ಪಾಸ್​ಪೋರ್ಟ್​​ನಲ್ಲಿದ್ದ ರಾಷ್ಟ್ರೀಯತೆ ಕಾಲಂನ್ನು ತೆಗೆದೇಬಿಟ್ಟಿತಾ ಕೇಂದ್ರ ಸರ್ಕಾರ? ವೈರಲ್​ ಮೆಸೇಜ್​ನ ಸತ್ಯಾಂಶ ಏನು?

ಪಾಸ್​ಪೋರ್ಟ್​ನಲ್ಲಿದ್ದ ರಾಷ್ಟ್ರೀಯತೆ (nationality) ಕಾಲಂನ್ನು ಕೇಂದ್ರ ಸರ್ಕಾರ ತೆಗೆದುಹಾಕಿದೆ ಎಂಬ ಸಂದೇಶವೊಂದು ಸೋಷಿಯಲ್​ ಮೀಡಿಯಾಗಳಲ್ಲಿ ವೈರಲ್​ ಆಗುತ್ತಿದೆ.. ಫೇಸ್​ಬುಕ್​ನಲ್ಲಷ್ಟೇ ಅಲ್ಲದೆ, ವಾಟ್ಸಾಪ್​​ನಲ್ಲೂ ಈ ಮೆಸೇಜ್​ ಓಡಾಡುತ್ತಿದೆ.

ಪ್ರಧಾನಿ ಮೋದಿ ನೇತೃತ್ವದ ಕೇಂದ್ರ ಸರ್ಕಾರ ಇದೀಗ ಪಾಸ್​​ಪೋರ್ಟ್​​ನಲ್ಲಿದ್ದ ರಾಷ್ಟ್ರೀಯತೆ ಎಂಬ ಕಾಲಂನ್ನು ತೆಗದುಹಾಕಿಬಿಟ್ಟಿದೆ. ಹಾಗಾಗಿ ನಿಮ್ಮ ಹಳೆಯ ಪಾಸ್​ಪೋರ್ಟ್​ಗಳನ್ನು ಕಳೆದುಕೊಳ್ಳಬೇಡಿ.. ಹಾಳು ಮಾಡಿಕೊಳ್ಳಬೇಡಿ ಎಂಬ ಮೆಸೇಜ್​​ ಸೈಯದ್​ ಎಟೆಮಡ್ ಉದ್ದೀನ್​ ಎಂಬುವರ ವಾಟ್ಸಾಪ್​ನಿಂದ ಶೇರ್​ ಆಗಿದೆ. ಅವರು ತಮ್ಮನ್ನು ತಾವು ವಕೀಲ ಎಂದು ಹೇಳಿಕೊಂಡು, ಕಾನೂನು ಸಲಹೆ ಎಂಬರ್ಥದಲ್ಲಿ ಈ ಸಂದೇಶವನ್ನು ಕಳಿಸಿದ್ದರಿಂದ, ಸಹಜವಾಗಿಯೇ ಹಲವರು ಇದನ್ನು ಶೇರ್​ ಮಾಡಿದ್ದಾರೆ.

ವಾಸ್ತವ ಏನು? ಆದರೆ ಇಂಡಿಯಾ ಟುಡೆ ಆ್ಯಂಟಿ ಫೇಕ್​ ನ್ಯೂಸ್​ ವಾರ್​ ರೂಂ (AFWA) ನಡೆಸಿದ ಫ್ಯಾಕ್ಟ್​ಚೆಕ್​ನಲ್ಲಿ ಈ ಸಂದೇಶದ ವಾಸ್ತವ ಹೊರಬಿದ್ದಿದೆ. ಪಾಸ್​ಪೋರ್ಟ್​ ಸೇರಿ, ಪ್ರಯಾಣಕ್ಕೆ ಸಂಬಂಧಿಸಿದ ಎಲ್ಲ ರೀತಿಯ ದಾಖಲೆಗಳಲ್ಲಿ ರಾಷ್ಟ್ರೀಯತೆ (nationality) ಕಾಲಂ ಹಾಗೇ ಇದೆ. ಅದನ್ನು ತೆಗೆದಿಲ್ಲ ಎಂದು ವಿದೇಶಾಂಗ ವ್ಯವಹಾರಗಳ ಸಚಿವಾಲಯದ ವಕ್ತಾರ ಅನುರಾಗ್​ ಶ್ರೀವಾಸ್ತವ್​ ಸ್ಪಷ್ಟಪಡಿಸಿದ್ದಾರೆ ಎಂದು ಇಂಡಿಯಾ ಟುಡೆ ತಿಳಿಸಿದೆ.

ಮಾಧ್ಯಮಗಳಲ್ಲಿ ದೊಡ್ಡ ಸುದ್ದಿಯಾಗಬೇಕಿತ್ತು ! ಪಾಸ್​ಪೋರ್ಟ್​ನಲ್ಲಿರುವ ರಾಷ್ಟ್ರೀಯತೆ ಕಾಲಂನ್ನು ತೆಗೆದುಹಾಕುವುದು ಸಣ್ಣ ವಿಷಯವಲ್ಲ. ಹಾಗೊಮ್ಮೆ ಸರ್ಕಾರ ಮಾಡಿದ್ದರೆ, ಅದು ಮಾಧ್ಯಮಗಳಲ್ಲಿ ದೊಡ್ಡ ಸುದ್ದಿಯಾಗಬೇಕಿತ್ತು. ಆದರೆ ಎಷ್ಟೇ ಹುಡುಕಿದರೂ ಇದಕ್ಕೆ ಸಂಬಂಧಪಟ್ಟ ಒಂದು ಸುದ್ದಿಯೂ ಸಿಕ್ಕಿಲ್ಲ ಎಂದು ಹೇಳಿದೆ. ಅಷ್ಟೇ ಅಲ್ಲ, ಪಾಸ್​ಪೋರ್ಟ್ ಹೊಣೆ ಹೊತ್ತಿರುವ ವಿದೇಶಾಂಗ ವ್ಯವಹಾರಗಳ ಸಚಿವಾಲಯ (MEA)ದ ಪಾಸ್​ಪೋರ್ಟ್ ಸೇವಾ ವೆಬ್​ಸೈಟ್​ನಲ್ಲಿ ಕೂಡ ರಾಷ್ಟ್ರೀಯತೆ ಕಾಲಂ ತೆಗೆದು ಹಾಕಿರುವ ಬಗ್ಗೆ ಯಾವುದೇ ಅಧಿಸೂಚನೆಯೂ ಇಲ್ಲ. ಹಾಗೇ, ಈ ವೆಬ್​ಸೈಟ್​ನಲ್ಲಿ ಇರುವ ಪಾಸ್​ಪೋರ್ಟ್​ ಅರ್ಜಿಯಲ್ಲೂ ರಾಷ್ಟ್ರೀಯತೆಯನ್ನು ನಮೂದಿಸಲು ಕಾಲಂ ಇಡಲಾಗಿದೆ. ಹಾಗೇ, ಇತ್ತೀಚೆಗಷ್ಟೇ ಒಬ್ಬರಿಗೆ ನೀಡಲಾದ ಪಾಸ್​ಪೋರ್ಟ್​ ಕೂಡ ಚೆಕ್​ ಮಾಡಲಾಗಿದ್ದು, ಅದರಲ್ಲೂ ನ್ಯಾಷನಾಲಿಟಿ ಕಾಲಂ ಹಾಗೇ ಇದೆ.

ಹಾಗಾಗಿ ಪಾಸ್​ಪೋರ್ಟ್​ನಲ್ಲಿ ರಾಷ್ಟ್ರೀಯತೆ ಕಾಲಂ ಇರುವುದಿಲ್ಲ ಎಂಬ ಮೆಸೇಜ್​ ನಿಮಗೂ ಬಂದಿದ್ದರೆ ಅದನ್ನು ನಂಬಬೇಡಿ..

ಸುಳ್ಳು ಮಾಹಿತಿಯನ್ನು ಒಳಗೊಂಡ ಸಂದೇಶ

ಇತ್ತೀಚಿನ ಪಾಸ್​ಪೋರ್ಟ್​ನಲ್ಲಿ ರಾಷ್ಟ್ರೀಯತೆ ಕಾಲಂ ಇದೆ..