ಇಡೀ ಎಟಿಎಂ ಯಂತ್ರವನ್ನೇ ಕಿತ್ತು, ಕಾರಿನಲ್ಲಿ ತುಂಬಿಸಿಕೊಂಡು ಪರಾರಿಯಾದ ಕಳ್ಳರು! ವಿಡಿಯೋ ವೈರಲ್

ನವದೆಹಲಿ, ಅಕ್ಟೋಬರ್ 6: ಜಾರ್ಖಂಡ್‌ನ ದೇವ್‌ಘರ್‌ನಲ್ಲಿ ಅಚ್ಚರಿಯ ರೀತಿಯ ಎಟಿಎಂ ಕಳವು ಪ್ರಕರಣವೊಂದು ವರದಿಯಾಗಿದೆ. ಕಳ್ಳರ ಗುಂಪೊಂದು ಎಟಿಎಂ ಕೇಂದ್ರದ ಶಟರ್ ಕತ್ತರಿಸಿ ಹಣ ದೋಚಲು ವಿಫಲವಾದಾಗ, ಇಡೀ ಎಟಿಎಂ ಯಂತ್ರವನ್ನೇ ಕಿತ್ತುಕೊಂಡು ಪರಾರಿಯಾಗಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ. ನಂದನ್ ಪಹಾರ್ ಬಳಿಯ ಸೇವಾಧಾಮ್ ಕಟ್ಟಡದ ಬಳಿ ಇದ್ದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (ಎಸ್​ಬಿಐ) ಎಟಿಎಂ ಯಂತ್ರವನ್ನು ಕಳ್ಳರು ಕಿತ್ತೊಯ್ದಿದ್ದಾರೆ. ಸೋಮವಾರ ರಾತ್ರಿ ದಾಳಿ ನಡೆಸಿದ ಕಳ್ಳರು ಯಾವುದೇ ಸುಳಿವು ನೀಡದೆ ಎಟಿಎಂ ಯಂತ್ರದೊಂದಿಗೆ ಪರಾರಿಯಾಗಿದ್ದಾರೆ. ಈ ಕುರಿತು ಸುತ್ತಮುತ್ತಲಿನ ನಿವಾಸಿಗಳಿಗೂ ಯಾವುದೇ ಅನುಮಾನ ಬರಲಿಲ್ಲ.

ಈ ಕಳ್ಳತನದ ಸಿಸಿಟಿವಿ ದೃಶ್ಯಾವಳಿಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿವೆ. ಕಳ್ಳರು ಮೊದಲು ತಮ್ಮ ಕಾರನ್ನು ಬಳಸಿ ಎಟಿಎಂ ಯಂತ್ರವನ್ನು ಹೇಗೆ ಕಿತ್ತರು ಮತ್ತು ನಂತರ ಅದೇ ವಾಹನದಲ್ಲಿ ಅದನ್ನು ಹೇಗೆ ಹೇರಿಕೊಂಡರು ಎಂಬುದು ವಿಡಿಯೋದಲ್ಲಿ ಸೆರೆಯಾಗಿದೆ. ಎಟಿಎಂ ಯಂತ್ರವನ್ನು ಅಳವಡಿಸಲಾಗಿದ್ದ ಕೊಠಡಿಯ ಶಟರ್ ಕತ್ತರಿಸುವುದು ಕಳ್ಳರ ಆರಂಭಿಕ ಯೋಜನೆಯಾಗಿತ್ತು. ಆದರೆ ಅದು ಸಾಧ್ಯವಾಗದಿದ್ದಾಗ, ಇಡೀ ಎಟಿಎಂ ಯಂತ್ರವನ್ನೇ ಕಿತ್ತುಕೊಂಡು ಪರಾರಿಯಾಗಿದ್ದಾರೆ ಎಂದು ತನಿಖಾಧಿಕಾರಿಗಳು ತಿಳಿಸಿದ್ದಾರೆ.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ