PAK vs ENG: 3 ದಿನಗಳಲ್ಲಿ 5 ಶತಕ: ಪಾಕಿಸ್ತಾನದಲ್ಲಿ ಟೆಸ್ಟ್ ಕ್ರಿಕೆಟ್ನ ಕಗ್ಗೊಲೆ..!
Pakistan vs England, 1st Test: ಮುಲ್ತಾನ್ನಲ್ಲಿ ನಡೆಯುತ್ತಿರುವ ಆತಿಥೇಯ ಪಾಕಿಸ್ತಾನ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದ ಮೂರನೇ ದಿನದಾಟದ ಮುಕ್ತಾಯಕ್ಕೆ ಇಂಗ್ಲೆಂಡ್ ತಂಡವು 3 ವಿಕೆಟ್ ಕಳೆದುಕೊಂಡು 492 ರನ್ ಕಲೆಹಾಕಿದೆ. ಇದಕ್ಕೂ ಮುನ್ನ ಪ್ರಥಮ ಇನಿಂಗ್ಸ್ ಆಡಿದ ಪಾಕಿಸ್ತಾನ್ ತಂಡವು 556 ರನ್ಗಳಿಸಿ ಆಲೌಟ್ ಆಗಿತ್ತು.
ಬರೋಬ್ಬರಿ 1048 ರನ್ಗಳು... ಅದು ಸಹ ಕೇವಲ ಮೂರು ದಿನದಾಟಗಳಲ್ಲಿ... ಈ ಮೂರು ದಿನದಾಟಗಳಲ್ಲಿ ಮೂಡಿಬಂದ ಶತಕಗಳ ಸಂಖ್ಯೆ 5 ...ಇಂತಹದೊಂದು ರನ್ ಮಳೆ ಸುರಿದಿರುವುದು ಪಾಕಿಸ್ತಾನದ ಮುಲ್ತಾನ್ನಲ್ಲಿ. ಪಾಕಿಸ್ತಾನ್ ಮತ್ತು ಇಂಗ್ಲೆಂಡ್ ನಡುವಣ ಮೊದಲ ಟೆಸ್ಟ್ ಪಂದ್ಯದ ಮೂರು ದಿನದಾಟಗಳಲ್ಲಿ ಐವರು ಬ್ಯಾಟರ್ಗಳು ಶತಕ ಬಾರಿಸಿದ್ದಾರೆ.
ಈ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಪಾಕಿಸ್ತಾನ್ ಪರ ಆರಂಭಿಕ ಆಟಗಾರ ಅಬ್ದುಲ್ಲಾ ಶಫೀಕ್ 102 ರನ್ ಬಾರಿಸಿ ಅಬ್ಬರಿಸಿದ್ದರು. ಇನ್ನು ಮೂರನೇ ಕ್ರಮಾಂಕದಲ್ಲಿ ಕಣಕ್ಕಿಳಿದ ನಾಯಕ ಶಾನ್ ಮಸೂದ್ 177 ಎಸೆತಗಳಲ್ಲಿ 151 ರನ್ ಸಿಡಿಸಿದ್ದರು.
ಇದಾದ ಬಳಿಕ ಬಂದ ಸೌದ್ ಶಕೀಲ್ 82 ರನ್ ಬಾರಿಸಿದರು. ಇನ್ನು 8ನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ಅಘಾ ಸಲ್ಮಾನ್ 119 ಎಸೆತಗಳಲ್ಲಿ ಅಜೇಯ 104 ರನ್ ಸಿಡಿಸಿದರು. ಈ ಮೂಲಕ ಪಾಕಿಸ್ತಾನ್ ತಂಡವು 2ನೇ ದಿನದಾಟದ ಮುಕ್ತಾಯಕ್ಕೂ ಮುನ್ನ 556 ರನ್ ಕಲೆಹಾಕಿ ಆಲೌಟ್ ಆಯಿತು.
ಇದಕ್ಕುತ್ತರವಾಗಿ ಪ್ರಥಮ ಇನಿಂಗ್ಸ್ ಆರಂಭಿಸಿದ ಇಂಗ್ಲೆಂಡ್ ಪರ ಓಪನರ್ ಝಾಕ್ ಕ್ರಾಲಿ 85 ಎಸೆತಗಳಲ್ಲಿ 78 ರನ್ ಚಚ್ಚಿದರು. ಇನ್ನು ನಾಲ್ಕನೇ ಕ್ರಮಾಂಕದಲ್ಲಿ ಬ್ಯಾಟ್ ಬೀಸಿದ ಬೆನ್ ಡಕೆಟ್ 75 ಎಸೆತಗಳಲ್ಲಿ 84 ರನ್ ಬಾರಿಸಿದರು.
ಮತ್ತೊಂದೆಡೆ ಆಕರ್ಷಕ ಬ್ಯಾಟಿಂಗ್ ಪ್ರದರ್ಶಿಸಿದ ಜೋ ರೂಟ್ 277 ಎಸೆತಗಳಲ್ಲಿ 12 ಫೋರ್ಗಳೊಂದಿಗೆ ಅಜೇಯ 176 ರನ್ ಬಾರಿಸಿದ್ದಾರೆ. ಹಾಗೆಯೇ ಸ್ಪೋಟಕ ಬ್ಯಾಟಿಂಗ್ನೊಂದಿಗೆ ಹ್ಯಾರಿ ಬ್ರೂಕ್ 173 ಎಸೆತಗಳಲ್ಲಿ ಅಜೇಯ 141 ರನ್ ಕಲೆಹಾಕಿದ್ದಾರೆ. ಈ ಮೂಲಕ ಇಂಗ್ಲೆಂಡ್ ತಂಡವು ಮೂರನೇ ದಿನದಾಟದ ಅಂತ್ಯಕ್ಕೆ 3 ವಿಕೆಟ್ ಕಳೆದುಕೊಂಡು 492 ರನ್ ಗಳಿಸಿದೆ.
ಅಂದರೆ ಉಭಯ ತಂಡಗಳ ಇನಿಂಗ್ಸ್ಗಳಲ್ಲಿ ಐದು ಶತಕಗಳು ಹಾಗೂ ಮೂರು ಅರ್ಧಶತಕಗಳು ಮೂಡಿಬಂದಿವೆ. ಅದು ಸಹ ಕೇವಲ ಮೂರು ದಿನದಾಟಗಳಲ್ಲಿ ಎಂಬುದು ವಿಶೇಷ. ಕೇವಲ ಮೂರು ದಿನದಾಟಗಳಲ್ಲೇ ಪಂದ್ಯವೊಂದರ ಮೊದಲ ಇನಿಂಗ್ಸ್ ಸ್ಕೋರ್ 1000 ರನ್ಗಳ ಗಡಿದಾಟಿರುವುದರಿಂದ ಇದೀಗ ಮುಲ್ತಾನ್ನಲ್ಲಿನ ಫ್ಲಾಟ್ ಪಿಚ್ ಬಗ್ಗೆ ಅಪಸ್ವರಗಳು ಕೇಳಿ ಬರುತ್ತಿವೆ.
ಅದರಲ್ಲೂ ಈ ಪಿಚ್ನಲ್ಲಿ ಎಲ್ಲರೂ ಶತಕ ಬಾರಿಸುತ್ತಿದ್ದಾರೆ. ಫಾರ್ಮ್ ಕಳೆದುಕೊಂಡುವರು ಪಾಕಿಸ್ತಾನಕ್ಕೆ ಬಂದು ಬ್ಯಾಟಿಂಗ್ ಮಾಡಿ. ಇದು ಮುಲ್ತಾನ್ ಹೈವೆಯಲ್ಲಿ ನಡೆಯುತ್ತಿರುವ ಟೆಸ್ಟ್ ಪಂದ್ಯ. ಇಂಗ್ಲೆಂಡ್ನಲ್ಲಿ ಹುಟ್ಟಿದ ಟೆಸ್ಟ್ ಕ್ರಿಕೆಟ್ ಪಾಕಿಸ್ತಾನದಲ್ಲಿ ಕಗ್ಗೊಲೆಯಾಗಿ ಎಂಬಿತ್ಯಾದಿ ಬರಹಗಳೊಂದಿಗೆ ಇದೀಗ ಮುಲ್ತಾನ್ ಟೆಸ್ಟ್ ಪಂದ್ಯವನ್ನು ಟ್ರೋಲ್ ಮಾಡಲಾಗುತ್ತಿದೆ.