WhatsApp: ವಾಟ್ಸ್​ಆ್ಯಪ್ ಬಳಕೆದಾರರಿಗೆ ಸಿಹಿಸುದ್ದಿ; ಡೆಸ್ಕ್​ಟಾಪ್​ ಆ್ಯಪ್​ ಮೂಲಕವೂ ವಿಡಿಯೋ, ವಾಯ್ಸ್ ಕಾಲ್ ಸೌಲಭ್ಯ

ನೀವು ಕಂಪ್ಯೂಟರ್​ನಲ್ಲಿ ವಾಟ್ಸ್​ಆ್ಯಪ್ ಬಳಕೆದಾರರೇ? ವಾಟ್ಸ್​ಆ್ಯಪ್ ಅಪ್ಲಿಕೇಶನ್ ಅನ್ನು ನಿಮ್ಮ ಕಂಪ್ಯೂಟರ್​ನಲ್ಲಿ ಅಳವಡಿಸಿಕೊಂಡು ವಾಟ್ಸ್​ಆ್ಯಪ್ ಬಳಸುತ್ತೀರೇ? ಕಂಪ್ಯೂಟರ್​ನಲ್ಲಿ ವಾಟ್ಸ್​ಆ್ಯಪ್ ಬಳಸುವಾಗ ವಿಡಿಯೋ ಕಾಲ್, ವಾಯ್ಸ್ ಕಾಲ್ ಮಾಡುವ ಸೌಲಭ್ಯ ಬೇಕಿತ್ತು ಎಂದು ಅನಿಸುತ್ತಿದ್ದರೆ ನಿಮಗೆ ಸಂತಸದ ಸುದ್ದಿಯೊಂದು ಕಾದಿದೆ.  ನೀವು ಬಳಸುವ ವಿಂಡೋಸ್ ಅಥವಾ ಆ್ಯಪಲ್ ಸಿಸ್ಟಮ್​ನಲ್ಲಿ ಬಳಸುವ ವಾಟ್ಸ್​ಆ್ಯಪ್​ನಲ್ಲೂ ವಿಡಿಯೋ ಕಾಲ್, ವಾಯ್ಸ್ ಕಾಲ್ ಮಾಡುವ ಹೊಸ ಸೌಲಭ್ಯವನ್ನು ವಾಟ್ಸ್​ಆ್ಯಪ್ ನೀಡಲಿದೆ.

ಸದ್ಯ ಒಮ್ಮೆ ಒಬ್ಬರಿಗೆ ಮಾತ್ರ ವಿಡಿಯೋ ಕಾಲ್, ವಾಯ್ಸ್ ಕಾಲ್ ಮಾಡುವ ಸೌಲಭ್ಯ ಒದಗಿಸಲಾಗಿದ್ದು, ಗ್ರೂಪ್ ವಿಡಿಯೋ ಕಾಲ್ ಮತ್ತು ವಾಯ್ಸ್ ಕಾಲ್​ಗೆ ಅವಕಾಶ ನೀಡಿಲ್ಲ. ಆದರೆ ಒಮ್ಮೆಗೆ 8 ಜನರಿಗೆ ವಿಡಿಯೋ ಕಾಲ್ ಅಥವಾ ವಾಯ್ಸ್ ಕಾಲ್ ಮಾಡಬಹುದಾಗಿದೆ. ಇನ್ನೂ ಹೆಚ್ಚು ಜನರು ಒಟ್ಟಿಗೆ ವಿಡಿಯೊ ಕಾಲ್​ ಮಾಡುವ ಸೌಲಭ್ಯವನ್ನು ಮುಂದಿನ ದಿನಗಳಲ್ಲಿ ನೀಡುವ ಭರವಸೆಯನ್ನು ಕಂಪನಿ ವ್ಯಕ್ತಪಡಿಸಿದೆ.

ಈ ಸೌಲಭ್ಯ ಪಡೆಯಲು ವಾಟ್ಸ್​ಆ್ಯಪ್ ವೆಬ್​ಸೈಟ್​ನಿಂದ ವಾಟ್ಸ್​ಆ್ಯಪ್ ಆ್ಯಪ್​ನ್ನು ಡೌನ್​ಲೋಡ್ ಮಾಡಿಕೊಳ್ಳಬೇಕು. ನಿಮ್ಮ ಮೊಬೈಲ್​ನಲ್ಲೂ ಅದೇ ಖಾತೆಯ ವಾಟ್ಸ್​ಆ್ಯಪ್ ಇರಿಸಿಕೊಂಡು, ಕಂಪ್ಯೂಟರ್​ನ ವಾಟ್ಸ್​ಆ್ಯಪ್​ನಲ್ಲಿ ಸ್ಕ್ಯಾನ್ ಮಾಡಿ ಓಪನ್ ಮಾಡಬೇಕು. ಈ ಮೂಲಕ ಕಂಪ್ಯೂಟರ್​ನಲ್ಲಿ ಆ್ಯಪ್​ ಮೂಲಕ ವಾಟ್ಸ್​ಆ್ಯಪ್ ಬಳಸಬಹುದು.

ಫೇಸ್​ಬುಕ್ ಒಡೆತನದ ಮೆಸೇಜಿಂಗ್ ಆ್ಯಪ್ ವಾಟ್ಸ್​ಆ್ಯಪ್ ಖಾಸಗಿ ಸಂವಹನಕ್ಕೊಂದೇ ಅಲ್ಲದೇ, ಉದ್ಯೋಗ, ಉದ್ಯಮ ನಡೆಸಲು ಸಹ ಸಹಕಾರಿಯಾಗಿದೆ. ಸದ್ಯ ವಾಟ್ಸ್​ಆ್ಯಪ್ ವೆಬ್​ನಲ್ಲಿ ಈ ಸೌಲಭ್ಯ ನೀಡಲಾಗಿಲ್ಲ. ಹೀಗಾಗಿ, ಮುಂದಿನ ದಿನಗಳಲ್ಲಿ ವಾಟ್ಸ್​ಆ್ಯಪ್ ವೆಬ್​ನಲ್ಲೂ ಈ ಸೌಲಭ್ಯ ನೀಡಬೇಕೆಂಬ ಒತ್ತಾಯ ಗ್ರಾಹಕರಿಂದ ಕೇಳಿಬರುವುದಂತೂ ಗ್ಯಾರಂಟಿ.

ವಾಟ್ಸ್​ಆ್ಯಪ್ ವೆಬ್​ ಬಗ್ಗೆ ಇದೆ ಆತಂಕ

ವಾಟ್ಸ್​ಆ್ಯಪ್​​ ತನ್ನ ಪಾಲಿಸಿಯನ್ನು ಬದಲಾಯಿಸಿದ ವಿಚಾರ ದೊಡ್ಡಮಟ್ಟದಲ್ಲಿ ಚರ್ಚೆ ಆಗುತ್ತಿದೆ. ಈ ಮಧ್ಯೆ ಸ್ಪಷ್ಟನೆ ನೀಡಿರುವ ಸಂಸ್ಥೆ ಯಾವುದೇ ಕಾರಣ ವೈಯಕ್ತಿಕ ಚ್ಯಾಟ್​ಗಳು ಸೋರಿಕೆ ಆಗುವುದಿಲ್ಲ ಎಂದು ಹೇಳಿತ್ತು. ಹೀಗಿರುವಾಗಲೇ ಗೂಗಲ್​ನಲ್ಲಿ ವಾಟ್ಸ್​ಆ್ಯಪ್ ಚಾಟ್​ ಸೋರಿಕೆ ಆಗಿರುವ ವಿಚಾರ ಬಯಲಾಗಿತ್ತು.

ವಾಟ್ಸ್​ಆ್ಯಪ್​ ವೆಬ್​ನಿಂದ ಕೆಲ ಚಾಟ್​ಗಳು ಲೀಕ್​ ಆಗಿರುವ ಬಗ್ಗೆ ವರದಿ ಆಗಿದೆ. ವೆಬ್​ನಲ್ಲಿರುವ ಸಮಸ್ಯೆಯಿಂದ ಈ ಸೋರಿಕೆ ಉಂಟಾಗಿದೆ. ಕೇವಲ ಒಂದು ಸರ್ಚ್​ನಿಂದ ಖಾಸಗಿ ಚ್ಯಾಟ್​ಗಳು ಸಾರ್ವಜನಿಕರಿಗೆ ಸಿಗುವಂತಾಗಿದೆ. ಇದು ವಾಟ್ಸ್​ಆ್ಯಪ್ ಭದ್ರತೆ ಬಗ್ಗೆ ಪ್ರಶ್ನೆ ಮಾಡಿದೆ.

ಒಂದು ಗೂಗಲ್​ ಸರ್ಚ್​​ನಿಂದ ವಾಟ್ಸ್​ಆ್ಯಪ್​ ಚಾಟ್ ಹಾಗೂ ಕಾಂಟ್ಯಾಕ್ಟ್​ಗಳು ಲಭ್ಯವಾಗುತ್ತಿದೆ. ಸೈಬರ್​ ಕಳ್ಳರು ಈ ಮಾಹಿತಿ ಬಳಕೆ ಮಾಡಿಕೊಂಡು ಸುಲಭವಾಗಿ ಫಿಶಿಂಗ್​ ನಡೆಸಬಹುದು ಎಂದು ತಜ್ಞರು ಎಚ್ಚರಿಕೆ ನೀಡಿದ್ದಾರೆ.

ಆದರೆ ವಾಟ್ಸ್​ಆ್ಯಪ್ ವೆಬ್​ಗೂ ವಾಟ್ಸ್​ಆ್ಯಪ್ ಅಪ್ಲಿಕೇಶನ್​ಗೂ ವ್ಯತ್ಯಾಸಗಳಿದ್ದು, ಕಂಪ್ಯೂಟರ್​ನಲ್ಲಿ ವಾಟ್ಸ್​ಆ್ಯಪ್​ ಅಪ್ಲಿಕೇಶನ್​ ಬಳಸಿ ಸುಲಭವಾಗಿ ಸಂದೇಶ ವಿನಿಮಯ ಮಾಡಬಹುದಾಗಿದೆ. ಇದೀಗ ವಿಂಡೋಸ್ ಅಥವಾ ಆ್ಯಪಲ್ ಸಿಸ್ಟಮ್​ನಲ್ಲಿ ಬಳಸುವ ವಾಟ್ಸ್​ಆ್ಯಪ್​ನಲ್ಲೂ ವಿಡಿಯೋ ಕಾಲ್, ವಾಯ್ಸ್ ಕಾಲ್ ಮಾಡುವ ಹೊಸ ಸೌಲಭ್ಯವನ್ನು ವಾಟ್ಸ್​ಆ್ಯಪ್ ನೀಡಲಿದೆ.

ಇದನ್ನೂ ಓದಿ: ವಾಟ್ಸ್​ಆ್ಯಪ್ ಹೊಸ ಪ್ರೈವೆಸಿ ಪಾಲಿಸಿಯಲ್ಲಿ ಭಾರತೀಯರಿಗೆ ತಾರತಮ್ಯ: ಕೇಂದ್ರ ಸರ್ಕಾರ

WhatsApp Privacy: ವಾಟ್ಸ್ಆ್ಯಪ್ ಗೌಪ್ಯತೆ ನೀತಿಯನ್ನು ಗ್ರಾಹಕರು ಪಾಲಿಸದೇ ಇದ್ದರೆ ಏನಾಗುತ್ತೆ?