ಜಾನ್ಸನ್​ ಆ್ಯಂಡ್ ಜಾನ್ಸನ್​ ಕಂಪನಿಯ ಏಕ ಡೋಸ್ ಕೊರೊನಾ​ ಲಸಿಕೆ ಅಕ್ಟೋಬರ್​ನಿಂದ ದೇಶದಲ್ಲಿ ಲಭ್ಯ; ಅಭಿಯಾನಕ್ಕೆ ಮತ್ತಷ್ಟು ಬಲ

ದೆಹಲಿ: ಭಾರತದಲ್ಲಿ ಅಕ್ಟೋಬರ್​​ ತಿಂಗಳಿಂದ ಲಸಿಕಾ ಅಭಿಯಾನಕ್ಕೆ ಮತ್ತಷ್ಟು ಬಲಬರಲಿದೆ. ಅಮೆರಿಕ ಮೂಲದ ಜಾನ್ಸನ್​ ಆ್ಯಂಡ್ ಜಾನ್ಸನ್​ ಕಂಪನಿ(Johnson & Johnson)ಯ ಸಿಂಗಲ್​ ಡೋಸ್ (ಏಕ ಡೋಸ್​)​ ಲಸಿಕೆಯ ಬಳಕೆ ದೇಶದಲ್ಲಿ ಅಕ್ಟೋಬರ್​ ತಿಂಗಳಿಂದ ಶುರುವಾಗಲಿದೆ ಎಂದು ರಾಯಿಟರ್ಸ್​ ಸುದ್ದಿ ಮಾಧ್ಯಮ ವರದಿ ಮಾಡಿದೆ. ಭಾರತದಲ್ಲೀಗ ಬಳಕೆಯಾಗುತ್ತಿರುವ ಕೊವಿಶೀಲ್ಡ್​, ಕೊವ್ಯಾಕ್ಸಿನ್​, ಸ್ಪುಟ್ನಿಕ್​ ವಿ ಲಸಿಕೆಗಳೆಲ್ಲ ಎರಡು ಡೋಸ್​​ಗಳ ಲಸಿಕೆಗಳಾಗಿದ್ದು, ಜಾನ್ಸನ್​ ಆ್ಯಂಡ್ ಜಾನ್ಸನ್​ ಕಂಪನಿ (Johnson & Johnson Covid 19 Vaccine)ಯ ಲಸಿಕೆ ಬಳಕೆ ಶುರುವಾದರೆ ಒಂದೇ ಡೋಸ್​​ನಲ್ಲಿಯೇ ಮುಗಿದುಹೋಗುತ್ತದೆ.

ಕೊವಿಡ್​ 19 ಲಸಿಕೆಯನ್ನು ಸರಿಯಾಗಿ ಪ್ಯಾಕ್​ ಮಾಡಿ, ಭಾರತಕ್ಕೆ ರವಾನಿಸಲಾಗುವುದು. ಮೊದಲ ಬಾರಿಗೆ ಸುಮಾರು 43.5 ಮಿಲಿಯನ್​ ಡೋಸ್​ಗಳನ್ನು ಕಳಿಸಲಾಗುವುದು.  ಅಕ್ಟೋಬರ್​ ಹೊತ್ತಿಗೆ 30 ಕೋಟಿ ಡೋಸ್​ ಕೊರೊನಾ ಲಸಿಕೆ ಉತ್ಪಾದನೆ ಗುರಿ ಹೊಂದಿರುವ ಭಾರತಕ್ಕೆ ಇದರಿಂದ ಖಂಡಿತ ಸಹಾಯವಾಗುತ್ತದೆ ಎಂದು ಜಾನ್ಸನ್​ ಆ್ಯಂಡ್ ಜಾನ್ಸನ್​ ಹೇಳಿದೆ.

ಭಾರತದ ಜಗತ್ತಿನ ಅತಿದೊಡ್ಡ ಕೊರೊನಾ ಲಸಿಕೆ ಉತ್ಪಾದಕ ದೇಶವಾಗಿದೆ.  ಭಾರತದ ಜನಸಂಖ್ಯೆಗೆ ಅನುಗುಣವಾಗಿ ಕೊರೊನಾ ಲಸಿಕೆ ಕೊರತೆ ಉಂಟಾಗಿದ್ದರಿಂದ ಮಾರ್ಚ್​ ತಿಂಗಳಿಂದ ಲಸಿಕೆ ರಫ್ತನ್ನು ನಿಲ್ಲಿಸಿತ್ತು. ಆದರೀಗ ಮತ್ತೆ ಅಕ್ಟೋಬರ್​ನಿಂದ ಅದನ್ನು ಮುಂದುವರಿಸಲು ನಿರ್ಧರಿಸಿದೆ. ಈ ಬಗ್ಗೆ ಆರೋಗ್ಯ ಸಚಿವ ಮನ್​ಸುಖ್​ ಮಾಂಡವಿಯಾ ಮಾಹಿತಿ ನೀಡಿದ್ದಾರೆ.  ಜಾನ್ಸನ್​ ಆ್ಯಂಡ್ ಜಾನ್ಸನ್​ ಕಂಪನಿಯ ಕೊವಿಡ್​ 19 ಲಸಿಕೆ ಒಂದೇ ಡೋಸ್​​ನದ್ದಾಗಿದೆ. ಇದನ್ನು ಭಾರತದಲ್ಲಿ ತುರ್ತು ಬಳಕೆ ಮಾಡಲು ಡ್ರಗ್ಸ್​ ಕಂಟ್ರೋಲರ್​ ಆಫ್​ ಇಂಡಿಯಾ (ಭಾರತೀಯ ಔಷಧ ನಿಯಂತ್ರಣ ಪ್ರಾಧಿಕಾರ) ಕಳೆದ ತಿಂಗಳು (ಆಗಸ್ಟ್​​) ಅನುಮೋದನೆ ನೀಡಿತ್ತು.  ಜಾನ್ಸನ್​ ಆ್ಯಂಡ್ ಜಾನ್ಸನ್​ ಕಂಪನಿಯು ಭಾರತದಲ್ಲಿ ಬಯೋಲಾಜಿಕಲ್​ ಇ ಸಂಸ್ಥೆ ಮೂಲಕ ಲಸಿಕೆ ಉತ್ಪಾದನೆ ಮಾಡಲಿದೆ.

ಆಗಸ್ಟ್ 5ರಂದು ಜಾನ್ಸನ್ ಆ್ಯಂಡ್ ಜಾನ್ಸನ್ ಪ್ರೈವೇಟ್ ಲಿಮಿಟೆಡ್ ತನ್ನ ಸಿಂಗಲ್ ಡೋಸ್ ಕೋವಿಡ್ ಲಸಿಕೆಯ ತುರ್ತು ಬಳಕೆಗೆ ಅನುಮತಿ ನೀಡುವಂತೆ (EUA) ಭಾರತ ಸರ್ಕಾರಕ್ಕೆ ಅರ್ಜಿ ಸಲ್ಲಿಸಿತ್ತು. ಈ ಜಾನ್ಸನ್ ಆ್ಯಂಡ್ ಜಾನ್ಸನ್ ಸಂಸ್ಥೆಯ ಕೋವಿಡ್ ಲಸಿಕೆಯು ಕೊರೊನಾ ಸೋಂಕಿನ ವಿರುದ್ಧ ಶೇ.85 ರಷ್ಟು ಪರಿಣಾಮಕಾರಿಯಾಗಿದೆ  ಎಂಬುದು ಪ್ರಯೋಗಗಳಿಂದ ಸಾಬೀತಾಗಿದೆ.

ಇದನ್ನೂ ಓದಿ: Bomb threats: ಇಂಗ್ಲೆಂಡ್​ನಲ್ಲಿ ನ್ಯೂಜಿಲೆಂಡ್ ಮಹಿಳಾ ಕ್ರಿಕೆಟ್ ತಂಡಕ್ಕೆ ಬಾಂಬ್ ಬೆದರಿಕೆ

(Johnson and Johnson Covid 19 Vaccine doses likely to arrive India in October)