ಆಸ್ಟ್ರೇಲಿಯಾ ಪ್ರಧಾನಿಗೆ ವಿಶೇಷ ಉಡುಗೊರೆ; ಮೋದಿ ‘ಕಲೋನಿಯಲ್ ಕಸಿನ್ಸ್’ ಆಲ್ಬಮ್ ಕೊಟ್ಟಿದ್ದೇಕೆ?

ನವದೆಹಲಿ, ಜುಲೈ 13: ಬೇರೆ ದೇಶಗಳ ಅಧ್ಯಕ್ಷರು ಅಥವಾ ಪ್ರಧಾನಮಂತ್ರಿಗಳು ಭಾರತಕ್ಕೆ ಬಂದಾಗ ನಮ್ಮ ದೇಶದ ನೆನಪಿಗಾಗಿ ಉಡುಗೊರೆಗಳನ್ನು ನೀಡುವ ಪದ್ಧತಿ ಭಾರತ ಸರ್ಕಾರದಲ್ಲಿ ಮೊದಲಿನಿಂದ ಚಾಲ್ತಿಯಲ್ಲಿದೆ. ಹಾಗೇ, ಪ್ರಧಾನಿ ನರೇಂದ್ರ ಮೋದಿ ಬೇರೆ ದೇಶಕ್ಕೆ ಹೋದಾಗಲೂ ಅಲ್ಲಿನ ನಾಯಕರಿಗೆ ಇಲ್ಲಿಂದ ಭಾರತೀಯ ಕಲೆ, ಕುಸುರಿ-ಕೆತ್ತನೆ, ಕೈಮಗ್ಗ, ಸಂಸ್ಕೃತಿಯನ್ನು ಬಿತ್ತರಿಸುವ ವಿಶೇಷವಾದ ಉಡುಗೊರೆಗಳನ್ನು ಕೊಂಡೊಯ್ಯುವ ಅಭ್ಯಾಸಗಳನ್ನು ರೂಢಿಸಿಕೊಂಡಿದ್ದಾರೆ. ಕಳೆದ ವಾರ ಆಸ್ಟ್ರೇಲಿಯಾಗೆ ಹೋಗಿದ್ದ ಪ್ರಧಾನಿ ನರೇಂದ್ರ ಮೋದಿ (PM Narendra Modi) ಅಲ್ಲಿನ ಪ್ರಧಾನಿ ಆಂಥೋನಿ ಅಲ್ಬನೀಸ್ ಅವರಿಗೆ 90ರ ದಶಕದ ಇಂಡೋ-ಪಾಪ್ ‘ಕಲೋನಿಯಲ್ ಕಸಿನ್ಸ್’ (Colonial Cousins) ಆಲ್ಬಮ್‌ನ ಸ್ಪೆಷಲ್ ಕಲೆಕ್ಟರ್ಸ್ ಎಡಿಷನ್ ‘ವಿನೈಲ್ ರೆಕಾರ್ಡ್’ (Vinyl Album) ಅನ್ನು ಉಡುಗೊರೆಯಾಗಿ ನೀಡಿದ್ದಾರೆ. ಈ ಉಡುಗೊರೆಯ ಬಳಿಕ ಈ ಆಲ್ಬಂ ಮತ್ತೊಮ್ಮೆ ಭಾರತದಲ್ಲೂ ಮತ್ತೆ ಭಾರೀ ಸದ್ದು ಮಾಡುತ್ತಿದೆ. ಪ್ರಧಾನಿ ನರೇಂದ್ರ ಮೋದಿ ಆಸ್ಟ್ರೇಲಿಯಾದ ಪ್ರಧಾನಿಗೆ ಈ ಮ್ಯೂಸಿಕ್ ಆಲ್ಬಂ ನೀಡಿರುವುದರ ಹಿಂದೆ ಹಲವು ಕುತೂಹಲಕಾರಿ ಸಂಗತಿಗಳಿವೆ. ಆ ಬಗ್ಗೆ ಮಾಹಿತಿ ಇಲ್ಲಿದೆ.

ಭಾರತದಿಂದ ಬೇರೆ ದೇಶದ ನಾಯಕರಿಗೆ ಉಡುಗೊರೆಗಳನ್ನು ನೀಡಲು ಆಯ್ಕೆ ಮಾಡುವಾಗ ಬಹಳ ಮುತುವರ್ಜಿ ವಹಿಸಲಾಗುತ್ತದೆ. ಆ ಉಡುಗೊರೆ ನಮ್ಮ ದೇಶದ ಸಂಸ್ಕೃತಿ, ಆಚರಣೆ, ಕಲೆಯನ್ನು ಪಸರಿಸುವಂತಿರಬೇಕು. ಹೀಗಾಗಿ, ರೇಷ್ಮೆ, ಕಾಟನ್ ಬಟ್ಟೆಯಿಂದ ಹಿಡಿದು ಅಮೃತಶಿಲೆಯ ಕೆತ್ತನೆಯ ಕಲಾಕೃತಿಗಳು, ಮರದ ಕೆತ್ತನೆಯ ಉಯ್ಯಾಲೆ, ಎರಡೂ ದೇಶಗಳ ಇತಿಹಾಸವನ್ನು ನೆನಪಿಸುವ ವಸ್ತುಗಳನ್ನು ಒಳಗೊಂಡು ಹಲವು ಉಡುಗೊರೆಗಳನ್ನು ಪ್ರಧಾನಿ ಮೋದಿ ಬೇರೆ ದೇಶಗಳ ನಾಯಕರಿಗೆ ನೀಡಿದ್ದಾರೆ. ಆದರೆ, ಈ ಬಾರಿ ಆಸ್ಟ್ರೇಲಿಯಾ ಪ್ರಧಾನಿ ಆಂಥೋನಿ ಅಲ್ಬನೀಸ್ ಅವರಿಗೆ ನೀಡಲಾಗಿರುವ ಭಾರತದ ಹೆಮ್ಮೆಯ ಸಾಂಸ್ಕೃತಿಕ ಸಂಕೇತವಾಗಿರುವ ‘ಕಲೋನಿಯಲ್ ಕಸಿನ್ಸ್’ (ಹರಿಹರನ್ ಮತ್ತು ಲೆಸ್ಲಿ ಲೂಯಿಸ್) ಅವರ ಐತಿಹಾಸಿಕ ಆಲ್ಬಮ್‌ನ ‘ವಿನೈಲ್ ರೆಕಾರ್ಡ್’ ಬಹಳ ಕುತೂಹಲ ಮೂಡಿಸಿದೆ.

ಇದನ್ನೂ ಓದಿ: ಆಸ್ಟ್ರೇಲಿಯಾದ ಕ್ರಿಕೆಟ್ ಸ್ಟೇಡಿಯಂಗೆ ಪ್ರಧಾನಿ ಮೋದಿ ಭೇಟಿ, ಮೆಲ್ಬೋರ್ನ್ ಕ್ಲಬ್ ಜೊತೆ ಐತಿಹಾಸಿಕ ಒಪ್ಪಂದ

ಪ್ರಧಾನಿ ಮೋದಿ ಇದೇ ಆಲ್ಬಂ ಅನ್ನು ಉಡುಗೊರೆಯಾಗಿ ಆಯ್ಕೆ ಮಾಡಿಕೊಳ್ಳಲು ಕೆಲವು ಮುಖ್ಯ ಕಾರಣಗಳಿವೆ. ಅವುಗಳೆಂದರೆ,

ಆಸ್ಟ್ರೇಲಿಯಾ ಪ್ರಧಾನಿ ಸಂಗೀತ ಪ್ರೇಮಿ:

ಆಸ್ಟ್ರೇಲಿಯಾದ ಪ್ರಧಾನಿ ಆಂಥೋನಿ ಅಲ್ಬನೀಸ್ ಅವರು ಕೇವಲ ರಾಜಕಾರಣಿಯಲ್ಲ. ಅವರು ದೊಡ್ಡ ಸಂಗೀತ ಪ್ರೇಮಿ. ಅವರಿಗೆ ಹಳೆಯ ಶೈಲಿಯ ‘ವಿನೈಲ್ ರೆಕಾರ್ಡ್‌ಗಳನ್ನು’ (ಗ್ರಾಮಫೋನ್ ಡಿಸ್ಕ್) ಸಂಗ್ರಹಿಸುವ ಅಪರೂಪದ ಹವ್ಯಾಸವಿದೆ. ಹೀಗಾಗಿ, ಪ್ರಧಾನಿ ಮೋದಿ ಆಸ್ಟ್ರೇಲಿಯಾದ ಪ್ರಧಾನಿಯವರ ವೈಯಕ್ತಿಕ ಆಸಕ್ತಿ ಮತ್ತು ಹವ್ಯಾಸವನ್ನು ತಿಳಿದುಕೊಂಡು, ಅವರ ಹೃದಯಕ್ಕೆ ಮುಟ್ಟುವಂತಹ ಈ ವಿಶೇಷ ಮ್ಯೂಸಿಕ್ ರೆಕಾರ್ಡ್ ಅನ್ನು ಉಡುಗೊರೆಯಾಗಿ ನೀಡಿದ್ದಾರೆ.

ಪೂರ್ವ ಮತ್ತು ಪಶ್ಚಿಮ ಸಂಸ್ಕೃತಿಗಳ ಸಮ್ಮಿಲನ:

‘ಕಲೋನಿಯಲ್ ಕಸಿನ್ಸ್’ ಎಂಬುದು 1996ರ ಮ್ಯೂಸಿಕ್ ಆಲ್ಬಮ್. ಪಾಪ್ ಮ್ಯೂಸಿಕ್​ನಲ್ಲಿ ಈ ಆಲ್ಬಂ ಹೊಸ ಭಾಷ್ಯವನ್ನೇ ಬರೆಯಿತು. ಇದು ಕೇವಲ ಹಾಡುಗಳ ಸಂಗ್ರಹವಲ್ಲ, ಇದು ಸಾಂಸ್ಕೃತಿಕ ಸಮ್ಮಿಲನದ ಅದ್ಭುತ ಮೈಲಿಗಲ್ಲು. ಇದರಲ್ಲಿ ಗಾಯಕ ಹರಿಹರನ್ ಅವರ ಶುದ್ಧ ಭಾರತೀಯ ಶಾಸ್ತ್ರೀಯ ಸಂಗೀತ ಮತ್ತು ಗಜಲ್ ಶೈಲಿಯಿದೆ. ಮತ್ತೊಂದೆಡೆ, ಲೆಸ್ಲಿ ಲೂಯಿಸ್ ಅವರ ವೆಸ್ಟರ್ನ್ ಪಾಪ್, ರಾಕ್ ಮತ್ತು ಗಿಟಾರ್ ರಿದಮ್‌ಗಳಿವೆ.

ಭಾರತ ಮತ್ತು ಆಸ್ಟ್ರೇಲಿಯಾ ದೇಶಗಳ ನಡುವಿನ ರಾಜತಾಂತ್ರಿಕ ಸಂಬಂಧವೂ ಇದೇ ರೀತಿಯದ್ದಾಗಿದೆ. ಭಾರತವು ಪೂರ್ವದ ಸಾಂಸ್ಕೃತಿಕ ಹಿನ್ನೆಲೆ ಹೊಂದಿದ್ದರೆ, ಆಸ್ಟ್ರೇಲಿಯಾವು ಪಾಶ್ಚಿಮಾತ್ಯ ಸಂಸ್ಕೃತಿಯನ್ನು ಹೊಂದಿದೆ. ಈ ಎರಡೂ ದೇಶಗಳು ಹೇಗೆ ಪರಸ್ಪರ ಕೈಜೋಡಿಸಿ ಸಾಮರಸ್ಯದಿಂದ ಮುನ್ನಡೆಯುತ್ತಿವೆಯೋ, ಹಾಗೆಯೇ ಈ ಆಲ್ಬಮ್‌ನಲ್ಲಿ ಭಾರತೀಯ ಮತ್ತು ಪಾಶ್ಚಿಮಾತ್ಯ ಸಂಗೀತ ಲೋಕ ಸೌಹಾರ್ದತೆಯಿಂದ ಒಂದಾಗಿದೆ ಎಂಬುದನ್ನು ಬಿಂಬಿಸಲು ಮೋದಿ ಈ ಉಡುಗೊರೆ ನೀಡಿದ್ದಾರೆ.

ಭಾರತದ ಜಾಗತಿಕ ಸಾಂಸ್ಕೃತಿಕ ರಾಯಭಾರಿ:

ಕಲೋನಿಯಲ್ ಕಸಿನ್ಸ್ ಆಲ್ಬಮ್ ಬಿಡುಗಡೆಯಾದಾಗ ಜಾಗತಿಕ ಮಟ್ಟದಲ್ಲಿ ಭಾರಿ ಸಂಚಲನ ಸೃಷ್ಟಿಸಿತ್ತು. ಬಿಲ್ಬೋರ್ಡ್ ಪ್ರಶಸ್ತಿ ಮತ್ತು ಪ್ರತಿಷ್ಠಿತ ಅಂತಾರಾಷ್ಟ್ರೀಯ MTV ಅವಾರ್ಡ್ ಗೆದ್ದ ಮೊದಲ ಭಾರತೀಯ ಬ್ಯಾಂಡ್ ಎಂಬ ಹೆಗ್ಗಳಿಕೆಗೆ ಇದು ಪಾತ್ರವಾಗಿತ್ತು. ಹೀಗಾಗಿ, ಭಾರತದ ಸಾಂಸ್ಕೃತಿಕ ರಫ್ತುಗಳು ಕೇವಲ ಪಾರಂಪರಿಕ ರೇಷ್ಮೆ ಬಟ್ಟೆಗಳು ಅಥವಾ ಕಲ್ಲಿನ ಕೆತ್ತನೆಗಳಿಗಷ್ಟೇ ಸೀಮಿತವಾಗಿಲ್ಲ. ಭಾರತವು ಜಾಗತಿಕ ಮಟ್ಟದ ಆಧುನಿಕ ಮತ್ತು ಸೃಜನಶೀಲ ಪಾಪ್ ಸಂಗೀತವನ್ನೂ ಕೂಡ ಸೃಷ್ಟಿಸಬಲ್ಲದು ಎಂಬುದನ್ನು ಜಗತ್ತಿಗೆ ಸಾರಲು ಪ್ರಧಾನಿ ಮೋದಿ ಈ ಆಲ್ಬಮ್ ಅನ್ನು ಉಡುಗೊರೆಯಾಗಿ ನೀಡಿದ್ದಾರೆ ಎಂದು ವ್ಯಾಖ್ಯಾನಿಸಲಾಗುತ್ತಿದೆ.

ತಾಳ್ಮೆಯ ಸಂಕೇತ:

ಇಂದಿನ ಡಿಜಿಟಲ್ ಯುಗದಲ್ಲಿ ಜನರು ಮೊಬೈಲ್‌ಗಳಲ್ಲಿ ಪ್ರತಿ 30 ಸೆಕೆಂಡಿಗೆ ಹಾಡುಗಳನ್ನು ಬದಲಾಯಿಸುತ್ತಾರೆ. ಆದರೆ, ವಿನೈಲ್ ರೆಕಾರ್ಡ್‌ನಲ್ಲಿ (ಗ್ರಾಮಫೋನ್​ನಲ್ಲಿ) ಹಾಡು ಕೇಳಲು ತಾಳ್ಮೆ ಬೇಕು. ಭಾರತ ಮತ್ತು ಆಸ್ಟ್ರೇಲಿಯಾ ನಡುವಿನ ದೀರ್ಘಕಾಲೀನ ಸ್ನೇಹಕ್ಕೂ ಇಂತಹದ್ದೇ ತಾಳ್ಮೆ ಮತ್ತು ಬದ್ಧತೆ ಅಗತ್ಯ ಎಂಬುದನ್ನು ಈ ಅಪರೂಪದ ‘ವಿನೈಲ್ ಆಲ್ಬಮ್’ ಉಡುಗೊರೆ ನೆನಪಿಸುತ್ತದೆ.

ಇದನ್ನೂ ಓದಿ: ಇಂಡೋನೇಷ್ಯಾದಲ್ಲಿ ಪ್ರಧಾನಿ ಮೋದಿ ಭಾಷಣ; ‘ಕುಚ್ ಕುಚ್ ಹೋತಾ ಹೈ’ ಡೈಲಾಗ್ ಬಳಕೆಗೆ ಕರಣ್ ಸಂತಸ

ಪ್ರಧಾನಿ ನರೇಂದ್ರ ಮೋದಿಯವರು ನೀಡುವ ಪ್ರತಿಯೊಂದು ಉಡುಗೊರೆಯೂ ಭಾರತದ ‘ವೋಕಲ್ ಫಾರ್ ಲೋಕಲ್’ (Vocal for Local) ಮತ್ತು ‘ಏಕ ಭಾರತ ಶ್ರೇಷ್ಠ ಭಾರತ’ ಪರಿಕಲ್ಪನೆಯನ್ನು ಎತ್ತಿಹಿಡಿಯುತ್ತದೆ. ಜಮ್ಮು-ಕಾಶ್ಮೀರದ ಕುಂಕುಮಪುರ ಮತ್ತು ಶಾಲುಗಳಿಂದ ಹಿಡಿದು, ಕರ್ನಾಟಕದ ಶ್ರೀಗಂಧದ ಕೆತ್ತನೆಗಳು, ಗುಜರಾತ್‌ನ ಪಟೋಲಾ ರೇಷ್ಮೆ ಹಾಗೂ ಈಶಾನ್ಯ ಭಾರತದ ಬಿದಿರಿನ ಕಲೆಗಳವರೆಗೆ ಭಾರತದ ಮೂಲೆ ಮೂಲೆಯ ವಿಶಿಷ್ಟ ಕಲೆಗಳನ್ನು ಜಾಗತಿಕ ನಾಯಕರ ಮನೆಗೆ ತಲುಪಿಸುವ ಮೂಲಕ ಅವುಗಳನ್ನು ಪ್ರಧಾನಿ ಮೋದಿ ಭಾರತದ ಸಾಂಸ್ಕೃತಿಕ ರಾಯಭಾರಿಗಳನ್ನಾಗಿಸಿದ್ದಾರೆ.

Gift to Prime Minister of Australia

VINYL RECORD OF MUSIC BAND “COLONIAL COUSINS”

This vinyl edition of the Colonial Cousins album represents a landmark moment in contemporary Indian music. The 1990s collaboration between Hariharan and Leslie Lewis blended Indian classical… pic.twitter.com/TAVFE6okYK

— DD News (@DDNewslive) July 12, 2026

ಹೆಚ್ಚಾಯ್ತು ಕಲೋನಿಯಲ್ ಕಸಿನ್ಸ್ ಜನಪ್ರಿಯತೆ:

ಪ್ರಧಾನಿ ಮೋದಿ ಆಸ್ಟ್ರೇಲಿಯಾದ ಪ್ರಧಾನಿಗೆ ಈ ಇಂಡೋ-ಪಾಪ್ ಆಲ್ಬಂ ಅನ್ನು ಉಡುಗೊರೆಯಾಗಿ ನೀಡಿದ ಬಳಿಕ ಈ ಆಲ್ಬಂನ ಜನಪ್ರಿಯತೆ ಮತ್ತೊಮ್ಮೆ ಹೆಚ್ಚಾಗಿದೆ. ಈ ಬಗ್ಗೆ ಸುದ್ಧಿ ಸಂಸ್ಥೆಯೊಂದಕ್ಕೆ ಪ್ರತಿಕ್ರಿಯಿಸಿರುವ ಗಾಯಕ ಹರಿಹರನ್, “ಕಲೋನಿಯಲ್ ಕಸಿನ್ಸ್ ಯಾವಾಗಲೂ ಭಾರತದ ಸಾಂಸ್ಕೃತಿಕ ರಾಯಭಾರಿಯಾಗಿದೆ. ಪ್ರಧಾನಿಯವರು ನಮ್ಮ ಆಲ್ಬಮ್ ಅನ್ನು ಉಡುಗೊರೆಯಾಗಿ ನೀಡಿದ್ದಾರೆ ಎಂದು ತಿಳಿದು ನನಗೆ ಮತ್ತು ಲೆಸ್ಲಿಗೆ ಅಪಾರ ಸಂತೋಷವಾಯಿತು. 1996ರಿಂದ 2000ರವರೆಗೆ ನಾವು ಬಿಡುಗಡೆ ಮಾಡಿದ ಸಂಗೀತ ಇಂದಿಗೂ ಪ್ರಸ್ತುತವಾಗಿದೆ. ಇಂದಿಗೂ ನಾನು ನನ್ನ ಶೋಗಳಲ್ಲಿ ಕಲೋನಿಯಲ್ ಕಸಿನ್ಸ್‌ನ ಒಂದೆರಡು ಹಾಡುಗಳನ್ನು ಹಾಡಿದರೆ ಪ್ರೇಕ್ಷಕರು ರೋಮಾಂಚನಗೊಳ್ಳುತ್ತಾರೆ” ಎಂದಿದ್ದಾರೆ.

ಯಾರು ಈ ‘ಕಲೋನಿಯಲ್ ಕಸಿನ್ಸ್’?:

ಈಗ ಎಲ್ಲ ಆಲ್ಬಂಗಳನ್ನೂ ಯೂಟ್ಯೂಬ್​ನಲ್ಲಿ ಬಿಡುಗಡೆ ಮಾಡಲಾಗುತ್ತದೆ. ಅದು ಎಲ್ಲರಿಗೂ ಸುಲಭವಾಗಿ ಲಭ್ಯವಾಗುತ್ತದೆ. ಆದರೆ, 90ರ ದಶಕದಲ್ಲಿ ಆ ರೀತಿಯ ಅವಕಾಶಗಳು ಇರಲಿಲ್ಲ. 1996ರಲ್ಲಿ ‘ಕಲೋನಿಯಲ್ ಕಸಿನ್ಸ್’ ಆಲ್ಬಮ್ ಬಿಡುಗಡೆಯಾದಾಗ ಅದು ಭಾರತೀಯ ರೇಡಿಯೋ ಜಗತ್ತಿನಲ್ಲಿ ಒಂದು ಕ್ರಾಂತಿಯನ್ನೇ ಸೃಷ್ಟಿಸಿತು. ಈ ಆಲ್ಬಂನಲ್ಲಿ ಹಾಡಿದ ಹರಿಹರನ್ ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತ ಮತ್ತು ಗಜಲ್‌ಗಳಲ್ಲಿ ಅಪ್ರತಿಮ ಪಾಂಡಿತ್ಯ ಸಾಧಿಸಿ ಪ್ರಸಿದ್ಧರಾಗಿದ್ದರು. ಅವರು ಇಂದಿಗೂ ಸಿನಿಮಾ ಹಾಡುಗಳನ್ನು ಹಾಡುತ್ತಾರೆ. ಕನ್ನಡ, ತಮಿಳು, ಹಿಂದಿ ಸೇರಿದಂತೆ ಹಲವು ಭಾಷೆಗಳಲ್ಲಿ ಹಾಡಿರುವ ಅವರಿಗೆ ದೊಡ್ಡ ಅಭಿಮಾನಿಗಳ ಬಳಗವೇ ಇದೆ. ಮತ್ತೊಬ್ಬರಾದ ಲೆಸ್ಲಿ ಲೂಯಿಸ್, ಭಾರತದ ಅತ್ಯುತ್ತಮ ವೆಸ್ಟರ್ನ್ (ಪಾಶ್ಚಿಮಾತ್ಯ) ಸಂಗೀತ ಸಂಯೋಜಕ, ಪ್ರೊಡ್ಯೂಸರ್ ಮತ್ತು ಪಾಪ್ ಗಾಯಕನಾಗಿ ಹೆಸರು ಮಾಡಿದ್ದರು.

ಈಗಿನ ಡಿಜಿಟಲ್ ಪ್ಲೇಲಿಸ್ಟ್‌ಗಳು ಬರುವ ದಶಕಗಳ ಮೊದಲೇ, ಭಾರತೀಯ ರಾಗಗಳು ಮತ್ತು ಅಕೌಸ್ಟಿಕ್ ಗಿಟಾರ್ ಹಾಗೂ ಆಧುನಿಕ ಮ್ಯೂಸಿಕ್ ಪ್ರೊಡಕ್ಷನ್ ಒಂದೇ ಹಾಡಿನಲ್ಲಿ ಎಷ್ಟು ಸಹಜವಾಗಿ ಬೆರೆಯಬಲ್ಲವು ಎಂಬುದನ್ನು ಈ ಜೋಡಿ ಸಾಬೀತುಪಡಿಸಿತು. ಇದರ ಮ್ಯೂಸಿಕ್ ವಿಡಿಯೋಗಳು ಜಾಗತಿಕ ಮಟ್ಟದ ಗುಣಮಟ್ಟ ಹೊಂದಿದ್ದರೂ, ಭಾರತೀಯ ಆತ್ಮವನ್ನು ಹೊಂದಿದ್ದವು. 1990ರ ದಶಕದ ಮಧ್ಯಭಾಗದಲ್ಲಿ ಒಟ್ಟಿಗೆ ಸೇರಿದ ಈ ಇಬ್ಬರು ಕಲಾವಿದರು ಭಾರತೀಯ ಶಾಸ್ತ್ರೀಯ ಸಂಗೀತವನ್ನು ಪಾಶ್ಚಿಮಾತ್ಯ ಪಾಪ್ ಮತ್ತು ರಾಕ್ ಸಂಗೀತದೊಂದಿಗೆ ಅದ್ಭುತವಾಗಿ ಸಮ್ಮಿಲನಗೊಳಿಸಿದರು. ಇವರ ಈ ಹೊಸ ಪ್ರಯೋಗಕ್ಕೆ ಇಡೀ ಜಗತ್ತೇ ಮೆಚ್ಚಿಕೊಂಡಿತ್ತು.

ಇನ್ನಷ್ಟು ರಾಷ್ಟ್ರೀಯ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್ ಮಾಡಿ

Published On - 7:17 pm, Mon, 13 July 26