ಜಪಾನ್‌ನಲ್ಲಿ ಭಾಷಾತಜ್ಞ, ಲೇಖಕ ಟೊಮಿಯೊ ಮಿಜೋಕಾಮಿಯನ್ನು ಭೇಟಿ ಮಾಡಿದ ಮೋದಿ; ಯಾರು ಈ ವ್ಯಕ್ತಿ?

ಜಪಾನಿನ ನೆಲದಲ್ಲಿ ಭಾರತೀಯ ಸಂಸ್ಕೃತಿಯನ್ನು ಉತ್ತೇಜಿಸುವ ಅವಿರತ ಶ್ರಮದ ಮೂಲಕ ಭಾರತ-ಜಪಾನ್ (Japan) ಬಾಂಧವ್ಯವನ್ನು ಹೆಚ್ಚಿಸಿದ ಕೀರ್ತಿಗೆ ಭಾಜನರಾದ ಜಪಾನಿನ ಖ್ಯಾತ ಲೇಖಕ, ಹಿಂದಿ ಮತ್ತು ಪಂಜಾಬಿ ಭಾಷಾತಜ್ಞ, ಪದ್ಮ ಪುರಸ್ಕೃತ ಡಾ ಟೊಮಿಯೊ ಮಿಜೋಕಾಮಿ (Dr Tomio Mizokami) ಅವರನ್ನು ಪ್ರಧಾನಿ ನರೇಂದ್ರ ಮೋದಿ (Narendra Modi) ಶನಿವಾರ ಭೇಟಿ ಮಾಡಿದರು. ಅವರ ಸಂವಾದದ ಕುರಿತು ಮಾತನಾಡಿದ ಡಾ ಮಿಜೋಕಾಮಿ ಅವರು ಮುಂದಿನ ‘ವಿಶ್ವ ಹಿಂದಿ ಸಮ್ಮೇಳನ’ವನ್ನು ಜಪಾನ್‌ನಲ್ಲಿ ನಡೆಸಬೇಕೆಂದು ಪ್ರಧಾನಿ ಮೋದಿಯವರನ್ನು ಒತ್ತಾಯಿಸಿರುವುದಾಗಿ ಹೇಳಿದರು.

ಹಿಂದಿ ಭಾಷೆಯಲ್ಲಿ ಅವರ ಆಸಕ್ತಿ ಏಕೆ ಬೆಳೆಯಿತು ಎಂಬ ಕಾರಣವನ್ನು ಕೇಳಿದಾಗ, ನಾನು ಜಪಾನಿನ ಕೋಬ್ ನಗರದಲ್ಲಿ ಜನಿಸಿದೆ, ಆಗ ಭಾರತೀಯ ಜನಸಂಖ್ಯೆಯು ಹೆಚ್ಚಾಗಿ ಪ್ರಾಬಲ್ಯ ಹೊಂದಿತ್ತು. ನಾನು ಅವರಿಂದ ಪ್ರಭಾವಿತನಾಗಿದ್ದೆ. ಆ ಭಾಷೆ ಕಲಿಯಲು ನನಗೆ ಹೆಚ್ಚಿನ ಕುತೂಹಲವಿತ್ತು.

ಮಾಜಿ ಪ್ರಧಾನಿ ಜವಾಹರಲಾಲ್ ನೆಹರೂ ಎಂದರೆ ನನಗಿಷ್ಟ. ಆ ಕಾಲದಲ್ಲಿ, ಅವರು (ನೆಹರು) ಪ್ರಪಂಚದಾದ್ಯಂತ ಹೆಚ್ಚಿನ ಪ್ರಭಾವವನ್ನು ಹೊಂದಿದ್ದರು. ‘ಅಲಿಪ್ತ ಚಳವಳಿಯ’ (ಶೀತಲ ಸಮರದ ಅವಧಿಯಲ್ಲಿ) ಸಂಸ್ಥಾಪಕರಲ್ಲಿ ಒಬ್ಬರಾಗಿ, ನಮ್ಮಂತಹ ಯುವಕರಿಗೆ ಸ್ಫೂರ್ತಿಯಾಗಿದ್ದರು. ಶಾಂತಿ ಮತ್ತು ಸ್ಥಿರತೆಯನ್ನು ಬಯಸಿದರು. ಹಾಗಿರುವಾಗ ಅಂತಹ ನಾಯಕನ ಭಾಷೆಯನ್ನು ಏಕೆ ಕಲಿಯಬಾರದು ಎಂದು ಅನಿಸಿತು ಎಂದಿದ್ದಾರೆ ಮಿಜೋಕಾಮಿ.

ಪದ್ಮಶ್ರೀ ಪ್ರಶಸ್ತಿ ಪುರಸ್ಕೃತ, ಬಹುಭಾಷಾ ಲೇಖಕ ಮಿಜೋಕಾಮಿ ಪರಿಚಯ

•  ಒಸಾಕಾ ವಿಶ್ವವಿದ್ಯಾನಿಲಯದ ಡಾ ಟೊಮಿಯೊ ಮಿಜೋಕಾಮಿ ಅವರು ಸಾಹಿತ್ಯ ಮತ್ತು ಶಿಕ್ಷಣಕ್ಕೆ ನೀಡಿದ ಕೊಡುಗೆಗಾಗಿ ಅವರಿಗೆ 2018 ರಲ್ಲಿ ಪ್ರತಿಷ್ಠಿತ ‘ಪದ್ಮಶ್ರೀ’ ಪ್ರಶಸ್ತಿಯನ್ನು ನೀಡಿ ಗೌರವಿಸಲಾಗಿದೆ. ಹಿಂದಿ ಮತ್ತು ಭಾರತೀಯ ಸಂಸ್ಕೃತಿಯನ್ನು ಉತ್ತೇಜಿಸಲು ಅವರ ಅವಿರತ ಸೇವೆಗೆ ಸಿಕ್ಕಿದ ಮನ್ನಣೆಯಾಗಿದೆ ಇದು. 2001 ರಲ್ಲಿ ಉತ್ತರ ಪ್ರದೇಶ ಸರ್ಕಾರದ ಇವರಿಗೆ ‘ಹಿಂದಿ ರತ್ನ’ ಪ್ರಶಸ್ತಿ ನೀಡಿ ಗೌರವಿಸಿದೆ.
•  81 ವರ್ಷದ ಲೇಖಕರು ಭಾರತ ಮತ್ತು ಜಪಾನ್‌ನಲ್ಲಿ (ಒಸಾಕಾ) ಹಿಂದಿ ಕಲಿಯಲು, ಸಂಶೋಧನೆ ಮಾಡಲು ಮತ್ತು ಕಲಿಸಲು ತಮ್ಮ ಜೀವನವನ್ನು ಮುಡಿಪಾಗಿಟ್ಟಿದ್ದಾರೆ. ಮಿಜೋಕಾಮಿ 1941 ರಲ್ಲಿ ಜನಿಸಿದರು. ಪದವಿ ಮುಗಿದ ನಂತರ ಅವರು ಅಲಹಾಬಾದ್‌ನಲ್ಲಿ 1965-68 ರವರೆಗೆ ಹಿಂದಿಯನ್ನು ಅಧ್ಯಯನ ಮಾಡಿದರು. ಈ ಸಮಯದಲ್ಲಿ ಅವರು ಬಂಗಾಳಿ ಕೂಡಾ ಕಲಿತರು.
•  ನಂತರ 1968 ರಲ್ಲಿ, ಅವರು ಜಪಾನ್‌ಗೆ ಹಿಂದಿರುಗಿದ ಅವರು ಒಸಾಕಾ ವಿಶ್ವವಿದ್ಯಾಲಯದ ಹಿಂದಿ ವಿಭಾಗದಲ್ಲಿ ಸಂಶೋಧನಾ ಸಹಾಯಕರಾಗಿ ಸೇರಿದರು. ಮಿಜೋಕಾಮಿ ಅವರು ದೆಹಲಿ ವಿಶ್ವವಿದ್ಯಾಲಯದ (DU) ಹಳೆಯ ವಿದ್ಯಾರ್ಥಿ. ಅಲ್ಲಿ ಅವರು ಹಿಂದಿ ಭಾಷೆಯಲ್ಲಿ ಸ್ನಾತಕೋತ್ತರ ಪದವಿಯನ್ನು ಪಡೆದರು. 1983 ರಲ್ಲಿ ಅವರು ಹಿಂದಿಯಲ್ಲಿ ತಮ್ಮ ಪಿಎಚ್‌ಡಿ ಪಡೆದರು. ಅವರು ಸುಮಾರು 301 ಜನಪ್ರಿಯ ಹಿಂದಿ ಚಲನಚಿತ್ರ ಗೀತೆಗಳನ್ನು ಜಪಾನೀಸ್ ಉಪಶೀರ್ಷಿಕೆಗಳೊಂದಿಗೆ ಅನುವಾದಿಸಿದ್ದಾರೆ.
•  ಅವರು ಅಮೆರಿಕದಲ್ಲಿ ಭಾರತೀಯ ಭಾಷೆಗಳನ್ನು ಉತ್ತೇಜಿಸುವ ನಿಟ್ಟಿನಲ್ಲಿ ಕೆಲಸ ಮಾಡಿದ್ದಾರೆ. ಅವರು 1989-90 ರಿಂದ ಚಿಕಾಗೋ ವಿಶ್ವವಿದ್ಯಾಲಯ ಮತ್ತು ಕ್ಯಾಲಿಫೋರ್ನಿಯಾ ವಿಶ್ವವಿದ್ಯಾಲಯದಲ್ಲಿ ಸಂದರ್ಶಕ ವಿದ್ವಾಂಸರಾಗಿದ್ದರು, ಅಲ್ಲಿ ಅವರು ಪಂಜಾಬಿ ಕಲಿಸಿದರು.
•  65 ನೇ ವಯಸ್ಸಿನಲ್ಲಿ, ಅವರಿಗೆ ಒಸಾಕಾ ಯುನಿವರ್ಸಿಟಿ ಆಫ್ ಫಾರಿನ್ ಸ್ಟಡೀಸ್‌ನ ‘ಪ್ರೊಫೆಸರ್ ಎಮೆರಿಟಸ್’ ಎಂಬ ಬಿರುದನ್ನು ನೀಡಲಾಯಿತು.1999 ರಲ್ಲಿ ಲಂಡನ್‌ನಲ್ಲಿ ‘ವಿಶ್ವ ಹಿಂದಿ ಸಮ್ಮಾನ್’ ನೀಡಿ ಮಿಜೋಕಾಮಿ ಅವರನ್ನು ಗೌರವಿಸಲಾಗಿದೆ.

ಮತ್ತಷ್ಟು ರಾಷ್ಟ್ರೀಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ