ಕೊರೋನಾ ಹರಡುವ ಅಪಾಯ ತಡೆಯಲು ಯಾವ ರೀತಿಯ ಮಾಸ್ಕ್​ ಬಳಕೆ ಉತ್ತಮ ? ಇಲ್ಲಿದೆ ಮಾಹಿತಿ

ಕೊರೋನಾ ಆರಂಭವಾದ ಬಳಿಕ ಮಾಸ್ಕ್​ನ ಬಳಕೆ ಹೆಚ್ಚಾಗಿದೆ. ಮನೆಯಿಂದ ಹೊರಗೆ ಹೋಗುವಾಗ ಮಾಸ್ಕ್​ ಅನಿವಾರ್ಯವಾಗಿದೆ. ಹೀಗಾಗಿ ಮಾಸ್ಕ್​ ದಿನನಿತ್ಯದ ಜೀವನದ ಭಾಗವಾಗಿದೆ. ರೋಗ ಹರಡುವುದನ್ನು ತಡೆಯಲು ಫೇಸ್​ ಮಾಸ್ಕ್​ ಅವಶ್ಯಕವಾಗಿದೆ. ಈ ಮಾಸ್ಕ್​ಗಳು ಏರೋಸಾಲ್​ಗಳು ಮತ್ತು ಮೂಗು ಹಾಗೂ ಬಾಯಿಯಿಂದ ಹೊರಬರುವ ಹನಿಗಳಿಂದ ಹರಡುವ ಕೊರೋನಾದಂತಹ ರೋಗಗಳನ್ನು ತಡೆಯುತ್ತದೆ. ಕೊರೋನ ಆರಂಭದ ದಿನಗಳಲ್ಲಿ ಫೇಸ್​ ಮಾಸ್ಕ್​ ರೋಗ ಹರಡುವ ಪ್ರಮಾಣವನ್ನು ಕಡಿಮೆಗೊಳಿಸುತ್ತದೆ ಎಂದು ಯುಎಸ್​ ನ ಸೆಂಟರ್​ ಫಾರ್​ ಡಿಸೀಸ್​ ಕಂಟ್ರೋಲ್​ ಆ್ಯಂಡ್​ ಪ್ರಿವೆನ್ಶನ್​ ಸಂಸ್ಥೆ ಶಿಫಾರಸ್ಸು ಮಾಡಿತ್ತು. ಅದೇ ಇಂದಿಗೂ ರೋಗ ನಿಯಂತ್ರಣಕ್ಕೆ ಪ್ರಾಥಮಿಕ ಪರಿಹಾರವಾಗಿದೆ.

ಕೆಲವರಿಗೆ ಉಸಿರಾಟದ ಸಮಸ್ಯೆಯಿರುವುದರಿಂದ ಮುಖವನ್ನು ಬಿಗಿಯಾಗಿ ಮುಚ್ಚುವ ಮಾಸ್ಕ್​ಗಳು ಹೆಚ್ಚು ತೊಂದರೆ ಉಂಟು ಮಾಡಬಹುದು. ಹೀಗಾಗಿ ನಿಮ್ಮ ಮುಖಕ್ಕೆ ಹೊಂದುವ ಉಸಿರಾಟಕ್ಕೂ ಅನುಕೂಲವಾಗುವಂತಹ ಮಾಸ್ಕ್​ ಬಳಸಿ. ಕೆಲವು ದಿನಗಳ ಹಿಂದೆ ಕೊರೋನಾ ರೂಪಾಂತರಿ ಒಮಿಕ್ರಾನ್​ ವೈರಸ್​ಕೂಡ ವೇಗವಾಗಿ ಹರಡುತ್ತದೆ. ಹೀಗಾಗಿ ಆರೋಗ್ಯವನ್ನು ಕಾಪಡಿಕೊಳ್ಳುವುದು ಅಗತ್ಯವಾಗಿದೆ. ಮನೆಯಿಂದ ಹೊರಗೆ ಹೋಗುವಾಗ ಮಾಸ್ಕ್​ ಧರಿಸುವುದು ಕಡ್ಡಾಯವಾಗಬೇಕು. ಹಾಗಾದರೆ ಯಾವ ರೀತಿಯ ಮಾಸ್ಕ್​ಗಳು ಹೆಚ್ಚು ಸುರಕ್ಷಿತ ಎನ್ನುವ ಪ್ರಶ್ನೆ ಮೂಡುತ್ತದೆ.

ಈ ಕುರಿತು ಅಮೆರಿಕನ್​ ಜರ್ನಲ್​ ಆಫ್​ ಇನ್ಫೆಕ್ಷನ್​ ಕಂಟ್ರೋಲ್​ ಅಧ್ಯಯನ ನಡೆಸಿದ್ದು, ವರದಿಯನ್ನು ಪ್ರಕಟಿಸಿದೆ. ಅದರ ಪ್ರಕಾರ , ಕಿವಿಯ ಹಿಂದೆ ಕೊಂಚ ಬಿಗಿಯಾಗಿ ಸಿಲುಕಿಸುವ ಹಾಗೂ ಬಾಯಿ ಮತ್ತು ಮೂಗನ್ನು ಸಂಪೂರ್ಣವಾಗಿ ಮುಚ್ಚುವ ಮಾಸ್ಕ್​ಗಳು ಹೆಚ್ಚು ಸುರಕ್ಷಿತ ಎಂದು ಹೇಳಲಾಗಿದೆ. ಅದರ ಜತೆಗೆ ವೈದ್ಯಕೀಯ ಮಾಸ್ಕ್​ಗಳು ಅಥವಾ ಎನ್​95 ಮಾಸ್ಕ್​ಗಳು ಬಳಕೆಗೆ ಉತ್ತಮ ಎನ್ನಲಾಗಿದೆ. ಅದರಲ್ಲೂ ವೈದ್ಯರು ಬಳಸುವ ಡಬಲ್​ ಕವರ್​ ಮಾಸ್ಕ್​ಗಳು ಮೂರು ಪದರಗಳನ್ನು ಹೊಂದಿದ್ದು, ಮೂಗು ಮತ್ತು ಬಾಯಿಯನ್ನು ಸರಿಯಾದ ರೀತಿಯಲ್ಲಿ ಕವರ್​ ಮಾಡಿ ಹೆಚ್ಚಿನ ರಕ್ಷಣೆ ನೀಡುತ್ತದೆ ಎಂದು ವರದಿಯಲ್ಲಿ ಹೇಳಲಾಗಿದೆ.

ಆದರೆ ನೆನಪಿಡಿ ನೀವು ಧರಿಸುವ ಬಟ್ಟೆಯ ಮಾಸ್ಕ್​ಗಳು ಎಷ್ಟರ ಮಟ್ಟಿಗೆ ಸುರಕ್ಷಿತ ಎನ್ನುವುದನ್ನು ಪರೀಕ್ಷಿಸಿಕೊಳ್ಳಿ. ತೆಳ್ಳನೆಯ ಬಟ್ಟೆಯ ಮಾಸ್ಕ್​ಗಳು ನಿಮ್ಮ ಬಾಯಿ ಹಾಗೂ ಮೂಗಿನಿಂದ ಹೊರಬರುವ ಹನಿಗಳನ್ನು ತಡೆಯಲಾರದು. ಹೀಗಾಗಿ ಡಬಲ್​ ಕವರ್​ ಮಾಸ್ಕ್​ ಧರಿಸುವುದು ಅಥವಾ ವೈದ್ಯಕೀಯ ಮಾಸ್ಕ್ ಧರಿಸುವುದು ಉತ್ತಮ. ಅಲ್ಲದೆ ಯಾವುದೇ ಮಾಸ್ಕ್​ಅನ್ನು ಸರಿಯಾದ ಕ್ರಮದಲ್ಲಿ ಧರಿಸುವುದು ನಿಮ್ಮ ಸುರಕ್ಷತೆಯನ್ನು ಹೆಚ್ಚಿಸುತ್ತದೆ ಹಾಗೂ ಕೊರೋನಾ ಸಾಂಕ್ರಾಮಿಕ ರೋಗದ ಅಪಾಯದಿಂದ ದೂರವಿರಬಹುದು ಎನ್ನುತ್ತಾರೆ ಸಂಶೋಧಕರು.