NBF: ರಾಷ್ಟ್ರೀಯ ಸುದ್ದಿ ಪ್ರಸಾರಕರಿಂದ ಬಾರ್ಕ್ ಪುನರಾರಂಭಿಸಿಲು ಕೇಂದ್ರಕ್ಕೆ ಮನವಿ
ರಾಷ್ಟ್ರೀಯ ಸುದ್ದಿ ಪ್ರಸಾರಕರ ಒಕ್ಕೂಟವು(NBF) ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಖಾತೆ ಸಚಿವ ಅನುರಾಗ್ ಠಾಕೂರ್ ಅವರನ್ನು ಭೇಟಿಯಾಗಿ ಬಾರ್ಕ್ ರೇಟಿಂಗ್ ಅನ್ನು ಮತ್ತೆ ಪ್ರಾರಂಭಗೊಳಿಸಬೇಕು ಎಂದು ಮನವಿ ಮಾಡಿದೆ.
ಆಗಸ್ಟ್ 18, ನವದೆಹಲಿ: ರಾಷ್ಟ್ರೀಯ ಸುದ್ದಿ ಪ್ರಸಾರಕರ ಒಕ್ಕೂಟದ(NBF) ಆಡಳಿತ ಮಂಡಳಿ ಹಾಗೂ ಹಿರಿಯ ಸದಸ್ಯರು ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಖಾತೆಯ ಸಚಿವ ಅನುರಾಗ್ ಠಾಕೂರ್ ಅವರನ್ನು ಮಂಗಳವಾರ ಭೇಟಿಯಾದರು. ಈ ಸಂದರ್ಭದಲ್ಲಿ ಪ್ರಸ್ತುತ ಸುದ್ದಿ ಪ್ರಸಾರ ಮಾಧ್ಯಮಗಳ ಬೆಳವಣಿಗೆ ಹಾಗೂ ಅವುಗಳು ಎದುರಿಸುತ್ತಿರುವ ಸವಾಲುಗಳನ್ನು ಚರ್ಚಿಸಲಾಯಿತು. ಇತ್ತೀಚೆಗೆ ಏಕಪಕ್ಷೀಯ ನಿರ್ಧಾರದ ಮೂಲಕ ನಿಲ್ಲಿಸಲಾಗಿದ್ದ ಚಾನಲ್ಗಳ ವೀಕ್ಷಕ ರೇಟಿಂಗ್ ಪದ್ಧತಿಯನ್ನು ಪುನರಾರಂಭಗೊಳಿಸುವಂತೆ ಮನವಿ ಸಲ್ಲಿಸಲಾಯಿತು. ಹಾಗೂ ರೇಟಿಂಗ್ ನೀಡುವ ಪದ್ಧತಿ ನಿಂತ ಕಾರಣ, ಚಾನಲ್ಗಳು ಅನುಭವಿಸುತ್ತಿರುವ ಕಷ್ಟಗಳನ್ನು ಹಾಗೂ ಅವುಗಳ ಬೆಳವಣಿಗೆಗೆ ತೊಡಕಾಗಿರುವ ಅಂಶಗಳನ್ನು ಮಾತುಕತೆಯಲ್ಲಿ ಚರ್ಚಿಸಲಾಯಿತು.
ಕೇಂದ್ರ ಮಾಹಿತಿ ಮತ್ತು ಪ್ರಸಾರ ಖಾತೆ ಸಚಿವ ಅನುರಾಗ್ ಠಾಕೂರ್ ಮಾತನಾಡಿ, ‘‘ಅರ್ನಾಬ್ ಗೋಸ್ವಾಮಿ ನೇತೃತ್ವದ ಎನ್ಬಿಎಫ್ ಆಡಳಿತ ಮಂಡಳಿಯನ್ನು ಭೇಟಿಯಾಗಿ ಚರ್ಚಿಸಿರುವುದು ಖುಷಿಯ ವಿಚಾರ. ಮಾತುಕತೆಯಲ್ಲಿ ಉತ್ತಮ ವಿಚಾರಗಳ ವಿನಿಮಯವಾಗಿದ್ದು, ಎನ್ಬಿಎಫ್ ಜೊತೆ ಸುದ್ದಿ ಮಾಧ್ಯಮಗಳ ಬೆಳವಣಿಗೆಯ ವಿಚಾರವಾಗಿ ಮತ್ತಷ್ಟು ಚರ್ಚಿಸಲು ಹಾಗೂ ಸುದ್ದಿ ಮಾಧ್ಯಮಗಳ ಮುಖಾಂತರ ಪ್ರಜಾಪ್ರಭುತ್ವ ವ್ಯವಸ್ಥೆಯನ್ನು ಮತ್ತಷ್ಟು ಬಲಪಡಿಸಲು ಕಾತರನಾಗಿದ್ದೇನೆ’’ ಎಂದರು.
ಎನ್ಬಿಎಫ್ನ(NBF) ಸ್ಥಾಪಕ ನಿರ್ದೇಶಕ ಅರ್ನಾಬ್ ಗೋಸ್ವಾಮಿ ಮಾತನಾಡಿ, ‘‘ಭಾರತದ ಮಟ್ಟದಲ್ಲಿ ಒಂದು ಸಶಕ್ತ ಸುದ್ದಿ ಪ್ರಸಾರಕರ ಒಕ್ಕೂಟವನ್ನು ಕಟ್ಟುವುದರ ಹಿಂದಿನ ಅವಶ್ಯಕತೆಯನ್ನು ಸಚಿವರಿಗೆ ತಿಳಿಸಲು ಒಂದು ಉತ್ತಮ ಅವಕಾಶ ಒದಗಿತು. ಸಚಿವರೂ ಕೂಡ ಆಡಳಿತ ಮಂಡಳಿಯ ವಿಚಾರಗಳನ್ನು ಆಲಿಸಿದ್ದು, ಸುದ್ದಿ ಪ್ರಸಾರದ ಮಾಧ್ಯಮವನ್ನು ಮತ್ತಷ್ಟು ಶಕ್ತಗೊಳಿಸಲು ಸಚಿವಾಲಯದೊಂದಿಗೆ ಕೈಜೋಡಿಸಲು ಎದುರುನೋಡುತ್ತಿದ್ದೇವೆ’’ ಎಂದು ನುಡಿದರು. ಎನ್ಬಿಎಫ್ನ ಆಡಳಿತ ಮಂಡಳಿಯು ಒಕ್ಕೂಟಕ್ಕೆ ಪ್ರಾದೇಶಿಕ ಭಾಷೆಗಳಲ್ಲೂ ಸದಸ್ಯರಿರುವುದನ್ನು ಮತ್ತು ಒಕ್ಕೂಟದ ಚಾನಲ್ಗಳು ಸ್ವಯಂ ನಿರ್ಬಂಧದ ಮೂಲಕ ಕಾರ್ಯನಿರ್ವಹಸಲಿವೆ ಎಂಬುದನ್ನು ಇದೇ ವೇಳೆ ತಿಳಿಸಲಾಯಿತು.
ಟಿವಿ9 ಸಮೂಹ ಸಂಸ್ಥೆಗಳ ಸಿಇಒ ಹಾಗೂ ಎನ್ಬಿಎಫ್ನ ಉಪಾಧ್ಯಕ್ಷ ಬರುಣ್ ದಾಸ್ ಎನ್ಬಿಎಫ್ನ ಭಾಗವಾಗಿ ಸಚಿವರನ್ನು ಭೇಟಿಯಾಗಿದ್ದಕ್ಕೆ ಹರ್ಷ ವ್ಯಕ್ತಪಡಿಸಿದರು. ಬಾರ್ಕ್ ರೇಟಿಂಗ್ನ ಮಹತ್ವ ತಿಳಿಸಿದ ಅವರು, ‘‘ಹೆಚ್ಚು ಸ್ಪರ್ಧಾತ್ಮಕತೆ ಇರುವ ಸುದ್ದಿ ಮಾಧ್ಯಮ ಕ್ಷೇತ್ರದಲ್ಲಿ ರಾಷ್ಟ್ರೀಯ ಮಟ್ಟದಲ್ಲಿ ಹಾಗೂ ಪ್ರಾದೇಶಿಕ ಮಟ್ಟದಲ್ಲಿ ಮಾನದಂಡಗಳು ಅವಶ್ಯವಾಗಿ ಬೇಕು. ಇಂದು ಸಚಿವರ ಭೇಟಿಯ ನಂತರ ನಾವು ಆಶಾದಾಯಕವಾಗಿದ್ದೇವೆ’’ ಎಂದು ಹೇಳಿದರು. ಈ ಭೇಟಿಯಲ್ಲಿ ಎನ್ಬಿಎಫ್ ರೇಟಿಂಗ್ಅನ್ನು ಬಿಡುಗಡೆ ಮಾಡುವುದು ಏಕೆ ಮುಖ್ಯವೆಂದು ಸಚಿವರಿಗೆ ಮನವರಿಕೆ ಮಾಡಿಕೊಟ್ಟಿದೆ.
ಸಚಿವರನ್ನು ಭೇಟಿಯಾದ ಆಡಳಿತ ಮಂಡಳಿಯಲ್ಲಿ ರಿಪಬ್ಲಿಕ್ ಮಿಡಿಯಾ ನೆಟ್ವರ್ಕ್ನ ಸಂಪಾದಕ ಅರ್ನಾಬ್ ಗೋಸ್ವಾಮಿ, ಟಿವಿ9 ಗ್ರೂಪ್ನ ಸಿಇಒ ಬರುಣ್ ದಾಸ್, ಪ್ರಾಗ್ ನ್ಯೂಸ್ನ ಸ್ಥಾಪಕ ನಿರ್ದೇಶಕ ಸಂಜೀವ್ ನರೈನ್, ಪ್ರೈಡ್ ಈಸ್ಟ್ ಎಂಟರ್ಟೈನ್ಮೆಂಟ್ನ ನಿರ್ದೇಶಕ ರಿನಿಕಿ ಭೂಯಾನ್, ಐಟಿವಿ ನೆಟ್ವರ್ಕ್ನ ಸ್ಥಾಪಕ ಕಾರ್ತಿಕೇಯ ಶರ್ಮಾ, ಫೋರ್ಥ್ ಡೈಮೆನ್ಶನ್ನ ಸಿಇಒ ಶಂಕರ್ ಬಾಲ, ಟಿವಿ9 ಭಾರತ ವರ್ಷದ ಸುದ್ದಿ ನಿರ್ದೇಶಕ ಹೇಮಂತ್ ಶರ್ಮಾ, ನ್ಯೂಸ್ ನೇಷನ್ನ ಸಂಪಾದಕ ಮನೋಜ್ ಗೈರೋಲಾ, MHOneನ ಮುಖ್ಯಸ್ಥ ಮಹೇಂದ್ರ ಬಾಟ್ಲಾ, ನ್ಯೂಸ್ ಫರ್ಸ್ಟ್ನ ಬ್ಯುಸಿನೆಸ್ ಹೆಡ್ ದಿವಾಕರ್.ಎಸ್., NBFನ ಕಾರ್ಯದರ್ಶಿ ಜೈ ಕೃಷ್ಣ ಹಾಗೂ NBFನ ಪಾಲಿಸಿ ಮತ್ತು ರೆಗ್ಯುಲೇಷನ್ನ ಸದಸ್ಯೆ ಇಶಿತಾ ಈ ಸಂದರ್ಭದಲ್ಲಿ ಉಪಸ್ಥಿತರಿದ್ದರು.
(NBF meets I&B Minister Anurag Thakur, requests quick restoration of BARC ratings)
Published On - 1:56 pm, Wed, 18 August 21