75 ವರ್ಷದಿಂದ ಮಕ್ಕಳಿಗೆ ಉಚಿತ ಶಿಕ್ಷಣ: ದಣಿವರಿಯದೆ ದುಡಿಯುತ್ತಾರೆ ಈ ಶತಾಯುಷಿ ಶಿಕ್ಷಕ!

ಭುವನೇಶ್ವರ: ಕಳೆದ 75 ವರ್ಷಗಳಿಂದ ವ್ಯಕ್ತಿಯೊಬ್ಬರು ಮಕ್ಕಳಿಗೆ ಉಚಿತ ಶಿಕ್ಷಣ ನೀಡುತ್ತಾ ಬಂದಿರುವ ಸ್ವಾರಸ್ಯಕರ ಸಂಗತಿ ಒಡಿಶಾದ ಜಜ್​ಪುರ್​ ಗ್ರಾಮದಲ್ಲಿ ಬೆಳಕಿಗೆ ಬಂದಿದೆ. ಹೌದು, ಮಕ್ಕಳಿಂದ ಅಥವಾ ಅವರ ಪೋಷಕರಿಂದ ಯಾವುದೇ ಫಲಾನುಭವದ ಅಪೇಕ್ಷೆಯಿಲ್ಲದೆ 104 ವರ್ಷದ ನಂದಾ ಪ್ರುಸ್ತಿ ಎಂಬ ವೃದ್ಧರು ಮಕ್ಕಳಿಗೆ ತಮ್ಮ ಮನೆ ಬಳಿಯಿರುವ ಮರದ ಕೆಳಗೆ ಉಚಿತ ಶಿಕ್ಷಣ ನೀಡುತ್ತಾ ಬಂದಿದ್ದಾರೆ. ಅದು ಒಂದಲ್ಲ, ಎರಡಲ್ಲ, ಬರೋಬ್ಬರಿ 75 ವರ್ಷಗಳಿಂದ ಈ ನಿಸ್ವಾರ್ಥ ಸೇವೆ ಮಾಡಿಕೊಂಡು ಬಂದಿದ್ದಾರೆ.

ಅಚ್ಚರಿಯ ಸಂಗತಿಯೆಂದರೆ, ನಂದಾ ಈ ಕೆಲಸಕ್ಕೆ ಸರ್ಕಾರ ನೀಡಲು ಮುಂದಾದ ನೆರವನ್ನು ಸಹ ತಿರಸ್ಕರಿಸಿದ್ದಾರಂತೆ. ಮಕ್ಕಳಿಗೆ ಪಾಠ ಹೇಳಿಕೊಡುವುದು ನನಗೆ ಬಹಳ ಇಷ್ಟ. ಹೀಗಾಗಿ, ಅವರಿಗೆ ಶಿಕ್ಷಣ ನೀಡಲು ಈ ಮರದ ನೆರಳೇ ನನಗೆ ಸಾಕು ಎಂದು ಈ ಪರೋಪಕಾರಿ ವೃದ್ಧ ಹೇಳಿದ್ದಾರೆ.

ವೃದ್ಧನ ಅಮೋಘ ಸೇವೆಗೆ ತಲೆಬಾಗಿರುವ ಗ್ರಾಮಸ್ಥರು ಇವರಿಗೆ ತಮ್ಮ ಕಾರ್ಯ ಮುಂದುವರಿಸಲು ಒಂದು ಕೊಠಡಿಯನ್ನು ನಿರ್ಮಿಸಲು ಮುಂದಾಗಿದ್ದಾರೆ.

Published On - 3:21 pm, Sun, 27 September 20