ಅಪ್ಪನ ಗೊರಕೆಗೆ ಬೇಸತ್ತ ಮಗನಿಂದ ತಂದೆಯ ಘೋರ ಹತ್ಯೆ, ಎಲ್ಲಿ?

ಲಕ್ನೋ: ತಂದೆಯ ಗೊರಕೆ ಕಾಟಕ್ಕೆ ಬೇಸತ್ತ ಮಗ ತನ್ನ ಅಪ್ಪನನ್ನೇ ಬರ್ಬರವಾಗಿ ಕೊಂದಿರುವ ಘಟನೆ ಉತ್ತರ ಪ್ರದೇಶದ ಪಿಲಿಬಿತ್ ಜಿಲ್ಲೆಯ ಸೌಧ ಗ್ರಾಮದಲ್ಲಿ ಬೆಳಕಿಗೆ ಬಂದಿದೆ. 65 ವರ್ಷದ ರಾಮ್​ಸ್ವರೂಪ್​ ಮಗನಿಂದ ಹತನಾದ ದುರ್ದೈವಿ.

ಸೌಧ ಗ್ರಾಮದ ನಿವಾಸಿಯಾದ ರಾಮ್​ಸ್ವರೂಪ್ ತನ್ನ ಪತ್ನಿ ಹಾಗೂ ಇಬ್ಬರು ಗಂಡು ಮಕ್ಕಳಾದ ನವೀನ್​ ಮತ್ತು ಮುಕೇಶ್​ ಜೊತೆ ವಾಸವಿದ್ದನು. ಈ ಹಿಂದೆ ಹಲವಾರು ಬಾರಿ ರಾಮ್ ​ಸ್ವರೂಪ್​ ಗೊರಕೆ ಹೊಡೆಯುವ ವಿಚಾರವಾಗಿ ಆತನ ದೊಡ್ಡ ಮಗ ನವೀನ್​ನೊಟ್ಟಿಗೆ ಗಲಾಟೆಗಳಾಗಿತ್ತು ಎಂದು ತಿಳಿದುಬಂದಿದೆ.

ಕಳೆದ ಕೆಲವು ದಿನಗಳ ಹಿಂದೆ, ರಾಮ್​ಸ್ವರೂಪ್​ ಪತ್ನಿ ಹಾಗೂ ಕಿರಿಯ ಮಗ ಮುಕೇಶ್​ ತಮ್ಮ ನೆಂಟರ ಮನೆಗೆ ಹೋಗಿದ್ದರಂತೆ. ಈ ವೇಳೆ, ಕಳೆದ ಮಂಗಳವಾರ ರಾತ್ರಿಯಂದು ನವೀನ್​ ತನ್ನ ತಂದೆಯ ಜೊತೆ ಗೊರಕೆ ವಿಚಾರವಾಗಿ ಮತ್ತೊಮ್ಮೆ ತಗಾದೆ ತೆಗೆದಿದ್ದನಂತೆ. ಇಬ್ಬರ ನಡುವೆ ತೀವ್ರ ವಾಗ್ವಾದ ಸಂಭವಿಸಿದೆ. ಕೊನೆಗೆ, ನವೀನ್​ ಕೋಪದ ಕೈಗೆ ಬುದ್ಧಿ ಕೊಟ್ಟು ರಾಮ್ ​ಸ್ವರೂಪ್​ಗೆ ದೊಣ್ಣೆಯಿಂದ ಸಿಕ್ಕಾಪಟ್ಟೆ ಹೊಡೆದಿದ್ದಾನೆ.

ದೊಣ್ಣೆಯ ಏಟಿನಿಂದ ಕುಸಿದುಬಿದ್ದ ರಾಮ್ ​ಸ್ವರೂಪ್​ ಸ್ಥಳದಲ್ಲೇ ಸಾವನ್ನಪ್ಪಿದ್ದಾನೆ. ಆಗ ನವೀನ್​ ಕೂಡಲೇ ಅಲ್ಲಿಂದ ಕಾಲ್ಕಿತ್ತಿದ್ದಾನೆ. ಇನ್ನು ಕಿರಿಯ ಮಗ ಮುಕೇಶ್​ ಮನೆಗೆ ಹಿಂದಿರುಗಿದ ವೇಳೆ ಘಟನೆ ಬೆಳಕಿಗೆ ಬಂದಿದೆ. ಇದೀಗ, ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ದೂರು ದಾಖಲಿಸಿಕೊಂಡು ಪರಾರಿಯಾದ ಮುಕೇಶ್​ನ ಪತ್ತೆಹಚ್ಚಲು ಮುಂದಾಗಿದ್ದಾರೆ.

Published On - 3:04 pm, Thu, 13 August 20