ಕಾಫಿನಾಡ ಮೈ ಕೊರೆಯುವ ಚಳಿಯಲ್ಲಿ ಸಿಕ್ಕಿ ಹಾಕಿಕೊಂಡು ನಡುಗುತ್ತಿರುವ ಸಾರಿಗೆ ನೌಕರರು

ಚಿಕ್ಕಮಗಳೂರು: ಸಾರಿಗೆ ನೌಕರರ ಮುಷ್ಕರ ಅಂತೂ ಇಂತೂ ಅಂತ್ಯ ಕಂಡಿತು ಎನ್ನುವಷ್ಟರಲ್ಲಿ ಮತ್ತೆ ಮುಂದುವರೆಯಲಿದೆ ಎಂಬ ಸುದ್ದಿ ಬಿದ್ದಿದೆ. ಉತ್ತರ ಕರ್ನಾಟಕ ಕಡೆಯಿಂದ ಮೂರು ದಿನಗಳ ಹಿಂದೆ ಚಿಕ್ಕಮಗಳೂರಿಗೆ ಬಂದ ಕಂಡಕ್ಟರ್ ಹಾಗೂ ಡ್ರೈವರ್​ಗಳು ಕೊಂಚ ನಿರಾಳರಾಗುವಷ್ಟರಲ್ಲಿ ಮುಷ್ಕರ ಮುಂದುವರೆಯುವ ಸುದ್ದಿ ಮತ್ತೆ ನಡುಕ ಹುಟ್ಟಿಸಿದೆ. ಈ ನಡುಕಕ್ಕೆ ಕಾರಣ ಮಲೆನಾಡಿನ ಕೊರೆಯುವ ಚಳಿ. ಮೂರು ದಿನಗಳಿಂದ ಚಿಕ್ಕಮಗಳೂರಿನ ಕೊರೆವ ಚಳಿಯಲ್ಲಿ ಬಸ್ಸಿನಲ್ಲೇ ದಿನದೂಡುತ್ತಿರುವ ಅವರ ಪರಿಸ್ಥಿತಿ ನಿಜಕ್ಕೂ ಅಯ್ಯೋ.. ಪಾಪ!

ಬಸ್ ನಿಲ್ದಾಣದಲ್ಲೇ ಮುಖ ತೊಳೆದುಕೊಂಡು, ನಿಲ್ದಾಣದಲ್ಲೇ ಊಟ-ತಿಂಡಿ ಮಾಡಿ ರಾತ್ರಿ ಬಸ್ಸಿನೊಳಗೆ ಕಾಲ ಕಳೆಯುತ್ತಿರುವ ಡ್ರೈವರ್ ಹಾಗೂ ಕಂಡಕ್ಟರ್​ಗಳ ಅವಸ್ಥೆ ಯಾರಿಗೂ ಬೇಡ ಎನ್ನುವಂತಾಗಿದೆ. ಒಂದೆಡೆ ಜೋರಾಗಿ ಬೀಸುವ ಗಾಳಿ. ಇನ್ನೊಂದೆಡೆ ಮೈಕೊರೆವ ರಣ ಚಳಿ. ಸಂಜೆ ಆರರಿಂದ ಬೆಳಗ್ಗೆ 9 ಗಂಟೆಯವರೆಗೆ ಚಳಿಯನ್ನು ತಡೆದುಕೊಳ್ಳುವುದೇ ಕಷ್ಟ ಎನ್ನುವ ಪರಿಸ್ಥಿತಿಯಲ್ಲಿ ಬಸ್ಸಿನಲ್ಲಿ ಮಲಗಿ ರಾತ್ರಿ ಕಳೆಯುತ್ತಿರುವ ಡ್ರೈವರ್​, ಕಂಡಕ್ಟರ್​ಗಳಿಗೆ ‘ಪ್ರತಿಭಟನೆಯ ಚಳಿ’ ಜೋರಾಗಿಯೇ ತಟ್ಟಿದೆ ಎಂದರೆ ತಪ್ಪಾಗಲಿಕ್ಕಿಲ್ಲ.

ಭೀಕರ ಚಳಿಯ ಮಧ್ಯೆ ಕಂಡಕ್ಟರ್ ಹಾಗೂ ಡ್ರೈವರ್ಗಳು ಬಸ್​ನಲ್ಲಿ ನಡುಗುತ್ತಲೇ ದಿನದೂಡುತ್ತಿದ್ದಾರೆ. ಹಾಸಿಕೊಳ್ಳಲು ಹಾಸಿಗೆ ಇಲ್ಲದೇ, ಹೊದ್ದು ಮಲಗಲು ದಪ್ಪನೆಯ ಬೆಡ್​ಶೀಟ್, ರಗ್ ಕೂಡ ಇಲ್ಲದೇ, ಕೊರೆವ ಚಳಿ ನಡುವೆಯೂ ಇರುವ ಸೊಳ್ಳೆ ಕಾಟದಲ್ಲಿ ರಾತ್ರಿ ಕಳೆಯಲು ಹರಸಾಹಸ ಪಡುತ್ತಿದ್ದಾರೆ.

ಡ್ರೈವರ್ ಪ್ಲಾಸ್ಟಿಕ್ ಚಾಪೆ ಹಾಸಿಕೊಂಡು ಮಲಗಿದ್ರೆ, ಕಂಡಕ್ಟರ್ ರಟ್ಟಿನ ಬಾಕ್ಸ್​ ಹಾಸಿಕೊಂಡು ಮಲಗುತ್ತಿದ್ದಾರೆ. ಚಳಿಯಲ್ಲಿ ನಡುಗುತ್ತಾ ಕಾಲ ದೂಡುವ ಮಧ್ಯೆ ಏಕಾಏಕಿ ಬೀಸುವ ಗಾಳಿ ಡ್ರೈವರ್, ಕಂಡಕ್ಟರ್​ಗಳನ್ನ ಕಂಗಾಲಾಗಿಸುತ್ತಿದೆ.

ಈ ಬಗ್ಗೆ ಟಿವಿ9 ಜೊತೆ ಮಾತನಾಡಿದ ಸಿಬ್ಬಂದಿಗಳು ಇಡೀ ರಾತ್ರಿ ನಿದ್ದೆ ಬರಲ್ಲ ಸಾರ್, ಭಾರೀ ಚಳಿ ಇದೆ ಎಂದು ಅಳಲು ತೋಡಿಕೊಂಡರು. ಈಗ ಪ್ರತಿಭಟನೆ ಮತ್ತೆ ಮುಂದುವರೆಯುವ ನಿರ್ಧಾರ ಹೊರಬಿದ್ದಿರುವುದರಿಂದ ಚಿಕ್ಕಮಗಳೂರಿನಲ್ಲಿ ದಿನ ಕಳೆಯುತ್ತಿರುವ ಡ್ರೈವರ್​, ಕಂಡಕ್ಟರ್​ಗಳಿಂತೂ ಚಳಿ ಹಿಡಿದಿರುವುದು ಸುಳ್ಳಲ್ಲ.