IPL 2024: ಅಷ್ಟಕ್ಕೂ ಈ ಮಯಾಂಕ್ ಡಾಗರ್ ಯಾರು ಗೊತ್ತಾ?
IPL 2024: ಇಂಡಿಯನ್ ಪ್ರೀಮಿಯರ್ ಲೀಗ್ (IPL) ಸೀಸನ್ 17 ರಲ್ಲಿ ಆರ್ಸಿಬಿ ಈವರೆಗೆ 2 ಪಂದ್ಯಗಳನ್ನಾಡಿದೆ. ಈ ಎರಡೂ ಪಂದ್ಯಗಳಲ್ಲೂ ಆಲ್ರೌಂಡರ್ ಆಗಿ ಮಯಾಂಕ್ ಡಾಗರ್ ಕಣಕ್ಕಿಳಿದಿದ್ದರು. ಇನ್ನು ಈ ಪಂದ್ಯಗಳಲ್ಲಿ ಆರ್ಸಿಬಿ ಮೊದಲ ಮ್ಯಾಚ್ನಲ್ಲಿ ಸಿಎಸ್ಕೆ ವಿರುದ್ಧ ಸೋತರೆ. 2ನೇ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ವಿರುದ್ಧ ಗೆಲುವು ದಾಖಲಿಸಿದೆ.
ಇಂಡಿಯನ್ ಪ್ರೀಮಿಯರ್ ಲೀಗ್ (IPL 2024) ಸೀಸನ್-17 ರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (RCB) ತಂಡ ಇದುವರೆಗೆ 2 ಪಂದ್ಯಗಳನ್ನಾಡಿದೆ. ಈ ಎರಡೂ ಪಂದ್ಯಗಳಲ್ಲೂ ಆರ್ಸಿಬಿ ಪರ ಮಯಾಂಕ್ ಡಾಗರ್ ಕಾಣಿಸಿಕೊಂಡಿದ್ದಾರೆ.
ಸಿಎಸ್ಕೆ ವಿರುದ್ಧದ ಪಂದ್ಯದಲ್ಲಿ 2 ಓವರ್ಗಳನ್ನು ಎಸೆದಿದ್ದ ಮಯಾಂಕ್ ಕೇವಲ 6 ರನ್ ಮಾತ್ರ ನೀಡಿ ಗಮನ ಸೆಳೆದಿದ್ದರು. ಆದರೆ ಪಂಜಾಬ್ ಕಿಂಗ್ಸ್ ವಿರುದ್ಧದ ಪಂದ್ಯದಲ್ಲಿ 3 ಓವರ್ಗಳಲ್ಲಿ 34 ರನ್ ನೀಡಿ ದುಬಾರಿಯಾಗಿದ್ದರು. ಇದಾಗ್ಯೂ ಮಯಾಂಕ್ ಅದ್ಭುತ ಫೀಲ್ಡಿಂಗ್ ಮೂಲಕ ಗಮನ ಸೆಳೆದಿದ್ದಾರೆ.
ಇದರ ಬೆನ್ನಲ್ಲೇ ಈ ಮಯಾಂಕ್ ಡಾಗರ್ ಯಾರು ಎಂಬ ಪ್ರಶ್ನೆಯೊಂದು ಹುಟ್ಟಿಕೊಂಡಿದೆ. ಏಕೆಂದರೆ ಕಳೆದ 16 ಸೀಸನ್ ಐಪಿಎಲ್ನಲ್ಲಿ ಕೇಳಿಸಿಕೊಳ್ಳದ ಹೆಸರೊಂದು ಇದೀಗ ಏಕಾಏಕಿ ಆರ್ಸಿಬಿ ಪ್ಲೇಯಿಂಗ್ ಇಲೆವೆನ್ನಲ್ಲಿ ಕಾಣಿಸಿಕೊಳ್ಳುತ್ತಿದೆ. ಹೀಗಾಗಿಯೇ ಮಯಾಂಕ್ ಯಾರೆಂಬ ಗೂಗಲ್ ಸರ್ಚ್ ಕೂಡ ಜೋರಾಗಿದೆ.
ಈ ಹುಡುಕಾಟದ ನಡುವೆ ಕೆಲವೊಂದು ಕುತೂಹಲಕಾರಿ ವಿಷಯಗಳು ಬೆಳಕಿಗೆ ಬಂದಿದೆ. ಅಂದರೆ ಅಷ್ಟಕ್ಕೂ ಮಯಾಂಕ್ ಡಾಗರ್ ಯಾರೆಂದು ಕೇಳಿದರೆ ಥಟ್ಟನೆ ನೀಡಬಹುದಾದ ಉತ್ತರ ಟೀಮ್ ಇಂಡಿಯಾದ ಮಾಜಿ ಆಟಗಾರ ವೀರೇಂದ್ರ ಸೆಹ್ವಾಗ್ ಅವರ ಸಹೋದರಳಿಯ.
ವೀರೇಂದ್ರ ಸೆಹ್ವಾಗ್, ಮಯಾಂಕ್ ಡಾಗರ್ ಅವರ ತಾಯಿಯ ಸೋದರಸಂಬಂಧಿ. ಅಂದರೆ ವೀರು ಅವರ ಕಸಿನ್ ಸಿಸ್ಟರ್. ಹೀಗೆ ಟೀಮ್ ಇಂಡಿಯಾದ ಲೆಜೆಂಡ್ ಆಟಗಾರನೊಂದಿಗೆ ರಕ್ತ ಸಂಬಂಧ ಹೊಂದಿರುವ ಮಯಾಂಕ್ ಡಾಗರ್ ಕೂಡ ಮಾವನಂತೆ ಕ್ರಿಕೆಟ್ನಲ್ಲಿ ಅಂಗಳಕ್ಕಿಳಿದಿದ್ದಾರೆ.
ಅಷ್ಟೇ ಅಲ್ಲದೆ ಈ ಹಿಂದೆ ಅಂಡರ್ 19 ವಿಶ್ವಕಪ್ನಲ್ಲೂ ಭಾರತ ತಂಡವನ್ನು ಪ್ರತಿನಿಧಿಸಿದ್ದಾರೆ. 2016 ರಲ್ಲಿ ನಡೆದ ಕಿರಿಯರ ವಿಶ್ವಕಪ್ ತಂಡದಲ್ಲಿ ಮಯಾಂಕ್ ಆಲ್ರೌಂಡರ್ ಆಗಿ ಕಾಣಿಸಿಕೊಂಡಿದ್ದರು. ಅಂದು ನಾಲ್ಕು ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದ ಯುವ ಎಡಗೈ ಸ್ಪಿನ್ನರ್ ಒಟ್ಟು 12 ವಿಕೆಟ್ ಕಬಳಿಸಿದ್ದರು.
ಇನ್ನೂ ಹೇಳಬೇಕೆಂದರೆ, 2016 ರಲ್ಲಿ ಅಂಡರ್-19 ವಿಶ್ವಕಪ್ ಆಡಿದ್ದ ಇಶಾನ್ ಕಿಶನ್, ರಿಷಭ್ ಪಂತ್, ಅವೇಶ್ ಖಾನ್, ವಾಷಿಂಗ್ಟನ್ ಸುಂದರ್, ಸರ್ಫರಾಝ್ ಖಾನ್ ಮತ್ತು ಖಲೀಲ್ ಅಹ್ಮದ್ ಸೇರಿದಂತೆ ಈಗಿನ ಪ್ರಮುಖ ಆಟಗಾರರ ಸಹ ಆಟಗಾರನಾಗಿ ಮಯಾಂಕ್ ಡಾಗರ್ ಮಿಂಚಿದ್ದರು.
ಆದರೆ ಮಯಾಂಕ್ ಡಾಗರ್ಗೆ ಐಪಿಎಲ್ನಲ್ಲಿ ಚಾನ್ಸ್ ಸಿಕ್ಕಿದ್ದು 2018 ರಲ್ಲಿ. ಪಂಜಾಬ್ ಕಿಂಗ್ಸ್ ತಂಡವು ಮೊದಲ ಬಾರಿಗೆ ಯುವ ಎಡಗೈ ಆಲ್ರೌಂಡರ್ಗೆ ಅವಕಾಶ ನೀಡಿತ್ತು. ಆದರೆ ಚೊಚ್ಚಲ ಪಂದ್ಯವಾಡುವ ಚಾನ್ಸ್ ಸಿಕ್ಕಿರಲಿಲ್ಲ.
ಇದಾದ ಬಳಿಕ 2023 ರಲ್ಲಿ ಸನ್ರೈಸರ್ಸ್ ಹೈದರಾಬಾದ್ ತಂಡವು 1.8 ಕೋಟಿ ರೂ. ನೀಡಿ ಮಯಾಂಕ್ ಡಾಗರ್ ಅವರನ್ನು ಖರೀದಿಸಿತ್ತು. ಅಲ್ಲದೆ ಎಸ್ಆರ್ಹೆಚ್ ಪರ 3 ಪಂದ್ಯಗಳನ್ನಾಡಿದ್ದ ಅವರು 1 ವಿಕೆಟ್ ಕಬಳಿಸಿದ್ದರು.
ಇನ್ನು ಈ ಬಾರಿಯ ಐಪಿಎಲ್ ಹರಾಜಿಗೂ ಮುನ್ನ ಆರ್ಸಿಬಿ ಫ್ರಾಂಚೈಸಿಯು ಶಹಬಾಝ್ ಅಹ್ಮದ್ ಅವರನ್ನು ನೀಡಿ, ಎಸ್ಆರ್ಹೆಚ್ ತಂಡದಿಂದ ಮಯಾಂಕ್ ಡಾಗರ್ ಅವರನ್ನು ಟ್ರೇಡ್ ಮಾಡಿಕೊಂಡಿದೆ. ಅದರಂತೆ ಇದೀಗ 27 ವರ್ಷದ ಮಯಾಂಕ್ ಡಾಗರ್ ಆರ್ಸಿಬಿ ಪರ ಮೊದಲೆರಡು ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದಾರೆ.