ಮೋದಿ ನಿವಾಸದಲ್ಲಿ ಬಿಲ್ ಗೇಟ್ಸ್; ಎಐನಿಂದ ಪರಿಸರದವರೆಗೆ ವಿವಿಧ ವಿಚಾರ ಚರ್ಚಿಸಿದ ಜಾಗತಿಕ ನಾಯಕರು

ನವದೆಹಲಿ, ಮಾರ್ಚ್ 28: ಮೈಕ್ರೋಸಾಫ್ಟ್ ಸಂಸ್ಥಾಪಕರಾದ ಬಿಲ್ ಗೇಟ್ಸ್ (Bill Gates) ಇಂದು ಗುರುವಾರ ಪ್ರಧಾನಿ ನಿವಾಸಕ್ಕೆ ಭೇಟಿ ನೀಡಿ ನರೇಂದ್ರ ಮೋದಿ (Narendra Modi) ಜೊತೆ ಚರ್ಚೆ ನಡೆಸಿದರು. ಇದರ ಒಂದು ಪ್ರೋಮೋವನ್ನು ಎಎನ್​ಐ ಸುದ್ದಿ ಸಂಸ್ಥೆ ಹಂಚಿಕೊಂಡಿದೆ. ನಾಳೆ ಶುಕ್ರವಾರ ಇವರ ಭೇಟಿ ಮತ್ತು ಚರ್ಚೆಯ ಪೂರ್ಣ ವಿಡಿಯೋವನ್ನು ಬಿಡುಗಡೆ ಮಾಡುವ ನಿರೀಕ್ಷೆ ಇದೆ. ಈ ಪ್ರೋಮೋದಲ್ಲಿರುವ (promo) ದೃಶ್ಯಗಳ ಪ್ರಕಾರ ಪ್ರಧಾನಿ ನರೇಂದ್ರ ಮೋದಿ ಮತ್ತು ಬಿಲ್ ಗೇಟ್ಸ್ ಬಹಳ ಆತ್ಮೀಯವಾಗಿ ಮತ್ತು ಮುಕ್ತವಾಗಿ ಮಾತನಾಡುತ್ತಾರೆ, ಅಭಿಪ್ರಾಯ ಹಂಚಿಕೊಳ್ಳುತ್ತಾರೆ. ತಂತ್ರಜ್ಞಾನ ಬಳಕೆಯಿಂದ ಹಿಡಿದು ಕೋವಿಡ್, ಹವಾಮಾನ ಬದಲಾವಣೆ ವಿರುದ್ಧ ನಡೆಯುತ್ತಿರುವ ಹೋರಾಟಗಳ ಸುತ್ತ ಮಾತುಕತೆ ನಡೆಯುತ್ತದೆ.

ಭಾರತದ ಬಗ್ಗೆ ನನಗಿರುವ ಒಂದು ಮೆಚ್ಚುಗೆ ಎಂದರೆ ಇದು ತಂತ್ರಜ್ಞಾನವನ್ನು ಬಳಸುತ್ತಿರುವುದು ಮಾತ್ರವಲ್ಲ, ಅದನ್ನು ಮುನ್ನಡೆಸುತ್ತಲೂ ಇದೆ ಎಂದು ಬಿಲ್ ಗೇಟ್ಸ್ ಹೇಳುತ್ತಾರೆ. ತಂತ್ರಜ್ಞಾನ ವಿಚಾರವಾಗಿ ಮಾತನಾಡುತ್ತಾ ನರೇಂದ್ರ ಮೋದಿ ತಮ್ಮ ಮೊಬೈಲ್​ನಲ್ಲಿರುವ ಆ್ಯಪ್​ವೊಂದನ್ನು ಬಿಲ್ ಗೇಟ್ಸ್​ಗೆ ತೋರಿಸಿ, ಸೆಲ್ಫಿ ತೆಗೆಯಲು ಹೇಳುತ್ತಾರೆ. ಮೈಕ್ರೋಸಾಫ್ಟ್ ಸಂಸ್ಥಾಪಕರು ವಾವ್ ಎಂದು ಉದ್ಗರಿಸುತ್ತಾರೆ.

ಇದನ್ನೂ ಓದಿ: ಅನಗತ್ಯ, ಸ್ವೀಕಾರಾರ್ಹವಲ್ಲ: ಅರವಿಂದ್ ಕೇಜ್ರಿವಾಲ್ ಬಂಧನದ ಕುರಿತು ಅಮೆರಿಕದ ಹೇಳಿಕೆಗೆ ಭಾರತ ಪ್ರತಿಕ್ರಿಯೆ

ಇವತ್ತು ಹಳ್ಳಿಗಳಲ್ಲಿರುವವರಿಗೆ ತಂತ್ರಜ್ಞಾನ ತಲುಪಿಸುವುದು ನನಗೆ ಮುಖ್ಯ. ನಮ್ಮ ಕಾಲದಲ್ಲಿ ಹೆಣ್ಮಕ್ಕಳು ಸೈಕಲ್ ತುಳಿಯುವುದೇ ಕಷ್ಟವಾಗಿತ್ತು. ಇವತ್ತು ಪೈಲಟ್​ಗಳಾಗಿದ್ದಾರೆ, ಡ್ರೋನ್ ಓಡಿಸುತ್ತಾರೆ.

ಹವಾಮಾನ ಬದಲಾವಣೆ ಸಮಸ್ಯೆ ಬಗೆಹರಿಸುವ ವಿಚಾರವನ್ನು ಬಿಲ್ ಗೇಟ್ಸ್ ಪ್ರಸ್ತಾಪಿಸುತ್ತಾರೆ. ಇದಕ್ಕೆ ನರೇಂದ್ರ ಮೋದಿ ತಾವು ಹಾಕಿದ ಕೋಟ್ ಅಥವಾ ಜಾಕೆಟ್ ಅನ್ನು ತೋರಿಸುತ್ತಾರೆ. ಇದು ರೀಸೈಕಲ್ಡ್ ವಸ್ತುಗಳಿಂದ ತಯಾರಿಸಿದ ಜಾಕೆಟ್ ಎನ್ನುತ್ತಾರೆ.

ಪ್ರೋಮೋ ವಿಡಿಯೋ

ಕೋವಿಡ್ ಸಾಂಕ್ರಾಮಿಕ ರೋಗವನ್ನು ಸರ್ಕಾರ ನಿಯಂತ್ರಣ ಮಾಡಿದ ಬಗ್ಗೆ ಬಿಲ್ ಗೇಟ್ಸ್ ವಿಚಾರ ಪ್ರಸ್ತಾಪ ಮಾಡುತ್ತಾರೆ. ಇದು ವೈರಸ್ ಮತ್ತು ಸರ್ಕಾರದ ನಡುವಿನ ಯುದ್ಧವಲ್ಲ, ಜೀವ ಮತ್ತು ವೈರಸ್ ನಡುವಿನ ಯುದ್ಧವಾಗಿತ್ತು ಎಂಬುದು ಪ್ರಧಾನಿಗಳ ಉತ್ತರ.

ಇದನ್ನೂ ಓದಿ: ಭಾರತದ ಆರ್ಥಿಕತೆ 2047ರವರೆಗೆ ಸತತ ಎಂಟು ಪ್ರತಿಶತ ವೇಗದಲ್ಲಿ ಬೆಳೆಯಲು ಸಾಧ್ಯ: ಕೆವಿ ಸುಬ್ರಮಣಿಯನ್

ಎಎನ್​ಐ ಸುದ್ದಿಸಂಸ್ಥೆ ಇವರಿಬ್ಬರ ಅನೌಪಚಾರಿಕ ಚರ್ಚೆಯ ಪೂರ್ಣ ವಿಡಿಯೋ ತುಣಕನ್ನು ಮಾರ್ಚ್ 29ರಂದು ಬಿಡುಗಡೆ ಮಾಡಲಿದೆ. ನರೇಂದ್ರ ಮೋದಿ ಮತ್ತು ಬಿಲ್ ಗೇಟ್ಸ್ ಔಪಚಾರಿಕವಾಗಿ ಹಲವು ಬಾರಿ ಭೇಟಿಯಾಗಿದ್ದಾರೆ. ಫೆಬ್ರುವರಿ ಕೊನೆಯ ವಾರದಲ್ಲಿ ಭಾರತಕ್ಕೆ ಭೇಟಿ ನೀಡಿದ ಸಂದರ್ಭದಲ್ಲಿ ಬಿಲ್ ಗೇಟ್ಸ್ ಇದೇ ಪ್ರಧಾನಿ ನಿವಾಸಕ್ಕೆ ತೆರಳಿ ನರೇಂದ್ರ ಮೋದಿ ಅವರನ್ನು ಭೇಟಿ ಮಾಡಿ ಚರ್ಚೆ ನಡೆಸಿದ್ದರು. ಇದೇ ಮೊದಲ ಬಾರಿಗೆ ಅನೌಪಚಾರಿಕವಾಗಿ ಅವರಿಬ್ಬರು ಮಾತನಾಡಿದ್ದಾರೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ