್ಳುತ್ತದೆ. ಹೀಗಾಗಿ ಅಟ್ಲಾಸ್​ ಮಾತ್​ ತನ್ನ ಶಕ್ತಿಯನ್ನು ಸಂರಕ್ಷಿಸಲು ಅತ್ಯಂತ ಕಡಿಮೆ ಹಾರಾಟ ಮಾಡಿ ಹೆಚ್ಚಾಗಿ ಎಲೆಯ ಮೇಲೇ ವಿಶ್ರಾಂತಿ ಮಾಡುತ್ತಾ ಕಂಡುಬರುತ್ತೆ. ದಿನ ಕಳೆದಂತೆ ತುಂಬಾ ಬಲಹೀನವಾಗುವ ಈ ಪತಂಗ ಅಂತಿಮವಾಗಿ ಹಕ್ಕಿ, ಓತಿ ಮತ್ತು ಇರುವೆಗಳ ಕೈಯಲ್ಲಿ ಸಿಲುಕಿ ಆಹಾರವಾಗಿ ಬಿಡುತ್ತೆ ಎಂದು ತಜ್ಞರು ತಿಳಿಸಿದ್ದಾರೆ. -ಹರೀಶ್ ಪಾಲೆಚ್ಚಾರ್