ಕ್ರೆಡಿಟ್​ ಕಾರ್ಡ್ ವ್ಯವಹಾರದ ಮೇಲೆ ಹುಟ್ಟಿದೆ ಭರವಸೆ; ಬ್ಯಾಂಕ್​ಗಳು ಮಾಹಿತಿ ಕೇಳುವ ಪ್ರಮಾಣದಲ್ಲಿ ಹೆಚ್ಚಳ

ಮುಂಬೈ: ಕ್ರೆಡಿಟ್ ಕಾರ್ಡ್ ಬಳಕೆದಾರರ ಬಗ್ಗೆ ಮಾಹಿತಿ ಕೇಳಿ, ಬ್ಯಾಂಕ್​ಗಳು ಸಲ್ಲಿಸಿದ ಕೋರಿಕೆಯ ಪ್ರಮಾಣ ಕಳೆದ ವರ್ಷಕ್ಕಿಂತ ಈ ವರ್ಷ ಹೆಚ್ಚಾಗಿದೆ ಎಂದು ಕ್ರೆಡಿಟ್​ ಇನ್​ಫಾರ್ಮೇಶನ್​ ಸಂಸ್ಥೆಯಲ್ಲೊಂದಾದ ಟ್ರಾನ್ಸ್‌ಯುನಿಯನ್ ಸಿಬಿಲ್ ತಿಳಿಸಿದೆ.

ಇದು ಕೊವಿಡ್​-19 ಲಾಕ್​ಡೌನ್ ಸಡಿಲಗೊಂಡ ಬಳಿಕ ಗ್ರಾಹಕರ ಆರ್ಥಿಕ ಚಟುವಟಿಕೆ ಬಹುಮಟ್ಟಿಗೆ ಸುಧಾರಿಸಿದೆ ಎನ್ನುವುದರ ದ್ಯೋತಕ ಎಂದು ಸಿಬಿಲ್ ಅಭಿಪ್ರಾಯಪಟ್ಟಿದೆ.

ಸಾಲುಸಾಲು ಹಬ್ಬಗಳು, ಲಾಕ್​ಡೌನ್ ನಂತರ ಒಮ್ಮಲೇ ಜನರು ಅಗತ್ಯ ವಸ್ತುಗಳ ಖರೀದಿಗೆ ಮರಳಿದ್ದರಿಂದ ಬೇಡಿಕೆ ಪ್ರಮಾಣ ಜಾಸ್ತಿಯಾಗಿ, ವ್ಯವಹಾರ ಹೆಚ್ಚಾಯಿತು. ಹಾಗಾಗಿ ಅಕ್ಟೋಬರ್​ನಲ್ಲಿ ಹಲವು ಆರ್ಥಿಕ ಸೂಚಕಗಳಲ್ಲಿ ಅಭಿವೃದ್ಧಿ ಕಂಡುಬಂತು ಎಂದು ಕಂಪನಿ ವಿವರಿಸಿದೆ.

ಮಾರುಕಟ್ಟೆಯಲ್ಲಿ ಆರ್ಥಿಕ ಚಟುವಟಿಕೆ ಇದೇ ರೀತಿ ಮುಂದುವರಿಯುವ ಬಗ್ಗೆ ತಜ್ಞರು ಅನುಮಾನ ವ್ಯಕ್ತಪಡಿಸಿದ್ದಾರೆ. ಬೇಡಿಕೆಯ ಸ್ಥಿರತೆಯನ್ನು ಸೂಕ್ಷ್ಮವಾಗಿ ಗಮನಿಸುವ ಅಗತ್ಯವಿದೆ ಎಂದು ಆರ್​ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಕೂಡ ಹೇಳಿದ್ದಾರೆ.

ಹಿಸ್ಟರಿ ಪರಿಶೀಲನೆ
ಬ್ಯಾಂಕ್​ಗಳು ಹಾಗೂ ಹಣಕಾಸು ಸಂಸ್ಥೆಗಳು ಬಳಕೆದಾರರ ಕ್ರೆಡಿಟ್ ಕಾರ್ಡ್​ ಹಿಸ್ಟರಿಯನ್ನು ಪರಿಶೀಲಿಸುವ ಪ್ರಮಾಣ ಏಪ್ರಿಲ್​ನಲ್ಲಿ ಕುಸಿದಿತ್ತು. 2019ರ ಏಪ್ರಿಲ್​ ಅವಧಿಗೆ ಹೋಲಿಸಿದರೆ ಈ ಬಾರಿ ಏಪ್ರಿಲ್​ನಲ್ಲಿ ಶೇ.5ರಷ್ಟು ಕಡಿಮೆಯಾಗಿತ್ತು. ಆದರೆ ಜುಲೈ ವೇಳೆಗೆ ಅದರಲ್ಲಿ ಸುಧಾರಣೆ ಕಂಡುಬಂತು. 2019ರ ಜುಲೈನಲ್ಲಿ ಇದ್ದ ಕ್ರೆಡಿಟ್ ಕಾರ್ಡ್​ ಪರಿಶೀಲನೆಯ ಪ್ರಮಾಣಕ್ಕೆ ಹೋಲಿಸಿದರೆ 2020ರಲ್ಲಿ ಇದು ಶೇ. 61ರಷ್ಟು ಹೆಚ್ಚಾಗಿತ್ತು. ಅಕ್ಟೋಬರ್​ನಲ್ಲಿ ಒಮ್ಮೆಲೆ ಈ ಪ್ರಮಾಣ ಮತ್ತಷ್ಟು ಏರಿಕೆಯಾಗಿದೆ. ಅಂದರೆ ಕಳೆದ ಅವಧಿಗಿಂತ ಶೇ.106ರಷ್ಟು ಅಧಿಕಗೊಂಡಿದೆ.

ಲಾಕ್​ಡೌನ್​ ನಿರ್ಬಂಧ ತೆರವುಗೊಳಿಸಿದ ನಂತರ ಕ್ರೆಡಿಟ್ ಕಾರ್ಡ್​ ವಿಚಾರಣೆ ಪ್ರಮಾಣದಲ್ಲೂ ಚೇತರಿಕೆ ಕಾಣುತ್ತಿರುವುದು ಆಶಾದಾಯಕ ಬೆಳವಣಿಗೆ. ಕೊರೊನಾ ಸೋಂಕಿನ ಭೀತಿಯಿಂದ ಹಲವರು ನಗದು ಮುಟ್ಟಲು ಹೆದರುತ್ತಿದ್ದು ಡಿಜಿಟಲ್​ ಪಾವತಿ ವಿಧಾನವನ್ನು ಅಳವಡಿಸಿಕೊಳ್ಳುತ್ತಿದ್ದಾರೆ. ಕಾರ್ಡ್​ಗಳ ಮೂಲಕ ಮಾಡುವ ವ್ಯವಹಾರದ ಮೇಲೆ ಜನರಲ್ಲಿ ನಿಧಾನವಾಗಿ ಭರವಸೆ ಮೂಡುತ್ತಿದೆ ಎಂದು ಸಿಬಿಲ್ ತಿಳಿಸಿದೆ.

ಇದನ್ನೂ ಓದಿ: ಕಾರ್ಪೊರೇಟ್ ಕಂಪನಿಗಳಿಗೆ ಬ್ಯಾಂಕಿಂಗ್​ ಲೈಸೆನ್ಸ್​: ಆರ್​ಬಿಐ ಕ್ರಮ ಸಮರ್ಥಿಸಿಕೊಂಡ ತಜ್ಞರ ಸಮಿತಿ ಸದಸ್ಯ