ವಿದೇಶಿ ತಂಡದ ನಾಯಕತ್ವನ್ನು ತ್ಯಜಿಸಿ ಭಾರತದಲ್ಲಿ ಕಣಕ್ಕಿಳಿಯಲಿರುವ ಸ್ಟಾರ್ ಆಟಗಾರ
Anshuman Rath: ಆರಂಭಿಕ ಬ್ಯಾಟ್ಸ್ಮನ್, ವಿಕೆಟ್ ಕೀಪರ್ ಹಾಗೂ ಬೌಲರ್ ಜವಾಬ್ದಾರಿಯನ್ನು ಅಂಶುಮಾನ್ ನಿರ್ವಹಿಸಿದ್ದರು. ಅದರಂತೆ ರಾತ್ ಹೆಸರಿನಲ್ಲಿ ಒಟ್ಟು 19 ಅಂತಾರಾಷ್ಟ್ರೀಯ ವಿಕೆಟ್ಗಳಿವೆ.
ಅದು 2018, ದುಬೈ ಇಂಟರ್ನ್ಯಾಷನಲ್ ಸ್ಡೇಡಿಯಂನಲ್ಲಿ ನಡೆದ ಏಷ್ಯಾಕಪ್ನಲ್ಲಿ ಭಾರತ-ಹಾಂಕಾಂಗ್ ತಂಡಗಳು ಮುಖಾಮುಖಿಯಾಗಿದ್ದವು. ಕ್ರಿಕೆಟ್ ಶಿಶು ಹಾಂಕಾಂಗ್ ತಂಡವನ್ನು ಭಾರತ ತಂಡ ಸುಲಭವಾಗಿ ಬಗ್ಗು ಬಡಿಯಲಿದೆ ಎಂದು ಎಲ್ಲರೂ ನಿರೀಕ್ಷಿಸಿದ್ದರು. ಆದರೆ ಆ ನಿರೀಕ್ಷೆ ಹುಸಿಯಾಗಿತ್ತು. ಭಾರತ ನೀಡಿದ 286 ರನ್ಗಳ ಗುರಿ ಬೆನ್ನತ್ತಿದ ಹಾಂಕಾಂಗ್ ತಂಡವು ಭರ್ಜರಿ ಪೈಪೋಟಿ ನೀಡಿತು. ರೋಚಕ ಹೋರಾಟದಲ್ಲಿ ಹಾಂಕಾಂಗ್ ತಂಡ 8 ವಿಕೆಟ್ ನಷ್ಟಕ್ಕೆ 259 ರನ್ಗಳಿಸಿ 26 ರನ್ಗಳಿಂದ ವಿರೋಚಿತವಾಗಿ ಸೋಲೊಪ್ಪಿಕೊಂಡಿತು.
ಅಂದು ಟೀಮ್ ಇಂಡಿಯಾಗೆ ಸೋಲಿನ ಭಯ ಹುಟ್ಟಿಸಿದ್ದು ಹಾಂಕಾಂಗ್ ತಂಡದ ನಾಯಕ ಅಂಶುಮಾನ್ ರಾತ್. ಆ ಪಂದ್ಯದಲ್ಲಿ 73 ರನ್ ಸಿಡಿಸಿ ಟೀಮ್ ಇಂಡಿಯಾ ಬೌಲರುಗಳನ್ನು ಬೆಂಡೆತ್ತಿದ್ದರು. ಮೂಲತಃ ಭಾರತೀಯರಾಗಿರುವ ರಾತ್ ಅಂತಾರಾಷ್ಟ್ರೀಯ ಕ್ರಿಕೆಟ್ ಕೆರಿಯರ್ ಆರಂಭಿಸಿದ್ದು ಹಾಂಕಾಂಗ್ ಪರ ಎಂಬುದು ವಿಶೇಷ.
ಅದರಂತೆ ಅಂಶುಮಾನ್ ರಾತ್ ಹಾಂಕಾಂಗ್ ಪರ 18 ಏಕದಿನ ಮತ್ತು 20 ಟಿ20 ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದಾರೆ. ಈ ವೇಳೆ ಒನ್ಡೇ ಕ್ರಿಕೆಟ್ನಲ್ಲಿ 7 ಅರ್ಧಶತಕ ಹಾಗೂ ಒಂದು ಶತಕದೊಂದಿಗೆ 827 ರನ್ ಬಾರಿಸಿದ್ದಾರೆ. ಹಾಗೆಯೇ ಟಿ20ಯಲ್ಲಿ 321 ಕಲೆಹಾಕಿದ್ದಾರೆ. ಇದಲ್ಲದೆ 20ನೇ ವಯಸ್ಸಿನಲ್ಲೇ ಯುವ ಬ್ಯಾಟ್ಸ್ಮನ್ ಹಾಂಕಾಂಗ್ ತಂಡದ ಸಾರಥ್ಯವನ್ನು ವಹಿಸಿಕೊಂಡಿದ್ದರು ಎಂಬುದು ವಿಶೇಷ. ಆದರೀಗ ಹಾಂಕಾಂಗ್ ಕ್ರಿಕೆಟ್ಗೆ ಗುಡ್ ಬೈ ಹೇಳಿದ್ದಾರೆ.
ಬದಲಾಗಿ ಭಾರತದಲ್ಲಿ ಹೊಸ ಇನಿಂಗ್ಸ್ ಶುರು ಮಾಡಲು ಬಯಸಿದ್ದಾರೆ. ಅದರಂತೆ ಮುಂದಿನ ದಿನಗಳಲ್ಲಿ ಒಡಿಶಾ ತಂಡವನ್ನು ಪ್ರತಿನಿಧಿಸುವುದಾಗಿ ಹೇಳಿಕೊಂಡಿದ್ದಾರೆ. ಈ ಮೂಲಕ ಟೀಮ್ ಇಂಡಿಯಾ ಪರ ಆಡುವ ಇಂಗಿತ ವ್ಯಕ್ತಪಡಿಸಿದ್ದಾರೆ ಅಂಶುಮಾನ್ ರಾತ್. ವಿಕೆಟ್ ಕೀಪರ್ ಬ್ಯಾಟ್ಸ್ಮನ್ ಎನಿಸಿಕೊಂಡಿರುವ ಅಂಶುಮಾನ್ ಬೌಲಿಂಗ್ ಮಾಡುವಲ್ಲಿ ಕೂಡ ಸಮರ್ಥರು ಎಂಬುದು ಇನ್ನೊಂದು ವಿಶೇಷ.
ಏಕೆಂದರೆ ಹಾಂಕಾಂಗ್ ಪರ ಆರಂಭಿಕ ಬ್ಯಾಟ್ಸ್ಮನ್, ವಿಕೆಟ್ ಕೀಪರ್ ಹಾಗೂ ಬೌಲರ್ ಜವಾಬ್ದಾರಿಯನ್ನು ಅಂಶುಮಾನ್ ನಿರ್ವಹಿಸಿದ್ದರು. ಅದರಂತೆ ರಾತ್ ಹೆಸರಿನಲ್ಲಿ ಒಟ್ಟು 19 ಅಂತಾರಾಷ್ಟ್ರೀಯ ವಿಕೆಟ್ಗಳಿವೆ. ಹೀಗಾಗಿ ಮುಂದಿನ ದಿನಗಳಲ್ಲಿ ಒಡಿಶಾ ಪರ ಆಲ್ರೌಂಡರ್ ಆಗಿ 23 ರ ಹರೆಯದ ಅಂಶುಮಾನ್ ಕಾಣಿಸಿಕೊಂಡರೂ ಅಚ್ಚರಿಪಡಬೇಕಿಲ್ಲ.
ಇನ್ನು ಅಂಶುಮಾನ್ ಕೊನೆಯ ಬಾರಿ ಹಾಂಕಾಂಗ್ ತಂಡವನ್ನು ಪ್ರತಿನಿಧಿಸಿದ್ದು 2018 ರಲ್ಲಿ. ಇದೀಗ ಮೂರು ವರ್ಷಗಳು ಕಳೆದಿವೆ. ಹೀಗಾಗಿ ಹೊಸ ದೇಶದ ತಂಡದ ಭಾಗವಾಗಲು NOC ಮತ್ತು ಇತರ ಅಗತ್ಯ ವಿಷಯಗಳನ್ನು ಪೂರ್ಣಗೊಳಿಸಿದ್ದಾರೆ.
ಪ್ರಸ್ತುತ ಒಡಿಶಾ ತಂಡದ ಕೋಚ್ ದೇಶೀಯ ಅಂಗಳದ ಸಚಿನ್ ಖ್ಯಾತಿಯ ವಾಸಿಂ ಜಾಫರ್ ಎಂಬುದು ವಿಶೇಷ. ಇದೀಗ 23ರ ಹರೆಯದ ಸ್ಟಾರ್ ಆಟಗಾರನೇ ಒಡಿಶಾ ತಂಡಕ್ಕೆ ಎಂಟ್ರಿ ಕೊಡುತ್ತಿರುವುದು ತಂಡ ಬಲ ಹೆಚ್ಚಿಸಿದೆ ಎಂದು ಹೇಳಬಹುದು.
Published On - 3:03 pm, Mon, 30 August 21