ನ್ಯೂ ದೆಹಲಿ ರಿವ್ಯೂ ಆಫ್ ಬುಕ್ಸ್ ಬಿಡುಗಡೆ; ಜಾಗತಿಕ ಚಿಂತನೆಗಳಿಗೆ ಭಾರತೀಯ ದೃಷ್ಟಿಕೋನದ ಅಗತ್ಯವಿದೆ ಎಂದ ಸಂಜೀವ್ ಸನ್ಯಾಲ್

ನವದೆಹಲಿ, ಅಕ್ಟೋಬರ್ 25: ‘ನ್ಯೂ ದೆಹಲಿ ರಿವ್ಯೂ ಆಫ್ ಬುಕ್ಸ್’ (NDRB) ಪತ್ರಿಕೆಯ ಮೊದಲ ಆವೃತ್ತಿಯು ದೆಹಲಿಯಲ್ಲಿ ಅದ್ಧೂರಿಯಾಗಿ ಬಿಡುಗಡೆಯಾಗಿದೆ. ಪ್ರಧಾನಮಂತ್ರಿಯವರ ಆರ್ಥಿಕ ಸಲಹಾ ಮಂಡಳಿಯ ಸದಸ್ಯರಾದ ಸಂಜೀವ್ ಸನ್ಯಾಲ್ ಈ ಕಾರ್ಯಕ್ರಮದಲ್ಲಿ ಮುಖ್ಯ ಅತಿಥಿಯಾಗಿ ಪಾಲ್ಗೊಂಡು ಕೃತಿಯನ್ನು ಅನಾವರಣಗೊಳಿಸಿದರು. ಎನ್‌ಡಿಆರ್‌ಬಿಯ ಸಂಪಾದಕೀಯ ಮುಖ್ಯಸ್ಥ ಪ್ರೇಮ್ ಅಂಶು ಸಿನ್ಹಾ ಹಾಗೂ ಪ್ರಕಾಶಕ ಮತ್ತು ‘ನೇಷನ್ ಫಸ್ಟ್ ಪಾಲಿಸಿ ರಿಸರ್ಚ್ ಆ್ಯಂಡ್ ಚೇಂಜ್ ಫೌಂಡೇಶನ್’ನ ಸಂಶೋಧನಾ ನಿರ್ದೇಶಕರಾದ ಅನಂತ್ ಕೃಷ್ಣ ಉಪಸ್ಥಿತರಿದ್ದರು.

ಯುವ ತಂಡದ ಈ ಹೊಸ ಪ್ರಯತ್ನವನ್ನು ಶ್ಲಾಘಿಸಿದ ಸಂಜೀವ್ ಸನ್ಯಾಲ್, ಭಾರತದಲ್ಲಿ ದೀರ್ಘಕಾಲದಿಂದ ಒಂದೇ ಸೈದ್ಧಾಂತಿಕ ಚಿಂತನೆ ಶೈಕ್ಷಣಿಕ ಕ್ಷೇತ್ರದಲ್ಲಿ ಮೇಲುಗೈ ಸಾಧಿಸಿತ್ತು. ಈ ‘ಸೈದ್ಧಾಂತಿಕ ಏಕಸಂಸ್ಕೃತಿ’ಯನ್ನು ಮುರಿದು, ಮುಕ್ತ ಚರ್ಚೆ ಮತ್ತು ನೈಜ ಬೌದ್ಧಿಕ ವೈವಿಧ್ಯತೆಯನ್ನು ಉತ್ತೇಜಿಸುವ ಅಗತ್ಯವಿದೆ. ಜಾಗತಿಕ ವಿಚಾರಗಳನ್ನು ಅಥವಾ ವಿದೇಶಿ ಬೆಳವಣಿಗೆಗಳನ್ನು ಬರಿ ಪಾಶ್ಚಿಮಾತ್ಯರ ಕಣ್ಣಿನಿಂದ ನೋಡದೆ, ಭಾರತೀಯ ಚೌಕಟ್ಟಿನಲ್ಲಿ ವಿಶ್ಲೇಷಿಸುವ ಬೌದ್ಧಿಕ ವ್ಯವಸ್ಥೆಯನ್ನು ನಾವು ಬೆಳೆಸಿಕೊಳ್ಳಬೇಕಿದೆ ಎಂದರು.

ಇದನ್ನೂ ಓದಿ: ವಾರಣಾಸಿಯಲ್ಲಿ ವಾಯುಪಡೆಯಿಂದ ರೋಚಕ ಏರೋಶೋ; ಪ್ರಧಾನಿ ಮೋದಿ ವೀಕ್ಷಣೆ; ಪ್ರಧಾನಿಗೆ ಸ್ವಕ್ಷೇತ್ರದಲ್ಲಿ ಭವ್ಯ ಸ್ವಾಗತ

ಸೈದ್ಧಾಂತಿಕವಾಗಿ ಒಂದೇ ಆಲೋಚನೆಗೆ ಸೀಮಿತವಾಗುವುದನ್ನು ಮತ್ತು ವಿಚಾರಗಳನ್ನು ಚರ್ಚಿಸುವ ಬದಲು ವ್ಯಕ್ತಿಗಳ ತೇಜೋವಧೆ ಮಾಡುವ ಸಂಸ್ಕೃತಿಯನ್ನು ಅವರು ಆಕ್ಷೇಪಿಸಿದರು. ಸಂಸ್ಥೆಯು ತಕ್ಷಣದ ವೇಗದ ಬೆಳವಣಿಗೆಗಿಂತ ಗುಣಮಟ್ಟ, ಸುಸ್ಥಿರತೆ ಹಾಗೂ ಧೀರ್ಘಾವಧಿಯ ಮೌಲ್ಯಗಳಿಗೆ ಆದ್ಯತೆ ನೀಡಬೇಕು ಎಂದು ಸಲಹೆ ನೀಡಿದ ಅವರು, ಫ್ರೀಡ್ರಿಚ್ ಹಾಯೆಕ್ ಹಾಗೂ ಬಿ.ಆರ್. ಶೆಣೈ ಅವರಂತಹ ಪ್ರಸಿದ್ಧ ಚಿಂತಕರ ಕೊಡುಗೆಗಳನ್ನು ಸ್ಮರಿಸಿದರು.

Last evening, at The Dome, Ambassador, we launched the much-awaited inaugural issue of New Delhi Review of Books with Mr @sanjeevsanyal gracing our event as Chief Guest.

Mr Sanyal urged India to ‘reverse the gaze’ and examine the world on its own terms. He encouraged our young team to value longevity, consistency, and quality over rapid expansion.

— New Delhi Review of Books (@newdelhireview) October 24, 2026

ಫ್ರೀಡ್ರಿಚ್ ಹಾಯೆಕ್ ಮತ್ತು ಬಿ.ಆರ್. ಶೆಣೈ ಅವರಂತಹ ಪ್ರಮುಖ ಆರ್ಥಿಕ ಚಿಂತಕರ ಕೊಡುಗೆಗಳನ್ನು ಸ್ಮರಿಸಿದ ಸಂಜೀವ್ ಸನ್ಯಾಲ್, ಸಂಸ್ಥೆಗಳು ತಕ್ಷಣದ ಬೆಳವಣಿಗೆಗಿಂತ ಗುಣಮಟ್ಟ ಮತ್ತು ಸುಸ್ಥಿರತೆಗೆ ಆದ್ಯತೆ ನೀಡಬೇಕೆಂದು ಸಲಹೆ ನೀಡಿದರು.

1990ರ ದಶಕದ ದೆಹಲಿಯ ಬೌದ್ಧಿಕ ಮತ್ತು ಶೈಕ್ಷಣಿಕ ವಾತಾವರಣದ ಕುರಿತು ಮಾತನಾಡಿದ ಸಂಜೀವ್ ಸನ್ಯಾಲ್, 1990ರ ದಶಕದಲ್ಲಿ ಬರ್ಲಿನ್ ಗೋಡೆಯ ಪತನ, ಸೌವಿಯತ್ ಯೂನಿಯನ್ (USSR) ವಿಘಟನೆ ಹಾಗೂ ಭಾರತದ ಆರ್ಥಿಕ ಉದಾರೀಕರಣದಂತಹ ಪ್ರಮುಖ ಘಟನೆಗಳು ನಡೆದರೂ, ಅಂದಿನ ವಿಶ್ವವಿದ್ಯಾಲಯಗಳ ಪಠ್ಯಕ್ರಮಗಳು ಮಾತ್ರ ಹಳೆಯ ಸಮಾಜವಾದಿ ಸಿದ್ಧಾಂತಕ್ಕೆ ಅಂಟಿಕೊಂಡಿದ್ದವು. ಆ ಸಮಯದಲ್ಲಿ ಮುಕ್ತ ಮಾರುಕಟ್ಟೆ ಹಾಗೂ ಉದಾರವಾದಿ ಆರ್ಥಿಕ ಚಿಂತಕರಾದ ಫ್ರೀಡ್ರಿಚ್ ಹಾಯೆಕ್ ಮತ್ತು ಬಿ.ಆರ್. ಶೆಣೈ ಅವರ ಪುಸ್ತಕಗಳನ್ನು ‘ಪೋರ್ನೋಗ್ರಫಿ’ (ಅಶ್ಲೀಲ ಸಾಹಿತ್ಯ)ಯಂತೆ ಮುಚ್ಚಿಟ್ಟು ಓದಬೇಕಾದ ಸ್ಥಿತಿಯಿತ್ತು ಎಂದಿದ್ದಾರೆ.

ಇದನ್ನೂ ಓದಿ: ಮನ್ ಕಿ ಬಾತ್‌ನಲ್ಲಿ ಸ್ಥಳೀಯ ಉತ್ಪನ್ನಗಳ ಬಳಕೆಗೆ ಪ್ರಧಾನಿ ಮೋದಿ ಕರೆ: ಕರ್ನಾಟಕದ ಕಲಬುರಗಿ ತೊಗರಿಬೇಳೆ, ಬಿಹಾರದ ಮಖಾನಾ ಉಲ್ಲೇಖ

ಎನ್‌ಡಿಆರ್‌ಬಿಯನ್ನು “ಬೌದ್ಧಿಕ ಮೂಲಸೌಕರ್ಯ” ಎಂದು ಬಣ್ಣಿಸಿದ ಅನಂತ್ ಕೃಷ್ಣ, ರಾಜಕೀಯ ಫ್ಯಾಷನ್‌ಗಳ ಆಧಾರದ ಮೇಲಲ್ಲದೆ, ಬಲವಾದ ವಾದಗಳು ಮತ್ತು ವಿಚಾರಗಳ ಆಧಾರದ ಮೇಲೆ ಪುಸ್ತಕಗಳನ್ನು ಮೌಲ್ಯಮಾಪನ ಮಾಡುವುದು ಈ ಪ್ರಕಟಣೆಯ ಮುಖ್ಯ ಉದ್ದೇಶವಾಗಿದೆ ಎಂದಿದ್ದಾರೆ. ಎನ್‌ಡಿಆರ್‌ಬಿ ಕೇವಲ ಪುಸ್ತಕಗಳ ಸಾರಾಂಶವನ್ನು ನೀಡುವುದಿಲ್ಲ; ಬದಲಿಗೆ ವಿಚಾರಗಳು, ಪುರಾವೆಗಳು ಮತ್ತು ವಾದಗಳನ್ನು ಆಳವಾಗಿ ವಿಶ್ಲೇಷಿಸುವ ಕೆಲಸ ಮಾಡುತ್ತದೆ ಎಂದು ಪ್ರೇಮ್ ಅಂಶು ಸಿನ್ಹಾ ಸ್ಪಷ್ಟಪಡಿಸಿದರು.

ನ್ಯೂ ದೆಹಲಿ ರಿವ್ಯೂ ಆಫ್ ಬುಕ್ಸ್ ರಾಜಕೀಯ, ಇತಿಹಾಸ, ಅರ್ಥಶಾಸ್ತ್ರ, ಸಾಹಿತ್ಯ ಮತ್ತು ಸಂಸ್ಕೃತಿಯ ಕುರಿತು ವಿಮರ್ಶಾತ್ಮಕ ಪ್ರಬಂಧಗಳನ್ನು ಪ್ರಕಟಿಸುವ ತ್ರೈಮಾಸಿಕ ನಿಯತಕಾಲಿಕವಾಗಿದೆ. ಇದು ಎನ್‌ಎಫ್‌ಪಿಆರ್‌ಸಿ ಫೌಂಡೇಶನ್‌ನ ಬೆಂಬಲದೊಂದಿಗೆ ಸಂಪಾದಕೀಯ ಸ್ವಾಯತ್ತತೆಯೊಂದಿಗೆ ಕಾರ್ಯಾಚರಿಸುತ್ತದೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ