IPL 2024: 78 ಕುಟುಂಬಗಳಿಗೆ ಬೆಳಕಾದ ರಾಜಸ್ಥಾನ್ ರಾಯಲ್ಸ್
IPL 2024: ಐಪಿಎಲ್ 2024ರ 19ನೇ ಪಂದ್ಯದಲ್ಲಿ ಆರ್ಸಿಬಿ ವಿರುದ್ಧ ರಾಜಸ್ಥಾನ್ ರಾಯಲ್ಸ್ ಭರ್ಜರಿ ಜಯ ಸಾಧಿಸಿದೆ. ಈ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಆರ್ಸಿಬಿ 20 ಓವರ್ಗಳಲ್ಲಿ 183 ರನ್ ಕಲೆಹಾಕಿತು. ಈ ಗುರಿಯನ್ನು ಬೆನ್ನತ್ತಿದ ರಾಜಸ್ಥಾನ್ ರಾಯಲ್ಸ್ ತಂಡ 19.1 ಓವರ್ಗಳಲ್ಲಿ ಗುರಿ ಮುಟ್ಟುವ ಮೂಲಕ 6 ವಿಕೆಟ್ಗಳ ಜಯ ಸಾಧಿಸಿದೆ. ಈ ಮೂಲಕ IPL 2024 ರ ಅಂಕ ಪಟ್ಟಿಯಲ್ಲಿ ಅಗ್ರಸ್ಥಾನ ಅಲಂಕರಿಸಿದೆ.
ಇಂಡಿಯನ್ ಪ್ರೀಮಿಯರ್ ಲೀಗ್ನ (IPL 2024) 19ನೇ ಪಂದ್ಯದಲ್ಲಿ ಪಿಂಕ್ ಪ್ರಾಮಿಸ್ನೊಂದಿಗೆ ಕಣಕ್ಕಿಳಿದಿದ್ದ ರಾಜಸ್ಥಾನ್ ರಾಯಲ್ಸ್ ತಂಡವು ಇದೀಗ ಒಟ್ಟು 78 ಕುಟುಂಬಗಳ ಪಾಲಿಗೆ ಬೆಳಕಾಗುವುದಾಗಿ ಘೋಷಿಸಿದೆ. ಅಂದರೆ ಆರ್ಸಿಬಿ ವಿರುದ್ಧದ ಪಂದ್ಯದಲ್ಲಿ ಮೂಡಿಬರುವ ಪ್ರತಿ ಸಿಕ್ಸ್ಗೆ 6 ಆರು ಮನೆಗಳಿಗೆ ಸೋಲಾರ್ ಶಕ್ತಿಯೊಂದಿಗೆ ವಿದ್ಯುತ್ ಒದಗಿಸುವುದಾಗಿ ರಾಜಸ್ಥಾನ್ ರಾಯಲ್ಸ್ ಘೋಷಿಸಿತ್ತು.
ಅದರಂತೆ ಆರ್ಸಿಬಿ-ಆರ್ಆರ್ ನಡುವಣ ಪಂದ್ಯದಲ್ಲಿ ಒಟ್ಟು 13 ಸಿಕ್ಸರ್ಗಳು ಮೂಡಿಬಂದಿವೆ. ಇದರಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪರ ವಿರಾಟ್ ಕೊಹ್ಲಿ 4 ಸಿಕ್ಸ್ ಬಾರಿಸಿದರೆ, ಫಾಫ್ ಡುಪ್ಲೆಸಿಸ್ 2 ಸಿಕ್ಸ್ ಸಿಡಿಸಿದ್ದಾರೆ. ಇನ್ನು ಸೌರವ್ ಚೌಹಾನ್ 1 ಸಿಕ್ಸ್ ಬಾರಿಸಿದ್ದಾರೆ.
ಹಾಗೆಯೇ ರಾಜಸ್ಥಾನ್ ರಾಯಲ್ಸ್ ಪರ ಫಾಫ್ ಡುಪ್ಲೆಸಿಸ್ 4 ಸಿಕ್ಸ್ಗಳನ್ನು ಸಿಡಿಸಿದರೆ, ಸಂಜು ಸ್ಯಾಮ್ಸನ್ 2 ಸಿಕ್ಸ್ ಬಾರಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಅದರಂತೆ ಈ ಪಂದ್ಯದಲ್ಲಿ ಒಟ್ಟು 13 ಸಿಕ್ಸ್ಗಳು ಮೂಡಿಬಂದಿವೆ.
1 ಸಿಕ್ಸ್ಗೆ 6 ಸೋಲಾರ್ನಂತೆ ಇದೀಗ 78 ಕುಟುಂಬಗಳಿಗೆ ಸೌರಶಕ್ತಿ ವ್ಯವಸ್ಥೆ ಮಾಡಿ ಕೊಡುವುದಾಗಿ ರಾಜಸ್ಥಾನ್ ರಾಯಲ್ಸ್ ಫ್ರಾಂಚೈಸಿ ಘೋಷಿಸಿದೆ. ಈ ಮೂಲಕ ಗೆಲುವಿನ ಬೆನ್ನಲ್ಲೇ ಆರ್ಆರ್ ಫ್ರಾಂಚೈಸಿ ತನ್ನ ಪಿಂಕ್ ಪ್ರಾಮಿಸ್ ಅನ್ನು ಈಡೇರಿಸಲು ಮುಂದಾಗಿದೆ.
ಸದ್ಯ ಆಡಿರುವ 4 ಪಂದ್ಯಗಳಲ್ಲೂ ಭರ್ಜರಿ ಜಯ ಸಾಧಿಸಿರುವ ರಾಜಸ್ಥಾನ್ ರಾಯಲ್ಸ್ 8 ಅಂಕಗಳೊಂದಿಗೆ ಪಾಯಿಂಟ್ಸ್ ಟೇಬಲ್ನಲ್ಲಿ ಅಗ್ರಸ್ಥಾನ ಅಲಂಕರಿಸಿದೆ. ಮುಂದಿನ 10 ಪಂದ್ಯಗಳಲ್ಲಿ 4 ರಲ್ಲಿ ಜಯ ಸಾಧಿಸಿದರೆ ಪ್ಲೇಆಫ್ ಪ್ರವೇಶಿಸುವುದು ಬಹುತೇಕ ಖಚಿತವಾಗಿದೆ. ಹೀಗಾಗಿ ಆರ್ಆರ್ ತಂಡವು ಈ ಬಾರಿ ನಾಕೌಟ್ ಹಂತಕ್ಕೇರುವುದನ್ನು ಎದುರು ನೋಡಬಹುದು.