ಗುರ್​​ಗಾಂವ್ ನಮಾಜ್ ಸ್ಥಳದಲ್ಲಿ ಟ್ರಕ್​​ಗಳನ್ನು ನಿಲ್ಲಿಸಿ ಪ್ರಾರ್ಥನೆಗೆ ಅಡ್ಡಿಪಡಿಸಿದ ಪ್ರತಿಭಟನಾಕಾರರು

ಗುರ್​ಗಾಂವ್: ಕಳೆದ ವಾರಗಳಿಂದೀಚೆಗೆ ಗುರ್​​ಗಾಂವ್​​​ನಲ್ಲಿ (Gurgaon) ಮುಸಲ್ಮಾನರ ನಮಾಜ್‌ಗೆ (namaz) ಅಡ್ಡಿಪಡಿಸಲು ಪ್ರಯತ್ನಿಸುತ್ತಿರುವ ಸ್ಥಳೀಯರು ಮತ್ತು ಬಲಪಂಥೀಯ ಗುಂಪುಗಳ ಸದಸ್ಯರು ಶುಕ್ರವಾರ, ಸೆಕ್ಟರ್ 37 ರಲ್ಲಿ (Sector 37) ಮುಸ್ಲಿಂ ಸಮುದಾಯವು ಪ್ರಾರ್ಥನೆಗಾಗಿ ಮೀಸಲಿಟ್ಟ ಪ್ರದೇಶದಲ್ಲಿ ಟ್ರಕ್ ನಿಲ್ಲಿಸಿ ಪ್ರಾರ್ಥನೆಗೆ ಅಡ್ಡಿಪಡಿಸಿದ್ದಾರೆ. ಪ್ರಾರ್ಥನೆಗೆ ಅಡ್ಡಿಪಡಿಸಲು ಪ್ರಯತ್ನಿಸಿದ 67 ಮಂದಿಯನ್ನು ಪೊಲೀಸರು ಬಸ್ಸಿನೊಳಗೆ ತಳ್ಳಿದ್ದಾರೆ. ಪೊಲೀಸರು ಪ್ರತಿಭಟನಾಕಾರರನ್ನು ಹಿಂದಕ್ಕೆ ತಳ್ಳುತ್ತಿದ್ದಂತೆ ಘೋಷಣೆ ಕೂಗಿ ಪ್ರತಿಭಟನಾರರು ಪ್ರಾರ್ಥನೆಗೆ ಅಡ್ಡಿ ಪಡಿಸಿದರು. ಒಬ್ಬರನ್ನು ಪೊಲೀಸರು ಬಂಧಿಸಿದ್ದಾರೆ. ಸೆಕ್ಟರ್ 12 ರಲ್ಲಿ ಇದೇ ರೀತಿಯ ಪ್ರತಿಭಟನೆಗಾಗಿ ಈ ಹಿಂದೆಯೂ ಸಹ ಬಂಧಿಸಲ್ಪಟ್ಟ ಜನರು ಈ ಗುಂಪಿನಲ್ಲಿದ್ದರು. ನಗರದಲ್ಲಿ ಸಾರ್ವಜನಿಕ ಸ್ಥಳಗಳಲ್ಲಿ ನಮಾಜ್ ವಿರುದ್ಧ ಪ್ರತಿಭಟನೆಯನ್ನು ಮುನ್ನಡೆಸುತ್ತಿರುವ ವ್ಯಕ್ತಿಗಳನ್ನು ಇತ್ತೀಚೆಗೆ ಸಂಯುಕ್ತ ಹಿಂದೂ ಸಂಘರ್ಷ ಸಮಿತಿಯು (Sanyukta Hindu Sangharsh Samiti )ಆಯೋಜಿಸಿದ್ದ ಗೋವರ್ಧನ ಪೂಜೆಯಲ್ಲಿ ಸನ್ಮಾನಿಸಲಾಗಿತ್ತು. ತೆರೆದ ನಮಾಜ್ ಸ್ಥಳದಲ್ಲಿ ಟ್ರಕ್‌ಗಳನ್ನು ಪಾರ್ಕಿಂಗ್ ಮಾಡುವ ಮೂಲಕ ಈ ಬಾರಿ ಪ್ರತಿಭಟನಾಕಾರರು ಅಡ್ಡಿಪಡಿಸಿದ್ದಾರೆ. ಮುಂಬೈ ಭಯೋತ್ಪಾದನಾ ದಾಳಿಯ 13 ನೇ ವಾರ್ಷಿಕೋತ್ಸವದಂದು 26/11 ಹುತಾತ್ಮರನ್ನು ಸ್ಮರಿಸಲು ಪ್ರತಿಭಟನಾಕಾರರುಈ ಹಿಂದೆ ಸೆಕ್ಟರ್ 37 ರಲ್ಲಿ ಹವನ ಸಮಾರಂಭ ನಡೆಸಿದ್ದರು. ಇದಕ್ಕಿಂತ ಮುನ್ನ ನಮಾಜ್ ಸ್ಥಳದಲ್ಲಿ ಕ್ರಿಕೆಟ್ ಆಡಿದರು. ಮತ್ತೊಮ್ಮೆ ಪೂಜೆ ನಡೆಸಿದರು, ಸೆಗಣಿ ಬೆರಣಿ ತಟ್ಟಿಯೂ ನವಾಜ್ ಸ್ಥಳದಲ್ಲಿ ಪ್ರತಿಭಟನೆ ನಡೆಸಿದರು.

ಶುಕ್ರವಾರ ಪ್ರತಿಭಟನಾಕಾರರು ಸುಮಾರು 70 ರಷ್ಟಿದ್ದರು. ಅವರಲ್ಲಿ ಹೆಚ್ಚಿನವರು ಸಮೀಪದ ಗ್ರಾಮಗಳಾದ ಖಂಡ್ಸಾ, ನರಸಿಂಗ್‌ಪುರ್, ಮೊಹಮ್ಮದ್‌ಪುರ ಜರ್ಸಾ ಮತ್ತು ಬೇಗಂಪುರ್ ಖಟೋಲಾದಿಂದ ಬಂದವರು ಎಂದು ಹೇಳಿಕೊಂಡರು. ಸ್ಥಳದಲ್ಲಿ ತಮ್ಮ ಟ್ರಕ್‌ಗಳನ್ನು ನಿಲ್ಲಿಸುವುದು ಮತ್ತು ಕ್ರಿಕೆಟ್ ಆಡುವುದಕ್ಕೂ ನಮಾಜ್ ವಿವಾದಕ್ಕೂ ಯಾವುದೇ ಸಂಬಂಧವಿಲ್ಲ ಎಂದು ಅವರು ಹೇಳಿದರು.

ಕಾನೂನು ಮತ್ತು ಸುವ್ಯವಸ್ಥೆಯ ಸಮಸ್ಯೆ, ಕೊವಿಡ್ ಮಾನದಂಡಗಳನ್ನು ಅನುಸರಿಸದ ಕಾರಣದಿಂದ ಚದುರಿ ಹೋಗುವಂತೆ ಪೊಲೀಸರು ಕೇಳಿದರೂ ಪ್ರತಿಭಟನಾಕಾರರು ಜಗ್ಗಲಿಲ್ಲ.  ಏತನ್ಮಧ್ಯೆ, ಕಳೆದ ತಿಂಗಳು ನಮಾಜ್ ಸಲ್ಲಿಸಬಹುದಾದ ಸ್ಥಳಗಳನ್ನು ಗುರುತಿಸಲು ಜಿಲ್ಲಾಧಿಕಾರಿ ರಚಿಸಿದ ಸಮಿತಿಯ ಭಾಗವಾಗಿದ್ದ ಸಂಯುಕ್ತ ಹಿಂದೂ ಸಂಘರ್ಷ ಸಮಿತಿಯು ಶುಕ್ರವಾರ ಆಡಳಿತಕ್ಕೆ ಅಂತಿಮ ಸೂಚನೆ ನೀಡಿದ್ದು, ಮುಂದಿನ ವಾರದಿಂದ ನಗರದ ಸ್ಥಳದಲ್ಲಿ ಯಾವುದೇ ನಮಾಜ್‌ಗೆ ಅವಕಾಶ ನೀಡುವುದಿಲ್ಲ ಎಂದು ಹೇಳಿದೆ.

ನಾವು ಆಡಳಿತಕ್ಕೆ ಒಂದು ತಿಂಗಳ ಸಮಯವನ್ನು ನೀಡಿದ್ದೇವೆ, ಅದು ನಾಳೆ ಕೊನೆಗೊಳ್ಳುತ್ತದೆ. ಡಿಸೆಂಬರ್ 10 ರಿಂದ, ಈ ಯಾವುದೇ ಸ್ಥಳಗಳಲ್ಲಿ ನಮಾಜ್ ಮಾಡಲು ನಾವು ಅನುಮತಿಸುವುದಿಲ್ಲ. ನಮಾಜ್‌ಗಾಗಿ ಯಾವುದೇ ಸ್ಥಳಗಳನ್ನು ಗೊತ್ತುಪಡಿಸಲಾಗಿಲ್ಲ ಎಂದು ನಾನು ಪುನರುಚ್ಚರಿಸಲು ಬಯಸುತ್ತೇನೆ. ಅನುಮತಿ ತಾತ್ಕಾಲಿಕವಾಗಿತ್ತು. ಖಂಡಸಾದ ವೀರ ಜನರ ಈ ಪ್ರತಿಭಟನೆಯ ಮೂಲಕ ನಮ್ಮ ಚಳವಳಿಗೆ ಇನ್ನಷ್ಟು ಶಕ್ತಿ ಬಂದಿದೆ. ದೇಶದೆಲ್ಲೆಡೆಯಿಂದ ನಮಗೆ ಬೆಂಬಲ ಸಂದೇಶಗಳು ಬರುತ್ತಿವೆ ಎಂದು ಸಮಿತಿಯ ಅಧ್ಯಕ್ಷ ಮಹಾವೀರ ಭಾರದ್ವಾಜ್ ಹೇಳಿದ್ದಾರೆ.

ಕಳೆದ ವಾರ ಹವನದ ಆಯೋಜಕರಲ್ಲಿದ್ದ ಮತ್ತು ಶುಕ್ರವಾರ ಸೆಕ್ಟರ್ 37 ರಲ್ಲಿ ಹಾಜರಿದ್ದ ಖಂಡ್ಸಾದ ಉದ್ಯಮಿ ಅವನೀಶ್ ರಾಘವ್, “ನಾವು ಸಾರಿಗೆ ವ್ಯವಹಾರವನ್ನು ಹೊಂದಿದ್ದೇವೆ ಮತ್ತು ಒಕ್ಕೂಟದಿಂದ ಬಂದಿದ್ದೇವೆ. ಇದು ನಮ್ಮ ಭೂಮಿ. ಬೇರೆಡೆ ಸ್ಥಳಾವಕಾಶವಿಲ್ಲದ ಕಾರಣ ನಮ್ಮ ಟ್ರಕ್‌ಗಳನ್ನು ನಿಲ್ಲಿಸಲು ನಾವು ಇಲ್ಲಿ ಒಟ್ಟುಗೂಡಿದ್ದೇವೆ. ಇಲ್ಲಿ ನಮಾಜ್ ಮಾಡಲು ಸರ್ಕಾರವು ಮುಸ್ಲಿಮರಿಗೆ ಅನುಮತಿ ನೀಡಿಲ್ಲ ಅಥವಾ ನಾವು ಇಲ್ಲಿಗೆ ಬರುವುದನ್ನು ನಿಲ್ಲಿಸಿಲ್ಲ. ಇಲ್ಲಿನ ಹಳ್ಳಿಗಳ ಸ್ಥಳೀಯರಿಗೆ ತಮ್ಮ ಕಾರ್ಯಕ್ರಮಗಳನ್ನು ನಡೆಸಲು ಸ್ಥಳಾವಕಾಶವಿಲ್ಲ. ಆದರೆ ಕೆಲವು ಹೊರಗಿನವರು ಮೇವಾತ್‌ನಿಂದ ನಮಾಜ್ ಮಾಡಲು ಇಲ್ಲಿಗೆ ಬರುತ್ತಾರೆ. ಎಂದಿದ್ದಾರೆ.

ಒಂದು ಗಂಟೆಗೂ ಹೆಚ್ಚು ಕಾಲ ಸ್ಥಳದಲ್ಲಿಯೇ ಧರಣಿ ನಡೆಸಿದ ಪ್ರತಿಭಟನಾಕಾರರು ‘ಜೈ ಶ್ರೀರಾಮ್’ ಮತ್ತು ‘ವಂದೇ ಮಾತರಂ’ ಘೋಷಣೆಗಳನ್ನು ಕೂಗಿದರು. ಮಧ್ಯಾಹ್ನ 1.05 ಕ್ಕೆ, ಮುಸ್ಲಿಂ ಏಕತಾ ಮಂಚ್ ಅಧ್ಯಕ್ಷ ಶೆಹಜಾದ್ ಖಾನ್ ನೇತೃತ್ವದ ಮುಸ್ಲಿಮರ ಗುಂಪು ಸ್ಥಳಕ್ಕೆ ತೆರಳುತ್ತಿದ್ದಂತೆ, ಪ್ರತಿಭಟನಾಕಾರರು ಅವರನ್ನು ಎದುರಿಸಲು ಪ್ರಯತ್ನಿಸಿದರು, ಆದರೆ ಪೊಲೀಸರು ಅವರನ್ನು ಹಿಂದಕ್ಕೆ ತಳ್ಳಿದರು.

ಕನಿಷ್ಠ ಏಳು ಜನರನ್ನು ಪೊಲೀಸ್ ಠಾಣೆಗೆ ಕರೆದೊಯ್ಯಲಾಯಿತು. ಅವರಲ್ಲಿ ಭಾರತ್ ಮಾತಾ ವಾಹಿನಿಯ ಅಧ್ಯಕ್ಷ ದಿನೇಶ್ ಠಾಕೂರ್ ಅವರು ಸೆಕ್ಟರ್ 47 ರಲ್ಲಿ ನಮಾಜ್ ವಿರುದ್ಧ ಪ್ರತಿಭಟನೆಯ ನೇತೃತ್ವ ವಹಿಸಿದ್ದಾರೆ. ಸಮುದಾಯಗಳ ನಡುವೆ ದ್ವೇಷವನ್ನು ಉತ್ತೇಜಿಸುವುದಕ್ಕಾಗಿ ಏಪ್ರಿಲ್‌ನಲ್ಲಿ ಪ್ರಕರಣ ದಾಖಲಿಸಲಾಗಿದೆ.
ಕಾನೂನು ಮತ್ತು ಸುವ್ಯವಸ್ಥೆಯ ಸಮಸ್ಯೆಯನ್ನು ಉಂಟುಮಾಡಿದ ಒಬ್ಬ ವ್ಯಕ್ತಿ, ದಿನೇಶ್ ಠಾಕೂರ್ ಅವರನ್ನು ಸಿಆರ್‌ಪಿಸಿಯ ತಡೆಗಟ್ಟುವ ಕ್ರಮಗಳ ಅಡಿಯಲ್ಲಿ ಬಂಧಿಸಲಾಗಿದೆ. ಈ ಹಿಂದೆಯೂ ಸಹ, ಸೆಕ್ಟರ್ 47 ರಲ್ಲಿ ಇದೇ ರೀತಿಯ ಘಟನೆಯಲ್ಲಿ ಅವರನ್ನು ಬಂಧಿಸಲಾಯಿತು. ಇತರರನ್ನು ಎಚ್ಚರಿಕೆಯ ನಂತರ ಬಿಡುಗಡೆ ಮಾಡಲಾಯಿತು ಎಂದು ಡಿಸಿಪಿ (ಪಶ್ಚಿಮ) ದೀಪಕ್ ಸಹರಾನ್ ಹೇಳಿದ್ದಾರೆ.

ಠಾಕೂರ್ ತನ್ನ ಬಂಧನಕ್ಕೆ ಮುಂಚಿತವಾಗಿ “ಈ ನಮಾಜ್ ಒಂದು ಪಿತೂರಿ. ಭೂ ಜಿಹಾದ್” ಎಂದು ಹೇಳಿದರು.
ಸೆಕ್ಟರ್ 12 ಎ ನಲ್ಲಿ ಪ್ರಾರ್ಥನೆಗೆ ಅಡ್ಡಿಪಡಿಸಲು ಪ್ರಯತ್ನಿಸಿದ್ದಕ್ಕಾಗಿ ಅಕ್ಟೋಬರ್ 29 ರಂದು ಬಂಧಿಸಲ್ಪಟ್ಟ 26 ಜನರಲ್ಲಿ ಅಮಿತ್ ಹಿಂದೂ ಕೂಡ ಶುಕ್ರವಾರದ ಪ್ರತಿಭಟನೆಯ ಭಾಗವಾಗಿದ್ದರು. ಬಂಧನಕ್ಕೆ ನಾವು ಹೆದರುವುದಿಲ್ಲ ಎಂದು ಅವರು ಹೇಳಿರುವುದಾಗಿ ಇಂಡಿಯನ್ ಎಕ್ಸ್​​ಪ್ರೆಸ್ ವರದಿ ಮಾಡಿದೆ.

ಎಲ್ಲಾ ಪಾಲುದಾರರೊಂದಿಗೆ ಸಮಾಲೋಚಿಸಿದ ನಂತರ ಇತ್ತೀಚೆಗೆ ರಚಿಸಲಾದ ಸಮಿತಿಯು ಶುಕ್ರವಾರದ ಪ್ರಾರ್ಥನೆಗಾಗಿ ಒಪ್ಪಿಕೊಂಡ ಅಂಶಗಳ ಪಟ್ಟಿಯಲ್ಲಿ ಸೆಕ್ಟರ್ 37 ಸೈಟ್ ಸೇರಿದೆ ಎಂದು ಶೆಹ್ಜಾದ್ ಖಾನ್ ಹೇಳಿದರು. “ಇದು ಸರ್ಕಾರಿ ಭೂಮಿ. ಸಮಿತಿಯು ಸ್ಥಾನಗಳನ್ನು 37 ರಿಂದ 29 ಕ್ಕೆ ಇಳಿಸಿತ್ತು. ನಾವು ಅದಕ್ಕೆ ಒಪ್ಪಿದ್ದೇವೆ. ಆದರೆ ಗೊತ್ತುಪಡಿಸಿದ ಸೈಟ್‌ಗಳಲ್ಲಿ ನಾವು ನಮಾಜ್ ಮಾಡುತ್ತೇವೆ. ಜನರಿಗೆ ಯಾವುದೇ ವಿರೋಧವಿದ್ದರೆ, ಅವರು ಆಡಳಿತವನ್ನು ಸಂಪರ್ಕಿಸಬೇಕು. ಆಡಳಿತವು ತೆರೆದ ಸ್ಥಳದಲ್ಲಿ ನಮಾಜ್ ಮಾಡುವುದನ್ನು ನಿಲ್ಲಿಸುವಂತೆ ಕೇಳಿದರೆ, ನಾವು ನಿಲ್ಲಿಸುತ್ತೇವೆ ಎಂದಿದ್ದಾರೆ.

ಇದನ್ನೂ ಓದಿ: Omicron in India ಹೊಸ ಕೊವಿಡ್-19 ರೂಪಾಂತರಿ ಆತಂಕ; ಆರೋಗ್ಯದ ಕಾಳಜಿಗೆ ಇಲ್ಲಿದೆ ತಜ್ಞರ ಸಲಹೆ

ಇದನ್ನೂ ಓದಿ: ಗುರ್​ಗಾಂವ್ ನಮಾಜ್ ಸ್ಥಳ ಆಕ್ರಮಿಸಿಕೊಂಡ ಸ್ಥಳೀಯರು; 26/11 ದಾಳಿಯ 13ನೇ ವಾರ್ಷಿಕ ನಿಮಿತ್ತ ಹವನ