National Science Day 2024: ರಾಷ್ಟ್ರೀಯ ವಿಜ್ಞಾನ ದಿನ: ಸರ್ ಸಿವಿ ರಾಮನ್ ಬಗ್ಗೆ ತಿಳಿದುಕೊಳ್ಳಬೇಕಾದ 10 ಸಂಗತಿಗಳು

ದೆಹಲಿ ಫೆಬ್ರವರಿ 28: ಸರ್ ಸಿವಿ ರಾಮನ್ (C V Raman) ಪೂರ್ತಿ ಹೆಸರು, ಚಂದ್ರಶೇಖರ ವೆಂಕಟ ರಾಮನ್. 1888 ನವೆಂಬರ್ 7ರಂದು ತಮಿಳುನಾಡಿನ ತಿರುಚಿರಾಪಳ್ಳಿಯಲ್ಲಿ ಶೈಕ್ಷಣಿಕ ಕುಟುಂಬದಲ್ಲಿ ಜನನ. ಅಪ್ಪ ಭೌತಶಾಸ್ತ್ರ ಮತ್ತು ಗಣಿತಶಾಸ್ತ್ರದ ಪ್ರಾಧ್ಯಾಪಕರಾಗಿದ್ದರು ಮತ್ತು ಅವರ ತಾಯಿ ಸಂಸ್ಕೃತ ವಿದ್ವಾಂಸರ ವಂಶದಿಂದ ಬಂದವರು. ಭಾರತೀಯ ವಿಜ್ಞಾನಿ ಸರ್ ಸಿವಿ ರಾಮನ್, ರಾಮನ್ ಎಫೆಕ್ಟ್ ಅನ್ನು ಕಂಡುಹಿಡಿದ ನಂತರ 1928 ರಲ್ಲಿ ಅವರಿಗೆ ನೊಬೆಲ್ ಪ್ರಶಸ್ತಿ (Nobel Prize)ಲಭಿಸಿತು. ರಾಮನ್ ಅವರ ಸಂಶೋಧನೆಗಳು ವಿಜ್ಞಾನ ಕ್ಷೇತ್ರದಲ್ಲಿ ಕ್ರಾಂತಿಯನ್ನುಂಟು ಮಾಡಿದ್ದು, ಅವರಿಗೆ ಗೌರವಾರ್ಥವಾಗಿ ಅವರು ಆವಿಷ್ಕಾರ ಮಾಡಿದ ದಿನದಂದು ದೇಶವು ರಾಷ್ಟ್ರೀಯ ವಿಜ್ಞಾನ ದಿನವನ್ನು(National Science Day) ಆಚರಿಸುತ್ತದೆ. ವಿಜ್ಞಾನ ಮತ್ತು ಅದರ ವಿವಿಧ ಅಂಶಗಳಲ್ಲಿ ಆಸಕ್ತಿಯನ್ನು ಬೆಳೆಸಲು ಯುವಕರನ್ನು ಉತ್ತೇಜಿಸಲು ಮತ್ತು ಪ್ರೇರೇಪಿಸಲು ಇದು ವೇದಿಕೆಯಾಗಿ ಕಾರ್ಯನಿರ್ವಹಿಸುತ್ತದೆ. ವಿಶಾಲ ಜನಸಂಖ್ಯೆಯಲ್ಲಿ ಹೆಚ್ಚಿನ ವೈಜ್ಞಾನಿಕ ಸಾಕ್ಷರತೆಯನ್ನು ಉತ್ತೇಜಿಸುವುದು ಇದರ ಗುರಿಯಾಗಿದೆ.

ಕೇವಲ 16 ನೇ ವಯಸ್ಸಿನಲ್ಲಿ, ರಾಮನ್ ಮದ್ರಾಸ್‌ನ ಪ್ರೆಸಿಡೆನ್ಸಿ ಕಾಲೇಜಿನಿಂದ ಪದವಿ ಪಡೆದ್ದಿದ್ದು ಭೌತಶಾಸ್ತ್ರದಲ್ಲಿ ಚಿನ್ನದ ಪದಕವನ್ನು ಗೆದ್ದರು. 18 ರ ಹೊತ್ತಿಗೆ, ಅವರು ಸ್ನಾತಕೋತ್ತರ ಅಧ್ಯಯನ ಮಾಡುವಾಗ ಅವರು ಫಿಲಾಸಫಿಕಲ್ ಮ್ಯಾಗಜೀನ್‌ನಲ್ಲಿ ತಮ್ಮ ಅಧ್ಯಯನ ಪ್ರಬಂಧ ಪ್ರಕಟಿಸಿದ್ದರು. ಇದು ಪ್ರೆಸಿಡೆನ್ಸಿ ಕಾಲೇಜಿಗೆ ಮೊದಲನೆಯದು.

ಆರೋಗ್ಯ ಸಮಸ್ಯೆಗಳಿಂದ ರಾಮನ್ ಹೆಚ್ಚಿನ ಅಧ್ಯಯನಕ್ಕಾಗಿ ಇಂಗ್ಲೆಂಡ್‌ಗೆ ಹೋಗಲು ಸಾಧ್ಯವಾಗಲಿಲ್ಲ. ಬದಲಿಗೆ, ಅವರು 1907 ರಲ್ಲಿ ಹಣಕಾಸು ನಾಗರಿಕ ಸೇವಾ ಪರೀಕ್ಷೆಯಲ್ಲಿ ಉತ್ತೀರ್ಣರಾದರು ಮತ್ತು ಕಲ್ಕತ್ತಾದಲ್ಲಿ ಸಹಾಯಕ ಅಕೌಂಟೆಂಟ್ ಜನರಲ್ ಆಗಿ ನೇಮಕಗೊಂಡರು. ಅಲ್ಲಿ ಅವರು ತಮ್ಮ ಬಿಡುವಿನ ವೇಳೆಯಲ್ಲಿ ಇಂಡಿಯನ್ ಅಸೋಸಿಯೇಷನ್ ಫಾರ್ ದಿ ಕಲ್ಟಿವೇಶನ್ ಆಫ್ ಸೈನ್ಸ್ (IACS) ನಲ್ಲಿ ಸಂಶೋಧನೆ ಪ್ರಾರಂಭಿಸಿದರು.

ಮುಂದಿನ ದಶಕದಲ್ಲಿ, ಅವರು ಏಕಾಂಗಿಯಾಗಿ 27 ಸಂಶೋಧನಾ ಪ್ರಬಂಧಗಳನ್ನು ಪ್ರಕಟಿಸಿದರು. ಕಂಪನಗಳು ಸಂಗೀತ ವಾದ್ಯಗಳ ಮೇಲೆ ಹೇಗೆ ಪರಿಣಾಮ ಬೀರುತ್ತವೆ ಎಂಬುದರ ಬಗ್ಗೆ ಅವರು ಹೆಚ್ಚಿನ ಅಧ್ಯಯನ ನಡೆಸಿದ್ದರು.

1921 ರಲ್ಲಿ, ರಾಮನ್ ಲಂಡನ್‌ಗೆ ತಮ್ಮ ಮೊದಲ ಭೇಟಿ ನೀಡಿದರು. ಈ ಹೊತ್ತಿಗೆ, ಅವರು ಈಗಾಗಲೇ ಜೆಜೆ ಥಾಮ್ಸನ್ (ಎಲೆಕ್ಟ್ರಾನ್‌ನ ಅನ್ವೇಷಕ) ಮತ್ತು ಅರ್ನೆಸ್ಟ್ ರುದರ್‌ಫೋರ್ಡ್ (ಅವರ ಪರಮಾಣು ರಚನೆ ಸಂಶೋಧನೆಗೆ ಹೆಸರುವಾಸಿಯಾದವರು) ನಂತಹ ಪ್ರಖ್ಯಾತ ವಿಜ್ಞಾನಿಗಳಿಂದ ಅಕೌಸ್ಟಿಕ್ಸ್‌ಗೆ ನೀಡಿದ ಕೊಡುಗೆಗಳಿಗಾಗಿ ಮೆಚ್ಚುಗೆ ಪಡೆದಿದ್ದರು. ಅಲ್ಲಿಯವರೆಗೆ ಅವರ ಸಂಶೋಧನೆಯು ಪಿಟೀಲು ಮತ್ತು ಸಾಂಪ್ರದಾಯಿಕ ಭಾರತೀಯ ವಾದ್ಯಗಳಾದ ವೀಣೆ ಮತ್ತು ಮೃದಂಗ ಸೇರಿದಂತೆ ಸಂಗೀತ ವಾದ್ಯಗಳ ಹಿಂದಿನ ವಿಜ್ಞಾನದ ಮೇಲೆ ಕೇಂದ್ರೀಕೃತವಾಗಿತ್ತು.

ಇದನ್ನೂ ಓದಿ: Lok Sabha Election: ಉತ್ತರಾಖಂಡದಲ್ಲಿ ಐದು ಲೋಕಸಭಾ ಕ್ಷೇತ್ರಕ್ಕೆ 55 ಆಕಾಂಕ್ಷಿತರ ಪಟ್ಟಿ ಸಿದ್ಧ

ಸಿವಿ ರಾಮನ್ ಬಗ್ಗೆ ನೀವು ತಿಳಿದಿರಬೇಕಾದ ಹತ್ತು ಸಂಗತಿಗಳು

1. ಸಿವಿ ರಾಮನ್ ಅವರ ತಂದೆ ಗಣಿತ ಮತ್ತು ಭೌತಶಾಸ್ತ್ರದ ಉಪನ್ಯಾಸಕರಾಗಿದ್ದರು. ಹಾಗಾಗಿ ಬಾಲ್ಯದಿಂದಲೇ ಶೈಕ್ಷಣಿಕ ವಾತಾವರಣದಲ್ಲಿ ಅವರು ಬೆಳೆದದ್ದು.
2.  ನೊಬೆಲ್-ವಿಜೇತ ಪ್ರಯೋಗದಲ್ಲಿ ರಾಮನ್ ಸಹೋದ್ಯೋಗಿ ಕೆಎಸ್ ಕೃಷ್ಣನ್ ಕೂಡಾ ಸಹಕರಿಸಿದರು. ರಾಮನ್ ಅವರೊಂದಿಗಿನ ಕೆಲವು ವೃತ್ತಿಪರ ಭಿನ್ನಾಭಿಪ್ರಾಯಗಳಿಂದಾಗಿ ಕೃಷ್ಣನ್ ನೊಬೆಲ್ ಪ್ರಶಸ್ತಿಯನ್ನು ಹಂಚಿಕೊಳ್ಳಲಿಲ್ಲ. ಇದರ ಹೊರತಾಗಿಯೂ, ತನ್ನ ನೊಬೆಲ್ ಸ್ವೀಕಾರ ಭಾಷಣದಲ್ಲಿ, ವಿಜ್ಞಾನಿ ಕೃಷ್ಣನ್ ಅವರ ಕೊಡುಗೆಗಳನ್ನು ಉಲ್ಲೇಖಿಸಿದ್ದಾರೆ.
3. ವಿಜ್ಞಾನದಲ್ಲಿ ನೊಬೆಲ್ ಪ್ರಶಸ್ತಿಯನ್ನು ಗೆದ್ದ ಮೊದಲ ಏಷ್ಯನ್ ವ್ಯಕ್ತಿ ಸಿವಿ ರಾಮನ್.
4. ಒಮ್ಮೆ, ರಾಮನ್ ಅವರ ಕ್ರಾಂತಿಕಾರಿ ಆಪ್ಟಿಕಲ್ ಸಿದ್ಧಾಂತದ ಹಿಂದಿನ ಸ್ಫೂರ್ತಿಯ ಬಗ್ಗೆ ಕೇಳಲಾಯಿತು. ಅದಕ್ಕೆ ಅವರು 1921 ರಲ್ಲಿ ಯುರೋಪ್ ಗೆ ಹೋಗುತ್ತಿರುವಾಗ ಅವರು ಗಮನಿಸಿದ “ಮೆಡಿಟರೇನಿಯನ್ ಸಮುದ್ರದ ಅದ್ಭುತವಾದ ನೀಲಿ’ಅವರನ್ನು ಪ್ರೇರೇಪಿಸಿತು ಎಂದಿದ್ದರು.
5. ಬೆಳಕಿನಲ್ಲಿ ಅವರ ಪರಿಣತಿಯ ಜೊತೆಗೆ, ಸಿ.ವಿ.ರಾಮನ್ ಅವರು ಅಕೌಸ್ಟಿಕ್ಸ್‌ನಲ್ಲಿ ತೊಡಗಿಸಿಕೊಂಡರು.
6. ತಬಲಾ ಮತ್ತು ಮೃದಂಗದಂತಹ ಭಾರತೀಯ ಡ್ರಮ್‌ಗಳ ಹಾರ್ಮೋನಿಕ್ ಗುಣಲಕ್ಷಣಗಳನ್ನು ಅನ್ವೇಷಿಸಿದ ಮೊದಲ ವ್ಯಕ್ತಿಯಾಗಿದ್ದಾರೆ.
7. ಇವರುಪರಮಾಣು ನ್ಯೂಕ್ಲಿಯಸ್ ಮತ್ತು ಪ್ರೋಟಾನ್‌ನ ಅನ್ವೇಷಕರಾದ ಡಾ ಅರ್ನೆಸ್ಟ್ ರುದರ್‌ಫೋರ್ಡ್ ಅವರು 1929 ರ ರಾಯಲ್ ಸೊಸೈಟಿಯ ಅಧ್ಯಕ್ಷೀಯ ಭಾಷಣದಲ್ಲಿ ರಾಮನ್‌ರ ಸ್ಪೆಕ್ಟ್ರೋಸ್ಕೋಪಿಯನ್ನು ಶ್ಲಾಘಿಸಿದರು, ಅದು ತರುವಾಯ ರಾಮನ್‌ಗೆ ಅವರ ಕೊಡುಗೆಗಳನ್ನು ಗುರುತಿಸಿ ನೈಟ್‌ಹುಡ್ ಅನ್ನು ನೀಡಿತು.
8. 1933 ರಲ್ಲಿ, ಸಿವಿ ರಾಮನ್ ಅವರು ಭಾರತೀಯ ವಿಜ್ಞಾನ ಸಂಸ್ಥೆಯ (IIS) ಮೊದಲ ಭಾರತೀಯ ನಿರ್ದೇಶಕರಾಗಿ ಇತಿಹಾಸ ಸೃಷ್ಟಿಸಿದರು. ಎಲ್ಲಾ IIS ನಿರ್ದೇಶಕರು ಬ್ರಿಟಿಷರಾಗಿದ್ದಾಗ ವಸಾಹತುಶಾಹಿ ಯುಗದಲ್ಲಿ ಇದು ಗಮನಾರ್ಹ ಸಾಧನೆಯಾಗಿದೆ.
9. ಇವರ ಮನೆಯ ಹೆಸರು ಪಂಚವಟಿ. ಸಿವಿ ರಾಮನ್ ಅವರ ಪತ್ನಿ ಲೋಕಸುಂದರಿ ಅಮ್ಮಾಳ್ ಅವರು ವನವಾಸದ ಸಮಯದಲ್ಲಿ ರಾಮ ಮತ್ತು ಸೀತೆ ವಾಸಿಸುತ್ತಿದ್ದ ಆಶ್ರಮದ ಹೆಸರನ್ನು ತಮ್ಮ ಮನೆಗೆ ಇಡಲು ಸೂಚಿಸಿದ್ದರು.
10. ರಾಮನ್ ಅವರು ಪ್ರಧಾನಿ ಜವಾಹರಲಾಲ್ ನೆಹರೂ ಅವರನ್ನು ಒಮ್ಮೆ ತಮಾಷೆ ಮಾಡಿದ್ದರು. ಅದೇನೆಂದರೆ ಯುವಿ ಬೆಳಕಿನ ಕಿರಣಗಳನ್ನು ಬಳಸಿಕೊಂಡು ತಾಮ್ರವನ್ನು ಚಿನ್ನ ಎಂದು ನಂಬುವಂತೆ ಮಾಡಿದ್ದು,ನೆಹರೂ ಕೂಡಾ ಅದನ್ನು ನಂಬಿದ್ದರು ಎಂದು ಹೇಳಲಾಗಿದೆ.

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ