ರಶ್ಮಿಕಾ ಮಂದಣ್ಣರ ಡೀಪ್ಫೇಕ್ ರೀತಿ ಲೋನ್ ಆ್ಯಪ್ಗಳಿಂದ ಸಾಮಾನ್ಯರಿಗೂ ನಕಲಿ ವಿಡಿಯೋಗಳ ಮೂಲಕ ಕಿರುಕುಳ: ಗಾಯಕಿ ಚಿನ್ಮಯಿ ಶ್ರೀಪಾದ ಕಳವಳ
Chinmayi Sripaada On DeepFake Video: ನಕಲಿ ಚಿತ್ರಗಳನ್ನು ಸೃಷ್ಟಿಸಿ ಸೆಲಬ್ರಿಟಿಗಳಿಗೆ ಮಾತ್ರವಲ್ಲ, ಸಾಮಾನ್ಯ ಜನರಿಗೂ ಕಿರುಕುಳ ಕೊಡಲಾಗುತ್ತಿದೆ. ಸುಲಿಗೆ ಮಾಡಲು, ಬ್ಲ್ಯಾಕ್ಮೇಲ್ ಮಾಡಲು ಮತ್ತು ಮಹಿಳೆಯರನ್ನು ರೇಪ್ ಮಾಡಲು ಎಐ ಟೆಕ್ನಾಲಜಿಯನ್ನು ಉಪಯೋಗಿಸುವ ಸಾಧ್ಯತೆ ಬಗ್ಗೆ ಗಾಯಕಿ ಚಿನ್ಮಯಿ ಭಯ ವ್ಯಕ್ತಪಡಿಸಿದ್ದಾರೆ.
ನವದೆಹಲಿ, ನವೆಂಬರ್ 8: ನಟಿ ರಶ್ಮಿಕಾ ಮಂದಣ್ಣ ಅವರ ನಕಲಿ ವಿಡಿಯೋ ಪ್ರಕರಣ (Rashmika Mandanna deepfake video) ಬಹಳ ಜನರನ್ನು ದಿಗ್ಮೂಢಗೊಳಿಸಿದೆ. ಆರ್ಟಿಫಿಶಿಯಲ್ ತಂತ್ರಜ್ಞಾನ ಬಳಸಿ ಡೀಪ್ಫೇಕ್ ವಿಡಿಯೋಗಳನ್ನು ತಯಾರಿಸುವುದು ಅದೆಷ್ಟು ಸುಲಭವಾಗಿದೆ ಎಂಬುದು ಆತಂಕಕ್ಕೆ ಕಾರಣವಾಗಿದೆ. ಬೇರೊಬ್ಬ ಮಹಿಳೆಯ ವಿಡಿಯೋದಲ್ಲಿ, ಆ ಮಹಿಳೆಯ ಮುಖಕ್ಕೆ ರಶ್ಮಿಕಾ ಮುಖವನ್ನು ಜೋಡಿಸಲಾಗಿದೆ ಅಷ್ಟೇ. ಈ ಡೀಪ್ಫೇಕ್ ವಿಡಿಯೋವನ್ನು ನೋಡಿದ ಸಾಮಾನ್ಯರಿಗೆ ಯಾರಿಗಾದರೂ ಅದು ನಕಲಿ ಎಂದು ಗೊತ್ತಾಗದ ಮಟ್ಟಿಗೆ ಅದು ತಯಾರಾಗಿದೆ. ಈ ಪ್ರಕರಣದಲ್ಲಿ ಅಮಿತಾಭ್ ಬಚ್ಚನ್ ಸೇರಿದಂತೆ ಬಹಳಷ್ಟು ಸೆಲಬ್ರಿಟಿಗಳು ಕನ್ನಡತಿ ರಶ್ಮಿಕಾಗೆ ಸಹಾನುಭೂತಿ ವ್ಯಕ್ತಪಡಿಸಿದ್ದಾರೆ. ಇದೇ ವೇಳೆ, ಗಾಯಕಿ ಚಿನ್ಮಯಿ ಶ್ರೀಪಾದ (Singer Chinmayi Sripaada) ಅವರೂ ಕೂಡ ಈ ಪ್ರಕರಣದಲ್ಲಿ ಪ್ರತಿಕ್ರಿಯಿಸಿದ್ದು, ಎಐ ಟೆಕ್ನಾಲಜಿಯ ದುರ್ಬಳಕೆ ಮಾಡಿಕೊಳ್ಳುವವರ ವಿರುದ್ಧ ಕಾನೂನು ಕ್ರಮ ಜರುಗಿಸಬೇಕೆಂದು ಒತ್ತಾಯಿಸಿದ್ದಾರೆ.
ಆದರೆ, ಈ ರೀತಿಯ ನಕಲಿ ಚಿತ್ರಗಳನ್ನು ಸೃಷ್ಟಿಸಿ ಸೆಲಬ್ರಿಟಿಗಳಿಗೆ ಮಾತ್ರವಲ್ಲ, ಸಾಮಾನ್ಯ ಜನರಿಗೂ ಕಿರುಕುಳ ಕೊಡಲಾಗುತ್ತಿದೆ. ಸುಲಿಗೆ ಮಾಡಲು, ಬ್ಲ್ಯಾಕ್ಮೇಲ್ ಮಾಡಲು ಮತ್ತು ಮಹಿಳೆಯರನ್ನು ರೇಪ್ ಮಾಡಲು ಎಐ ಟೆಕ್ನಾಲಜಿಯನ್ನು ಉಪಯೋಗಿಸುವ ಸಾಧ್ಯತೆ ಬಗ್ಗೆ ಗಾಯಕಿ ಚಿನ್ಮಯಿ ಭಯ ವ್ಯಕ್ತಪಡಿಸಿದ್ದಾರೆ.
ಲೋನ್ ಆ್ಯಪ್ಗಳಿಂದ ಹಣ ಪಡೆದ ಮಹಿಳೆಯರ ಫೋಟೋಗಳನ್ನು ಪೋರ್ನ್ ಫೋಟೋಗಳಿಗೆ ಜೋಡಿಸಿ ಬ್ಲ್ಯಾಕ್ಮೇಲ್ ಮಾಡಲಾಗುತ್ತಿದೆ. ಹಣ ವಸೂಲಿ ಮಾಡಲಾಗುತ್ತಿದೆ ಎಂದೂ ಚಿನ್ಮಯಿ ಶ್ರೀಪಾದ ಆರೋಪಿಸಿದ್ದಾರೆ.
ಇದನ್ನೂ ಓದಿ: Rashmika Mandanna: ಡೀಪ್ಫೇಕ್ ವಿಡಿಯೋ ಹೇಗೆ ಸೃಷ್ಟಿಯಾಗುತ್ತದೆ? ರಶ್ಮಿಕಾ ಮಂದಣ್ಣ ಅವರ ನಕಲಿ ವಿಡಿಯೋ ಹೇಗೆ ಮಾಡಿದ್ರು?
‘ಹುಡುಗಿಯರನ್ನು ಸುಲಿಗೆ ಮಾಡಲು, ಬ್ಲ್ಯಾಕ್ಮೇಲ್ ಮಾಡಲು ಮತ್ತು ರೇಪ್ ಮಾಡಲು ಅವರಿಗೆ ಡೀಪ್ ಫೇಕ್ ಒಂದು ಅಸ್ತ್ರವಾಗಲಿದೆ. ಈ ಹುಡುಗಿಯರ ಕುಟುಂಬಗಳು ಸಣ್ಣ ಗ್ರಾಮವೋ, ಪಟ್ಟಣದವರೋ ಆಗಿದ್ದರೆ ಅವರಿಗೆ ಗೌರವದ ವಿಚಾರವಾದ್ದರಿಂದ ಅದು ನಕಲಿ ವಿಡಿಯೋವಾ ಅಲ್ಲವಾ ಎಂಬುದು ಗಮನಿಸುವುದಿಲ್ಲ,’ ಎಂದು ಚಿನ್ಮಯಿ ತಮ್ಮ ಎಕ್ಸ್ ಪೋಸ್ಟ್ನಲ್ಲಿ ಹಾಕಿದ್ದಾರೆ.
‘ತರಬೇತಿ ಪಡೆಯದ ಜನರಿಗೆ ಡೀಪ್ ಫೇಕ್ ವಿಡಿಯೋವನ್ನು ಗುರುತಿಸುವುದು ಕಷ್ಟ. ಇಂಥ ಡೀಪ್ಫೇಕ್ ಚಿತ್ರಗಳ ಬಗ್ಗೆ ಸಾರ್ವಜನಿಕರಲ್ಲಿ ಅರಿವು ಮೂಡಿಸುವ ಕೆಲಸ ನಡೆಯುತ್ತದೆ ಎಂದು ಆಶಿಸಿದ್ದೇನೆ. ಇಂಥ ಪ್ರಕರಣ ಎದುರಾದರೆ ಜನರು ತಾವೇ ಕ್ರಮ ಕೈಗೊಳ್ಳುವ ಬದಲು ಕಾನೂನಿನ ಗಮನಕ್ಕೆ ತರಬೇಕು,’ ಎಂದು ಚಿನ್ಮಯಿ ಸಲಹೆ ನೀಡಿದ್ದಾರೆ.
ಅಂದಹಾಗೆ, ರಶ್ಮಿಕಾ ಮಂದಣ್ಣ ಅವರ ಡೀಪ್ಫೇಕ್ ವಿಡಿಯೋದ ಮೂಲ ವಿಡಿಯೋ ಝಾರಾ ಪಟೇಲ್ ಎಂಬ ಬ್ರಿಟಿಷ್ ಭಾರತೀಯೆಯದ್ದಾಗಿತ್ತು. ಎಲಿವೇಟರ್ನೊಳಗೆ ಝಾರಾ ಮುಗುಳ್ನಗುತ್ತಾ ಪ್ರವೇಶಿಸಿದ ವಿಡಿಯೋ ಅದಾಗಿತ್ತು. ಅದರಲ್ಲಿ ಝಾರಾ ಪಟೇಲ್ ಮುಖಕ್ಕೆ ರಶ್ಮಿಕಾಳ ಮುಖ ಸೇರಿಸಲಾಗಿತ್ತು. ಆರಂಭದ ಒಂದು ಸೆಕೆಂಡ್ನ ದೃಶ್ಯದಲ್ಲಿ ಝಾರಾ ಮುಖ ಇದ್ದದ್ದು ರಶ್ಮಿಕಾ ಮುಖವಾಗಿ ಬದಲಾಗಿದ್ದನ್ನು ಸೂಕ್ಷ್ಮವಾಗಿ ಗಮನಿಸಿದಾಗ ಕಾಣಬಹುದು. ಸಾಮಾನ್ಯ ಸಂದರ್ಭದಲ್ಲಿ ಇದು ರಶ್ಮಿಕಾ ಮಂದಣ್ಣರದ್ದೇ ಎಂದು ಖಚಿತವಾಗಿ ಎಲ್ಲರೂ ಭಾವಿಸುವಷ್ಟು ಕರಾರುವಾಕ್ಕಾಗಿದೆ ಈ ವಿಡಿಯೋ.
ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ