40,000ಕ್ಕೂ ಹೆಚ್ಚು ತಮಿಳು ಬ್ರಾಹ್ಮಣರಿಗೆ ಸಿಗುತ್ತಿಲ್ಲ ವಧು; ಉತ್ತರ ಪ್ರದೇಶ, ಬಿಹಾರಕ್ಕೂ ವ್ಯಾಪಿಸಿದ ವಧು ಅನ್ವೇಷಣೆ

ಚೆನ್ನೈ: ತಮಿಳುನಾಡಿನಲ್ಲಿ  40,000 ಕ್ಕೂ ಹೆಚ್ಚು ತಮಿಳು ಬ್ರಾಹ್ಮಣ (Tamil Brahmins) ಯುವಕರಿಗೆ  ವಧುಗಳನ್ನು ಹುಡುಕಲು ಕಷ್ಟವಾಗುತ್ತಿರುವ ಕಾರಣ, ತಮಿಳುನಾಡು (Tamilnadu) ಮೂಲದ ಬ್ರಾಹ್ಮಣರ ಸಂಘವು ಉತ್ತರ ಪ್ರದೇಶ (Uttar Pradesh ) ಮತ್ತು ಬಿಹಾರದಲ್ಲಿ(Bihar) ಒಂದೇ ಸಮುದಾಯಕ್ಕೆ ಸೇರಿದ ಸೂಕ್ತ ಜೋಡಿಗಳನ್ನು ಹುಡುಕಲು ವಿಶೇಷ ಅಭಿಯಾನವನ್ನು ಪ್ರಾರಂಭಿಸಿದೆ. “ನಮ್ಮ ಸಂಘದ ಪರವಾಗಿ ನಾವು ವಿಶೇಷ ಆಂದೋಲನವನ್ನು ಪ್ರಾರಂಭಿಸಿದ್ದೇವೆ” ಎಂದು ತಮಿಳುನಾಡು ಬ್ರಾಹ್ಮಣ ಸಂಘದ (Thambraas) ಅಧ್ಯಕ್ಷ ಎನ್ ನಾರಾಯಣನ್ ಸಂಘದ ಮಾಸಿಕ ತಮಿಳು ನಿಯತಕಾಲಿಕದ ನವೆಂಬರ್ ಸಂಚಿಕೆಯಲ್ಲಿ ಪ್ರಕಟವಾದ ಮುಕ್ತ ಪತ್ರದಲ್ಲಿ ತಿಳಿಸಿದ್ದಾರೆ. ಕೆಲವು ಅಂದಾಜುಗಳನ್ನು ಉಲ್ಲೇಖಿಸಿ, ನಾರಾಯಣನ್ ಅವರು 30-40 ವಯಸ್ಸಿನ 40,000 ಕ್ಕೂ ಹೆಚ್ಚು ತಮಿಳು ಬ್ರಾಹ್ಮಣ ಪುರುಷರಿಗೆಮ ತಮಿಳುನಾಡಿನಲ್ಲಿ ವಧುಗಳನ್ನು ಹುಡುಕಲು ಸಾಧ್ಯವಾಗದ ಕಾರಣ ಮದುವೆಯಾಗದೆ ಉಳಿದಿದ್ದಾರೆ. “ಮದುವೆ ವಯಸ್ಸಿನ ಗುಂಪಿನಲ್ಲಿ 10 ಬ್ರಾಹ್ಮಣ ಹುಡುಗರಿದ್ದರೆ, ತಮಿಳುನಾಡಿನಲ್ಲಿ ಮದುವೆ ವಯಸ್ಸಿನ ಗುಂಪಿನಲ್ಲಿ ಕೇವಲ ಆರು ಹುಡುಗಿಯರು ಮಾತ್ರ ಲಭ್ಯವಿದ್ದಾರೆ” ಎಂದು ಹೇಳಿದರು. ಅಸೋಸಿಯೇಷನ್ ಮುಖ್ಯಸ್ಥರು ತಮ್ಮ ಪತ್ರದಲ್ಲಿ ದೆಹಲಿ, ಲಕ್ನೋ ಮತ್ತು ಪಾಟ್ನಾದಲ್ಲಿ ಸಂಯೋಜಕರನ್ನು ಉಪಕ್ರಮವನ್ನು ಮುಂದುವರಿಸಲು ನೇಮಿಸಲಾಗುವುದು ಎಂದು ಹೇಳಿದರು.

ಹಿಂದಿಯಲ್ಲಿ ಓದಲು, ಬರೆಯಲು ಮತ್ತು ಮಾತನಾಡಲು ತಿಳಿದಿರುವ ವ್ಯಕ್ತಿಯನ್ನು ಇಲ್ಲಿನ ಸಂಘದ ಪ್ರಧಾನ ಕಚೇರಿಯಲ್ಲಿ ಸಮನ್ವಯ ಪಾತ್ರವನ್ನು ನಿರ್ವಹಿಸಲು ನೇಮಿಸಲಾಗುವುದು ಎಂದು ನಾರಾಯಣನ್ ಹೇಳಿದರು.
ಲಕ್ನೋ ಮತ್ತು ಪಾಟ್ನಾದ ಜನರೊಂದಿಗೆ ಸಂಪರ್ಕದಲ್ಲಿದ್ದಾರೆ ಎಂದು ತಂಬ್ರಾಸ್ ಮುಖ್ಯಸ್ಥರು ಪಿಟಿಐಗೆ ತಿಳಿಸಿದರು. ಈ ನಿಟ್ಟಿನಲ್ಲಿ ಕೆಲಸ ಆರಂಭಿಸಿದ್ದೇನೆ ಎಂದರು. ಹಲವಾರು ಬ್ರಾಹ್ಮಣ ಜನರು ಈ ಕ್ರಮವನ್ನು ಸ್ವಾಗತಿಸಿದರೆ, ಸಮುದಾಯದ ಒಳಗಿನಿಂದ ಇತರ ಅಭಿಪ್ರಾಯಗಳೂ ಇದ್ದವು.

ಶಿಕ್ಷಣತಜ್ಞ ಎಂ ಪರಮೇಶ್ವರನ್, “ಮದುವೆಯಾಗುವ ವಯೋಮಾನದಲ್ಲಿ ಸಾಕಷ್ಟು ಸಂಖ್ಯೆಯ ತಮಿಳು ಬ್ರಾಹ್ಮಣ ಹುಡುಗಿಯರು ಲಭ್ಯವಿಲ್ಲದಿದ್ದರೂ, ಹುಡುಗರಿಗೆ ವಧುಗಳನ್ನು ಹುಡುಕಲು ಸಾಧ್ಯವಾಗದೇ ಇರುವುದು ಏಕೈಕ ಕಾರಣವಲ್ಲ” ಎಂದು ಹೇಳಿದರು. ನಿರೀಕ್ಷಿತ ವಧು-ವರರ ಪೋಷಕರು ಮದುವೆಗಳಲ್ಲಿ ‘ಆಡಂಬರ ಮತ್ತು ಪ್ರದರ್ಶನ’ವನ್ನು ಏಕೆ ನಿರೀಕ್ಷಿಸುತ್ತಾರೆ ಎಂದು ಅವರು ಅಚ್ಚರಿ ವ್ಯಕ್ತಪಡಿಸಿದ್ದಾರೆ.
“ಹುಡುಗರ ಹೆತ್ತವರು ಏಕೆ ಮದುವೆಯನ್ನು ಅದ್ದೂರಿ ಮದುವೆ ಮಂಟಪಗಳಲ್ಲಿ ನಡೆಸಬೇಕೆಂದು ಬಯಸುತ್ತಾರೆ? ಸರಳ ಶೈಲಿಯಲ್ಲಿ ಮದುವೆಯನ್ನು ನಡೆಸುವುದರಿಂದ ಅವರನ್ನು ತಡೆಯುವುದು ಯಾವುದು? ದೇವಸ್ಥಾನದಲ್ಲಿ ಅಥವಾ ಮನೆಯಲ್ಲಿ ಏಕೆ ಮಾಡಬಾರದು? ಎಂದು ಅವರು ಕೇಳಿದ್ದಾರೆ.

‘ಮಹಾಪೆರಿಯವ’ ಜೀವನದ ಪ್ರತಿಯೊಂದು ಹಂತದಲ್ಲೂ ಸರಳತೆಯನ್ನು ಬೋಧಿಸುತ್ತಾರೆ ಮತ್ತು ಜನರು ರೇಷ್ಮೆ ಬಟ್ಟೆಯನ್ನು ಬಳಸದಂತೆ ಸಲಹೆ ನೀಡಿದರು ಎಂದು ಪರಮೇಶ್ವರನ್ ಹೇಳಿದರು.  ಮಹಾಸ್ವಾಮಿ ಮತ್ತು ಪರಮಾಚಾರ್ಯರು ಶಂಕರ ಮಠ ಎಂದೂ ಕರೆಯಲ್ಪಡುವ ಕಂಚಿ ಕಾಮಕೋಟಿ ಪೀಠದ 68 ನೇ ಮಠಾಧೀಶರಾದ ದಿವಂಗತ ಶಂಕರಾಚಾರ್ಯ, ಶ್ರೀ ಚಂದ್ರಶೇಖರೇಂದ್ರ ಸರಸ್ವತಿ (1894-1994) ಅವರನ್ನೇ ಮಹಾಪೆರಿಯವ ಎನ್ನುತ್ತಾರೆ.

ಮದುವೆಯ ಸಂಪೂರ್ಣ ವೆಚ್ಚವನ್ನು ಹುಡುಗಿಯ ಕುಟುಂಬವೇ ಭರಿಸಬೇಕಾಗಿದ್ದು, ಇದು ತಮಿಳು ಬ್ರಾಹ್ಮಣ ಸಮುದಾಯದ ಪಾಡು ಎಂದು ಪರಮೇಶ್ವರನ್ ಹೇಳಿದ್ದಾರೆ. “ದೊಡ್ಡ ಶ್ರೀಮಂತ ಮದುವೆಗಳು ಸ್ಟೇಟಸ್ ಸಂಕೇತವಾಗಿದ್ದು ಇದು ತುಂಬಾ ದುರದೃಷ್ಟಕರವಾಗಿದೆ. ಸಮುದಾಯವು ಪ್ರಗತಿಯನ್ನು ಆರಿಸಿಕೊಳ್ಳಬೇಕು ಎಂದು ಅವರು ಹೇಳಿದರು.

“ಈ ದಿನ ಮತ್ತು ಯುಗದಲ್ಲಿಯೂ ಸಹ, ತಮಿಳು ಬ್ರಾಹ್ಮಣ ವಿವಾಹಗಳು ಎರಡು ಮೂರು ದಿನಗಳವರೆಗೆ ನಡೆಯುತ್ತವೆ , ಇದರಲ್ಲಿ ಆರತಕ್ಷತೆ ಮತ್ತು ಇತರ ಮದುವೆಯ ಪೂರ್ವ ಮತ್ತು ನಂತರದ ಸಮಾರಂಭಗಳು ಸೇರಿವೆ.” ಆಭರಣಗಳು, ಮದುವೆ ಮಂಟಪದ ಬಾಡಿಗೆ, ಆಹಾರ ಮತ್ತು ಉಡುಗೊರೆಗಳ ವೆಚ್ಚ ಸೇರಿದಂತೆ ಒಟ್ಟು ವೆಚ್ಚವು ಈ ದಿನಗಳಲ್ಲಿ ಕನಿಷ್ಠ 12-15 ಲಕ್ಷ ರೂಪಾಯಿಗಳು ಖರ್ಚಾಗುತ್ತವೆ ಎಂದು ಅವರು ಹೇಳಿದರು.

“ನಿಸ್ಸಂದೇಹವಾಗಿ, ಇದು ವಧುವಿನ ಕುಟುಂಬಕ್ಕೆ ದೊಡ್ಡ ಆರ್ಥಿಕ ಹೊರೆಯಾಗಿದೆ. ಕೆಲವರು ತಮ್ಮ ಜೀವಿತಾವಧಿಯ ಉಳಿತಾಯವನ್ನು ಕಳೆಯುತ್ತಿದ್ದರೆ, ಇನ್ನು ಕೆಲವರು ತಮ್ಮ ಜೀವನದುದ್ದಕ್ಕೂ ಸಾಲದ ಸುಳಿಯಲ್ಲಿ ಸಿಲುಕಿರುತ್ತಾರೆ. “ಇಲ್ಲಿ, ನಾವು ಖರ್ಚು ಮಾಡಲು ಶಕ್ತರಾಗಿರುವವರ ಬಗ್ಗೆ ಮಾತನಾಡುವುದಿಲ್ಲ. ಸಮಸ್ಯೆಯೆಂದರೆ, ಅಂತಹ ಶ್ರೀಮಂತರು ಮಾನದಂಡವನ್ನು ಹೊಂದಿಸುತ್ತಿದ್ದಾರೆ ಮತ್ತು ಸಮಾಜವು ಅದನ್ನು ಪಡೆಯಲು ಸಾಧ್ಯವಾಗದ ಜನರು ಸಹ ಅದನ್ನು ಅನುಕರಿಸಲು ಬಯಸುತ್ತಾರೆ.

ಹೆಚ್ಚು ತೊಂದರೆಗೊಳಗಾದವರ ಮಧ್ಯಮ ವರ್ಗ, ಕೆಳ ಮಧ್ಯಮ ವರ್ಗ ಮತ್ತು ಬಡ ಬ್ರಾಹ್ಮಣರು. “ಬಡ ಬ್ರಾಹ್ಮಣ ಕುಟುಂಬಗಳು ತಮ್ಮ ಹೆಣ್ಣುಮಕ್ಕಳ ಮದುವೆಗಾಗಿ ಹಣವನ್ನು ಸಂಗ್ರಹಿಸಲು ವರ್ಷಗಳಿಂದ ಹೆಣಗಾಡುತ್ತಿರುವುದನ್ನು ನನಗೆ ವೈಯಕ್ತಿಕವಾಗಿ ತಿಳಿದಿದೆ. ಜನರು ತಮ್ಮ ಅಹಂಕಾರವನ್ನು ತ್ಯಜಿಸಲು ಸಿದ್ಧರಿದ್ದರೆ, ಅವರು ತಮಿಳುನಾಡಿನಲ್ಲಿ ವಧುಗಳನ್ನು ಹುಡುಕಬಹುದು. ಆಗ ಮಾತ್ರ ಅವರು ನಮ್ಮ ಋಷಿಗಳು ಮತ್ತು ಧರ್ಮಗ್ರಂಥಗಳು ಹೇಳಿದಂತಹ ಧರ್ಮದ ಅನುಯಾಯಿಗಳೆಂದು ಹೇಳಿಕೊಳ್ಳಬಹುದು. ಪ್ರಗತಿಪರವಾಗಿರುವುದರಲ್ಲಿ ಪರಿಹಾರವಿದೆ ಮತ್ತು ಮದುವೆ ಸಮಾರಂಭಗಳು ಸಮಯದೊಂದಿಗೆ ಸಂಪೂರ್ಣವಾಗಿ ಸರಳವಾಗಿರಬೇಕು ಎಂದು ಪರಮೇಶ್ವರನ್ ಹೇಳಿದರು. ಕೆಲವು ಸಂಪ್ರದಾಯಗಳು ಧಾರ್ಮಿಕ ಅನುಮತಿಯನ್ನು ಹೊಂದಿಲ್ಲದಿದ್ದರೂ ಪ್ರಾಯೋಗಿಕ ತೊಂದರೆಗಳನ್ನು ಉಂಟುಮಾಡುತ್ತವೆ ಎಂದು ಹೇಳಿದರು.

ಪರಮೇಶ್ವರನ್ ಅವರು ದೇಶದ ದಕ್ಷಿಣ ಮತ್ತು ಪಶ್ಚಿಮ ಭಾಗಗಳಲ್ಲಿ ಶಿಕ್ಷಣ ಸಂಸ್ಥೆಗಳಲ್ಲಿ ಸೇವೆ ಸಲ್ಲಿಸಿದ್ದಾರೆ.
ವಧುವಿನ ಹುಡುಕಾಟದಲ್ಲಿರುವ ಯುವಕ ಅಜಯ್, “ಈಗ ಕನ್ನಡ ಮಾತನಾಡುವ ಮಾಧ್ವರು ಮತ್ತು ತಮಿಳು ಮಾತನಾಡುವ ಸ್ಮಾರ್ತರ ನಡುವೆ ತಮಿಳು-ತೆಲುಗು ಬ್ರಾಹ್ಮಣ ವಿವಾಹಗಳು ಅಥವಾ ಮದುವೆಗಳು ಸಾಮಾನ್ಯವಾಗಿದೆ. ಹಲವಾರು ದಶಕಗಳ ಹಿಂದೆ ಈ ರೀತಿಯದ್ದನ್ನು ಊಹಿಸಲೂ ಸಾಧ್ಯವಿಲ್ಲ. “ಈಗಾಗಲೇ, ನಾವು ಉತ್ತರ ಭಾರತೀಯ ಮತ್ತು ತಮಿಳು ಬ್ರಾಹ್ಮಣರ ನಡುವೆ ಅರೇಂಜ್ಡ್ ಮ್ಯಾರೇಜ್‌ಗಳನ್ನು ನೋಡಿದ್ದೇವೆ” ಎಂದು ಅವರು ಹೇಳಿದರು.

ಮಾಧ್ವ ಬ್ರಾಹ್ಮಣರು ವೈಷ್ಣವ ಪಂಥ ಮತ್ತು ಶ್ರೀ ಮಧ್ವಾಚಾರ್ಯರ ಅನುಯಾಯಿಗಳು. ತಮಿಳುನಾಡಿನಲ್ಲಿ ‘ಅಯ್ಯರ್’ ಎಂದೂ ಕರೆಯಲ್ಪಡುವ ಸ್ಮಾರ್ತರು ಎಲ್ಲಾ ದೇವತೆಗಳ ಆರಾಧನೆಯನ್ನು ಸ್ವೀಕರಿಸುತ್ತಾರೆ ಮತ್ತು ಶ್ರೀ ಆದಿಶಂಕರರ ಅನುಯಾಯಿಗಳು.

ಹೆಸರು ಹೇಳಲಿಚ್ಛಿಸದ ವೈಷ್ಣವ ತಮಿಳು ಬ್ರಾಹ್ಮಣರೊಬ್ಬರು, “ವರ್ಷಗಳ ಹಿಂದೆ ಅಯ್ಯಂಗಾರ್ ಸಮುದಾಯದಲ್ಲಿ ತೆಂಕಲೈ ಮತ್ತು ವಡಕಲೈ ಪಂಗಡಗಳ ನಡುವೆ ವಿವಾಹಗಳು ಅಸಾಧ್ಯವಾಗಿತ್ತು. ಇಂದು ಅದು ನಡೆಯುತ್ತಿದ್ದು, ಸಂಘದ ಈ ನಡೆ ಸ್ವಾಗತಾರ್ಹ’ ಎಂದರು.

ಇದನ್ನೂ ಓದಿ: Farm Laws Timeline ಕೃಷಿ ಕಾನೂನು ಅಂಗೀಕಾರದಿಂದ ರದ್ದತಿ ನಿರ್ಧಾರವರೆಗೆ ಏನೆಲ್ಲಾ ನಡೆಯಿತು?