Contactless Transaction: ಇನ್ಮುಂದೆ ATMನಲ್ಲಿ ಹಣ ಪಡೆಯಲು ನೀವು ಕಾರ್ಡ್​ ಬಳಸಬೇಕಿಲ್ಲ!

ತಂತ್ರಜ್ಞಾನ ದಿನೇದಿನೇ ಮುಂದುವರೆಯುತ್ತಿದ್ದಂತೆ ಎಲ್ಲಾ ಕ್ಷೇತ್ರಗಳೂ ಬದಲಾವಣೆಗೆ ಒಗ್ಗಿಕೊಳ್ಳುತ್ತಿವೆ. ಈಗಾಗಲೇ ಡಿಜಿಟಲ್ ಇಂಡಿಯಾ ಯೋಜನೆಯಡಿಯಲ್ಲಿ ಕ್ಯಾಶ್​ಲೆಸ್ ವ್ಯವಹಾರಕ್ಕೆ ದೇಶದಲ್ಲಿ ಸಾಕಷ್ಟು ಮಹತ್ವ ಒದಗಿದ್ದು ತಂತ್ರಜ್ಞಾನ ಬಳಕೆ ಜನಸಾಮಾನ್ಯರಿಗೆ ಸುಲಭವಾಗಿ ತಲುಪಿದೆ. ಈ ಬೆಳವಣಿಗೆಗಳು ಕೊರೊನಾ ಸಂದರ್ಭದಲ್ಲಂತೂ ಜನರ ಪಾಲಿಗೆ ವರದಾನವಾಗಿದ್ದವು. ಅದರ ಮುಂದುವರಿದ ಭಾಗವೆಂಬಂತೆ ATM ಕೇಂದ್ರಗಳಲ್ಲೂ ಈಗ ನೂತನ ತಂತ್ರಜ್ಞಾನ ಆಧಾರಿತ ಪದ್ಧತಿ ಜಾರಿಗೆ ತರಲು ಯೋಜಿಸಲಾಗಿದ್ದು. ಕಾಂಟ್ಯಾಕ್ಟ್ ಲೆಸ್ ವ್ಯವಹಾರಕ್ಕೆ ಇದು ದಾರಿ ಮಾಡಿಕೊಡಲಿದೆ ಎಂದು ಸಂಬಂಧಿಸಿದವರು ಹೇಳಿದ್ದಾರೆ. ATMಗಳಲ್ಲಿ ಕಾರ್ಡ್​ ಬಳಸದೇ ಕೇವಲ QR ಕೋಡ್ ಮೂಲಕವೇ ಹಣ ಪಡೆಯುವ ವ್ಯವಸ್ಥೆ ಸದ್ಯದಲ್ಲೇ ಎಲ್ಲೆಡೆ ಲಭ್ಯವಾಗಲಿದೆ.

ಇದಕ್ಕಾಗಿ AGS Transact Technologies ಜೊತೆಗೆ Mastercard ಕೈ ಜೋಡಿಸಿದ್ದು, ಈ ನೂತನ ತಂತ್ರಜ್ಞಾನದಡಿಯಲ್ಲಿ ಮೊಬೈಲ್ ಬ್ಯಾಂಕಿಂಗ್ ಆ್ಯಪ್ ಬಳಸಿಕೊಂಡು ATM ಯಂತ್ರದಿಂದ ಹಣಪಡೆಯಬಹುದಾಗಿದೆ. ಸದ್ಯ Mastercard ಬಳಕೆದಾರರಿಗೆ ಹೊಸ ಸೌಲಭ್ಯ ಸಿಗಲಿದ್ದು, ಗ್ರಾಹಕರು ಹಣ ಪಡೆಯುವ ಮುನ್ನ ATM ಯಂತ್ರದ ಮೇಲೆ ಕಾಣುವ QR ಕೋಡ್ ಸ್ಕ್ಯಾನ್ ಮಾಡಬೇಕಿದೆ. ನಂತರ ತಮ್ಮ ಮೊಬೈಲ್​ನಲ್ಲಿ ಪಿನ್​ ನಮೂದಿಸಿ, ಪಡೆಯಬೇಕಾದ ಹಣದ ಮೊತ್ತವನ್ನೂ ಹಾಕಿ ನಗದು ಸ್ವೀಕರಿಸಬಹುದಾಗಿದೆ.

ಈ ವ್ಯವಸ್ಥೆ ಶೀಘ್ರದಲ್ಲೇ ದೇಶದ ಎಲ್ಲಾ ATM ಕೇಂದ್ರಗಳಲ್ಲೂ ಜಾರಿಯಾಗಲಿದ್ದು, ನೀವು ನಿಮ್ಮ ATM ಕಾರ್ಡ್​ ಬಳಸದೇ, ಮಶೀನ್​ನಲ್ಲಿ ಪಿನ್​ ನಮೂದಿಸದೇ ಹಣ ಪಡೆಯುವುದು ಸಾಧ್ಯವಾಗಲಿದೆ.