Virat Kohli: ಬರೋಬ್ಬರಿ 1673 ದಿನಗಳು…ಮುಂದುವರೆದ ಕಿಂಗ್ ಕೊಹ್ಲಿಯ ಶತಕದ ಕಾಯುವಿಕೆ..!
Virat Kohli's Records: ವೆಸ್ಟ್ ಇಂಡೀಸ್ ವಿರುದ್ಧದ 2ನೇ ಟೆಸ್ಟ್ ಪಂದ್ಯದಲ್ಲಿ ಸೆಂಚುರಿ ಸಿಡಿಸುವ ಮೂಲಕ ವಿರಾಟ್ ಕೊಹ್ಲಿ ವಿದೇಶಿ ನೆಲದಲ್ಲಿನ ತಮ್ಮ ಶತಕದ ಬರ ನೀಗಿಸಿಕೊಳ್ಳಲಿದ್ದಾರಾ?
ಡೊಮಿನಿಕಾದ ವಿಂಡ್ಸರ್ ಪಾರ್ಕ್ ಮೈದಾನದಲ್ಲಿ ನಡೆದ ವೆಸ್ಟ್ ಇಂಡೀಸ್ ವಿರುದ್ಧದ ಮೊದಲ ಪಂದ್ಯದಲ್ಲಿ ಟೀಮ್ ಇಂಡಿಯಾ ಇನಿಂಗ್ಸ್ ಹಾಗೂ 141 ರನ್ಗಳ ಅಮೋಘ ಗೆಲುವು ಸಾಧಿಸಿದೆ. ಈ ಜಯದೊಂದಿಗೆ 2 ಪಂದ್ಯಗಳ ಸರಣಿಯಲ್ಲಿ ಭಾರತ ತಂಡವು 1-0 ಅಂತರದಿಂದ ಮುನ್ನಡೆ ಸಾಧಿಸಿದೆ. ಈ ಪಂದ್ಯದಲ್ಲಿ ಟೀಮ್ ಇಂಡಿಯಾ ಪರ ಇಬ್ಬರು ಆರಂಭಿಕರು ಶತಕ ಬಾರಿಸಿದ್ದು ವಿಶೇಷ.
ಚೊಚ್ಚಲ ಪಂದ್ಯವಾಡಿದ ಯಶಸ್ವಿ ಜೈಸ್ವಾಲ್ 171 ರನ್ ಬಾರಿಸಿದರೆ, ರೋಹಿತ್ ಶರ್ಮಾ 103 ರನ್ಗಳಿಸಿದರು. ಇನ್ನು ಟೀಮ್ ಇಂಡಿಯಾ ಪರ ಮೂರನೇ ಅತೀ ದೊಡ್ಡ ಸ್ಕೋರ್ಗಳಿಸಿದ್ದು ವಿರಾಟ್ ಕೊಹ್ಲಿ.
182 ಎಸೆತಗಳನ್ನು ಎದುರಿಸಿದ್ದ ವಿರಾಟ್ ಕೊಹ್ಲಿ 5 ಫೋರ್ನೊಂದಿಗೆ 76 ರನ್ ಬಾರಿಸಿದ್ದರು. ಇತ್ತ ಕೊಹ್ಲಿಯು 75 ರನ್ ದಾಟುತ್ತಿದ್ದಂತೆ ಅಭಿಮಾನಿಗಳು ಶತಕದ ನಿರೀಕ್ಷೆಯಲ್ಲಿದ್ದರು. ಆದರೆ ರಹಕೀಮ್ ಕಾರ್ನ್ವಾಲ್ ಎಸೆತದಲ್ಲಿ ಅಥನಾಝ್ಗೆ ಕ್ಯಾಚ್ ನೀಡುವ ಮೂಲಕ ವಿರಾಟ್ ಕೊಹ್ಲಿ ವಿಕೆಟ್ ಒಪ್ಪಿಸಿದ್ದರು.
ಇದರೊಂದಿಗೆ ಕೇವಲ 24 ರನ್ಗಳಿಂದ ವಿರಾಟ್ ಕೊಹ್ಲಿ ಶತಕ ವಂಚಿತರಾದರು. ಅದರಲ್ಲೂ ವಿರಾಟ್ ಕೊಹ್ಲಿಯ ಬ್ಯಾಟ್ನಿಂದ ವಿದೇಶದಲ್ಲಿ ಟೆಸ್ಟ್ ಶತಕ ಮೂಡಿಬಂದು 5 ವರ್ಷಗಳಾಗುತ್ತಾ ಬರುತ್ತಿದೆ.
ಅಂದರೆ ಕೊನೆಯ ಬಾರಿ ಕಿಂಗ್ ಕೊಹ್ಲಿ ವಿದೇಶದಲ್ಲಿ ಟೆಸ್ಟ್ ಶತಕ ಬಾರಿಸಿದ್ದು 2018 ರಲ್ಲಿ. ಆಸ್ಟ್ರೇಲಿಯಾ ವಿರುದ್ಧದ ಆ ಪಂದ್ಯದಲ್ಲಿ 257 ಎಸೆತಗಳನ್ನು ಎದುರಿಸಿದ್ದ ಕೊಹ್ಲಿ 123 ರನ್ ಬಾರಿಸಿ ಅಬ್ಬರಿಸಿದ್ದರು.
ಇದಾದ ಬಳಿಕ ವಿದೇಶದಲ್ಲಿ ವಿರಾಟ್ ಕೊಹ್ಲಿಯ ಬ್ಯಾಟ್ನಿಂದ ಟೆಸ್ಟ್ ಶತಕ ಮೂಡಿಬಂದಿಲ್ಲ. ಅಂದರೆ ಭಾರತದ ಹೊರಗೆ ಕಿಂಗ್ ಕೊಹ್ಲಿ ಟೆಸ್ಟ್ ಸೆಂಚುರಿ ಸಿಡಿಸಿ ಬರೋಬ್ಬರಿ 1673 ದಿನಗಳು ಕಳೆದಿವೆ. ಇದೀಗ ವಿರಾಟ್ ಕೊಹ್ಲಿಯ ಮುಂದಿರುವುದು ವೆಸ್ಟ್ ಇಂಡೀಸ್ ವಿರುದ್ಧದ 2ನೇ ಟೆಸ್ಟ್ ಪಂದ್ಯ.
ಜುಲೈ 20 ರಿಂದ ಶುರುವಾಗಲಿರುವ ವೆಸ್ಟ್ ಇಂಡೀಸ್ ವಿರುದ್ಧದ 2ನೇ ಟೆಸ್ಟ್ ಪಂದ್ಯದಲ್ಲಿ ಸೆಂಚುರಿ ಸಿಡಿಸುವ ಮೂಲಕ ವಿರಾಟ್ ಕೊಹ್ಲಿ ವಿದೇಶಿ ನೆಲದಲ್ಲಿನ ತಮ್ಮ ಶತಕದ ಬರ ನೀಗಿಸಿಕೊಳ್ಳಲಿದ್ದಾರಾ ಕಾದು ನೋಡಬೇಕಿದೆ.