PM Modi’s Mother ಮಗ ಪ್ರಧಾನಿಯಾಗಿದ್ದರೂ ಹೀರಾಬೆನ್ ತಮ್ಮ ಹಳ್ಳಿಯಲ್ಲೇ ಇರಲು ಬಯಸಿದ್ದಕ್ಕೆ ಕಾರಣ ಇಲ್ಲಿದೆ

ನರೇಂದ್ರ ಮೋದಿ (Narendra Modi) ದೇಶದ ಪ್ರಧಾನಿಯಾಗಿದ್ದರೂ ಅವರ ಅಮ್ಮ ಹೀರಾಬೆನ್ (Heeraben Modi) ಸರಳ ಜೀವನವನ್ನೇ ನಡೆಸಿದ್ದರು. 1923 ಜೂನ್ 18ರಂದು ಜನಿಸಿದ್ದ ಹೀರಾಬೆನ್ ಈ ವರ್ಷ 100ನೇ ಹುಟ್ಟುಹಬ್ಬ ಆಚರಿಸಿದ್ದರು. ಹೀರಾಬೆನ್ ಗಾಂಧಿನಗರದ (Gandhi Nagar) ಗ್ರಾಮೀಣ ಪ್ರದೇಶವಾದ ರಾಯಸನ್ ಗ್ರಾಮದಲ್ಲಿ ನರೇಂದ್ರ ಮೋದಿಯವರ ಕಿರಿಯ ಸಹೋದರ ಪಂಕಜ್ ಮೋದಿ ಜತೆ ವಾಸವಾಗಿದ್ದರು. ಸದಾ ಸರಳತೆಯನ್ನು ಬಯಸುತ್ತಿದ್ದ ಹೀರಾಬೆನ್, ಗ್ರಾಮದಲ್ಲಿಯೇ ಇರಲು ಇಷ್ಟಪಡುತ್ತಿದ್ದರು. 2014 ಸೆಪ್ಟೆಂಬರ್ 17ರಂದು ದೇಶದ ಪ್ರಧಾನಿಯಾಗಿದ್ದರೂ ಯಾವುದೇ ಭದ್ರತೆ ಇಲ್ಲದೆ ಮೋದಿ ಅಮ್ಮನ ಹುಟ್ಟುಹಬ್ಬಕ್ಕೆ ಆಗಮಿಸಿದ್ದರು. ಹೀರಾಬೆನ್ ಹುಟ್ಟುಹಬ್ಬಕ್ಕೆ ಮೋದಿ ಆಗಮಿಸಿ, ಅಮ್ಮ ಮಾಡಿದ ಆಹಾರ ಸವಿಯುವುದು ಅವರ ಆಶೀರ್ವಾದ ಪಡೆದು ಅವರ ಜತೆ ಕೆಲಕಾಲ ಕಳೆಯುವುದನ್ನು ನಾವು ಫೋಟೊಗಳಲ್ಲಿ ನೋಡಿದ್ದೇವೆ. ಈ ಫೋಟೊಗಳನ್ನು ಗಮನಿಸಿದರೆ ಗೊತ್ತಾಗುತ್ತದೆ ಹೀರಾಬೆನ್ ಸರಳತೆಯನ್ನು ಮೈಗೂಡಿಸಿಕೊಂಡವರು ಎಂದು. ಮಗ ದೇಶದ ಪ್ರಧಾನಿಯಾಗಿದ್ದರೂ ಹಮ್ಮು ಬಿಮ್ಮುಗಳಿಲ್ಲದೆ ತಮ್ಮ ಕೆಲಸವನ್ನು ತಾವೇ ಮಾಡಿಕೊಳ್ಳುತ್ತಾರೆ ಹೀರಾಬೆನ್. ಅವರು ಸಾರ್ವಜನಿಕ ಸಾರಿಗೆಯನ್ನೇ ಓಡಾಟಕ್ಕೆ ಬಳಸುತ್ತಾರೆ. ಇವರು ಯಾವುದೇ ವಿಶೇಷವಾದ ಆಹಾರವನ್ನು ತಿನ್ನಲು ಇಷ್ಟಪಡುವುದಿಲ್ಲ. ಅವರೇ ಅಡುಗೆ ಮಾಡಿಕೊಳ್ಳುತ್ತಾರೆ. ಹೆಚ್ಚು ಎಣ್ಣೆ ಮತ್ತು ಸಾಂಬಾರ ಪದಾರ್ಥಗಳನ್ನು ಹೊಂದಿರುವ ಆಹಾರ ಇವರಿಗೆ  ಇಷ್ಟವಿಲ್ಲ. ತನ್ನ ದೈನಂದಿನ ಆಹಾರದಲ್ಲಿ ಬೇಳೆ, ಅನ್ನ, ಖಿಚಡಿ ಮತ್ತು ಚಪಾತಿ ಹೀರಾಬೆನ್ ಅವರಿಗೆ ಇಷ್ಟ.

2016 ಮೇ 16ರಂದು ಹೀರಾಬೆನ್ ದೆಹಲಿಯ ರೇಸ್ ಕೋರ್ಸ್ ನಲ್ಲಿರುವ ಮೋದಿಯವರ  ಅಧಿಕೃತ ನಿವಾಸಕ್ಕೆ ಭೇಟಿ ನೀಡಿದ್ದರು. ಗುಜರಾತಿನ ರಾಯ್ಸನ್ ಪ್ರದೇಶದಲ್ಲಿನ 80 ಮೀಟರ್ ರಸ್ತೆಗೆ ಪೂಜ್ಯ ಹೀರಾಬಾ ಮಾರ್ಗ್ ಎಂದು ಹೆಸರಿಡಲಾಗಿದೆ. ಮುಂದಿನ ಯುವಜನಾಂಗ ಅವರ ಬದುಕಿನಿಂದ ಸ್ಫೂರ್ತಿ ಪಡೆಯಬೇಕು ಎಂದು ರಸ್ತೆಗೆ ಹೆಸರಿಟ್ಟ ಕಾರ್ಯಕ್ರಮಗಲ್ಲಿ ಗಾಂಧಿನಗರ ಮೇಯರ್ ಹಿತೇಶ್ ಮಕ್ವಾನಾ ಹೇಳಿದ್ದರು.

ಇದನ್ನೂ ಓದಿ: Prahlad Modi: ಪ್ರಧಾನಿ ಮೋದಿ ಸಹೋದರ ಪ್ರಹ್ಲಾದ್ ಮೋದಿ, ಇತರರು ನಾಳೆ ಆಸ್ಪತ್ರೆಯಿಂದ ಬಿಡುಗಡೆ

ಹೀರಾಬೆನ್ ಬಗ್ಗೆ ನಿಮಗೆ ಗೊತ್ತಿಲ್ಲದ ಸಂಗತಿಗಳು

1. ಹೀರಾ ಬೆನ್ ಮೋದಿ ಚಿಕ್ಕ ವಯಸ್ಸಿನಲ್ಲೇ ಟೀ ಅಂಗಡಿಯ ದಾಮೋದರ್ ದಾಸ್ ಮೂಲ್ಚಂದ್ ಮೋದಿ ಅವರನ್ನು ಮದುವೆಯಾಗಿಗದ್ದರು. ಈ ದಾಂಪತ್ಯದಲ್ಲಿ ಅವರಿಗೆ 6 ಮಕ್ಕಳಿದ್ದಾರೆ. 5 ಗಂಡು, 1 ಹೆಣ್ಣು. ಮೂರನೇ ಮಗನೇ ಪ್ರಧಾನಿ ನರೇಂದ್ರ ಮೋದಿ.
2. ಪ್ರಧಾನಿಯಾಗುವುದಕ್ಕಿಂತ ಮುನ್ನ ಮೋದಿ, ಗುಜರಾತಿನಲ್ಲಿ 4 ಬಾರಿ ಮುಖ್ಯಮಂತ್ರಿಯಾಗಿದ್ದರು. ಮೋದಿ ಮೊದಲ ಬಾರಿ ಗುಜರಾತ್ ಸಿಎಂ ಆಗಿದ್ದಾಗ, ಅಮ್ಮ ಅವರಿಗೆ ನೀಡಿದ ಉಪದೇಶ ಲಂಚ ತೆಗೆದುಕೊಳ್ಳಬೇಡ ಎಂಬುದಾಗಿತ್ತು.
3. ಆಕೆ ನನ್ನ ಬದುಕಿನ ಆಧಾರ ಸ್ತಂಭ. ನನ್ನ ಯಶಸ್ಸಿನ ಹಿಂದೆ ಆಕೆ ಪ್ರಮುಖ ಪಾತ್ರ ವಹಿಸಿದ್ದಾಳೆ ಎಂದು ಸಂದರ್ಶನವೊಂದರಲ್ಲಿ ಮೋದಿ ಹೇಳಿದ್ದರು.
4. 2014ರ ಲೋಕಸಭಾ ಚುನಾವಣೆಯ ಫಲಿತಾಂಶಕ್ಕೆ ಮುನ್ನ ಮೋದಿ ಅಮ್ಮ ಹೀರಾಬೆನ್ ಅವರ ಆಶೀರ್ವಾದ ಪಡೆದಿದ್ದರು.
5. ಗುಜರಾತಿನ ಮೆಹ್ಸಾನ ವಾಡ್​​ನಗರದಲ್ಲಿದ್ದ ಪೂರ್ವಜರ ಮನೆಯಲ್ಲಿ ಹೀರಾಬೆನ್ ವಾಸವಾಗಿದ್ದರು. ಪತಿಯ ಮರಣ ನಂತರ ಅವರು ಕಿರಿಯ ಮಗ ಪಂಕಜ್ ಮನೆಯಲ್ಲಿ ಇರಲು ತೊಡಗಿದರು.
6. 2016 ನವೆಂಬರ್ ನಲ್ಲಿ ಮೋದಿ ಸರ್ಕಾರ ನೋಟು ರದ್ದತಿ ಮಾಡಿದಾಗ ಹೀರಾಬೆನ್ ಕೂಡಾ ಎಟಿಎಂ ಮುಂದೆ ಸರತಿ ಸಾಲಿನಲ್ಲಿ ನಿಂತಿದ್ದರು.
7. 2019ರ ಲೋಕಸಭಾ ಚುನಾವಣೆಯಲ್ಲಿಯೂ ಹೀರಾಬೆನ್ ಮತಗಟ್ಟೆಗೆ ಬಂದು ಮತ ಚಲಾಯಿಸಿದ್ದರು.
8. ಮೋದಿ ನೇತೃತ್ವದ ಬಿಜೆಪಿ ಚುನಾವಣೆಯಲ್ಲಿ ಗೆದ್ದಾಗ ಗಾಂಧಿನಗರದ ತಮ್ಮ ಮನೆಯಿಂದಲೇ ಹೀರಾಬೆನ್ ಜನರತ್ತ ಕೈಬೀಸಿದ್ದರು.
9. ಅಮ್ಮನ 100ನೇ ವರ್ಷದ ಹುಟ್ಟುಹಬ್ಬದ ವೇಳೆ ಮೋದಿ ಅಮ್ಮನ ಬಗ್ಗೆ ಬ್ಲಾಗ್ ಬರೆದಿದ್ದರು. ಅದರಲ್ಲಿ ಅವರು ಪ್ರಜೆಯಾಗಿ ತನ್ನ ಕರ್ತವ್ಯಗಳ ಬಗ್ಗೆ ಆಕೆಗೆ ಯಾವಾಗಲೂ ಅರಿವಿದೆ. ಚುನಾವಣೆಗಳು ಪ್ರಾರಂಭವಾದಾಗಿನಿಂದ, ಅವರು ಪಂಚಾಯತ್‌ನಿಂದ ಸಂಸತ್ತಿನವರೆಗೆ ಪ್ರತಿ ಚುನಾವಣೆಯಲ್ಲೂ ಮತ ಚಲಾಯಿಸಿದ್ದಾರೆ. ಕೆಲ ದಿನಗಳ ಹಿಂದೆ ಗಾಂಧಿನಗರ ಮುನ್ಸಿಪಲ್ ಕಾರ್ಪೊರೇಷನ್ ಚುನಾವಣೆಯಲ್ಲಿ ಮತ ಚಲಾಯಿಸಲು ತೆರಳಿದ್ದರು ಎಂದಿದ್ದಾರೆ.
10. ಜೀವನದಲ್ಲಿ ಅಮ್ಮ ಯಾವುದರ ಬಗ್ಗೆಯೂ ದೂರುವುದನ್ನು ನಾನು ಕೇಳಿಲ್ಲ. ಅವಳು ಯಾರ ಬಗ್ಗೆಯೂ ದೂರುವುದಿಲ್ಲ ಅಥವಾ ಯಾರಿಂದಲೂ ಯಾವುದೇ ನಿರೀಕ್ಷೆಗಳನ್ನು ಇಟ್ಟುಕೊಳ್ಳುವುದಿಲ್ಲ ಎಂದಿದ್ದರು ಮೋದಿ

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ