ಯೂಟ್ಯೂಬ್​ನಲ್ಲಿ 10 ಕೋಟಿ ವ್ಯೂಸ್​ ಗಳಿಸಿತು ‘ಬೆಳಗೆದ್ದು’ ಸಾಂಗ್​.. ರಕ್ಷಿತ್​ ಶೆಟ್ಟಿಯನ್ನು ನೆನಪಿಸಿಕೊಂಡ ರಶ್ಮಿಕಾ ಮಂದಣ್ಣ

ಕಿರಿಕ್​ ಪಾರ್ಟಿ ಸಿನಿಮಾದ ಬೆಳಗೆದ್ದು ಯಾರ ಮುಖವ ನಾನು ನೋಡಿದೆ ಹಾಡು ಯುಟ್ಯೂಬ್​ನಲ್ಲಿ ಬರೋಬ್ಬರಿ 10 ಕೋಟಿ ವೀಕ್ಷಕರನ್ನು ಗಳಿಸಿಕೊಂಡಿದೆ. 2016ರ ನವೆಂಬರ್​ 25 ರಂದು ಯೂಟ್ಯೂಬ್​ನಲ್ಲಿ ಬಿಡುಗಡೆಗೊಂಡಿದ್ದ ಈ ಹಾಡು ಇದೀಗ 10 ಕೋಟಿ ವೀಕ್ಷಣೆ ಗಳಿಸಿರುವ ಕಾರಣ ‘ಕಿರಿಕ್’​ ತಂಡ ಫುಲ್​ ಖುಷಿಯಾಗಿದೆ. ಟ್ವಿಟರ್​, ಫೇಸ್​ಬುಕ್​ ಮುಂತಾದ ಕಡೆ ‘10 ಕೋಟಿ’ಯ ಖುಷಿಯನ್ನು ಚಿತ್ರತಂಡ ಹಂಚಿಕೊಂಡಿದೆ.

ಕಿರಿಕ್​ ಪಾರ್ಟಿ ಸಿನಿಮಾ ಮೂಲಕ ಮೋಡಿ ಮಾಡಿದ್ದ ರಕ್ಷಿತ್​ ಶೆಟ್ಟಿ ಮತ್ತು ರಶ್ಮಿಕಾ ಮಂದಣ್ಣ ಜೋಡಿ ಸಿನಿಮಾ ಬಿಡುಗಡೆಯಾದಾಗ ಭಾರೀ ಸುದ್ದಿಯಲ್ಲಿದ್ದರು. ಆದರೆ, ನಂತರದ ದಿನಗಳಲ್ಲಿ ಅವರಿಬ್ಬರ ಮಧ್ಯೆ ಎಲ್ಲವೂ ಸರಿಯಿಲ್ಲ ಎಂಬ ಅಭಿಪ್ರಾಯ ಮೂಡಿದ ಕಾರಣ ಜೋಡಿಯ ಕುರಿತಾದ ಸುದ್ದಿ ತಣ್ಣಗಾಗಿತ್ತು. ಟ್ವಿಟರ್​, ಇನ್​ಸ್ಟಾಗ್ರಾಂಗಳಲ್ಲೂ ಇವರಿಬ್ಬರೂ ಸಂಪರ್ಕದಲ್ಲಿರುವುದು ಕಂಡುಬಂದಿರಲಿಲ್ಲ.

ಆದರೆ, ಇದೀಗ ‘ಬೆಳಗೆದ್ದು ಯಾರ ಮುಖವ ನಾನು ನೋಡಿದೆ’ ಹಾಡು 10 ಕೋಟಿ ವೀಕ್ಷಣೆ ಪಡೆಯುತ್ತಿದ್ದಂತೆ ರಶ್ಮಿಕಾ ತನ್ನ ಖುಷಿಯನ್ನು ಹಂಚಿಕೊಂಡಿದ್ದಾರೆ. ನನ್ನ ಮೊಟ್ಟ ಮೊದಲ ಹಾಡು ಈ ಸಾಧನೆ ಮಾಡಿರುವುದು ಸಿಕ್ಕಾಪಟ್ಟೆ ಖುಷಿ ಕೊಟ್ಟಿದೆ. ಚಿತ್ರೀಕರಣದ ಸಂದರ್ಭವನ್ನು ಮತ್ತೆ ನೆನಪಿಸಿಕೊಂಡು ನನ್ನೊಳಗಿನ ಸಾನ್ವಿಗಾಗಿ ಹುಡುಕಾಡುತ್ತಿದ್ದೇನೆ ಎಂದು ಟ್ವೀಟ್​ ಮಾಡಿದ್ದಾರೆ.

ಅಚ್ಚರಿಯೆಂದರೆ ಈ ಟ್ವೀಟ್​ನ ಕೊನೆಯಲ್ಲಿ ರಶ್ಮಿಕಾ ರಕ್ಷಿತ್​ ಶೆಟ್ಟಿಯನ್ನು ಟ್ಯಾಗ್​ ಮಾಡಿದ್ದಾರೆ. ರಿಷಬ್​ ಶೆಟ್ಟಿ, ಅಜನೀಶ್​ ಬಿ ಲೋಕನಾಥ್​, ಸಂಯುಕ್ತ ಹೆಗಡೆ ಜೊತೆ ರಕ್ಷಿತ್​ ಶೆಟ್ಟಿಯನ್ನೂ ಟ್ಯಾಗ್ ಮಾಡಿರುವುದು ಕುತೂಹಲ ಮೂಡಿಸಿದೆ.

ಇಡೀ ಕಿರಿಕ್​ ತಂಡ ಈ ಖುಷಿಯನ್ನು ಅಭಿಮಾನಿಗಳೊಂದಿಗೆ ಹಂಚಿಕೊಂಡಿದೆ. 10 ಕೋಟಿ ದಾಟಿದ ನನ್ನ ಮೊದಲ ಹಾಡು ಎಂದು ಅಜನೀಶ್​ ಬಿ ಲೋಕನಾಥ್​ ಸಂತಸ ಹಂಚಿಕೊಂಡಿದ್ದಾರೆ. ಫೇಸ್​ಬುಕ್​ನಲ್ಲೂ ವೀಡಿಯೋ ಹಂಚಿಕೊಳ್ಳಲಾಗಿದ್ದು ಸದ್ಯ ಕಿರಿಕ್​ ಪಾರ್ಟಿ ಅಭಿಮಾನಿಗಳು ಸಖತ್​ ಖುಷಿಯಲ್ಲಿದ್ದಾರೆ.